تبلیغات
ایران آذربایجانی تورکجه سینین ادبیات اوتاغی - مطالب ناغیللار
ایران آذربایجانی تورکجه سینین ادبیات اوتاغی
یاشاسین آذربایجان

قونو سلاخلانجی

سلاخلانج

باغلانتیلار

اؤزل یارپاقلار‌

← وبلاق گؤروشلری

  • گؤروشلرین هامیسی :
  • بو گون گؤروشلر :
  • دوننکی گؤروشلر :
  • بو آی گؤروشلر :
  • قاباق آی گؤرو‌شلر :
  • یازارلارین سایی :
  • یازیلارین هامیسی‌نین سایی :
  • سون گؤروش :
  • سون دیَیشمه :

لینکلر‌

آذربایجان ناغیللاری-جانتیق

جانتیق 
بادی-بادی گیریفتار، حامام-حامام ایچینده، خلبیر سامان ایچینده، 
دوه دللکلیک ائلر، کؤهنه حامام ایچینده. قاریشقا شیللاق آتدی، دوه‌نین 
قیچی سیندی. حامامچی‌نین طاسی یوخ، بالتاچی‌نین بالتاسی یوخ، اوردا بیر تازی 
گؤردوم، اونون دا خالتاسی یوخ. عومرومده چوخ شیلاشی یئمیشم، هئچ بئله 
یالان دئمه‌میشم. گونلرین بیر گونونده، مممد نصیر طینینده، بیری 
وار ایدی، بیری یوخ ایدی، اللهدان باشقا هئچ کیم یوخ ایدی. وار-یوخ بیر پادشاه 
وار ایدی. بو پادشاهین هئچ اوشاغی اولمازدی. پادشاه چوخ-چوخ نذیرلر 
وئردی، دوعالار یازدیردی، اوشاغی اولمادی کی، اولمادی. بیر گون پادشاهین قاپیسینا 
بیر درویش گلیب، بیر قسیده‌‌‌ دئدی. پادشاه اونا خلت وئردی. درویش 
گؤردو کی، پادشاه چوخ فیکیرلیدی، دئدی: 
- ائی پادشاه، نییه بئله فیکیرلیسن؟ 
پادشاه دئدی: 
- بابا درویش، منیم هله بو یاشیما قدر هئچ اوشاغیم اولماییب. 
بیلمیرم من اؤلندن سونرا بو دؤولت کیمه قالاجاق. منیم یئریمده 
کیم اوتوراجاق. 
درویش بیر آلما چیخاردیب پادشاها وئردی، دئدی: 
- پادشاه ساغ اولسون، گئجه هرم‌خانایا گئدنده بو آلمانین یاریسین 
سن یئیرسن، یاریسین دا آروادینا وئررسن. بوندان سونرا یقین 
اوشاغین اولار. 
بلی، درویش گئتدی. گئجه پادشاه هرم‌خانایا گئدیب، آلمانین یاریسینی 
اؤزو یئدی، یاریسین دا آروادینا وئردی. بلی، آرادان دوققوز آی، دوققوز 
گون کئچدی، پادشاهین آروادی یوکون یئره قویدو. آروادین بیر اؤلو اوغلو 
اولدو. پادشاها خبر گئتدی کی، قیبله‌ی-عالم ساغ اولسون، بیر اوغلون اولوب، 
آنجاق اؤلودو. پادشاه قوصّه‌‌لندی، اؤز-اؤزونه دئدی: گؤر منیم نئجه بختیم 
یوخدو کی، آخیردا اوشاغیم اؤلو اولدو. یئنه خبر گتیرنلره موشتولوق 
وئردی. پادشاه بورادا اؤز فیکرینده اولسون، سنه کیمدن دئییم، پادشاهین 
آروادیندان. ائله کی، اوشاق آنادان اولدو، آرادان بیر آز کئچندن سونرا 
آرواد بیر دامار دا دوغدو. ماما گؤردو کی، اؤلو اوشاغین دؤشو یاریقدی. 
تئز داماری گؤتوروب اونون دؤشونده اولان یاریغا قویدو، اوشاق آسقیریب دیریلدی. 
او ساعت پادشاها خبر گئتدی کی: 
- قیبله‌ی-عالم ساغ اولسون، ماما اوشاغی دیریلتدی. 
پادشاه چوخ شاد اولدو. خبر گتیرنلره حدّیندن آرتیق موشتولوق 
وئردی. بلی، اوشاغین آدین جانتیق قویدولار. 

آردین اوخو....

آغ قوش

آغ قوش 
بیری وار ایدی، بیری یوخ ایدی، بیر پادشاه وار ایدی. بو پادشاهین آروادی‌نین 
بوینونا نه قدر اوشاق دوشوردوسه، هامیسی آنا بطنیندن گلنده اؤلوردو. 
نه قدر طبیب، طیلسیم، جادو ائلتدیریردیلرسه، هئچ بیر فایدا وئرمیردی. 
گونلرین بیر گونونده یئنه ده پادشاهین زنه‌نی هملی اولور. دوغماغینا 
بیر قدر قالمیش، پادشاه زنه‌نینی اؤز قایناتاسی‌نین یانینا گؤندریر 
کی، بلکه اوردا یاخشی باخالار. گون کئچیر، آی دولانیر، پادشاهین بیر 
اوغلو اولور. بلی، موژده-موژده اوستوندن گلیر. پادشاه زنه‌نینه سیفاریش 
گؤندریر کی، هله بیر نئچه واخت قالسین اوردا، اوشاغین بیر آز سومویو برکیسین، 
گلر، یئنه بیر قضا-قدر اوز وئرر. 

آردین اوخو....

گولنار خانیم

گولنار خانیم

قنداهار پادشاهی‌نین ملیک مممد آدیندا بیر اوغلو وار ایدی.

گؤزللیکده ائله بیر آفتی-زامان ایدی کی، یوسیف کنان اونون الینه سو تؤکه

بیلمزدی. اؤزو ده قنداهار پادشاهی‌نین آمان-زامان بیر دنه اوغلو ایدی.

ملیک مممه‌دی هامیدان چوخ ایسته‌ین قوجا بیر لعله‌سی واردی.

بیر گون لعله بوتون مونججیملری جمعله‌ییب، تاس قوردوروب، رمل

آتدیریب ملیک مممه‌دین باختینا باخدیردی. هامی مونججیملر دئدی کی،

ملیک مممد اون دؤرد یاشینا چاتاندا ایته‌جک، اؤزو ده کی، تاپیلماغی

چوخ چتین اولاجاق.

بلی، بیر-ایکی دسته قوشون حاضرلاندی کی، ملیک مممه‌دی قوروسون.

یازیق اوشاغی تای هئچ یئره قویمادیلار. آمما اولاجاغا چاره یوخدو.

ملیک مممه‌دین دوز اون دؤرد یاشی تامام اولان گئجه او اوتاقدا کی یاتمیشدی،

ائله او اوتاقدا بیر اپپک اولدو، اوچدو گؤیه. نه قدر آختاردیلار، نه

قدر جارچیلار سالدیلار، قاصیدلر گؤندردیلرسه اوشاق تاپیلمادی کی، تاپیلمادی.

بیر ایل کئچدی، ایکی ایل کئچدی، هر یئردن اومید الی اوزولدو، هامی قارا

گئییب ماته‌مه باتدی.

قوجا لعله بو ایشه تاب گتیرمه‌ییب تغییر-لیباس ائله‌دی، چیخدی ملیک

مممه‌دی آختارماغا.

لعله ملیک مممه‌دی آختارا-آختارا گلیب چیخدی ایستانبولا. شهری

گزدی، دولاندی، دولانا-دولانا گلیب چیخدی ایستانبول پادشاهی‌نین سارایی‌نین

قاباغینا. برک قیش ایدی. چوخلو دا قار یاغمیشدی. قارین اوستونده بیر یئره

قان تؤکولموشدو. لعله بونو گؤرجک، ییخیلیب اؤزوندن گئتدی.

سنه خبر وئریم ایستانبول پادشاهی‌نین بیرجه قیزی اولان گولنار خانیمدان.

بو قیز ائله گؤزلدی کی، وصفی عالمی توتموشدو. گولنار خانیم

اوتورموشدو اؤز پنجره‌سی‌نین قاباغیندا، گلیب گئدنه تاماشا ائدیردی. بیر

ده لعله‌نین قیشقیریب اؤزوندن گئتمه‌یین گؤردو. تئز او ساعت آداملارینی

گؤندریب اونو ایچری گتیرتدیردی.

......

آردین اوخو

یئددی داغ آلماسی

یئددی داغ آلماسی

بیری وار ایدی، بیری یوخ ایدی، گونلرین بیر گونونده بیر پادشاه وار ایدی.

بو پادشاهین بیر قیزی وار ایدی، آدی دا پرینوش خانیمدی. پرینوش او قدر

گؤزلدی کی، دونیادا ائله گؤزل قیز یوخدو. اؤلکلردن ییغین-ییغین پادشاه،

وزیر، تاجیر اوغوللاری پرینوش خانیما ائلچی گؤندریردیلر. آمما پرینوش

خانیم هئچ کیمه دیل وئرمیردی.

بیر گون پادشاه، قیزی پرینوشو چاغیرتدیریب خبر آلدی کی:

 

آردین اوخو...

تاختا قێلینج

تاختا قێلینج

بیری وار ایدی، بیری یوْخ ایدی، بیر پادشاهین بیر اوْغلو، بیر ده آروادی وار ایدی.

بیر گۆن بۇ پادشاه اوْغلونو، وزیرینی، وکیلینی گؤتوروب قوْشون ایله شیکارا

چێخیر. خئیلی اوْو ائله‌دیکدن سوْنرا، بیر گؤزل چمنده چادیر قۇروب، اوْتوراق

ائدیرلر.

پادشاهین اوْغلو حیا ائتدیگیندن، اؤز چادیرینی بیر کناردا قۇرور.

پادشاه اوْغلونو چوْخ ایسته‌دیگیندن، تئز-تئز اوْنو یوْخلار. یئنه ده قالخیب

اوْغلونو یوْخلاماغا گئدیر. گلیب چادیرا گیردیکده، باخیب گؤرور کی، چادیرین

دالیندان بیر قێزیل ایلان گیریب اوْغلونو چالماق عۆذره‌دی. تئز پادشاه

باشماغی‌نین بیر تایینی سۇ ایله دوْلدوروب، ایلانین قاباغینا قوْیور. اێلان سۇ

ایچیر قاییدیر. پادشاه اوْغلونو اوْیادیب دئییر:

- اێستکلی اوْغلوم! بیر چؤرگیم اؤوساناتا کئچدی8، قالخ، بۇرادا یاتماق

مصلحت دئییل.

پادشاه احوالاتی اوْنا سؤیله‌یه‌رک، اوْغلو ایله برابر اؤز چادیرینا قاییدیر.

بیر آز سوْنرا کؤچوب شهره گئدیرلر. بۇ احوالاتدان بیر نئچه گۆن سوْنرا،

پادشاهین آروادی برک ناخوْشلویور. اوْغلونو یانینا چاغیریب، اوْنا بئله بیر

وصییت ائدیر:

- اێستکلی اوْغلوم! بۇ خسته‌لیکدن من قالخمایاجاغام، اؤله‌جه‌یم.

من اؤلندن سوْنرا آتان گئدیب باشقا آرواد آلاجاق. تزه آلدیغی آرواد

سنی یوْلا آپارمایاجاق. آتان ایله سنین آراندا زیدلیک دۆشه‌جک، گئت-گئده

زیدلیک آرتاجاق. آتان قئیزه گلیب سنی اؤلدورمک ایسته‌یه‌جک. آتانی اوْ مقاما

قوْیما! باش گؤتور بیر مدت ویلایتیندن چێخ، گئت! یوْلدا هر

کس کی، سنله یوْلداش اوْلدو، چؤرگی یئینده، سن اؤز چؤرگینی اوْرتایا قوْی!

هرگاه یوْلداشین چؤرگین چوْخ حیصه‌‌سینی سنین قاباغینا قوْیسا، اوْنونلا

یوْلداش اوْل، یوْخ، قاباغینا قوْیماسا، اوْندا اوْندان آیریل! بیر ده یوْلداشینلا

بیر چایین کنارینا یئتیشسن، سن اوْنا تکلیف ائله کی، گل دالیما مین،

سنی سۇدان کئچیردیم. اگر اوْ سنی دالینا آلیب، سۇدان کئچیرتسه، اوْندا

اوْنونلا یوْلداش اوْل، یوْخ، سنین دالینا مینسه، اوْنونلا یوْلداش اوْلما، تئز

اوْندان آیریل!

آردین اوخو...

آغ قوش

آغ قوش 
بیری وار ایدی، بیری یوخ ایدی، بیر پادشاه وار ایدی. بو پادشاهین آروادی‌نین 
بوینونا نه قدر اوشاق دوشوردوسه، هامیسی آنا بطنیندن گلنده اؤلوردو. 
نه قدر طبیب، تیلسیم، جادو ائلتدیریردیلرسه، هئچ بیر فایدا وئرمیردی. 
گونلرین بیر گونونده یئنه ده پادشاهین زنه‌نی هملی اولور. دوغماغینا 
بیر قدر قالمیش، پادشاه زنه‌نینی اؤز قایناتاسی‌نین یانینا گؤندریر 
کی، بلکه اوردا یاخشی باخالار. گون کئچیر، آی دولانیر، پادشاهین بیر 
اوغلو اولور. بلی، موژده-موژده اوستوندن گلیر. پادشاه زنه‌نینه سیفاریش 
گؤندریر کی، هله بیر نئچه واخت قالسین اوردا، اوشاغین بیر آز سومویو برکیسین، 
گلر، یئنه بیر قضا-قدر اوز وئرر. 
بونلار بوردا قالماقدا اولسونلار، سنه کیمدن خبر وئریم، پادشاهین 
وزیریندن. 
پادشاهین بیر خبیس وزیری وار ایدی. چوخدان فورصت آختاریردی کی، اونو اؤلدوروب 
اؤزو پادشاهلیغا کئچسین. بو طرفدن گؤردو کی، یوخ، پادشاهین اوغلو 
دا اولدو، تا پادشاه اؤلسه ده بونا بیر شئی چاتمایاجاق، قت ائله‌دی کی، گرک 
پادشاهی اؤلدوروب اونون نسلینی یئر اوزوندن کسه. بلی، بیر گئجه اؤز 
آداملارین گؤتوروب هوجوم ائله‌دی پادشاهین سارایینا. پادشاهی اؤلدوروب اؤزو 
کئچدی اونون یئرینه، ایلشدی تاختدا. 
صاباحیسی گون اؤز آداملاریندان بیر دسته گؤندردی پادشاهین زنه‌نی‌نین 
یانینا. بیر نامه ده یالاندان پادشاهین دیلیندن یازدی کی، بس ناخوشام، 
گرک دورماییب گله‌سن. پادشاهین کولفتی کجاوه‌یه مینیب بو قاصیدلرله 
یولا دوشدو. گلیب بونلار بیر داغین اته‌یینده دوشرگه ائله‌دیلر. 
ائله کی، گئجه یارییا گلدی، بو قاصیدلرین باشچیسی دوروب گلدی پادشاهین 
آروادی‌نین چادیرینا. وزیر اونا تاپشیرمیشدی کی، آروادی دا، اوشاغی دا اوردا 
اؤلدورسون. گلیب گیردی ایچرییه، توتدو آروادین قولوندان. آرواد گؤردو کی، 
بو ملونون فیکری پیسدی، اوزون اونا توتوب دئدی: 
- سن نه کیمسنه‌سن کی، اؤز پادشاهی‌نین آروادینا ساتاشماق ایسته‌ییرسن. 
قاصیدباشی گولوب دئدی: 
- نه پادشاه، نه پادشاه آروادی؟ سنین ارین چوخدان او دونیایا تشریف 
آپاریب. ایندی پادشاه سنین ارینین وزیریدیر. بیز ده اونون امریله گلمیشیک 
کی، سنی ده، اوشاغینی دا گؤنده‌رک آتاسی‌نین یانینا. 
آرواد بونو ائشیتجک اوشاغی قارمالاییب اؤزون آتدی باییرا. قاصیدباشی 
بیر سس ووردو، کئشیکچیلر اویاندیلار، دوشدولر آروادین دالینا. آرواد 
گؤردو یوخ، آز قالیب کی، چاتسینلار، بیر یئره، بیر گؤیه باخیب اوشاغی آتدی 
دره‌یه. کئشیکچیلر چاتیب آروادی اؤلدوردولر، تای اوشاغین دالینجا دره‌یه 
ائنمه‌دیلر، بیلدیلر کی، او دا حؤکمن اوردا داشلارا دیَیب اؤلوب. 
بونلار پادشاهین یانینا گئتمکده اولسونلار، سنه کیمدن خبر 
وئریم، کؤهنه پادشاهین قارداشیندان. 
کؤهنه پادشاهین بیر قارداشی وار ایدی. بو واختلاردا سیاهته گئتمیشدی. 
سیاهتدن قاییدیب ایشی بئله گؤرنده باخدی کی، اونو دا اؤلدوره‌جکلر، 
باشینا بیر آز آدام ییغیب چکیلدی داغا. پادشاه بو احوالاتی ائشیدیب اونون 
دالینجا قوشون گؤندردی. آنجاق قوشون اونو توتا بیلمه‌دی. پادشاهلا اونون 
آراسی نه دوزلدی، نه ده اونو یوخ ائله‌یه بیلدی. وزیر هر نه تدبیر گؤردوسه 
وئجه گلمه‌دی کی، گلمه‌دی. 
کؤهنه پادشاهین قارداشی گئتدیکجه قوتلندی. بونلار بیر گون گلیب 
همین داغا چیخدیلار. عسگرلرین بیری بوردا دره‌ده، شیر یوواسی‌نین قاباغیندا 
اوینایان بیر اوشاق تاپدی؛ گتیردی پادشاهین قارداشی‌نین یانینا. پادشاهین 
قارداشی باخدی کی، بو اوشاغین قولوندا بیر بازوبند وار. بازوبندی 
اوخویوب گؤردو کی، اؤز قارداشی‌نین اوشاغیدی. دئمه بو همین اوشاقمیش کی، 
آرواد بونو دره‌یه آتمیشدی. اوشاق شیر سودو ایله بسلندیگینه گؤره آدین 
قویدولار شیرزاد. اما شیرزاد ائله دوغرودان دا شیر کیمی گومراه بیر 
اوشاقدی. غرض، بو اوشاق ائله خیردالیغیندان آت بئلینده گزدی، اوخ آتدی، 
قیلینج-قمه اویناتدی. اون دؤرد-اون بئش یاشینا چاتاندا عمللی-باشلی بیر 
پهلوان اولدو. 
بو خبر کی، یاییلدی اطرافا، پادشاهین اوغلو تاپیلیب، اؤز عمیسی‌نین یانیندادی، 
بونلارین گوجو بیر آز دا آرتدی. وزیر گؤردو یوخ، ایش خارابدی. تدبیر، 
تدبیر، آخیردا گونلرین بیرینده بؤیوک بیر یایلاق تیکدیردی، گؤزل، هم ده 
حیله‌گرلیکده شیطانا پاپاق تیکن قیزینی دا آپاریب قویدو اورا. 
شیرزاد بیر گون تکباشینا گزمه‌یه چیخمیشدی. گزه-گزه گلیب 
همین بو یئره چیخدی. یامان آجیمیشدی. بیر اوخ قویدو چیلله‌یه، آتیب بیر 
قوش ووردو. قوش گئدیب دوشدو همین بو قیزین قالاچاسینا. شیرزاد بیر کمند 
آتیب قالخدی بورا. باخدی کی، کولفرنگیده بیر قیز اوتوروب، بیر قیز 
اوتوروب کی، سویا دئییر آخما، آیا دئییر باخما. 
قیز شیرزادی گؤرجک گلیب پلتی آچیب اونو دعوت ائله‌دی ائوه. اؤزو ده 
تئز آتاسینا قاصید گؤندردی کی، دورماسین گلسین، شیرزادی سالمیشام جنگه. 
شیرزاد عیش-ایشرته مشغول ایدی، بیر ده پنجره‌یه باخدی گؤردو نه، دریایی- 
لشکردی کی، گلیر. ایشی باشا دوشدو. قالخدی آیاغا. ائله بیرینجی دفعه‌ 
قیزین باشین کسیب اونو جهنمه واصیل ائله‌دی. سونرا تئز اؤزون مهله‌یه 
سالیب میندی آتا. دالین بارییا طرف وئریب باشلادی جنگه. سن اولاسان بیر، 
دوشمن اولا دریایی-عمّان. شیرزادین هر طرفین آلدیلار. شیرزاد باخدی 
کی، داها لاپ گوجدن دوشور. ائله آز قالمیشدی کی، اونون ایشینی بیتیره‌لر، بیر 
ده بیر سس گلدی کی: 

آردی

سیمانین ناغیلی

کیتابین آدی :سیمانین ناغیلی

اولچوسو :500 کیلوبایت

الیفبا : عرب و لاتین الیفباسی

دیل : آذربایجان تورکجه سی

صحیفه لرین سایی : 72 صحیفه

ایندیر(دانلود)

قاراقاشین ناغیلی

 کیتابین آدی :قاراقاشین ناغیلی 

اولچوسو :224 کیلوبایت

الیفبا : عرب و لاتین الیفباسی

دیل : آذربایجان تورکجه سی

صحیفه لرین سایی : 53 صحیفه

ایندیر(دانلود)

آذربایجان ناغیل لاری(2 جیلد)

 کیتابین آدی : آذربایجان ناغیل لاری(2 جیلد)

اولچوسو :  619کیلو بایت

الیفبا : لاتین الیفبا سی

دیل : آذربایجان تورکجه سی

صحیفه لرین سایی : 293  صحیفه

قاراقاشین ناغیلی
سیمانین ناغیلی
تاختا قیلینج
یئددی داغ آلماسی
گولنار خانیم
جانتیق
گول سناوره نئیله‌دی, سناور گوله نئیله‌دی
آغ قوش
اوچ باجی‌نین ناغیلی
شاهزاده موتالیب
ایلیاسین ناغیلی
ناردان قیزین ناغیلی
کل حسنین ناغیلی
آخ-واخ
جئیرانین ناغیلی
ایبراهیم
قارا وزیر
امیراسلانین ناغیلی
کئچلله قاضی‌نین ناغیلی
محمّد 


 
ایندیر(دانلود)

ایلیاسین ناغیلی

  ایلیاسین ناغیلی

بادی-بادی گیریفتار, حامام-حامام ایچینده, خلبیر سامان ایچینده,

دوه دللکلیک ائدر, کؤهنه حامام ایچینده. قارێشقا شێللاق آتدێ, دوه‌نین

قێچێ سێندێ. حامامچێ‌نێن تاسێ یوْخ, بالتاچێ‌نێن بالتاسێ یوْخ, اوْردا بیر تازێ

گؤردۆم, اوْنۇن دا خالتاسێ یوْخ. گۆنلرین بیر گۆنۆنده, مممد نسیر

تینینده. چوْخلۇ شیلاشێ یئمیشم, بئله یالان دئممیشم. بیری وار ایدی, بیری

یوْخ ایدی, اللهدان باشقا هئچ کیم یوْخ ایدی. بیر تاجیر وار ایدی. بۇ تاجیرین

ایلیاس آدلێ بیر قۇلۇ وار ایدی. تاجیر ایلیاسێ اؤز اوْغلۇ کیمی ایستییردی. ایلیاس دا

تاجیری اؤز دده‌سی کیمی.

بیر گۆن تاجیر الینده اوْلان وار-یوْخ مایاسێنێ باتێردێ. تاجیر چوْخ

فیکیرلی-فیکیرلی اوْتۇرمۇشدۇ. ایلیاس بۇنۇ قۆسسه‌لی گؤرۆب یانێنا گلدی, دئدی:

- آغا, نه فیکیر ائلییرسن? دردینی دئ, بلکه چاره ائلدیم.

تاجیر گۆلۆب دئدی:

-آی ایلیاس, سن بیر قۇل آدامسان, منیم دردیمه نه چاره ائلیه

بیلرسن?

ایلیاس دئدی:

- آی آغا, سن اؤزۆن بیلیرسن کی, من سنی نه قدر ایستییرم. بلکه

ایکیمیز بیر یئرده دردۆوه درمان ائلدیک.

تاجیرین چاره‌سی کسیلدی, دئدی:

- ایلیاس, من وار-یوْخ مایامێ باتێرمێشام. ایندی الیمده بیر قپیک

مایام یوْخدۇ. اوْنۇن فیکرینی ائلییرم کی, ایندی من نه ائلیه‌جه‌یم.

ایلیاس دئدی:

- آغا, بۇننان هاسان شئی یوْخدۇ, آپار منی سات, همین پۇلۇ الینده

مایا ائله!

تاجیر گۆلۆب دئدی:

- ایلیاس اول, من سنی چوْخ ایستییرم. نئجه سنی آپارێم ساتێم? بیر

ده کی, سنه نه پۇل وئره‌جکلر کی, من اوْنۇ الیمده مایا ائلییم?

ایلیاس دئدی:

- آغا, من قییمتلی قۇلام. من دۆنیادا اۆچ شئیی یاخشێ تانێیێرام.

آتێ, داش-قاشێ, آدامێ. اوْدۇ کی, آپار منی بازارا, بئش یۆز تۆمن‌دن

آشاغێ ساتما. همین پۇلۇ گتیر, الینده مایا ائله!

تاجیر بیر آز فیکیر ائلدی, گؤردۆ باشقا چاره یوْخدۇ. ایلیاسێ قۇل میدانێنا

آپاردێ. کیم گلیب قییمت سوْرۇشۇردۇ, تاجیر بئش یۆز تۆمن دئییب,

اؤزۆ ده اۆچ شئی بیلدییینی خبر وئریردی.

بۇ واخت پادشاهێن وزیری بۇرادان کئچیردی. بۇ سسی ائشیدیب تاجیرین

یانێنا گلدی, دئدی:

- قۇلۇ نئچه دئییرسن?

- بئش یۆز تۆمنه دئییرم. اؤزۆ ده اۆچ شئیی یاخشێ تانێیێر: آدامێ, آتێ,

داش-قاشێ.

وزیر دئدی:

- سن دلی اوْلمۇسان ندی? هئچ پادشاهێن بۆتۆن قۇللارێ بئش یۆز

تۆمنه دیمز. سن بۇ قۇلۇ بئش یۆز تۆمنه دئییرسن?

تاجیر دئدی:

- بۇ قۇلۇن قییمتی هله بئش یۆز‌دن ده یۇخارێدێ. کئفین چکیر آل,

کئفین چکمیر آلما.

وزیر گئدیب پادشاها اهوالاتێ دانێشدێ. پادشاه دئدی:

- گئت, همین قۇلۇ آل!

وزیر بئش یۆز تۆمن گتیریب تاجیره وئردی, ایلیاسێ آلدێ, گتیریب پادشاهێن

قۇللارێ‌نێن ایچینه اؤتۆردۆ.

تاجیر ده همین پۇلۇ الینده مایا ائلییب آلێش-وئریشینه باشلادێ.

تاجیر آلێش-وئریشینده اوْلسۇن, ایلیاس دا قۇللارێن ایچینده اوْلسۇن, سنه

کیم‌دن دئییم, بیزیم بۇ شهرین جاوان پادشاهێندان. بیر گۆن پادشاها

بیر گؤزل آت گتیردیلر. هامێ آتا باخێب به-به دئدی, هئچ کیم بیر ائییب

تاپمادێ. بیر‌دن پادشاهێن یادێنا دۆشدۆ کی. آخێ منیم بیر قۇلۇم وار,

آتێ چوْخ یاخشێ تانێیێر. تئز امر ائلدی ایلیاسێ گتیردیلر. پادشاه دئدی:

- ایلیاس, بۇ آت نئجه آتدێ?

ایلیاس باش اییب دئدی:

- قیبلئیی-عالم ساغ اوْلسۇن, بۇ آتا هئچ بیر سؤز یوْخدۇ. آت بیرینجی آتدێ.

اما بۇنۇن بیر ائیبی وار کی, سۇیا گیرسه یاتار.

هامێ دئدی:

- هئچ ائله شئی اوْلماز.

ایلیاس دئدی:

- پادشاه ساغ اوْلسۇن, منیم دؤولتیم یوْخدۇ, آنجاق باشێمێ گیروْو

قوْیارام. آتێ سالاق سۇیا, اگر یاتماسا منیم بوْینۇمۇ وۇرۇن!

بلی, آتێ میندیلر, سۇیا وۇردۇلار. آت سۇیا گیرن کیمی یاتدێ. هامێ

متتل قالدێ.

آردین اوخو....

دوستلوغون سیرری

دوستلوغون سیرری
بئله روایت ائلییر‌لر کی, بیر پادشاهین گؤزونون آغی-قاراسی ملیک
آدلی بیرجه اوغلو وار ایمیش.
بیر گون ملیک آتا مینیب دنیز قیراغی ایله گئدیرمیش, بیر ده گؤرور کی,
اوز مئحتر‌لری ایله قونشو‌لاری کئچل مممد سویون قیراغیندا دالاشیر‌لار.
ملیک بون‌لاری آرالاش‌دیریب دئییر:
- نیینیز آرتیق دوشوب کی, بیر-بیرینیزی قیریرسینیز?
مئحتر دئییر:
- آغا, من گؤردوم کی, دریانین اوزونده بیر ساندیق او یانا-بو یانا
لنگر وورور. گیردیم اونو چیخارتماغا, کئچل مممد اوزونو یئتیریب باشلادی
کی, ساندیغی اولجه من گؤرموشم, ایندی اونون اوستونده دالاشیریق.
ملیک چیخاردیب بون‌لارین هرسینه بئش مانات پول وئریب ساندیغی
اونلار‌دان آلدی. بیر آز گئدن‌دن سونرا اوز-اوزونه دئدی:
- آچیم گؤروم بونون ایچینده نه وار کی, اونو دنیزه آتیب‌لار?
اوغلان بو فیکیرله ساندیغین آغزینی آچدی. گؤردو ایچینده بیر بالاجا دا
ساندیق وار. اونون دا آغزینی آچدی, گؤردو بونون دا ایچینده بیر ساندیق وار,
بئله-بئله اوغلان اوچ ساندیق آچدی, آخیرینجی ساندیغین آغزین قال‌دیراندا گؤردو
ایچینده یازی‌لی بیر مکتوب وار. مکتوبدا یازیلمیشدی: “حر کس حقیقی
دوستلوق ائلمیین سیررینی اویرنمک ایستییرسه, اوچ قوجا قلچسینه گئتسین”.
اوغلان مکتوبو اوخویوب قورتاران کیمی آتاسینین یانینا گئدیب دئییر:
- آتئیی-مئهریبان, منه ایجازه وئر ئوزاق بیر سفره چیخیم.
پادشاه دئییر:
- اوغول, خئییر اولسون, دئ گؤروم سفرین هارا‌دیر?
اوغلان دینمیر. آتاسی یئنه سوال وئریر. اوغلان گؤرور کی, آتاسی ال چکمک
ایستمیر. اودور کی, مکتوب احوالاتینی آتاسینا دانیشیر. پادشاه گولوب دئییر:
- هانسی عقلسیز آدامسا یازیب آتیب, سن ده اونون سؤزو ایله یئرین‌دن
اویناییب گئدیر‌سن. دوستلوق ائلمیین سیررینی مگر بورادا اویرنمک
اولماز?
اوغلان گؤردو کی, آتاسی اونون گئتمیینه راضی اولمایاجاق, اودور کی, بیر
سؤز دئمییب, دوز گلدی سارایین قم اوتاغینا. بورا ائله بیر یئر ایدی کی,
کیمین دردی-قمی اولسایدی گیریب اورادا آغلاییب گؤز یاشی تؤکردی. بو
اوتاقدا هر نه وارسا قارا رنگدیدی. اوغلان دا قارا پالتار گئییب دوز بیر
هفته بورادا قالدی. او قدر آغلاییب آه-زار ائلدی کی, گؤزونون یاشین‌دان
الیندکی کاغیذین رنگی گئتدی.
بو احوالات‌دان سونرا پادشاه ها گؤزله‌دی, اوغلون‌دان سوراق چیخمادی.
باشلادی‌لار اونو آختارماغا. آخیردا گلیب ملیکی سارایین قم اوتاغیندا
تاپدی‌لار. او ساعت گئدیب پادشاها خبر آپاردی‌لار. پادشاه وزیری ده گؤتوروب
اوغلونون یانینا گلدی. گؤردو ملیکین رنگی قاچیب, آغلاماق‌دان گؤز‌لری
شیشیب. پادشاه سوروشدو:
- اوغول, نه اولوب, دردین ندیر?
ملیک دئدی:
- حقیقی دوستلوق ائلمیین سیررینی اویرنمک اوچون ئوزاق سفره گئتمییمه
سن‌دن ایجازه ایسته دیم, وئرمه‌دین. نه قدر ائلدیم کی, اوزومو
اله آلام, گوجوم چاتمادی. اودور کی, گلیب قم اوتاغینا گیردیم.
آتاسی اوغلونا نه قدر نصیحت ائلدیسه, گؤردو کار ائله میر, آخیردا
علاجی کسیلدی, وزیری ایله مصلحتلشیب بو قرارا گلدی‌لر کی, یوز آتلی ایله
ملیکی یولا سالسین‌لار. اوزو ده آتلی‌لارا اویرتدی کی, بیر آز گئدن‌دن سونرا
آتلاری سولاماق بحانسیله قاچیب هرنیز بیر طرفه داغی‌لارسینیز, آخیردا
اوغلوم باخیب گؤرر کی, تک قالیب, علاجی کسی‌لر, او دا قاییدیب گلر.
پادشاه اوغلونا ایجازه وئریب اونو یوز آتلی ایله یولا سالدی. اوغلان ائله بیر
آز گئتمیشدی کی, بیر‌دن کئچل مممه‌ده راست گلدی. اونون قاباغینی کسیب
دئدی:
- آی مممد, دنیز‌دن تاپدیغینیز ساندیغین ایچین‌دن بیر مکتوب
تاپمیشام. او مکتوبدا یازیلان سؤز‌لری اویرنمیه گئدیرهم. گل منیمله
گئدک.
کئچل دئدی:
- یاخشی, قوی اوندا گئدیم آتا-آناما دئییم گلیم.
کئچل مممد آتا‌سین‌دان ایجازه آلدی, آناسی اونون خورجونونا بیر
آرپا چؤریی قویوب یولا سالدی. کئچل مممد دوز گلدی ملیکین
یانینا. باشلادی‌لار گئتمیه. منزیلبمنزیل یول گئتدی‌لر. بیر قدر
گئدن‌دن سونرا کئچل مممد باخیب گؤردو کی, آتلی‌لار ائله هئی آزالیر,
اما اوستونو وورمادی کی, بلکه ملیک احوالاتی بئله گؤروب گئری قاییدا.
بیر ده ملیک دؤنوب گئری باخاندا گؤردو کئچل مممه‌دله ایکیسی قالیب.
کئچل مممد دئدی:
- قوشونسوز تکجه گئتمکله نه ائلیه بیلریک, گل بیز ده قاییداق.
ملیک دئدی:
- کئچل قارداش, گؤرورم قاچماق‌دان اوتری اوره یین نانه یارپاغی
کیمی اسیر, ایستییر‌سن سن ده قاییت, من تکجه گئدرم.
یاخشی دئییب‌لر, کئچل چوخبیلمیش اولار, بیر آلت‌دان یوخاری باخیب دئدی:
- آغا ملیک, یادین‌دان چیخارتما کی, او یئری تاپسام تکجه من تاپاجاغام.
اودور کی, من سنینله گئدجیم.
بون‌لار باشلادی‌لار گئتمیه. آز گئتدی‌لر, چوخ گئتدی‌لر, دره-تپه
دوز گئتدی‌لر, اورادا آینان, ایلنن, بورادا شیرین دیلنن, بیر ده گؤردو‌لر کی,
چؤرک‌لری قورتاریب.
ملیک دئدی:
- ایندی بیز نئیلیک, چؤرییمیز قورتاریب, آجین‌دان اولوروک.
کئچل مممد دئدی:
- آنام خورجونوما بیر آرپا چؤریی قویوب, گل اونو یئیک.
کئچل چؤریی چیخارتدی, باشلادی‌لار یئمیه, ملیک عومرونده آرپا
چؤریی یئممیشدی, اما علاجی یوخ ایدی. آرپا چؤریینی یئییب قورتاران‌دان
سونرا باشلادی‌لار یئنه یول گئتمیه. گئتحاگئت گلیب بیر داغا چاتدی‌لار.
داغی آشیب بیر گوللوک-چمنلیک یئره چیخدی‌لار. بورا ائله بیر یئر ایدی
کی, باغ-گولوستان بونون یانیندا هئچ نه. بورادا او قدر گول-چیچک
واردی کی, هره‌سی مین رنگه چالیردی, اترین‌دن آدام والئه اولوردو. بولبول,
توراج, ککلیک, قیرقووول, بیل‌دیرچین, توووز قوشو, طوطو قوشو, هامیسی بیر-بیرینه
قاریشمیشدی. مارال, جئیران, جویور ده کی, لاپ ایسته دییین قدر. بورادا جان
درمانی دئسن, واردی. باغین لاپ اورتا‌سیندا بیر کرپیجی قیزیل‌دان, بیر کرپیجی
گوموش‌دن بیر سارای تیکیلمیشدی کی, باشی گؤیده بولود‌دان نم چکیردی.
اما بورانین دؤرد طرفینده ائله بیر قالاچا وار ایدی کی, باخاندا آدامی
واحیمه باسیردی.
ملیک دئدی:
- گؤرور‌سن, نه گؤزل یئردی, لاپ اولوب قالماغا دیر.
کئچل مممد دئدی:
- آغا ملیک, هله بیلمک اولماز, او قالاچا‌دان منیم گؤزوم سو
ایچمیر.

ناغیلین آردین اوخو

قشنگ خوروز

قشنگ خوروز
بیری وار ایدی, بیری یوخ ایدی, کئچمیش زامان‌لاردا ایکی ئوزاق قوحوم
وار ایدی. بون‌لارین بیری یوخسول ایدی, اوزو ده مئشده, بالاجا بیر داخمادا
اولوردو. او بیری دؤولت‌لی ایدی, شهرده, قشنگ, بؤیوک بیر ائوده
یاشاییردی.
گون‌لرین بیر گونو یوخسول, مئشه ایله گئدیردی, بیر‌دن آغاجین آلتیندا
پاریلدایان, قیزیل بیر للک گؤردو. باشینی قال‌دیریب یوخاری باخدی,
گؤردو کی, آغاجدا قویروغو قیزیل بیر خوروز اوتوروب. یوخسول قیزیل للیی
گؤتوروب بیرباش شهره, دؤولت‌لی قوحومونون یانینا گتیردی.
دؤولت‌لی قیزیل للیه باخیب دئدی:
- گؤزل شئی‌دیر! آنجاق دیری چوخ آزدیر. من سنه بو للک
اوچون بیرجه مانات گوموش پول وئررم.
یوخسول ایسه عومرونده قیزیل گؤرممیشدی, اونا گؤره ده بیلمیردی
کی, بو للک خالص قیزیل‌دان‌دیر. او ائله بیلیردی کی, بو نه ایسه قشنگ
پاریلدایان بیر شئی‌دیر. اونا گؤره ده او ائله بیلدی کی, اونون قیزیل للیی
اوچون گوموش پول یاخشی قییمت‌دیر.
یوخسول کیشی او بیری گون ائنه ده مئشیه گئتدی, همین آغاجین آلتین‌دان
ائنه ده قیزیل للک تاپدی. اونو گؤتوروب دؤولتلی‌نین یانینا
آپاردی, ائنه ده عوضینده گوموش پول آلدی. بیر نئچه گون دالبادال
بو احوالات بئله باش وئردی.
بیر دفعه ده یوخسول همیشکی کیمی آغاجین آلتینا گلدی, گؤردو
کی, قیزیل قویروقلو خوروز برک‌دن بانلاییر:
- کیم منیم اوره ییمی یئسه, او آدام هر گون بالیشینین آلتین‌دان
ایکی قیزیل یومورتا تاپاجاق! کیم منیم اوره ییمی یئسه, او هر گون
بالیشینین آلتین‌دان ایکی قیزیل یومورتا تاپاجاق!
یوخسول بو ایشه لاپ مات قالدی, تئز شهره قاچیب احوالاتی دؤولت‌لی
و آجگؤز قوحومونا دانیشدی. او ایسه جاوابیندا دئدی:
- اگر سن او خوروزو منیم اوچون توتا بیل‌سن, سنه اونون اوچون
مین گوموش پول وئررم!
یوخسول اونونلا بئله شرط کسدی:
- سنین پولون منه لازیم دئییل! یاخشیسی بودور کی, منیم ایکی
اوغلومو اوز یانینا آپاریب اونلارا اوز اوشاق‌لارین کیمی باخ. من ایستییرم
کی, اونلار عقل‌لی و ساواد‌لی اولسون‌لار.
دؤولت‌لی او ساعت سؤز وئردی کی, یوخسولون اوشاق‌لارینی یانینا آپارار
و اونلاری اوخوماغا قویار. بونون عوضینده ده یوخسول کیشی دؤولتلییه
سؤز وئردی کی, قیزیل قویروقلو خوروزو اونون اوچون توتسون.
یوخسول سحر تئز‌دن مئشیه, همین آغاجین آلتینا گلدی.
قشنگ خوروز دینمه‌دن یوخاری‌دان اونا باخیردی.
یوخسول نیشان آلیب اوخلا قیزیل قویروقلو خوروزو ووردو. یوخسول
کیشی خوروزو گؤتوروب اوغلان‌لارینا وئردی, اونلاری شهره, دؤولت‌لی قوحومونون
یانینا گؤندردی.
دؤولت‌لی قیزیل قویروقلو خوروزو گؤروب سئوینجین‌دن آتیلیب-دوشدو.
او اوزو خوروزون قیزیل للک‌لرینی بیر-بیر یولدو, سونرا اونو یوخسولون
اوغلان‌لارینا وئردی کی, خوروزو بیشیریب ناهارا اونا وئرسین‌لر. او,
اوزلویونده بئله قرارا گلمیشدی کی, یوخسولون اوغلان‌لارینی درسه
گؤندرمیجک: قوی اونون یانیندا قالیب نؤکرچیلیک ائلسین‌لر!
اوغلان‌لار متبخه کئچیب خوروزو بیشیرمیه باشلادی‌لار. اونلار
چالیشیردی‌لار کی, خؤرک داد‌لی اولسون, دؤولت‌لی قوهوم‌لاری راضی قالسین.
آنجاق بخت‌لری گتیرمه‌دی: خوروز بیشیب لاپ حاضر اولانا یاخین, اتین
سویو بیر‌دن قازاندا پیققاپیق قاینادی, خوروزون اوره یی سیچراییب
بیرباش دؤشمه‌نین اوستونه دوشدو!
- وای, بو نه بلا‌دیر باشیمیزا گلدی! - دئیه بؤیوک قارداش دیللندی.
- ایندی گرک خوروزون اوره یینی توللایاق. بیر باخ ها, لاپ چیرک‌لی
دؤشمه‌نین اوستونه دوشوب. ایندی اونو گؤتوروب آغامیزا وئره بیلمریک...
کیچیک قارداش ایسه یالواردی:
- خوروزون اوره یینی توللاما! من سحر‌دن هئچ بیر شئی یئمه میشم.
یاخشیسی بودور کی, گل اونو گؤتوروب یویاق, اوزوموز یئیک.
قارداش‌لار بئله ده ائلدی‌لر: خوروزون اوره یینی یویوب ایکی یئره
بؤلدو‌لر, هره بیر پارچاسینی یئدی. سونرا دا بیشمیش خوروزو دؤولت‌لی
قوهوم‌لارینین یانینا آپاردی‌لار.
دؤولت‌لی او ساعت باشلادی بوشقابین ایچینی قوردالاماغا کی, خوروزون
اوره یینی تاپسین. آختاردی, آختاردی, خوروزون هامیسینی یئدی, آنجاق
اوره یی هئچ یئرده تاپمادی. اوندا دؤولت‌لی, اوزونو قارداش‌لارا طوطوب
سوروشدو:
- خوروزون اوره یی هانی? اونو نه نئیلمیسینیز?
قارداش‌لار بو واخت احوالاتی اولدوغو کیمی اونا دانیشدی‌لار.
تاماحکار دؤولت‌لی اونلارین الین‌دن ائله حیرصلندی کی, آغاجی گؤتوروب
اونلارین ایکیسینی ده ائودن قوودو. قارداش‌لار آغلایا-آغلایا
مئشیه, اوز یوخسول, بالاجا کوما‌لارینا قاییتدی‌لار. اونلار هئچ باشا
دوشه بیلمیردی‌لر کی, بیر خوروزون اوره یی ندیر کی, اونون اوستونده
دؤولت‌لی بو قدر حیرصلنیب اونلاری ائوین‌دن قوودو.
گئجه کئچدی, سحر قارداش‌لار هره‌سی اوز بالیشینین آلتین‌دان بیر
قیزیل یومورتا تاپدی. اونلار قیزیل یومورتا‌لاری دا گؤتوروب آتا‌لارینین
یانینا گئتدی‌لر و باش‌لارینا گلنی اونا دانیشدی‌لار.
آتاسی اونلارا دئدی:
- منیم او دؤولت‌لی قوحوموم‌دان اوره ییم برک اینجیدی, سیزی
ائوین‌دن قوودوغو اوچون من بو پاریلدایان یومورتا‌لاری هر کس
اولسا ساتارام, تکجه اونا یوخ.
ائله بو واخت یاخینلیق‌دان گزرگی بیر تاجیر کئچیردی. یوخسول کیشی
یومورتا‌لاری گؤتوروب اونون یانینا گئتدی. تاجیر دئدی:
- آ, بو یومورتا‌لار کی, خالص قیزیل‌دیر! من بو قیزیل یومورتا‌لارا
گؤره سنه یاخشی پول وئررم.
تاجیر بونو دئییب یوخسولون اتیینه او قدر پول تؤکدو کی, او,
هئچ عومرونده بو قدر پول گؤرممیشدی.
یوخسول کیشی آنجاق ایندی باشا دوشدو کی, دؤولت‌لی قوحومو اونو
همیشه آلدا‌دیرمیش, - قیزیل للک اوچون اونا گوموش پول وئریردی.
“ئیبی یوخدور! - دئیه یوخسول اوز-اوزونه دوشوندو. - بیز‌لرده بیر
مسل وار, دئیر‌لر کی, باشقاسینی آلدا‌دان اوزو ده آلدانار. ائله
بئله ده اولدو.
او گون‌دن بری قارداش‌لار هر گون اوز بالیش‌لارینین آلتین‌دان هره‌سی
بیر دنه قیزیل یومورتا تاپیردی‌لار. آتاسی بو قیزیل یومورتا‌لاری
یاخشی قییمته ساطیردی. اونلار ایندی لاپ یاخشی دولانیردی‌لار. آنجاق ان
باشلیجاسی او ایدی کی, قارداش‌لار اوز آرزو‌لارینا چاتمیشدی‌لار: ایندی اونلارین
ایکیسی ده علم اویرنیردی و خئیلی شئی ده اویرنه بیلمیشدی‌لر.

 

آذربایجان ناغیل لاری(1 جلد)

 کیتابین آدی : آذربایجان ناغیل لاری(1 جلد)

اولچوسو :  727 کیلو بایت

الیفبا : لاتین الیفبا سی

دیل : آذربایجان تورکجه سی

صفحه لرین سایی : 360  صفحه

موندریجات

رئداکتور‌دان

آذربایجان ناغیل‌لاری حاقیندا

زمانه‌نین حؤکمو

گؤی مینجیخ

کئچل محمّد

ملیک مممه‌دله ملیک احمد

آخوای

بختییار

آوچی محمّد

قوش دیلی بیلن ایسکندر

نار قیز

کیچیک شاهزاده

ملیک محمّد

تاختا قیلینج

سودمن

گول سومانا نئیله‌دی?

گول و ساناوار

بولود

فراستسیز اوغول

پئشه دالینجا

اوچ باجی

لالا و نرگیز

مردنن نامردین ناغیلی

ایسکندر

شمسی قمر

ملیک جمعیلین حکایه‌سی

دمیردیش قیز

یئددی قارداش‌لار

دونیا گؤزه‌لی

موختارین حکایه تی

بارخودارین باختی

تنبل احمد

شاهشونقار

تلیم‌لی پیشیک

قارا آت

تویوق بیر قیلچلیدی

نازیکبه‌دن

پینچی محمّد

داد خانپری‌نین الین‌دن

درزی‌نین شاگیردی

اوچ شاهزاده

هازارانداستان بولبولو

آرمود بی

جیک-جیک خانیم

دانا, کئچی و قویون

قیزیل ایلان

جیرت‌دان

هاخنزر

کئچلین دیوانی

ئوستا عبدالله

ایکی آروادین ایشلیی

آلتی دول آرواد

ذرنیگار

نوخودو کئچل

ابولقاسیم

شاه عباسین اوغلو

خوشقه‌دم

کئچلله تاجیر

ایندیر(دانلود)

احمد ایله عدالت داستانی

 کیتابین آدی : احمد ایله عدالت داستانی

یازان : علیرضا ذیحق

اولچوسو :  358 کیلو بایت

الیفبا : عرب الیفبا سی

دیل : آذربایجان تورکجه سی

صفحه لرین سایی : 26  صفحه

ایندیر(دانلود)

اصلی کرم

کیتابین آدی :اصلی کرم

اولچوسو :  1 مگا بایت

الیفبا : عرب الیفباسی و لاتین الیفباسی

دیل : آذربایجان تورکجه سی

صفحه لرین سایی : 213 صفحه

ایندیر(دانلود)

________________________________________

کیتاب عنوانی : اصلی کرم

کیتابین فورما سی  : جاوا

ساپورت ائدن قولاغ جیق لار (موبایل تلفون لاری):بوتون قولاغ جیق لار کی جاوا پروگرمین ساپورت ائده لر

اولچوسو : 174 کیلو بایت

ایندیر(دانلود)

 
  • یارپاقلارین سایی :2
  • 1  
  • 2  
 

وبلاقا گؤره

بو دیل دنیزدی سیزین تک صدفده اینجیسی وار
قیزیلدی سیزده اولان اوزگه‌نین اگر میسی وار
دئسزکی اودلو دیاردی بیزه وطن یاراشار
بیزیم اوجاقلارین آنجاق کور ائیله‌ین هیسی وار
"عقیل"
وبلاق مودیری : نژادمحمد

سون یازیلار

آختارماق

یازارلار

Page Rank بالاجا خوخان آذربایجان تورکجه سینده ایسلام دینی و قرآن کریم