تبلیغات
ایران آذربایجانی تورکجه سینین ادبیات اوتاغی - مطالب فولکوریک
ایران آذربایجانی تورکجه سینین ادبیات اوتاغی
یاشاسین آذربایجان

قونو سلاخلانجی

سلاخلانج

باغلانتیلار

اؤزل یارپاقلار‌

← وبلاق گؤروشلری

  • گؤروشلرین هامیسی :
  • بو گون گؤروشلر :
  • دوننکی گؤروشلر :
  • بو آی گؤروشلر :
  • قاباق آی گؤرو‌شلر :
  • یازارلارین سایی :
  • یازیلارین هامیسی‌نین سایی :
  • سون گؤروش :
  • سون دیَیشمه :

لینکلر‌

آغ قوش

آغ قوش 
بیری وار ایدی، بیری یوخ ایدی، بیر پادشاه وار ایدی. بو پادشاهین آروادی‌نین 
بوینونا نه قدر اوشاق دوشوردوسه، هامیسی آنا بطنیندن گلنده اؤلوردو. 
نه قدر طبیب، طیلسیم، جادو ائلتدیریردیلرسه، هئچ بیر فایدا وئرمیردی. 
گونلرین بیر گونونده یئنه ده پادشاهین زنه‌نی هملی اولور. دوغماغینا 
بیر قدر قالمیش، پادشاه زنه‌نینی اؤز قایناتاسی‌نین یانینا گؤندریر 
کی، بلکه اوردا یاخشی باخالار. گون کئچیر، آی دولانیر، پادشاهین بیر 
اوغلو اولور. بلی، موژده-موژده اوستوندن گلیر. پادشاه زنه‌نینه سیفاریش 
گؤندریر کی، هله بیر نئچه واخت قالسین اوردا، اوشاغین بیر آز سومویو برکیسین، 
گلر، یئنه بیر قضا-قدر اوز وئرر. 

آردین اوخو....

آزری-قنبری

کیتابین آدی :آزری-قنبری 
بیچیم : آندروید
ائندیر-دانلود
باشقا لینک

بایاتیلار-مردلیک نامردلیک

اوتورموشام داش اوسته،
پاپاق دورار قاش اوسته.
سن دوشمنی نیشان وئر،
ناللاماغی باش اوسته.
  ******   
گئدرسن اؤزو قویماز،
دینرسن سؤزو قویماز،
کاسیب وار-یوخون وئرسه،
آغانین گؤزو دویماز.
  ******   
اززینم کاساد اولماز،
مرد الی کاساد اولماز.
یوز نامردین چؤرگین،
دوغراسان، کاسا دولماز.
  ******   
بو سازی آلان گلمز،
اوخویوب-چالان گلمز.
ایگیدی اؤلدوره‌لر،
دیلینه یالان گلمز.
  ******   
آختاردین یول بئله‌دی،
سور آتین، یول بئله‌دی.
دوستلار ایلقارلی اولسا،
نه گرک یول بلدی.
  ******   
دؤورانین گشتی گئتدی،
اوخ تکی کئچدی گئتدی.
مردلر بیر بولاق قازدی،
نامردلر ایچدی گئتدی.

آشیق علسگرین شعرلری آندروید اوچون

کیتابین آدی:آشیق علسگرین سئچیلمیش شعرلری

سیستم: آندروید ساپورت ائدن بویون سیستم لر(قولاقجیقلار،تبلتلر،بیلگی سایار)

اؤلچو:405 کیلو بایت

ائندیر-دانلود

آتالار سؤزو

بیری مینه باغلیدیر، مینی ده بیره.

***

بیری اود اولاندا بیری سو اولسون گرک.

***

بیری اؤلمسه، بیری دیریلمز.

***

بیری پالچیغا باتیب، بیری ده یانیندا یاتیب.

***

بیری واردی گئجه‌دن، بیری ده دوشدو باجادان.

***

بیری یئیر، بیری باخار - قیامت اوندا قوپار.

***

بیرین گؤر - فیکیر ائله، بیرین گؤر - شوکور ائله.

***

بیرین یاندیریب، بیرین قاندیرما.

***

بیریندن سوروشدولار: قاتیر نییه سسین چیخارتمیر؟

دئدی: آتاسین یادینا سالماق ایستمیر!

***

بیرینی ائوه قویان یوخ ایدی،

سوروشدو: چوخامی هاردان آسیم؟

***

بیرلیک هارادا، دیریلیک اورادا.

***

بیرلیک اولمایان یئرده دیریلیک اولماز.

***

بیره‌نین قانین آلدین - جانین آلدین.

***

بیسم الله دئمکله دونوز بوستاندان چیخماز.

***

بیشینجن گؤزله‌ین دوشونجن ده گؤزله‌یر.

***

بیته آجیق ائله‌ییب کؤینیی یاندیرمازلار.

***

بیتلی الین قوینونا آپاردی، آج گومانا دوشدو.

***

بیتمیش ایشدن گول اییسی گلر.

***

بی‌یارا گئت، بئکار قالما.

***

بیز گلدیک گلینی گؤرمه‌یه،

گلین ده گئدیب تزک درمه‌یه.

***

بیز یالواردیق دازا، داز دا اؤزون قویدو نازا.

***

بیزه چاتدی، دَ‌ییرمان یاتدی.

latincə

کور‌اوغلوینان دلی حسن

کور‌اوغلوینان دلی حسن

گونلرین بیر گونو کور‌اوغلو قیرات مینیب چنلیبئلین اته‌یینده‌کی

یولا چیخمیشدی. بیر ده باخدی بودو، بیر دسته یاراقلی-یاساقلی آتلی

گلیر. آمما آتلیلارین قاباغیندا بیر اوغلان گلیر کی، دونیالارا دیَر.

اوزوندن، گؤزوندن ایگیدلیک یاغیر. اوغلان کور‌اوغلونو گؤرجک، دسته‌سینه

های ووردو. آتلیلار او ساعت کور‌اوغلونو آرایا آلدیلار. کور‌اوغلو دایاندی.

گؤزله‌دی کی، گؤرسون ایشین آخیری نه اولاجاق. اوغلان آتی جؤولانا گتیردی، سوزدوروب

دوز کور‌اوغلونون قاباغیندا دایاندی. سونرا بیر کور‌اوغلویا باخدی،

بیر آتینا باخدی، سوروشدو:

آردین اوخو...

آلی کیشی

آلی کیشی

آلی کیشی نئچه ایللر حسن خانا ایلخی اوْتاریب عؤمرونو، گۆنونو اوْنون

قاپیسیندا چۆرودوب، ساققالینی آغارتمیشدی.

اوْ، هر گۆن سحر دان یئری آغاراندا ایلخینی هایلار، بۆتون گۆنو اوْتارار،

گئجه‌دن بیر پاس کئچندن سوْنرا خالخالا گتیرردی. تای داغلاردا، داشلاردا

کؤوشنلرده آلی کیشی‌نین آیاغی دیَمه‌میش بیر یئر یوْخ ایدی.

یئنه ده بیر گۆن آلی کیشی ایلخینی سۆروب دریا قێراغینا آپارمیشدی.

آتلار دریانین قێراغینداکی اوْتلاقدا اوْتلاییردیلار. آلی کیشی اؤزو ده بیر

طرفده داشا سؤیکه‌نیب اوْتورموشدو. قوْجا ایلخیچی بیر ده باخدی کی، بۇدو

دریادان ایکی آت چێخدی. آلی کیشی دریا آتی اوْلماغینی ائشیتمیشدی، آمما هئچ

گؤرمه‌میشدی. آتلار یاواش-یاواش گلیب ایلخییا قاریشدیلار. ایکی مادیانا

یاخینلاشاندان سوْنرا یئنه قاییدیب دریایا گیردیلر. آلی کیشی نه قدر

ایلخیچیلیق ائله‌میشدی، بئله شئی گؤرمه‌میشدی. تئز قالخیب مادیانلاری

مانشیرلادی. آمما بۇ باره‌ده هئچ کسه بیر سؤز دئمه‌دی.

 

آردین اوخو...

بایاتیلار

داغلار مارالا قالدی،

اوتو سارالا قالدی.

سرین چشمه، گؤی یایلاق

یئنه مارالا قالدی.

******

عزیزیم سؤزه قالدی،

بیر شیرین سؤزه قالدی.

یاد قووولدو داغلاردان،

ائل-اوبا بیزه قالدی.

******

داغلاردا تالام قالدی،

بیچمه‌دیم، لالام قالدی.

داغیلسین قوربت اؤلکه،

اوردا بیر بالام قالدی.

******

باغچادا باریم قالدی،

درمه‌دیم، ناریم قالدی.

اؤزوم یاد ائله دوشدوم،

وطنده یاریم قالدی.

******

آرازدا آخار قالدی،

ترلان اوچدو، سار قالدی.

ائلیمدن آیری دوشدوم،

گؤزلریم باخار قالدی.

******

گئتدی آرخا دولاندی،

سولار چارخا دولاندی.

دوشمن ائلین گوجوندن

قورخا-قورخا دولاندی.

******

آتالار سؤزو

بیر سۇ کی منی آخیدیر، منیم اۆچون دریادیر.

***

بیر شهره گئتدین گؤردون هامی کوْر، سن ده - کوْر.

***

بیر تاباق کۆتوم اوْلسا، بیری سنه یوْخدو.

***

بیر تالادا ایکی آخساق جئیران اوْلماز.

***

بیر تپه یێخیلار، بیر دره دوْلار.

***

بیر تیکه‌نی بیلمه‌ین مین تیکه‌نی ده بیلمز.

***

بیر تیکه‌نین قێرخ ایل حاقی وار.

***

بیر تیکیله داغ آشماق اوْلار.

***

بیر توْربا دنی وار، بئش دَ‌ییرمانا اۆیوتمه‌یه گئدیر.

***

بیر اۆرکده ایکی سئوگی اوْلماز.

***

بیر وار کوْر‌اوْغلو، بیر ده وار کوْر کیشی‌نین اوْغلو.

***

بیر وئرمه، بیر ده دیلر، یاتماغا یئر ده دیلر.

***

بیر وۇران مین وۇر دئیندن یاخشیدیر.

***

بیر وۇرماقلا آغاج یێخیلماز.

***

بیر یاخشیدان اؤترو - ها گزمه‌سن یۆز ایل گز!

***

بیر یاندان باغلایان بیر یاندان آچار.

***

بیر یئرده اوْتور کی، دۇرمایاسان.

***

بیره ده هوْ دئ، مینه ده هوْ دئ!

***

بیره دیَمز، مینی بَینمز.

***

بیری آجیندان شالوارین ساتیردی،

دئدیلر: نیسیه وئررسنمی؟

***

بیری ایتمه‌یینجه بیری بیتمز.

***

بیری کؤرپو تاپمیر کئچه، بیری سۇ تاپمیر ایچه.

***

بیری منیم، بیری بنده‌نین،

بیرینی ده نازلی یارا گؤندریم.

آتا بابا سؤزلری

بیر ده گلین اوْللام، اوْتوردوغومو-دۇردوغومو بیللم.

***

بیر ده قاتیرچی‌نین قاتیرینی هۆرکوتمه.

***

بیر دفعه‌‌ آلدانمیشدا قباهت آلدادانین،

ایکی دفعه‌‌ آلدانمیشدا قباهت آلدانانین.

***

بیر دفعه‌‌ یئمکنَن قارین دوْیماز.

***

بیر دلی قۇیویا بیر داش آتدی،

اوْن عاغیللی اوْنو چێخارا بیلمه‌دی.

***

بیر دلیدن یئددی مهله‌یه ضرر دیَر.

***

بیر دردلی‌نین درمانین اوْ درده دۆشندن آل.

***

بیر دیرهم مین عیبی اؤرتر.

***

بیر دوْغرو کی یالانا اوْخشادی، اوْنو سؤیله‌مه.

***

بیر الده ایکی قارپیز تۇتماق اوْلماز.

***

بیر ات کی گیردی قازانا، اوْلدو یئمه‌لی.

***

بیر گلن بیر ده گلر، صبر ائله.

***

بیر گؤردون نامردی، بیر ده گؤرسن، نامردسن.

***

بیر گؤرن یوْلداش، ایکی گؤرن قارداش.

***

بیر گؤز ایکی گؤزون گؤردویون گؤره بیلمز.

***

بیر گۆل ایله باهار اوْلماز.

***

بیر گۆن دۇز یئدیگین یئره قێرخ گۆن سلام وئر.

***

بیر گۆنون بَیلیگی ده بَیلیکدیر.

***

بیر حالالی مین حرام سایا بیلمه‌ییبدیلر.

***

بیر هسیردی، بیر مممدنه‌سیر.

***

بیر ایگید قێرخ ایلده مئیدانا گلر.

***

بیر ایگید یوْخسول اوْلا، اوْنا ال-آیاق گۆلر.

***

بیر ایگیدین پایی ایکی ایگیدی آج قوْیار.

نازلامالار

لایلا دئییم دۆز، باری،

گل دردیمی اۆز، باری.

بالاما قۇربان اوْلسون

یۆز دۇل آرواد، یۆز قاری.

******

من اززییم، شوْنقاری،

دۆلگر یوْنار یوْنقاری.

بالاما قۇربان اوْلسون،

دوْققوز قوْجا، اوْن قاری.

******

الینده وار هاناسی،

قۇلاغیندا تاناسی.

بیر توْیونو گؤریدیم،

اوْلایدیم بَی آناسی.

******

یۇرد یوْخ تالادان ساوای،

گۆل یوْخ لالادان ساوای.

آنایا نه عزیزدیر

کؤرپه بالادان ساوای؟

******

آ لای-لای، یئنه لای-لای،

جان دئییم سنه لای-لای.

سنه گلن درد، بلا

قوْی گلسین منه، لای-لای.

******

لای-لای، آ بالام لای-لای،

آلینماز قالام، لای-لای.

سنه کج باخانلاری

یاندیرسین نالام، لای-لای.

کور اوغلو

کیتابین آدی :کور اوغلو

متنی حاضرلاییب ترتیب ائدنلر: ایسرافیل عباسلی،بهلول عبدالله

کؤچورن :اوختای نژادمحمد

صحیفه سایی : 537

اؤلچو : 2.7 مگابایت

الیفبا : عرب الیفباسی

ائندیر-دانلود

گولنار خانیم

گولنار خانیم

قنداهار پادشاهی‌نین ملیک مممد آدیندا بیر اوغلو وار ایدی.

گؤزللیکده ائله بیر آفتی-زامان ایدی کی، یوسیف کنان اونون الینه سو تؤکه

بیلمزدی. اؤزو ده قنداهار پادشاهی‌نین آمان-زامان بیر دنه اوغلو ایدی.

ملیک مممه‌دی هامیدان چوخ ایسته‌ین قوجا بیر لعله‌سی واردی.

بیر گون لعله بوتون مونججیملری جمعله‌ییب، تاس قوردوروب، رمل

آتدیریب ملیک مممه‌دین باختینا باخدیردی. هامی مونججیملر دئدی کی،

ملیک مممد اون دؤرد یاشینا چاتاندا ایته‌جک، اؤزو ده کی، تاپیلماغی

چوخ چتین اولاجاق.

بلی، بیر-ایکی دسته قوشون حاضرلاندی کی، ملیک مممه‌دی قوروسون.

یازیق اوشاغی تای هئچ یئره قویمادیلار. آمما اولاجاغا چاره یوخدو.

ملیک مممه‌دین دوز اون دؤرد یاشی تامام اولان گئجه او اوتاقدا کی یاتمیشدی،

ائله او اوتاقدا بیر اپپک اولدو، اوچدو گؤیه. نه قدر آختاردیلار، نه

قدر جارچیلار سالدیلار، قاصیدلر گؤندردیلرسه اوشاق تاپیلمادی کی، تاپیلمادی.

بیر ایل کئچدی، ایکی ایل کئچدی، هر یئردن اومید الی اوزولدو، هامی قارا

گئییب ماته‌مه باتدی.

قوجا لعله بو ایشه تاب گتیرمه‌ییب تغییر-لیباس ائله‌دی، چیخدی ملیک

مممه‌دی آختارماغا.

لعله ملیک مممه‌دی آختارا-آختارا گلیب چیخدی ایستانبولا. شهری

گزدی، دولاندی، دولانا-دولانا گلیب چیخدی ایستانبول پادشاهی‌نین سارایی‌نین

قاباغینا. برک قیش ایدی. چوخلو دا قار یاغمیشدی. قارین اوستونده بیر یئره

قان تؤکولموشدو. لعله بونو گؤرجک، ییخیلیب اؤزوندن گئتدی.

سنه خبر وئریم ایستانبول پادشاهی‌نین بیرجه قیزی اولان گولنار خانیمدان.

بو قیز ائله گؤزلدی کی، وصفی عالمی توتموشدو. گولنار خانیم

اوتورموشدو اؤز پنجره‌سی‌نین قاباغیندا، گلیب گئدنه تاماشا ائدیردی. بیر

ده لعله‌نین قیشقیریب اؤزوندن گئتمه‌یین گؤردو. تئز او ساعت آداملارینی

گؤندریب اونو ایچری گتیرتدیردی.

......

آردین اوخو

یئددی داغ آلماسی

یئددی داغ آلماسی

بیری وار ایدی، بیری یوخ ایدی، گونلرین بیر گونونده بیر پادشاه وار ایدی.

بو پادشاهین بیر قیزی وار ایدی، آدی دا پرینوش خانیمدی. پرینوش او قدر

گؤزلدی کی، دونیادا ائله گؤزل قیز یوخدو. اؤلکلردن ییغین-ییغین پادشاه،

وزیر، تاجیر اوغوللاری پرینوش خانیما ائلچی گؤندریردیلر. آمما پرینوش

خانیم هئچ کیمه دیل وئرمیردی.

بیر گون پادشاه، قیزی پرینوشو چاغیرتدیریب خبر آلدی کی:

 

آردین اوخو...

تاختا قێلینج

تاختا قێلینج

بیری وار ایدی، بیری یوْخ ایدی، بیر پادشاهین بیر اوْغلو، بیر ده آروادی وار ایدی.

بیر گۆن بۇ پادشاه اوْغلونو، وزیرینی، وکیلینی گؤتوروب قوْشون ایله شیکارا

چێخیر. خئیلی اوْو ائله‌دیکدن سوْنرا، بیر گؤزل چمنده چادیر قۇروب، اوْتوراق

ائدیرلر.

پادشاهین اوْغلو حیا ائتدیگیندن، اؤز چادیرینی بیر کناردا قۇرور.

پادشاه اوْغلونو چوْخ ایسته‌دیگیندن، تئز-تئز اوْنو یوْخلار. یئنه ده قالخیب

اوْغلونو یوْخلاماغا گئدیر. گلیب چادیرا گیردیکده، باخیب گؤرور کی، چادیرین

دالیندان بیر قێزیل ایلان گیریب اوْغلونو چالماق عۆذره‌دی. تئز پادشاه

باشماغی‌نین بیر تایینی سۇ ایله دوْلدوروب، ایلانین قاباغینا قوْیور. اێلان سۇ

ایچیر قاییدیر. پادشاه اوْغلونو اوْیادیب دئییر:

- اێستکلی اوْغلوم! بیر چؤرگیم اؤوساناتا کئچدی8، قالخ، بۇرادا یاتماق

مصلحت دئییل.

پادشاه احوالاتی اوْنا سؤیله‌یه‌رک، اوْغلو ایله برابر اؤز چادیرینا قاییدیر.

بیر آز سوْنرا کؤچوب شهره گئدیرلر. بۇ احوالاتدان بیر نئچه گۆن سوْنرا،

پادشاهین آروادی برک ناخوْشلویور. اوْغلونو یانینا چاغیریب، اوْنا بئله بیر

وصییت ائدیر:

- اێستکلی اوْغلوم! بۇ خسته‌لیکدن من قالخمایاجاغام، اؤله‌جه‌یم.

من اؤلندن سوْنرا آتان گئدیب باشقا آرواد آلاجاق. تزه آلدیغی آرواد

سنی یوْلا آپارمایاجاق. آتان ایله سنین آراندا زیدلیک دۆشه‌جک، گئت-گئده

زیدلیک آرتاجاق. آتان قئیزه گلیب سنی اؤلدورمک ایسته‌یه‌جک. آتانی اوْ مقاما

قوْیما! باش گؤتور بیر مدت ویلایتیندن چێخ، گئت! یوْلدا هر

کس کی، سنله یوْلداش اوْلدو، چؤرگی یئینده، سن اؤز چؤرگینی اوْرتایا قوْی!

هرگاه یوْلداشین چؤرگین چوْخ حیصه‌‌سینی سنین قاباغینا قوْیسا، اوْنونلا

یوْلداش اوْل، یوْخ، قاباغینا قوْیماسا، اوْندا اوْندان آیریل! بیر ده یوْلداشینلا

بیر چایین کنارینا یئتیشسن، سن اوْنا تکلیف ائله کی، گل دالیما مین،

سنی سۇدان کئچیردیم. اگر اوْ سنی دالینا آلیب، سۇدان کئچیرتسه، اوْندا

اوْنونلا یوْلداش اوْل، یوْخ، سنین دالینا مینسه، اوْنونلا یوْلداش اوْلما، تئز

اوْندان آیریل!

آردین اوخو...

 
  • یارپاقلارین سایی :4
  • 1  
  • 2  
  • 3  
  • 4  
 

وبلاقا گؤره

بو دیل دنیزدی سیزین تک صدفده اینجیسی وار
قیزیلدی سیزده اولان اوزگه‌نین اگر میسی وار
دئسزکی اودلو دیاردی بیزه وطن یاراشار
بیزیم اوجاقلارین آنجاق کور ائیله‌ین هیسی وار
"عقیل"
وبلاق مودیری : نژادمحمد

سون یازیلار

آختارماق

یازارلار

Page Rank بالاجا خوخان آذربایجان تورکجه سینده ایسلام دینی و قرآن کریم