تبلیغات
ایران آذربایجانی تورکجه سینین ادبیات اوتاغی - مطالب ابر رسول رضا
ایران آذربایجانی تورکجه سینین ادبیات اوتاغی
یاشاسین آذربایجان

قونو سلاخلانجی

سلاخلانج

باغلانتیلار

اؤزل یارپاقلار‌

← وبلاق گؤروشلری

  • گؤروشلرین هامیسی :
  • بو گون گؤروشلر :
  • دوننکی گؤروشلر :
  • بو آی گؤروشلر :
  • قاباق آی گؤرو‌شلر :
  • یازارلارین سایی :
  • یازیلارین هامیسی‌نین سایی :
  • سون گؤروش :
  • سون دیَیشمه :

لینکلر‌

ارک قالاسی

ارک قالاسی
تبریز - گؤزل شهر! 

ووروشدولار: 
سون گولله‌یه؛ 
سون سونگویه، 
سون قونداغا قدر. 
ووروشدولار: 
هر شئی قیرمیزی گئیدی، 
داشدان، تورپاغا قدر. 
ووروشدولار: 
آلت دوداقدان
اوست دوداغا قالخا بیلمه‌ین
سسه قدر. 
ووروشدولار: 
اونلاردان یئددی دفعه‌‌ - یئتمیش قات
آرتیق اولان، 
سونگولری نارین داراق دیشی کیمی
سیخ اولان دوشمنله. 
یارالیلار اوفولدامادی. 
جان وئرنلر اینله‌مه‌دی. 
سوسوزلار یاندیم دئمه‌دی. 
اؤپدو قوروموش دوداقلاری
قان هوپموش تورپاغی. 
یارالارینا باسدیلار
قان رنگلی بایراغی. 
نه دوشمن اونلاردان
بیر آمان سؤزو آلا بیلدی، 
نه بو اؤلومو یاغی دویدو، 
نه قالا بیلدی. 
سؤیکه‌نیب قالا دیوارینا
اؤلدولر آیاق اوسته؛ 
چیگین-چیگینه. 
اولدوزلار شاهید اولدو، 
بیر سیرادا دایانمیش
اؤلولرین قاباغیندان، 
یوز یئره بؤلونموش دیریلرین
چکیلدیگینه. 
اؤلدولر آیاقلاری‌نین آلتیندا
وطن تورپاغی. 
باشلاری‌نین اوستونده
وطن اولدوزلاری. 
کؤنولدن کؤنوله کئچدی
اومیدلری، آرزولاری. 
گئجه آغیر-آغیر کئچدی
جنازه‌لرین اوستوندن؛ 
کئچدی گئتدی یولو سحره. 
گونش شفقدن بیر اؤرتوک چکدی
تورپاغی قورویوب، تورپاقدا دینجه‌لن
جنازه‌لره.

latincə

رسول رضا

رسول رضانین سئچیلمیش شعرلری موبایل دا اوخوماق اوچون

فورمت:جاوا

حاضیرلایان :اوختای نژادمحمد

ائندیر-دانلود

نیگاران سواللار

نیگاران سواللار

سون زامانلار

سنی تئز-تئز

یوخودا گؤرورم، تبریزیم!

یوخوما قملی گلیرسن

هر گئجه.

سویون، چؤرگین وارمی؟

نغمن نئجه؟

یئنه "قاراگیله"دیر،

یوخسا داها قملیدیر؟

گؤی مسجید نئجه‌دیر؟

ارک قالاسی نئجه؟

یانیق داغ قوپقورودور،

یا نملیدیر؟

تئز-تئز یوخوما گیریرسن،

تبریزیم!

یوخسا اینجیمیسن،

اوزون حسرت یوروب سنی؟

یوخسا دؤزوب-دؤزوب

ایندی یامان قریبسه‌میسن.

اینانمیرام،

هله اومیدین وار بؤیویه‌سی،

آرزون وار بوی آتاسی.

هاردان دوشدو یادیما

آنامین گؤینکلی بایاتیسی!

"من بوتؤو بیر یووایدیم،

یئل ووردو پارالاندیم.

من سندن آیریلمازدیم،

ظولومنن آرالاندیم".

تبریزین منیم

تبریزین منیم

بالاش آذروغلونا

لایلاسی محضون،

نغمه‌سی محضون.

حسرتی عومروندن اوزون.

کارواندان اوزولموش آغ دوه‌سی.

گؤزلرینده بؤیوک اومیدین اوزاق تؤهفه‌سی

نئچه ائوینین کوچه دیواری کور.

دوداقلاری قورو،

بولاقلاری گور.

آرزولاریندا قانچیر، قامچی.

کدری آخین-آخین،

سئوینجی دامجی-دامجی.

بضا گونلری قانلی یوخو کیمی،

بضا حسرتلی یوخولاری گئرچک اولموش.

نئچه دفعه‌‌ سئوینجک اولموش.

بالالاری سرگردان.

گلینلری نیگاران.

قورتولوش یوللاری:

مهبس، دار آغاجی، گولله‌باران.

دان یئری قان بویالی.

اومیدیندن، آرزوسوندان دؤنمه‌ین.

اوجاغیندا - اورگینده اودو سؤنمه‌ین.

سحری اوزون عصرلرین یولوندا یوبانان،

قارداشینا حسرت، باجیسینا حسرت،

بایاتیلاری - قدیم محبت.

قوینو گاه آیدین هاوالی،

گاه چنلی، دومانلی.

قلبی گومانلی.

طالعیی بحرانلی.

اؤزو بابابیر، ننبیر

عادت-عنعنه‌‌ بیر -

دوغما قارداشیم.

پاسپورتدا او یانلی.

آرزولایاندا الیم چاتمایان.

آغریسی، گؤینیی قلبیمده

گئجه-گوندوز یاتمایان.

داغلاری داغلاریما بنزر،

باغلاری، باغلاریما.

آنا سؤزو کیمی

عزیز اولان آدی - دوداقلاریما.

کؤهنم، تزم، اوزاغیم، یاخینیم.

ان گؤزل شئریم،

یانیقلی ماهنیم.

منسیزیم!

تبریزیم!

کور-آراز

کور-آراز

کورون سویو بولانیق سود کیمی،

آرازین سویو قیرمیزی-ساری.

آخیب-آخیب

بوردا قوووشور

دوغما، قدیم تورپاغین

آیری دوشموش بالالاری.

اولجه ائله بیل

اوزون ایللر حسرتلیسی کیمی

بیر-بیرینه باخیرلار.

بیر یاتاغا گیرسه‌لر ده،

آیری-آیری آخیرلار.

سونرا حسرتلی قوللار

بیر-بیرینه دولاشیر.

قارداشلار قوجاقلاشیر.

ایندی کیم آییرا بیلر اونلاری!

ایکی گوج بیرلشیب قودرت اولوب،

آخین اولوب.

اوزاقلیق یاخین اولوب.

آیریلیق وحدت اولوب.

ایکیسی بیرلشیب عظمتله آخیر

آلا گؤزلو خزره ساری.

ایندی کیم آییرا بیلر اونلاری؟!

وطن دئدیم

وطن دئدیم

خفیف یئلدن تیتره‌ین

یارپاغینا وطن دئدیم.

یانیق، قورو،

گؤی ککلیکلی،

بوز قومرولو

تورپاغینا وطن دئدیم.

داغلاری‌نین کؤپوک دومان

دوواغینا وطن دئدیم.

تاریخی‌نین

یاخی‌نینا،

اوزاغینا

وطن دئدیم.

باغلاری‌نین

یاسه‌منلی بوداغینا

وطن دئدیم.

گنجلری‌نین

نغمه-نغمه دوداغینا

وطن دئدیم.

اورک کیمی

گئجه-گوندوز حرکتلی

ایش و هونر مئیدانینا

وطن دئدیم.

بو گونونه، دؤورانینا

وطن دئدیم.

دالغالانان

آل شفقلی بایراغینا،

تنها، اوجقار بیر داخمادا

یانان نورلو چیراغینا

وطن دئدیم.

کؤهنه، یئنی

قارا قیزیل یاتاغینا،

ایلدن ایله شؤهرتلنن

آغ قیزیلین سوراغینا

وطن دئدیم.

بوللور، سرین بولاغینا،

اینسان یوردو - اوجاغینا،

تونج ظفرلی کئچمیشینه،

گل‌ها‌گللی بو چاغینا،

ایستی، عزیز قوجاغینا

وطن دئدیم.

من وطنین قوینوندایام.

وطن آدلی بیر تورپاغین

بورجو هر آن بوینومدادیر.

قئیرتینی چکمیشم ده،

چکیرم ده.

تورپاغینی اکمیشم ده،

اکیرم ده.

یوللاریندا - یوکسه‌لیشده

پوچور-پوچور آلین تری

تؤکموشم ده،

تؤکورم ده.

من وطنین قوینوندایام،

وطن منیم قوینومدادیر.

هم قئیرتی،

هم قایغیسی،

هم شؤهرتی -

بؤیوک بورجو

بوینومدادیر!

بوینومدادیر!

آوقوست، 1980

آرزو

آرزو

خریته‌یه باخدیم. 
قانادلارینی گریب، 
دالغالی خزره قونماق ایسته‌ین، 
نهنگ بیر قوش کیمی گؤرونور
آذربایجان. 
بیر شاهیندیر
دیمدیگی گؤی سولاردا. 
قانادلاری گؤیلرده. 
بو عظمتلی شکلی
یارادا بیلیدیم، 
بیر یئنی اثرده؛ 
آهنگی دنیز دالغالی. 
آدی "پوئزییا قارتالی".

19 اییول 1972
اییول، 1977 

نسیمییه، فضولییه، صابیره آچیق مکتوب

نسیمییه، فضولییه، صابیره آچیق مکتوب

(اونلارا محبت، بعضیلرینه عیبرت اوچون)

دوشونورم:

حاقیم وارمی

سیزه

اوستادیم،

بابام دئیم،

آتام دئیم،

یوخسا اوتانیم،

سوسوم:

یولونوزا، ایشینیزه

یادام دئیه.

قازانمیشاممی

اؤولاد حاقینی

زحمتیمله،

محبتیم، نیفرتیمله

جسارتیمله!

ساغ اولون!

ساغ اولون کی،

هئچ بیر زامان

باشقا خالقا خور باخمادینیز

تاریخه اینسان دوشدو،

اینسان قالدی آدینیز.

دوشونورم

بلکه یانینیزدا قباهتیم وار

بلکه بو بابتدن

آز-چوخ خجالتیم وار.

خالقین طالعیینده

آغیر گونلر آز اولماییب

ساغ اولون!

ساغ اولون کی،

نئچه-نئچه

سیناقدان کئچه-کئچه

قلبینیزی، شئرینیزی

غضب-کین یوواسی ائتمه‌دینیز

بیزه حاقسیزلیق ائله‌ین

تکلره گؤره،

مینلره، میلیونلارا

دوشمن گؤزویله باخماق

یولویلا گئتمه‌دینیز.

من خالقیمی سئویرم!

بو سؤزون آرخاسیندا

عومرومون چتین ایللری وار،

اومیدلری، آرزولاری، نیسگیللری وار.

بو سؤزون اؤزونده

محبت وار

یاخشی اینسانلارا،

باشقا خالقلارا،

طالعیینه یادلار

حؤکم ائله‌ینلره

داها چوخ.

من خالقیمی سئویرم

آنجاق منیمکیدیر دئیه یوخ.

سئویرم، چونکی

او آزادلیغا قوربان وئریب

بابه‌کینی

او قارداشلیق گوجویله

یارادیب بوگونکو باکینی

او لئنینه سلاحداش وئریب

نریمانینی،

اینسانلیغا بخش ائله‌ییب

سیزی، میرزه جلیلی،

ایسرافیلی، چینگیز ایلدیریمی،

ناتوانی، خییابانینی

یالنیز تانینمیشلاری یوخ،

اونا شؤهرت گتیرن

مینبیرینی سئویرم.

شؤهرت گتیرمه‌ینلر

نیفرت گتیرمه‌ییبسه،

اونلار دا منیمکیدیر.

باشقا خالقلارا

نه نیفرتیم،

نه پیس نیتیم اولموشدور.

کیم نه دئییر، دئسین

...کاروان کئچر…

زینگیلده‌ین آلاباشدیر.

اؤزوموزون ده پیسینی،

اؤزگه‌سی‌نینکینی ده

بیر اینسان غضبییله

بیر شاعر نیفرتیله

نه ائشیدن قولاغیم،

نه گؤرن گؤزوم اولوب،

هر زامان احتیاطیمدا

دؤنوک، نامرد، نانکورو

یاندیریب کوله دؤندرن

سؤزوم اولوب.

ساغ اولون کی،

گله‌جک اؤولادلارا

کین دئییل،

محبتی وصییت ائتدینیز.

نه عیسی دئین کیمی

"بیر اوزونه ووردولار

او بیرینی چئویر!"

یولویلا گئتدینیز.

بیزه مردلیک، عدالت

بؤیوک اینسان قلبینی تاپشیردینیز.

نه عاجیز اولون دئدینیز،

نه قیلیقسیز.

فیلانتروپلوغو،

موتیلیگی بیزه ارث قویمادینیز.

دوشمنله دوشمن کیمی،

دوستلا دوست کیمی!

ائله دئییلمی،

آتا صابیر!

دده‌‌ فضولی!

بابا نسیمی!

سیز بیر بهرلی آغاجا

داش آتیب دئیه،

الینیزه کئچه‌نین

دریسینی سویمادینیز،

اینسان محبتی‌نین،

سعادتین، مردلیگین

ترننوموندن دویمادینیز.

600 ایل مسافه‌دن گؤرور عالم

سنی حلب مئیدانیندا، -

قانینا قلتان.

هانی فیتوا وئرن،

هانی سویان؟

هانی بوینونا کندیر آتان؟

بؤیوک اوستاد!

یاشادین کؤنلو قوبارلی،

دیلی گیلئیلی

اوجالداندا محبتین

اؤلومسوز هئیکلینی

دئمه‌دین کی، یادئللی،

بیر عرب قیزیدیر لئیلی،

مجنون - بیر عرب اوغلو.

دئدین: شاعر

دردلیلره حمدرد دوغولور

قله‌مینله لئیلی و

مجنون دا بیر آز آذریلشدیسه:

بونون یامانلیغی وارمی بیر کسه!

ایران، تورکییه، هیندیستان

یاخین، اوزاق قونشولار

اورتادا آذربایجان

چکیلمز دردلری،

گؤینکلری، موسیبتلری

سنه آغیر گلیردی.

اینسان - قارداش دیَنده

گؤزونون قارشیسینا

موباریزه یولوندا

جانلاریندان کئچنلر،

یوخسول، فاغیر گلیردی.

ساغ اولون!

چوخ یاشایین،

عزیز، بؤیوک بابالار!

سؤزونوزده نه غرض،

نه باشقا خالقا نیفرت وار

جانلی اورک وار.

بؤیوک آمال،

سرت حقیقت وار…

ساغ اولون، وار اولون!

عزیز، بؤیوک بابالار!

سیزه اوستادیم،

سیزه بابام دئمه‌یه،

سیزه آتام دئمه‌یه

حاقیم وار.

آزادلیق

آزادلیق

قارا بیر گونده

یارالی بیر اؤلکه‌نین اوستونده

دیکلدی قوووتدن سرخوش،

قان لکه‌لی، بایراق.

گونشلی بیر گونده،

غضبلی بیر اؤلکه‌نین اوستوندن

ائندیریلدی اؤلوم کؤلگه‌لی بایراق.

قوللارینی گئنیش-گئنیش آچدی اینسان.

قوجاقلاشدی، گونش، هاوا، تورپاق.

منیم آرزوم

منیم آرزوم

من نه ایسته‌ییرم؟

جییر دولوسو هاوا!

کؤنول دولوسو سئوینج!

بضا ده بیر آز کدر.

ائله کی،

کؤنلوم ده،

قلبیم ده،

بئینیم ده

سئوینجین قدرینی بیلسینلر.

من نه ایسته‌ییرم؟

یاخشی دوست؛

قلبی آچیق،

نه یاخشی گونون دوستو اولسون،

نه ایلقاردا یاریمچیق.

دوشمن نئجه اولور-اولسون

آنجاق دوشمن اولسون،

مرد-مردانه،

اوز-اوزه ووروشان اولسون.

هزر،

دوستلوغو، دوشمنلیگی بیلینمه‌ین،

دوداغی تبسسوم دامغالی

اینساندان هزر!

هر یئرده،

هر آن هزر!

من نه ایسته‌ییرم؟

باهار اوزانسین ایل بویو

چمن-چمن،

اویلاق-اویلاق.

گول گولو چاغیرسین،

چیچک چیچیی.

چؤللره یانغین سالسین

لاله -

داغلار گؤیچیی!

آنجاق

لاله‌نی، بنؤوشه‌نی

بزک اوچون،

وزن اوچون

شعریمیزه سوخمایاق!

من نه ایسته‌ییرم؟

گوندوزلر آیدین اولسون،

گئجه‌لر قارا اولسون؛

آی دوغانا کیمی.

هر شئی بول اولسون -

یاقوتدان توتموش،

سوغانا کیمی.

شعر ده بول اولسون.

آنجاق،

تسبئح دنه‌سی کیمی

بیر-بیرینه بنزه‌ین

شعرلردن

یاخا قورتارماغا

بیر ایمکان،

بیر یول اولسون.

من نه ایسته‌ییرم؟

چینار آغاجلاری

قارغاسیز اولسون.

بو مومکون دئییلسه اگر،

هئچ اولمازسا،

شعر، صنعت دارغاسیز اولسون.

واللاه، بئله یاخشیدیر،

سولار آخسین سو کیمی

تمتراقسیز.

شعریمیز زنگین اولسون،

موختلیف اولسون

بؤیوک اینسان آرزوسو کیمی.

بیر گونوموز کئچمه‌سین

حرکتسیز، ماراقسیز.

کؤنوللر شاد اولسون.

وطنیمین گونلری کیمی.

هر یئرده سئوگی، اولفت

تمیز اولسون،

آزاد اولسون؛

باهارین آیدین سحری کیمی.

من نه ایسته‌ییرم؟

یاراتماقچین یاشایاق،

یاشاماقچین یاراتمایاق.

بیر گونوموزو بئله،

بیر آنیمیزی بئله

خیردا، اوجوز حیسسلرین

قورومویلا قارالتمایاق.

یاخشی ایشیمیز گوندن-گونه چوخ اولسون.

حیاتدا دا، صنعتده ده

کؤنلوموز، گؤزوموز

توخ اولسون.

من نه ایسته‌ییرم؟

جییر دولوسو هاوا!

کؤنول دولوسو سئوینج!

یارادیجی امکله دولو عومور.

شفقلی حیات!

موباریزه‌لی، دینج!

من نه ایسته‌ییرم؟

بؤیوک آرزولار سسلنسین

هر هوجئیرمیزده.

حیاتین نبضی وورسون

هر نثریمیزده،

هر شعریمیزده!

منده ایختییار اولسا

منده ایختییار اولسا

من ایسته‌ییرم:

بولودلار آغلاسین

اوشاقلار آغلاماسین؛

آنالی یا آناسیز.

من ایسته‌ییرم:

گوللر آچیلسین،

گولله‌لر آچیلماسین،

آمانلی یا آمانسیز.

من ایسته‌ییرم:

قاپیلار قاپانسین

سویوق اولاندا هاوا.

گؤزلر قاپانماسین،

سؤزلر قاپانماسین.

من ایسته‌ییرم:

یانغینلار سؤنسون،

اومیدلر سؤنمه‌سین.

مئیوه‌لر دیَسین اؤز فصلینده.

اورکلره سؤز دیَمه‌سین.

بهردن بوداقلار اییلسین.

اینسان باشینی ایمه‌سین،

خجالتدن یا گوجسوزلوکدن.

آخسین بولاقلار گؤز یاشی کیمی،

تورپاغین اوزرینده.

گؤز یاشی بولاق کیمی آخماسین

دونیانین هئچ بیر یئرینده.

هر شئی اینسانا باخسین.

اینسان اله باخماسین.

گئجه‌لر اولدوزلار اویاق اولسون.

اینسانلار یاتیب دینجلسین؛

قوت توپلاسین صاباحین

خئییرلی ایشلرینه.

آچسین گؤزلرینی

گله‌جه‌یین اومیدلی سحرینه.

من ایسته‌ییرم:

سئوینج، سعادت بول اولسون.

اورکدن-اوره یه،

اؤلکه‌دن-اؤلکه‌یه،

آچیق یول اولسون.

اینسان شکلی

اینسان شکلی

منه بیر سرگی سالونو وئرین!

نه گئنیش اولسون دونیا قدر،

نه ائله هوندور اولسون کی،

اته‌یینده قالا اوزون کؤلگه‌لر.

منه بیر سرگی سالونو وئرین!

اوردا بیر اینسان شکلی آساجاغام -

آدی بیر اینسان.

نه ائله کیچیک کی، محل قویان اولمایا،

نه ائله بؤیوک کی، باخاندا قورخاسان.

اوردا بیر اینسان شکلی آساجام،

گؤرونسون دونیانین هر یئریندن؛

زامانین کئچمیشیندن،

دؤورانین ایندیسیندن،

عصرین گله‌جه‌ییندن

بیر اینسان شکلی آساجام؛

بیر یانیندا نسیمی -

دابانیندان سویولاندان سونرا،

بیر یانیندا

مشل تکی یانمیش آذری قیزی -

تونج هئیکلی قویولاندان سونرا.

بیر یاندا جوردانو برونونون کولو.

بیر یانیندا مممدهه‌سن کیشی -

عومرو، گونو یوللارا تؤکولو.

یوخاریدا کوسموپولیت گؤی

آشاغیدا سرحدله کیلیدلنمیش اؤلکلر

بیر یاندا اوسوئنسیم -

مینلرله اینسان، بئلی بوکولو.

بیر یاندا یوللاری اینسانلا دؤشنمیش -

کالیما.

بیر یاندا خیروسیما - اؤلو.

بیر طرفده

فرهاد، شیرین،

کرم، اصلی،

بیر طرفده

ایسرافیل، قافور

قاستئللو، لورکا -

پرومئتئیلر نسلی.

بیر اینسان شکلی آساجام؛

قاپالی دوداقلاریندا سؤز یانیغی.

اطرافیندا بایرام تنتنه‌لری.

باخیشیندا سیناق گونلری،

دؤزوم سنه‌لری.

شکلین مؤلفی - زامان.

آدی - اینسانلیغین عومور یولو.

بیر آپرئلدن سونرا

بیر آپرئلدن سونرا

دونن بیر آپرئل ایدی

مان دئییلدی یالانلار.

نه بؤیوک درددیر یئنه

یئر اوزونده ایللرله

توکنمه‌ین، بیتمه‌ین

قیپقیرمیزی، آغ، قارا

نئچه رنگلی یالان وار.

2 آپرئل 1973

دینمه‌دیک

دینمه‌دیک

یاغیش یاغدی

بیر گون آرا وئرمه‌دی،

یاغدی گئجه-گوندوز.

سن دینمه‌دین،

من دینمه‌دیم.

گؤللندی چؤل، دره، دوز.

دؤرد بیر یان یاغیش اولدو

یازین اوغلان چاغیندا

قیش اولدو.

سن دینمه‌دین،

من دینمه‌دیم.

بیر گون گلدی

گؤی قوپقورو قورودو،

بیر دامجی دا دوشمه‌دی.

گون شاخیدی،

چؤللر یاندی

سن دینمه‌دین،

من دینمه‌دیم.

کولک اسدی

بوداقلاردان یارپاقلاری

قیردی، تؤکدو

یئنه سوسدوق.

سن دینمه‌دین،

من دینمه‌دیم.

یانغین اولدو،

توستوسو ده گؤرونمه‌دی.

سن ده سوسدون،

من ده سوسدوم.

دوشوندوک کی،

طبیعتین شیلتاغیدیر

هئی هارای چک،

چیغیر-باغیر!

بو دینمزلیک عادت اولدو

اؤزوموزو ایناندیردیق.

قیسمت دئدیک گونوموزه

"نئیله‌یک بیز

علاج یوخدور،

اولمالیلار اولاجاقدیر.

دونیا قدیم بیر اوجاقدیر.

هم کؤزو وار،

هم کولو وار.

هم تیکانی،

هم گولو وار".

بیر دوستوموز گؤرونمه‌دی،

نییه؟ نییه؟

سن بیلمه‌دین.

من بیلمه‌دیم.

سوروشما کی، کیم بیلدی، کیم!

بلکه بیلسن،

بلکه بیلسم

نئیله‌یردیک؟

قم یوکوموز آزالاردی

بیلسه ایدیک؟

دئمیرم کی،

نیگارانلیق یوخ اولاردی

قم یوکوموز آز اولاردی،

بلکه چوخدان چوخ اولاردی.

بلکه ده وئریب ال-اله

قوراقلیغا گؤز یاشیندان

نم وئرردیک،

یاغیشلاری دوردوراردیق،

یانغینلاری سؤندورردیک،

کولکلری سیندیراردیق

چیلیک-چیلیک.

بلکه نوه-نتیجه‌لر

دونیامیزین بد گوجونه

بیر گون اولار

قالیب گلر.

1977-1980

داریسقاللیق

داریسقاللیق

اوزون ایللر سیخدی منی:

گاه چکمه‌لریم -

بضا اوزونو، بضا ائنی ایله،

گاه اؤتوب کئچن ایله تأسفوم.

گاه اومیدیم، یئنی ایله.

گاه دونیانین دردی، قمی سیخدی منی،

گاه جورابلاریمین بوغازی،

گاه آلچاق بولودلارین قالین پرده‌سی؛

گاه بیر نادان قله‌میندن

تؤکولن یازی.

گاه آوتومات قله‌مین باهالیغی.

گاه سؤزون اوجوزلوغو.

گاه کؤینه‌ییمین یاخالیغی.

قیریب چیخماق ایسته‌دیم

"اولار"، اولماز" چرچیوه‌سیندن.

دئدیلر یوخ، یوخ!

دبلره، قایدالارا گیر!

وردیشلری، عادتلری گؤزله!

سیغاللی دیلله یاز!

سیخدیلار منی،

مادده‌لرله، سؤزلرل…

ایش اوتاغیم

اون ایکی مئتر یاریم.

آلتیسیندا

من،

یازی ماسام،

حسرتیم، اومیدیم.

صابیر.

هئمینقوئی.

تاواندان سوزولن دامجیلارین ایزی.

بریجید بوردونون

بیغسیز، پیشیک اوزو.

فالک، میکاییل،

تاغی،

بهلولون نوه‌سی.

ایلک سیرادا اولماق

و قالماق هوسی.

آلتی مئتر بئله.

آلتی یاریم:

کیتابلار، کیتابلار، کیتابلاریم.

پنجره‌لر سیخدی منی

اوزونسوو دؤردبوجاقدا گؤستریب

کوچه‌نین ائولرله سرحدلنمیش یارغانینی.

ماشینلار سیخدی منی

مارکالارینا موناسیب.

سیخدی منی واقونلارین

گوزگولو کوپئلری و

یول حساباتینی یوخلایان موهاسیب.

مسافه‌لر مئترلرله،

ایشیق کیلوواتلارلا دولدورولوب.

نغمه‌لر اوکتاوا ایچینده

خسته‌لرین هرارتی

درجه‌لر ایچینده.

ایری مئیوه‌لر دنه‌لره،

اوزوم-گؤز یاشی گیله‌لره دولوب.

شهریمین یاشیللیغی

اؤلچولوب، بیچیلیب

سالینیب رقملره.

داغلار داریخیب گؤیه قالخیب

دره‌لر چؤکوب یئره.

داریخیر اینسان

حدودلار، اؤلچولر ایچینده.

یایدا اوزون گوندوزلر،

قیشدا اوزون گئجه‌لر ایچینده.

دئییرم:

اؤلنده، آتین

ان درین دریایا منی؛

قالدیریب بولودلاردان یوخاری!

سون یولوم اوزون،

سون منزیلیم گئنیش اولسون باری

یوخ، یوخ.

ان درین دریالار دا

ساحللرین چنبری ایچینده‌دیر.

گؤرونور،

داریسقاللیق کناردا دئییل؛

هر مئیوه‌نین توموندا،

هر جانلی‌نین هوجئیره‌سینده،

هر بینانین داشیندا، کرپیجینده‌دیر.

گؤرونور،

یولوموز بودور.

صرورتی درک ائتمه‌یینجه

گئدیریک، گئده‌جییک

داریسقاللیقدان کئچه-کئچ…

 
  • یارپاقلارین سایی :2
  • 1  
  • 2  
 

وبلاقا گؤره

بو دیل دنیزدی سیزین تک صدفده اینجیسی وار
قیزیلدی سیزده اولان اوزگه‌نین اگر میسی وار
دئسزکی اودلو دیاردی بیزه وطن یاراشار
بیزیم اوجاقلارین آنجاق کور ائیله‌ین هیسی وار
"عقیل"
وبلاق مودیری : نژادمحمد

سون یازیلار

آختارماق

یازارلار

Page Rank بالاجا خوخان آذربایجان تورکجه سینده ایسلام دینی و قرآن کریم