تبلیغات
ایران آذربایجانی تورکجه سینین ادبیات اوتاغی - مطالب ابر بالاش آذر اوغلو
ایران آذربایجانی تورکجه سینین ادبیات اوتاغی
یاشاسین آذربایجان

قونو سلاخلانجی

سلاخلانج

باغلانتیلار

اؤزل یارپاقلار‌

← وبلاق گؤروشلری

  • گؤروشلرین هامیسی :
  • بو گون گؤروشلر :
  • دوننکی گؤروشلر :
  • بو آی گؤروشلر :
  • قاباق آی گؤرو‌شلر :
  • یازارلارین سایی :
  • یازیلارین هامیسی‌نین سایی :
  • سون گؤروش :
  • سون دیَیشمه :

لینکلر‌

بالاش آذر اوغلو

 

بالاش آذر اوغلونون سئچیلمیش اثرلری

بیچیم : آندروید

ائندیر-دانلود

یان، ائی گونش!

یان، ائی گونش!

سن ائی آزادلیغین ایلکین مشعلی،
بیزیم بو یئرلره قوناق گله‌لی.
چیخارتدین ظلمتدن اینسان اوغلونو،
او ائهتیراس دولو، او حسرت دولو.
اورکلر اوجالمیش ایندی داغ کیمی،
سن ائی گؤی اوزونده بیر بایراق کیمی.
باشینی ساللاییب دایانان گونش،
بیلیرم سنده‌کی او اود، او آتش.
مین یانان اورکدن قوپوب بیر آندا،
آلیشیب یانمیشدیر او آسیماندا.
نورون یئر اوزونه وئردیکجه زیینت،
تک سنه، تک سنه اینانمیش فقط.
آزادلیق تشنه‌سی - بو مظلوم اینسان،
دئمیش کی: “ائی گونش بیزدن اولوسان.
یان، بو اؤلکمیزین قلبینی قیزدیر.
یان، بو ایلک عشقیمیز، سون آرزوموزدور:
ائلین باشی اوسته گونش سؤنمه‌سین.
تاریخین تکری گئری دؤنمه‌سین،
بیر ده قاییتماسین نه هیجران، نه قم.
یان، سنین عشقینله بو یئر، بو عالم
چیخسین پنجه‌سیندن قارانلیقلارین،
یان کی، سینه‌سینی بورانلیقلارین
سنین شؤله‌لرین اریده‌جک، یان.
یان، نورا قرق اولسون تورپاق، آسیمان...”
سن ائی آزادلیغین ایلکین مشه‌لی،
بیزیم بو یئرلرین اوزو گوله‌لی
آنجاق بیرجه ایلدیر، بو کی، بللیدیر.
آدین کؤنلوموزه  بیر تسللیدیر.
قلبی‌نین اودو وار تورپاغینیزدا،
سنین شفقیندیر بایراغیمیزدا،
او آلیشیب یانان نه رنگ، نه قاندیر،
ایندی اؤزگه دؤوران، اؤزگه زاماندیر،
نه آیریلیق واردیر، نه ده کی زیندان.
یان ایندی، ائی گونش، سن یاخیندا یان.
او گونلر، او آیلار بیزدن اوزاقدیر،
یان، آزادلیق سؤزو بیزه بایراقدیر...
اردبیل، 1946

عومور کیتابی

عومور کیتابی

باهار گونلریدیر، ساکیت بیر گئجه،

گلمیش اوتاغیما آی پنجه‌رمدن.

یئنه میز دالیندا اوتوروب تکجه،

قالین بیر کیتابلا دانیشیرام من.

او دئدی: - آز چئویر واراقلاریمی،

اوخو جومله‌‌نی دریندن بیر-بیر.

بو گون واراقلاییب بیر کیتاب کیمی

باخدیغین، اونوتما اینسان عومرودور.

شاعرسن، یاخشی باخ، دریندن دوشون،

زامانین ان کیچیک حؤکمونو دینله.

بیل کی، واراقلاییب کئچیرسن هر گون

عومور کیتابینی سن اؤز الینله.

تبریز، 1946

سئوگیلیم

سئوگیلیم

شهلا گؤزلرینی گؤردویوم زامان

دئدیم: گول اوستونه بیر ژاله دوشموش.

بیلمم او گؤزلرده نه معنا واردیر،

بو شاعر عشقیندن خیالا دوشموش.

حوسنوندن بللیدیر، ائی نازلی دیلبر،

سنی قوجاغیندا بؤیوتموش باهار.

چیینینه تؤکولن خورمایی ساچلار

سانکی مرمر اوسته شلاله دوشموش.

گؤزلرین سالیبدیر منی کمنده،

یقین بو حالیمی دویموسان سن ده.

کیم سنی قیزلارلا گؤرسه چمنده

دئیر، گولوستانا بیر لاله دوشموش.

دئمیرم مجنون تک چؤللرده قالدیم،

نه ده فرهاد کیمی هئی کولونگ چالدیم.

نه سنان اولدون کی، شؤهرتیم، آدیم

دئیه‌لر، اوبایا، ماهالا دوشموش.

او گون کی، قاپیدان باخیب کئچیبسن

منی آتشلره یاخیب کئچیبسن.

بیر اینصافین اولسون، ائی نازلی دیلبر،

گل گؤر کی، عاشقین نه حالا دوشموش.

تبریز، 1945

من ده بیر عسگر کیمی

من ده بیر عسگر کیمی

شاعره قلم وئر، کاغیذ گتیرین،

شعریم جرگه‌لنسین بیر لشگر کیمی

یئنه میصراعلاریم دورسون سیرایا،

دؤیوش مئیدانیندا سفربر کیمی.

گونش، آی قیزینیر اوجاغیمیزدان،

شرقه ایشیق دوشور یاراغیمیزدان

دونن تولکو کیمی قاباغیمیزدان

قاچانلار قاییدیر یئنه شر کیمی.

خیالی باشقادیر ناشی یاغی‌نین،

گؤرونسه سرحددن باشی یاغی‌نین،

قالماز داش اوستونده داشی یاغی‌نین،

ائلیم سلاحلانیب بیر نفر کیمی.

اییلمک یاراشماز بیزیم میللته،

اورک ده اویماییر هر “محبت”

بو تئز - دئدیگی “حوسنو نیت”

هامی نیفرت ائدیر پیس خبر کیمی.

گؤزونو دیکدیگین اودلار یوردودور،

گؤردویون بو داغلار، دوزلر اوردودور.

گئجه‌لی، گوندوزلو کئشیکده دورور

هر ائل قهرمانی بیر عسگر کیمی.

آسلان یالوارارمی قورخاق تولکویه؟

گونش سیغینارمی قارا کؤلگه‌یه؟

سعادت مسکنی بیزیم اؤلکه‌یه

گلسز اؤله‌جکسیز اؤلنلر کیمی.

تبریز، 1946

تبریز

تبریز

چوخ زامان کدرلی گؤرموشم سنی،

یادیندا وارمیدیر او حالین، تبریز؟!

ایندی او گونلردن اوزاقسان داها،

آرتیبدیر شؤوکتین، جلالین، تبریز!

بیر قودرت دویورام دوغما سسیندن،

سینمی قیزدیردین گور نفه‌سیندن.

حیات کیتابی‌نین صحیفه‌سیندن

سیلینیب حسرتین، ملالین، تبریز!

او گون کی، سینه‌نی سیپر ائیله‌دین،

قارانلیق گئجه‌نی سحر ائیله‌دین،

بیزه آزادلیغی خبر ائیله‌دین

سسینه سس وئردی ماهالین، تبریز!

من چوخدان وئرمیشم سنه قلبیمی،

ایسته‌سن آل بیر ده سینا قلبیمی،

قویما یاد اللرده سینا قلبیمی،

داها قاییتماسین زاوالین، تبریز!

بیزده مقدسدیر آنانین آدی،

شاهلار، حؤکمودارلار بونو قانمادی.

هر ایل اوردو چکیب سنی تالادی،

آرتدی دردین، قمین، خیالین، تبریز!

اگر آتیلسا دا اودلارا یوردوم،

آنجاق اییلمه‌دی یادلارا یوردوم.

دؤزدو هر چتینه، هر دارا یوردوم.

یاردی قارانلیغی هیلالین، تبریز!

اوشاقکن دئدیلر آذر آناندیر،

اودلاردان دوغدوغوم ائله ایاندیر.

بیزه بؤهتان آتان یازینی قاندیر،

جاوابسیز قالماییب سوالین، تبریز!

بو ائللر یانیندا آند ایچیرم من،

خالقین آرزوسودور قلبیمدن کئچن.

من ایلهام آلمیشام هر زامان سندن،

دونیالار قدردیر کمالین، تبریز!

تبریز، 1945

آرزو

آرزو

بضا اؤز-اؤزومه دوشوندوکجه من،

خیاللار قلبیمی آلیر الیمدن،

دئییرم: من ده بیر عسگر اولایدیم.

نه اولا عومرومون بو گنج چاغیندا،

اودلار اؤلکه‌سی‌نین گئن قوجاغیندا

گئنیش صحرالارا رهبر اولئیدیم.

دورئیدیم سرحدده الیمده توفنگ،

قارانلیق مایاق کیمی،

زامانلار کئچیرمیش قارلی داغ کیمی.

اؤپئیدی سینمی یئللر هر سحر،

دوشئیدی اوستومه گولگون شفقلر،

گونشین رنگیندن آلایدیم مین رنگ.

قارانلیق گئجه‌نین قارا قلبینه

ترلان باخیشلاریم آخیب کئچئیدی،

گونشین رنگیندن آلایدیم مین رنگ.

قارتاللی داغلارین زیروه‌سینده من

بیر کئشیکچی کیمی دوراندا بضا،

دومانا، چووغونا گرئیدیم سینه.

منه طالعیینی تاپشیرارسا ائل،

اونو گؤزوم کیمی قورویارام، بیل.

نه نیشان، پاقون، نه جاه، نه جلال.

اگر اینانماسان اوخوجوم بونا،

بوز شینئل گئیه‌جک آذروغلونا

منجه آرزو اولسون، سنجه بیر خیال.

تبریز، 1943

اینقیلاب شاعرییم

اینقیلاب شاعرییم

من نه شاه، من نه سولطان، نه یاراشیق، نه زیینت،

نه افسانه، نه ملک، نه سارای، نه سلطنت،

نه قدیم عصرلری یادا سالیب آغلایان،

نه عومرونو قزله، مرسییه‌یه باغلایان،

نه دؤورون حاکمینه شعر یازیب پول آلان،

نه جللادلار اؤنونده حیات اوچون آلچالان،

نه پئیمانا، نه ساقی، نه سراب شاعرییم،

آزادلیغین جارچیسی اینقیلاب شاعرییم.

من اییلیب حاکمین اللریندن اؤپمه‌دیم،

شعریمی چیچک کیمی آیاقلارا سپمه‌دیم.

نه عاجیز بیر بنده‌یم، نه ساتیلمیش بیر قولام،

نه سارای مدداهییام درگاهلاردان قووولام.

من ائللرین اوغلویام، ائللر بؤیوتموش منی.

شعریم ائلدن آلیبدیر بو ایلهامی، قوه‌نی.

من نه شام، نه پروانه، نه روباب شاعرییم،

آزادلیغین جارچیسی اینقیلاب شاعرییم.

منیم کؤنول دفتریم بنزه‌ییر گولوستانا،

اوندا یئر وئریلمه‌میش قارلی قیشا، طوفانا،

بیر باهار اتری واردیر هر شعریمده، سؤزومده،

باهارین حسرتیله یاشاییرام اؤزوم ده.

من ال آچیب گؤیلردن دیله‌مه‌دیم آزادلیق،

منیم آرخالاندیغیم اونلاردان داها آرتیق.

اؤلکلر حسرت چکن آفیتاب شاعرییم،

آزادلیغین جارچیسی اینقیلاب شاعرییم.

اردبیل. 1941

کؤمورچو قیز

کؤمورچو قیز

هله شرق طرفده گؤیون رنگی قان،

یئنیجه بویلانیر اوفوقدن سحر.

فقط یاواش-یاواش سؤکولدوکجه دان

قیرمیزی بویانیر یاشیل تپه‌لر...

بولودلار آخیشیر سمادا لای-لای،

سؤنور گؤی اوزونده رنگی سولموش آی.

نییاردان شهره اوزانان یولو

اودور، آغیر-آغیر بیر نفر گلیر.

الینده کیسه وار کؤمورله دولو،

او قیز نه دایانیر، نه ده دینجه‌لیر،

“اماندیر گؤرمه‌سین منی پاسیبان” -

دئیه نفس بئله آلمیر قورخودان.

بیلیر کی، زحمتی گئده‌جک هئچه

شهره کئچمسه او احتیاطلا...

بلکه ده یاتمامیش قیز بوتون گئجه

هله ایلک آخشامدان چیخمیشدی یولا.

کیم بیلیر، کیم بیلیر نه واختدان بری

او قیز بو یوللاردا آچیر سحری.

باشیندا یایلیق یوخ، آیاقلار یالین،

دالیندا ان آغیر کؤمور شله‌سی.

احتیاج ایچینده بوغولانلارین

کسیبدیر چیینینی عومور شله‌سی...

بو یئرده اینسانا عومور ده یوکدور،

حیاتی، نشه‌سی، عشقی سؤنوکدور.

دونوب یاناغیندا داملا-داملا تر،

او یئنه کوچه‌ده شله گزدیریر.

کیم بیلیر، یوخودان دوروب بیر نفر

بلکه کؤمور آلا، هله گزدیریر،

او هله گزدیریر ساتا کؤمرونو

کؤموردن قارادیر اؤزونون گونو.

آخیب یاناغینا گؤزونون یاشی،

اؤتوروب کؤکسونو او قیز دریندن.

بو حالدان آلیشیر قلبی‌نین باشی.

(غضبیم قالدیریر داشی یئریندن)

دئییرم نه اوچون گئجه صوبحه تک

چالیشان اینسانلار آج قالسین گرک؟!

بو بیر جهنمدیر اودسوز، اوجاقسیز،

گؤرور دئمه‌سم ده عاریف اولانلار.

اودور بو آتشده اودلانیر بو قیز.

فقط نه توستو وار، نه ده دومان وار.

ائی آغا، دئمه‌یین حیاتدیر بو دا.

بیر گون دوشه‌جکسن اؤزون بو اودا...

اردبیل، 1941

بالاش آذر اوغلو

 کیتابین آدی : بالاش آذر اوغلونون شعرلری

کیتابین فورما سی  : جاوا

ساپورت ائدن قولاق جیقلار (موبایل تلفونلاری): بوتون قولاغ جیقلاری کی جاوا پروگرامین ساپورت ائدرلر

اولچوسو : 141 کیلو بایت

ایندیر(دانلود)

کاروان

کاروان

گئجه‌نین قولاغیندان کدرلی زنگ سسلری،

آغیر-آغیر یول گئدیر کاروان شیمالا ساری.

خیال منی آپاریر، گؤرن نه واختدان بری

دونیانی آددیملاییر زنگلی دوه قاتاری.

کاروان شیمالا گئدیر، کاروان جنوبا گئدیر،

کاروان بضا وطندن اوزاقلارا یول آلیر.

کاروان بوتون دونیانی زامان-زامان قت ائدیر،

کاروان کدر گتیریر، کاروان سئوینج آپاریر.

کاروان گئدیر... بیر زامان ابولولا مورری

بلکه‌ده بو کاروانلا بوتون شرقی دولاندی.

کیم بیلیر او داهی‌نین ان گؤزل اثرلری

ایستی قوملار اوستونده، خیالیندا یاراندی...

کاروان گئدیر آرامسیز، گئجه قارا، یول اوزاق،

آرخامدا ماوی دنیز، اؤنده قارلی ساوالان.

دوه‌لر بیر آهنگله یئنه آددیملایاراق

اؤتورلر بابالارین کئچدیگی توزلو یولدان.

ساروانین گؤزلرینده یوخوسوزلوق قمی وار،

نئچه گئجه یاتمامیش، هئی یئریگیر، یئریگیر.

ساروانین اؤزونون ده قریبه عالمی وار،

زنگ سسلری آلتیندا هر گون بایاتی دئییر:

آغ دوه دوزده قالدی،

یوکو تبریزده قالدی.

اوغلانی قان آپاردی

درمانی قیزدا قالدی.

گئجه ساکیت، اوزاقلار عکس ائتدیریر بو نغمه‌نی،

دوه‌لر آرام-آرام آددیملاییرلار یئنه.

او، خزر ساحلیندن آلیب آپاریر منی،

قدیم بابک یوردونا- ساوالان اته‌یینه...

Latincə

آددیملار

آددیملار

صنعت میدانینا قدم قویورام،

قوی سؤزوم گوج آلسین ائلیمدن منیم.

نه قدر چتیندیر، بونو دویورام،

آی دوستلار، توتونوز قولومدان منیم.

کؤرپه‌جه بیر قوشام آسیمان درین،

من او درینلییه اوچماق ایسته‌رم.

نغمه دفتریمین، سؤز دفتریمین

آدینی “وتن”له آچماق ایسته‌رم.

منیم آرزوم بودور، بیر اوغول کیمی،

کاش بو چتینلییه دؤزه بیلیدیم.

وطنه سئوگیمی، ائله سئوگیمی

کؤنول سؤزلریمه یازا بیلیدیم.

Latincə

وبلاقا گؤره

بو دیل دنیزدی سیزین تک صدفده اینجیسی وار
قیزیلدی سیزده اولان اوزگه‌نین اگر میسی وار
دئسزکی اودلو دیاردی بیزه وطن یاراشار
بیزیم اوجاقلارین آنجاق کور ائیله‌ین هیسی وار
"عقیل"
وبلاق مودیری : نژادمحمد

سون یازیلار

آختارماق

یازارلار

Page Rank بالاجا خوخان آذربایجان تورکجه سینده ایسلام دینی و قرآن کریم