تبلیغات
ایران آذربایجانی تورکجه سینین ادبیات اوتاغی - مطالب ابر ملا نصرالدین
ایران آذربایجانی تورکجه سینین ادبیات اوتاغی
یاشاسین آذربایجان

قونو سلاخلانجی

سلاخلانج

باغلانتیلار

اؤزل یارپاقلار‌

← وبلاق گؤروشلری

  • گؤروشلرین هامیسی :
  • بو گون گؤروشلر :
  • دوننکی گؤروشلر :
  • بو آی گؤروشلر :
  • قاباق آی گؤرو‌شلر :
  • یازارلارین سایی :
  • یازیلارین هامیسی‌نین سایی :
  • سون گؤروش :
  • سون دیَیشمه :

لینکلر‌

من گئدیم دئییم

من گئدیم دئییم 
گونلرین بیرینده ملّانین آروادی باشقا آروادلارلا برابر گؤلده 
پالتار یویورموش. بو طرفدن شهرین حاکمی ده اؤز یاخین آداملاری ایله 
بورادان کئچیرمیش گؤلده باشی-گؤزو آچیق آروادلاری گؤروب دایانیر، باشلاییر 
بونلارا باخماغا.ملّانین آروادی ایشی بئله گؤرنده آغزینی آچیب گؤزونو 
یومور؛ دیشی‌نین دیبیندن چیخانی بونلارا دئییر. حاکم گؤرور کی، 
یوخ اگر بیر آز دا دایانسا، لاپ بی‌آبیرچیلیق اولاجاق. آروادین نام-نشانینی 
بیلیب چیخیب گئدیر. 
اورادان-بورادان اؤیره‌نیر کی، آرواد ملّانین آروادیدیر. صاباحیسی 
ملّانی یانینا چاغیریب سوروشور: 
- ملّا، فلان آرواد سنین آروادیندیر؟ 
ملّا دئییر: 
- بلی، منیم آروادیمدیر، نئجه؟ 
حاکم دئییر: 
- گئت، اونو بورایا گتیر! 
ملّا سوروشور: 
- حاکم، باشینا دؤنوم، نَیینه لازیمدیر منیم آروادیم؟ 
حاکم دئییر: 
- اونا سؤزوم وار، گئت تئز گتیر! 
ملّا دئییر: 
- حاکم، قربانین اولوم! جسارت ائله‌ییرم... اولماز کی، او سؤزو سن 
منه دئیه‌سن، من گئدیم آروادیما دئییم؟

من گئدیم دئییم

من گئدیم دئییم 
گونلرین بیرینده مولّانین آروادی باشقا آروادلارلا برابر گؤلده 
پالتار یویورموش. بو طرفدن شهرین حاکمی ده اؤز یاخین آداملاری ایله 
بورادان کئچیرمیش گؤلده باشی-گؤزو آچیق آروادلاری گؤروب دایانیر، باشلاییر 
بونلارا باخماغا.مولّانین آروادی ایشی بئله گؤرنده آغزینی آچیب گؤزونو 
یومور؛ دیشی‌نین دیبیندن چیخانی بونلارا دئییر. حاکم گؤرور کی، 
یوخ اگر بیر آز دا دایانسا، لاپ بی‌آبیرچیلیق اولاجاق. آروادین نام-نیشانینی 
بیلیب چیخیب گئدیر. 
اورادان-بورادان اؤیره‌نیر کی، آرواد مولّانین آروادیدیر. صاباحیسی 
مولّانی یانینا چاغیریب سوروشور: 
- مولّا، فیلان آرواد سنین آروادیندیر؟ 
مولّا دئییر: 
- بلی، منیم آروادیمدیر، نئجه؟ 
حاکم دئییر: 
- گئت، اونو بورایا گتیر! 
مولّا سوروشور: 
- حاکم، باشینا دؤنوم، نَیینه لازیمدیر منیم آروادیم؟ 
حاکم دئییر: 
- اونا سؤزوم وار، گئت تئز گتیر! 
مولّا دئییر: 
- حاکم، قوربانین اولوم! جسارت ائله‌ییرم... اولماز کی، او سؤزو سن 
منه دئیه‌سن، من گئدیم آروادیما دئییم؟

latincə

ائششیین همجینسی

گونلرین بیرینده مولّا ائششه‌یینی مینیب شهره گئدیرمیش. یولدا 
کندخودا اونون قاباغینا چیخیر. اله سالماق مقصدیله ائششیی گؤستریب 
سوروشور: 
- یئنه ایکی مِهریبان دوست سحر تئزدن قول-بویون اولوب هارا گئدیرسینیز؟ 
مولّا تئز ائششکدن دوشوب دئییر: 
- یاخشی کی، سن بو سوالی وئردین، یوخسا هئچ بیلمیرم کی، نئجه اولاجاقدی. 
کندخودا سوروشور: 
- نه نئجه اولاجاقدی؟ 
مولّا دئییر: 
- بیز اؤزوموز اؤز آرزوموزلا گئتمیریک. سحر تئزدن آرواد بیزیم 
ایکیمیزی ده اویاتدی کی، دورون آیاغا، گئتمه‌لی یئر وار. منیم ده یادیمدان 
چیخدی، هئچ آرواددان سوروشمادیم کی، هارا گئده‌جییک. ایندی یاخشیدی 
کی، سن سوروشدون، یادیما دوشدو. 
کندخودا گولوب دئییر: 
- یاخشی ایش یاریدان کیشیسن. 
مولّا ائششه‌یین قولاغینی کندخودانین الینه وئریب دئییر: 
- سیز بیر بالاجا بوردا صؤحبت ائله‌یین، من آرواددان سوروشوم گلیم. 
سونرا ائششیی گؤستریب دئییر: 
- یازیق ائله چوخدان آرزو ائله‌ییردی کی، بیر سنین کیمی همجینسی ایله گؤروشوب 
دردلشسین.

قورتاران دئییلدی

قورتاران دئییلدی 
گونلرین بیریسینده مولّا حاماما گئدیر. کئیفی کؤک، حامام ایستی، 
خزنه‌نین ایچینده یاواش-یاواش زومزومه ائله‌مه‌یه باشلاییر. اوخودوقجا 
سس دوشور خزنه‌یه، مولّانین اؤزونه ده لذّت وئریر. آخیردا مولّا اؤزؤزونه 
دئییر: 
- بالام، منیم ائله عاغیللی-باشلی سسیم وار ایمیش کی... 
حامامدان چیخیب بیرباش گئدیر شهر حاکمی‌نین یانینا کی: 
- گلمیشم کی، سنین اوچون اوخویام. 
حاکم دئییر: 
- بویور اوخو، گؤرک نئجه اوخویورسان... 
مولّا دئییر: 
- آنجاق من ائله-بئله اوخویا بیلمه‌رم. منیم اوخوماغیم اوچون 
گرک بورادا یارییا قدر ایچی سو ایله دولو بیر حامام خزنه‌سی اولا. 
حاکم دئییر: 
- بالام، بیز حامام خزنه‌سینی نئجه گتیرک بورا؟.. 
چوخ گؤتور-قویدان سونرا آخیردا یارییا قدر سو ایله دولو بیر کوپ 
گتیریرلر. مولّا باشینی کوپون ایچینه سالیب باشلاییر اوخوماغا. حاکم 
مولّانین سسینی ائشیتجک قولاقلارینی توتوب نؤکرلره امر ائدیر کی: 
- کوپون سویو قورتارانا قدر الینیزی ایسلادیب مولّانی وورون! 
نؤکرلر باشلاییرلار مولّانی دؤیمه‌یه. هر شیلله‌دن سونرا مولّا 
اللرینی گؤیه قالدیریب اللها شوکور ائله‌ییر. آخیردا حاکم سوروشور: 
- مولّا، بو نه شوکوردور ائله‌ییرسن؟ 
مولّا دئییر: 
- شوکور ائله‌ییرم کی، نه یاخشی خزنه‌نی بورایا گتیرمک مومکون 
اولمادی، یوخسا اونون سویو هئچ قورتاران دئییلدی.

داش داش اوسته قالمازدی

داش داش اوسته قالمازدی

دئییرلر کی، موللانین آنادان اولدوغو کند چوخ گؤزل ایمیش. چوخ گؤزل

هاواسی، جوربه‌جور سولاری، قشنگ باغلاری، باغچالاری وار ایمیش.

ایستی یای گونلری‌نین بیرینده موللا ائشیدیر کی، شهرین حاکمی واخت کئچیرمک

اوچون هامان کنده گزمه‌یه گئدیب. قالیر کندین قئیدینه کی،

گؤره‌سن حاکمین بو واخت کئچیرمیی کنده نَیه باشا گله‌جک؟

بیر هفته کئچیر. موللا ائشیدیر کی، حاکم قاییدیب گلیب. دوروب حاکمین

یانینا گئدیر. باخیر کی، حاکمین کئیفی چوخ سازدی.

سلام-کلامدان سونرا موللا حاکمدن سوروشور:

- یاخشی، حاکم آغا نئجه کئچدی؟ راضی قالدینمی؟

حاکم دئییر:

- بیلیرسن نئجه یاخشی کئچدی... هئچ بیلمه‌دیم کی، بیر هفته نئجه گلدی،

نئجه کئچدی؟ بیر ده باخدیم کی، قورتاریب. باخ، بیرینجی گون کندده بؤیوک

بیر یانغین اولدو، کندین تامام یاریسی یاندی. جاماعت ائله قیشقیریب

قاچیردی کی، آدامین گولمکدن قارنی جیریلیردی. حتی بیر نئچه آدام دا

یاندی.ایکینجی گون بیر قودورموش ایت اون-اون بئش نفره‌جن آدام قاپدی.

اؤزون فیکیرلش گؤر نه قیامت اولار دا... لذّت وئردی. صاباحیسی بیر سئل

گلدی، بیر سئل گلدی، داها نه دئییم... تزه بیچیلمیش بوغدالار سویون

ایچینده اوزوردو، اونلارین دالینجا آداملار اؤزلری ده اوزوردولر. چوخلو

آدام دا آپاردی. دؤردونجو گون بیر کندلی دلی اولدو، بئش-آلتی آدام اؤلدوردو.

بئشینجی گون بیر دام اوچدو، بوتون کولفت قالدی آلتیندا. اؤلن، قولو

سینان، باشی ازیلن. آلتینجی گون بیر آرواد اؤزونو بوغوب اؤلدوردو... آخیر کی،

دئمینن باشا گلن دئییل. باشقا جور کئیف چکدیک. من عومرومده بئله

کئیف گؤرمه‌میشدیم.

موللا حاکمین سؤزلرینه قولاق آسیب دئییر:

- یاخشی کی، بیر هفته‌یه گلیبسن. بیر آز دا قالسایدین کندده داش

داش اوستده قالمازدی.

ساققال ایختییاری

ساققال ایختییاری

دئییرلر کی، هره‌نین بیر عادتی اولار. موللانین دا عادتی بو ایمیش کی، چوخ

تئز-تئز ساققالینی تومارلارمیش. تئیمور لنگ اینجیتمک مقصدی ایله بیر

گون اونا دئییر:

- ساققال تومارلاماغی سنه قاداغان ائله‌ییرم. بیر ده تومارلاسان

ساققالینی قیرخدیراجاغام، الینی ده کسدیره‌جه‌یم.

موللا تئیمورا یاخشی بلد ایمیش. بیلیرمیش کی، چوخ دا اونون ایپینین

اوستونه اودون ییغماق اولماز. اودور کی، یازیق ساققالینی تومارلاماغی ترگیدیر.

بو احوالاتدان بیر مدت کئچیر. گونلرین بیرینده تئیمور موللادان

سوروشور:

- موللا، من نه ائله‌ییم کی، اهالی منیم عدالتیمه اینانسین؟

موللا دئییر:

- هر شئیدن قاباق، قیبله‌ی-عالم، هر کیشی‌نین ساققالی‌نین ایختییارینی

اؤزونه قایتار!

Latıncə

یالان اولاجاق

یالان اولاجاق

موللا بیر گون یولدا ائششه‌یینی ایتیریر، نه قدر آختاریرسا، تاپا بیلمیر.

آخیردا ال چکیب پییادا ائوه قاییدیر. بیر آز گلندن سونرا قونشوسو چیخیر

قاباغینا. موللا قونشوسونو گؤرجک سوروشور:

- قونشو، کندده تزه نه وار، نه یوخ؟

قونشو دئییر:

- ائله تزه بیر شئی یوخدور. نئجه؟

موللا سوروشور:

- بس کندده دانیشمیردیلار کی، موللانین ائششیی ایتیب؟

قونشو دئییر:

- یوخ، ائشیتمه‌میشم.

موللا تئز شوکور ائله‌ییر کی:

- اللها شوکور. دئیه‌سن ائششه‌یین ایتمیی یالان اولاجاق. اگر دوغرودان

ایتسیدی، جاماعت دانیشاردی.

Latıncə

موللا و جاوان

موللا و جاوان

قیش آخشاملاریندان بیرینده موللا محله‌دکی چایچی دوکانینا گئدیر.

فیکیر وئریب گؤرور کی، دوکانین کونجونده بیر جاوان اوغلان اوتوروب، اما

ائله‌دی، ائله‌دی کی، ائله بیل قم دریاسینا باتیب. موللا ماراقلانیب جاوانا

یاخینلاشیر، بیر آز اوردان-بوردان صؤحبت ائله‌یندن سونرا سوروشور:

- قارداش، دئ گؤروم، سنه نه درد اوز وئریب کی، بئله قم دریاسینا

باتمیسان؟

جاوان بیر آه چکیب باشلاییر کی:

- موللا عمی، سندن آییب اولسا دا، من فیلان تاجیرین قیزینا عاشق اولموشام.

قیز دا منی سئویر. ایکیمیز ده بیر-بیریمیزه سؤز وئریب عهدپئیمان

باغلامیشیق. او، دؤولتلی تاجیر قیزیدی، اما من، نئجه کی گؤرورسن،

یوخسول بیر اوغلانام. چوخ گؤتور-قوی ائله‌یندن سونرا آخیری دونن

گئتدیم تاجیرین یانینا کی، بس، قیزینی وئر منه. تاجیر بیر آلتدان یوخاری

منه باخیب دئدی:

- قیزیمی نه قدر سئودیگینی گرک ثبوت ائلییه‌سن. او دا بئله اولار

کی، گرک چایدا بوزو سیندیریب گیره‌سن سویوق سویون ایچینه. تا سحره قدر

اورادا قالاسان. ایر بونو ائله‌سن اوندا قیزی سنه وئره‌رم.

من محبتین گوجوندن "باش اوسته" دئییب اورادان چیخدیم. گؤزله‌دیم

قارانلیق دوشدو.گلدیم چایین کنارینا. بوزو سیندیریب بوغازاجان

گیردیم سویوق سویون ایچینه. قار یاغیردی، کولک ویییلداییردی، بیر سویوق

وار ایدی کی، دای نه دئییم. دوز صوبحه قدر قالدیم سویون ایچینده. ائله کی،

سحر آچیلدی، سودان چیخدیم، اوز قویدوم تاجیرین ائوینه. ایچرییه گیریب دئدیم:

"تاجیر، ال-عهدو مینل-وفا. من شرطی یئرینه یئتیردیم، سن ده

ودینه عمل ائیله". تاجیر یئنه ده بیر آلتدان یوخاری منه باخیب دئدی:

- یالان دئییرسن. ثبوت ائله کی، سن دوغرودان دا سحره قدر سودا

قالیبسان.

من آند-آمان ائله‌ییب دئدیم:

- واللاه، بالله، قالمیشام. حتی او اوزاق کندلرین بیرینده بیر پنجره‌ده

بیر شام دا یانیردی.

تاجیر گولوب دئدی:

- دئمک، شرطیمیز پوزولوب. سن گؤزونله ایشیغا باخیب قیزینیبسان.

من نه قدر ائله‌دیم کی، "آی جانیم، ایکی آغاجلیقدان دا شام ایشیغینا

باخماقلا آدام قیزینا بیلرمی؟" - کار ائله‌مه‌دی کی، ائله‌مه‌دی. من ایشی

حاکمه وئردیم. بیلمیرم حاکمله گئدیب نه چوغوللاشدی، نه چوغوللاشمادی،

حاکم ده اونون دئدیکلرینی تسدیق ائیله‌ییب منی چیخاردیب قوودو.

ایندی ایشیم اولوب بئله آهو-زار.

موللا اولدن آخیرا کیمی دقتله قولاق آسیب جاوانا دئییر:

- صاباح آخشام منه قوناقسان. گلمه‌میش اولما!

موللا دوروب اورادان بیر باش تئیمور لنگین حضورونا گئدیر. باش

اییب دئییر:

- قیبله‌ی-عالم، صاباح آخشام منه قوناقسینیز.

اورادان گئدیب همن حاکمی، همن تاجیری ده چاغیریر. بلی، صاباح

اولور. تئیمور، حاکم، تاجیر و باشقا دعوت اولونموشلار گلیرلر. موللا

بونلاری یاخشیجا قبول ائله‌ییر، ایلشدیریر، اؤزو هارایا ایسه چیخیب گئدیر.

تئیمور اطرافا گؤز گزدیریب گؤرور کی، نه اوجاق یانیر، نه قازان قایناییر.

قالیر معطل کی، بو نئجه قوناقلیقدیر... غرض، بیر-ایکی ساعت گؤزله‌ییرلر،

موللا گلمیر. آخیردا تئیمور آروادی چاغیریب سوروشور:

- آی باجی، بس موللا هارا گئتدی؟

آرواد دئییر:

- باغچانین دیبینده سیزین اوچون پلوو بیشیریر. تئیمور قوناقلاری دا

گؤتوروب گئدیر باغچانین دیبینه. باخیر کی، موللا اؤجا بیر آغاجین باشیندان

بیر پوتلوق قازان آسیب، آغاجین دیبینده ده بیر شام یاندیریب، اوتوروب گؤزله‌ییر.

تئیمور سوروشور:

- موللا بو نه دیر؟ بورادا نه قاییریرسان؟

موللا چوخ ساکیت دئییر:

- قیبله‌ی-عالم ساغ اولسون! سو آسمیشام، گؤزله‌ییرم قایناسین، سیزین

اوچون پلوو بیشیریم.

تئیمور حیرصله‌نیب دئییر:

- آده، سن اؤزونو دولامیسان، یا بیزی؟ بورادان دا اورایا ایستی دیَیب

سو قیزار؟

موللا اوندان ده برک حیرصله‌نیب دئییر:

- بس ایکی آغاجلیقدا یانان شاما باخماقلا دا بدن قیزار کی، سن او

حؤکمو چیخاریبسان؟

تئیمور سوروشور: "بو نه مسئله‌دیر؟". موللا احوالاتی اونا دانیشیر،

قیزی آلیب اوغلانا وئریر.

Latıncə

گوجوم چاتمایاجاق

گوجوم چاتمایاجاق

تئیمور لنگین خاصیتلریندن بیریسی ده بو ایدی کی، یوخودا هر

کیم اونا پیس سؤز دئسه ایدی، یاخود پیس صورت گؤسترسه ایدی، یوخودان اویاناندا

اونو آسدیراردی. موللا نصر‌الدین اونون بو خاصیتینی بیلن کیمی شلشوله‌سینی

ییغیشدیریب بیرباش قاچیر کندلرینه. کندلیلر اونون باشینا

ییغیشیب سوروشورلار:

- موللا نییه قاچیب گلدین؟ نه قدر کی، سارایدا ایدین، یئنه جاماعتا

خئیرین دَ‌ییردی. وئرگیدن-مئرگیدن آز-ماز باغیشلاتدیرا بیلیردین.

موللا دئییر:

- آییقلیقدا، دوغرودور، تأثیر ائلییه بیلردیم. آنجاق گؤردوم بو ظالم

اوغلو ظالمین یوخوسونا گیرمه‌یه، اؤزو ده خوشونا گلمه‌یه منیم

گوجوم چاتمایاجاق. اونا گؤره ده باشیمی گؤتوروب قاچدیم.

Latıncə

کاسیب چوخدور

کاسیب چوخدور

تئیمور لنگ بیر گون صؤحبت اسناسیندا موللادان سوروشور:

- موللا، جنّت بؤیوکدور، یا جهنم؟

موللا دئییر:

- جنّت بؤیوک اولار.

تئیمور سوروشور:

- ندن بیلیرسن کی، جنّت بؤیوک اولار؟

موللا دئییر:

- چونکی کاسیب دؤولتلیدن چوخدور. اگر جنّت حاقیندا دئییلنلر

دوغرو چیخسا، بو دؤولتلیلر کی، بو دونیادا بئله ایشلر گؤرورلر، من

هئچ اینانمیرام کی، اورا بیرجه نفر ده اولسون دؤولتلی گئده بیله.

Latıncə

آیاقلاشا بیلمیردی

آیاقلاشا بیلمیردی

تئیمور لنگ بیر گون موللانی جیدیردا ایشتیراک ائتمک اوچون دعوت

ائدیر. موللا اؤکوزونو چوللاییر، آغزینا دا بیر یوین ووروب میدانا گلیر.

تئیمور لنگ موللانی بئله گؤروب دئییر:

- آی موللا، اؤکوز ده آت ایله آیاقلاشا بیلر؟ بونو نییه مینیبسن؟

موللا دئییر:

- واللاه، چوخداندیر کی، مینمه‌میشم، اما چر دیَمیش بوزوو

واختیندا ائله یامان قاچاغان ایدی کی، آت ندی، هئچ قوش دا اونونلا آیاقلاشا

بیلمیردی.

Latıncə

قییمت مسئله‌سی

قییمت مسئله‌سی

تئیمور لنگ بیر گون موللا نصر‌الدینی اؤزو ایله برابر حاماما

آپاریر. تئیمورون بئلینده چوخ قییمتلی بیر فیته وار ایمیش. یویوندوقلاری

واخت اورادان-بورادان صؤحبت ائله‌ییرلر، آخیردا تئیمور موللادان سوروشور:

- موللا، من نئجه آدامام؟ قییمتلی آدامام، یوخ؟

موللا بیر آز فیکیرلشیب جاواب وئریر:

- نییه، بیر اون تومنه دیَرسن.

تئیمور دئییر:

- آی ائوین تیکیلسین، اون تومن ائله منیم بئلیمده‌کی فیته‌نین قییمتیدیر.

موللا دئییر:

- ائله من ده فیته‌یه قییمت وئریرم ده...

Latıncə

عدالتیندن دانیشسینلار

عدالتیندن دانیشسینلار

تئیمور لنگ بیر گون موللا نصر‌الدینی قورخوتماق و اوتاندیرماق

مقصدیله سارای آداملاری‌نین ایچینده بیردن-بیره اوزونو اونا توتوب

حیرصلی-حیرصلی دئییر:

- آلدیغیم معلوماتا گؤره، دونن بیر مجلیسده جاماعت منی تعریفله‌ییرمیش،

منیم عدالتلی بیر پادشاه اولدوغوم باره‌ده دانیشیرمیشلار.

سن ده اورادا ایمیشسن. منیم یاخشیلیغیم باره‌ده هئچ بیر سؤز دئمه‌ییبسن.

موللا هئچ حالینی پوزمادان جاواب وئریر:

- خئییر، قیبله‌ی-عالم ساغ اولسون! یالان سؤزدور. من نینکی دونن،

حتی بوتون عومرومده هئچ ائله بیر مجلیسده اولمامیشام کی، اورادا سنین

عدالتیندن دانیشسینلار.

Latıncə

“نوشجان” دئمکدیر

“نوشجان” دئمکدیر

تئیمور لنگ شهره گلیب بیر قوناقلیق وئریر. قوناقلیقدا حؤکومت

آداملاری و شهرین دؤولتلیلری ایشتیراک ائدیرلر. موللا دا بو قوناقلیقدا

اولور. تئیمورون قورخوسوندان هئچ کس آغزینی آچیب دانیشا بیلمیر. اورتالیغا

شربت گتیریرلر. اولجه تئیمور شربتی آلیب ایچیر. دؤولتلیلردن

بیری یالتاقلاناراق "نوشجان!" دئمک ایسته‌ییر. لاکین اؤزونو ایتیره‌رک چاشیب

"مرهبا!" دئییر. تئیمور یئرسیز دئییلن بو “مرهبا”دان غضبله‌نیب

اوزونو اونا طرف دؤندریر. کیشی اؤزونو لاپ ایتیریر. ایشی بئله گؤرن موللا تئز

دئییر:

- غضبلنمه، قیبله‌ی-عالم! بیزیم شهرده "مرهبا" "نوشجان"

دئمکدیر.

Latıncə

یا ائششک اؤلر، یا تئیمور

یا ائششک اؤلر، یا تئیمور

بیر گون تئیمور لنگه بیر ائششک باغیشلاییرلار. موللانین دا پولو

قورتارمیش ایمیش. تئیمور اوزونو موللایا توتوب دئییر:

- هه موللا، دانیشمیرسان؟.. یوخسا بو ائششکده ایستئداد یوخدور؟

موللا ایشیق یئری گؤروب تئز جاواب وئریر:

- نییه یوخدور، قیبله‌ی-عالم ساغ اولسون؟! بو اوندان دا زکالی حئیواندیر.

اگر بونو منه وئرسه‌نیز من اونا لاپ آدام کیمی دانیشماق

اؤیره‌درم.

تئمور چوخ ماراقلانیب دئییر:

- یاخشی، وئریرم. شرطینی دئ!

موللا دئییر:

شرطیم بیر آز آغیردی. بو دفعه‌ ایش زحمتلیدیر. گرک منه بئش ایل

مؤهلت وئره‌سن. هر گونده بیر قیزیل وئره‌سن.

تئیمور راضیلاشیر. موللا حسابلاییب گونه بیر قیزیلدان بئشیللیک معاشینی

تئیموردان آلیر، ائششه‌یین ده نوختاسیندان توتوب گتیریر ائوه. آرواد

گؤرور کی، موللا یئنه بیر ائششک گتیریب. سوروشور:

- آی کیشی، بو نه دیر؟

موللا دئییر:

- دینمه، آرواد. بو پوللاری آل خرجله، گؤرک باشیمیزا نه گلیر؟ سونرا

احوالاتی آروادا دانیشیر.

آرواد دئییر:

- آ کیشی، دلی دئییلسن کی؟ باشینا آت تپمه‌ییب؟.. ائششک ده دانیشار؟..

موللا دئییر:

- آرواد، من ائله بیلیردیم بیرجه تئیمور سارساقدیر کی، منیم سؤزومه

اینانیب. دئمه، ائله سن ده اونون تایی ایمیشسن. البته‌، ائششک دانیشماز.

آرواد حیرصله‌نیر:

- بس ایندی کی، دانیشماز، نییه بوینونا گؤتوروبسن؟

موللا دئییر:

- قریبه سوال وئریرسن؟ گؤرمورسن، بیر آنبار پول گتیرمیشم؟!

آرواد دئییر:

- یاخشی، بس بئش ایلدن سونرا کی وعده‌ تامام اولاجاق، اوندا نه جاواب

وئره‌جکسن؟

موللا بیر آز فیکیرلشیب دئییر:

- آرواد، سارساق اولما، گؤتور پوللاری ائوه شئی-مئی آل!.. الله کریمدیر.

بئش ایله کیمی یا ائششک اؤلر، یا تئیمور. ائله ایکیسی ده دونیانی توتوب

دورمایاجاق کی؟..

Latıncə

 
  • یارپاقلارین سایی :4
  • 1  
  • 2  
  • 3  
  • 4  
 

وبلاقا گؤره

بو دیل دنیزدی سیزین تک صدفده اینجیسی وار
قیزیلدی سیزده اولان اوزگه‌نین اگر میسی وار
دئسزکی اودلو دیاردی بیزه وطن یاراشار
بیزیم اوجاقلارین آنجاق کور ائیله‌ین هیسی وار
"عقیل"
وبلاق مودیری : نژادمحمد

سون یازیلار

آختارماق

یازارلار

Page Rank بالاجا خوخان آذربایجان تورکجه سینده ایسلام دینی و قرآن کریم