تبلیغات
ایران آذربایجانی تورکجه سینین ادبیات اوتاغی - مطالب آنا
ایران آذربایجانی تورکجه سینین ادبیات اوتاغی
یاشاسین آذربایجان

قونو سلاخلانجی

سلاخلانج

باغلانتیلار

اؤزل یارپاقلار‌

← وبلاق گؤروشلری

  • گؤروشلرین هامیسی :
  • بو گون گؤروشلر :
  • دوننکی گؤروشلر :
  • بو آی گؤروشلر :
  • قاباق آی گؤرو‌شلر :
  • یازارلارین سایی :
  • یازیلارین هامیسی‌نین سایی :
  • سون گؤروش :
  • سون دیَیشمه :

لینکلر‌

4. بو گون یئددین اولدو

4. بو گون یئددین اولدو

آنام اؤلدومو؟

نه تئز اللرینی اوزدون دونیادان،

بالانی تک قویوب هارا گئتدین سن؟

نئجه یوخ اولورموش بیر آندا اینسان،

ائله بیل دونیادا هئچ یوخ ایمیشسن.

گونش قوروب ائتدی... اوتاق قارالدی،

بیر آندا یوخ اولدون سن خیال کیمی.

ایندی دوشونورم: سندن نه قالدی،

کؤنلومده خاطیرن قارا خال کیمی.

منی بویا-باشا یئتیردین، آنا

بیزه بورجلو بیلدیک هر زامان سنی.

سن منی دونیایا گتیردین، آنا،

منسه یولا سالدیم دونیادان سنی.

سن منه بئشیکده لایلای چالمیسان

بو گون لایلای چالیم سنه مندمی؟

سنین شیرین-شیرین لایلالارینی

من سنه قایتاریم جنازندمی؟

"یوخون شیرین اولسون" - دئیردین منه،

"یوخون شیرین اولسون" - دئییممی سنه؟

گرک من باشینا دؤنم-دولانام،

منی حیات اوچون

یاتیران آنام،

سؤیله اؤلومچون

نئجه یاتیریم

سنی من بو گون؟

بو نئجه دونیادیر، آنلامیرام من،

جیلوه‌سی جوربجور، رنگی جوربجور.

دونن نفه‌سییله سنی ایسیدن

بو گون بوزا دؤنوب، داشا دؤنوبدور.

بو نئجه دونیادیر،

اینسان اوغلونون

خیالی گؤیده‌دیر، اؤزو یئرده‌دیر،

ساغ ایکن چیینینده حیاتین یوکو

اؤلنده جسه‌دی چیگینلرده‌دیر...

بو نئجه دونیادیر، بو نئجه دونیا،

اؤلومو حقیقت، حیاتی رؤیا.

دردیمین، قمیمین سندین اورتاغی،

نییه اوز دؤندردین، بس نییه مندن؟

"دردین منه گلسین!" - دئیردین آخی،

نییه درد جالادین دردیمه بس سن؟...

آنام، هئچ کس سنی اینجیتمه‌میشدیر،

من سنی،

من سنی اینجیدن قدر.

ایندی کیمه آچیم دردیمی بیر-بیر،

کیم منیم دردیمه یانار سن قدر؟

ائوین هر کونجونده گؤرونور یئرین.

گؤزوم آختارجیدیر، آنا، آی آنا.

"ننم هانی؟" - دئییر کؤرپه آذرین.

من نه جاواب وئریم اونا، آی آنا؟

بیرمیرم، بیلمیرم بو اؤلوم نه دیر.

حیات وار ایکن؟

نفه‌سین، آی آنام، هله ائوده‌دیر،

اؤزون یئر آلتیندا داشا دؤنموسن.

بو گون یئددین اولدو...

آنام، یئددی گون،

بیزیمله برابر آغلار اوتاقلار.

سنه،

یالنیز سنه،

سنه دئمکچون

کؤنلومده نه قدر منیم سؤزوم وار.

"کیملری چاغیراق بو گون یئددییه؟

" خالالار، باجیلار سوروشور مندن.

آنامدان سوروشاق، او بیلر دئیه،

سنین اوتاغینا اوز طوطورام من.

آنام، تاپشیریلدین آنا تورپاغا،

بو اؤلوم، سینه‌مه چکدی داغ منیم.

سن منیم آرخامدا بنزردین داغا،

ائله بیل آرخامدان اوچدو داغ منیم.

قیزیمین آدیدیر سنین اؤز آدین.

بو دا گؤز داغیدیر منه بو گون ده.

سون دفعه‌ سن منه باخیب آغلادین.

صورتیم مزارا گئتدی گؤزونده...

عومرو باشا ووردون آلتمیش یاشیندا.

آلتمیشین اوستونده دوروب یاشین دا.

آرتیق سنین اوچون دایانان زامان

منیمچون دولانیر...

گون اولور آخشام.

واخت کئچیر، سن مندن اوزاقلاشیرسان،

من سنه گونبگون یاخینلاشیرام.

فئورال، 1963

Latıncə

زامان

زامان

بیر آی تامام اولدو، دوز بیر آی،

بیر گون

گلدیم قبیریستانا...

آناملا دئییل،

اونون باشداشییلا گؤروشمک اوچون.

دوزو گؤزلریمه اینانمادیم من،

بیر حئیرت دالغاسی اؤتدو سینمدن.

یاخشی یادیمدادیر...

دفن ائدیلنده

سونونجو قبیردی آنامین قبری.

قبیرله دولودور ساغ-سولو ایندی.

ندن مزارلیقدا واخت دوشمور یادا؟

دئمه او بوردا دا، بوردا دا وارمیش!

اؤلولر مسکنی - مزارلیقدا دا

زامان، قدم-قدم آددیملاییرمیش!..

Latıncə

باشداشی

باشداشی

آنامی دفه ائتدیک...

تؤکولدو دن-دن

گؤزومون یاشی،

همین گون مزارین باش تریندن

آنامین یئرینه قالخدی باشداشی.

آنامین عوضی باشداشی اولدو،

کؤلگه‌سی اؤزویله یاناشی اولدو...

اؤلدومو؟

ائله بیل او یوخموش اصلا،

داشلارین اوستده‌کی نئچه یازییلا

سئچیلیر اینسان

باشقالارمدان.

Latıncə

آنام اؤلدو!

آنام اؤلدو!

سون نفس،

سون هیچقیریق،

سون نیدا!

بیزه دئدی الویدا!

بیر ساعت اwل

دویان،

حیسس ائله‌ین

بیر اینسان

یاتاغیندا داش اولدو.

هئچلییه دوغرو آخان

بیر آخینا قوشولدو.

آنامین اؤلوموندن

بیر آن کئچیب،

آنجاق او،

داش اولوب اینسان ایکن،

اؤز-اؤزونو دانیبدیر.

بیرجه آندا

او بیزدن

مین ایل آرالانیبدیر.

ائله بیل زامان بیزه

بو اؤلوملر،

اؤلوملر،

آرخاسیندان هئی گولور.

کیم دئییر کی، واخت -

زامان

ساعت ایله اؤلچولور؟!

Latıncə

آنا

بیر جوجوق ایدیم یئره گومدیلار سنی

حیاتا قانادسیز آتدیلار منی

باخ نئجه پوزولوب عمرین گلشنی

حیات سن سیز منه زنداندیر آنا!

قوینوندا بسله نر گوزل دیلكلر

لاییقدیر سجده یه سنه ملكلر

نرده سن، گوزلریم هپ سنی بكلر

باخ اولادین ناسیل گریاندیر آنا!

سن بیر گونش ایدین، دوغدوندا باتدین

یازیق اولادینی غملره آتدین

بیر جواب وئر، هانكی مرادا چاتدین

تورپاقلاردا نئچه زماندیر آنا!؟

بیر آه چكسم سنسیز قوپمازمی طوفان؟

عزیزیم آنا جان، گوزوم آنا جان

یوموق گوزلرینی آچ دابیر اویان

ایندی زمان باشقا زماندیر آنا!

ییخیلیب پایینه اولمك ایسته رم

آنالیق مهرینی گورمك ایسته رم

سنی گورمك ایچون اولمك ایسته رم

تسللیم آه ایله فغاندیر آنا!

وبلاقا گؤره

بو دیل دنیزدی سیزین تک صدفده اینجیسی وار
قیزیلدی سیزده اولان اوزگه‌نین اگر میسی وار
دئسزکی اودلو دیاردی بیزه وطن یاراشار
بیزیم اوجاقلارین آنجاق کور ائیله‌ین هیسی وار
"عقیل"
وبلاق مودیری : نژادمحمد

سون یازیلار

آختارماق

یازارلار

Page Rank بالاجا خوخان آذربایجان تورکجه سینده ایسلام دینی و قرآن کریم