تبلیغات
ایران آذربایجانی تورکجه سینین ادبیات اوتاغی - مطالب حکیم سید ابولقاسم نباتی
ایران آذربایجانی تورکجه سینین ادبیات اوتاغی
یاشاسین آذربایجان

قونو سلاخلانجی

سلاخلانج

باغلانتیلار

اؤزل یارپاقلار‌

← وبلاق گؤروشلری

  • گؤروشلرین هامیسی :
  • بو گون گؤروشلر :
  • دوننکی گؤروشلر :
  • بو آی گؤروشلر :
  • قاباق آی گؤرو‌شلر :
  • یازارلارین سایی :
  • یازیلارین هامیسی‌نین سایی :
  • سون گؤروش :
  • سون دیَیشمه :

لینکلر‌

دوشه بیر ده نظریم مئهری-روخی-جانانه،

دوشه بیر ده نظریم مئهری-روخی-جانانه،

کافیرم، مئیل ائله‌سم سروو گولو ریحانه.

بو نه سؤزدور کی، منیم عشقیمی ترک ائیله‌میسن،

الله، الله، سؤزه باخ، سئیر ائله بیر بؤهتانه!

تؤوبه قیل، تارییه باخ، بیر ده چئویرمه اوزونو،

باخما دوشمن سؤزونه، لعن ائله بیر شیطانه.

هانی زاهید کی، گله بیر گؤره ترسا قیزینی،

اؤزونو ضبط ائلییه، تعنه وورا صنعانه‌‌.

ایسته‌رم، اطلسو دیبا گئیه‌سن قامتینه،

مست تاووس کیمی چتر اوراسان هر یانه.

بئلینه تیرمه ساریب، اوجلارین افشان ائده‌سن،

آچیلیب گول کیمی، مینّت قویاسان هر جانه.

نظرینده دوزوله، صف چکه خودّامو کنیز،

سن اؤزون تخته چیخیب ایلشه‌سن خاقانه.

عشق اودون دوغرو ایمیش، گیز‌له‌مک اولماز، بالله،

آلیشیب اؤز-اؤزونه، دوشدو سؤزوم داستانه.

یازیغیم گلدی، نباتی، سنه، یاندی اورگیم،

حئیفسن، چوخ دا دخی گزمه بئله دیوانه.

سرمست یێخیلدیم گئنه مئیخانه‌لر ایچره،

سرمست یێخیلدیم گئنه مئیخانه‌لر ایچره،

اوْلدوم گئنه رۆسوا نئچه فرزانه‌‌لر ایچره.

یاخدیم اوْدا سجّادوو دستارو ریدانی،

بیر آد ائله‌دیم من دخی پروانه‌لر ایچره.

ائی شۇخی-پریتلتو،ائی سروی-گۆل اندام،

گزمه، سنی تاری، بئله بیگانه‌لر ایچره.

اوْل نرگیسی-مستین نه فۆسونگردی، خۇدایا،

سالدی منی مجنون کیمی دیوانه‌لر ایچره.

گل، وئر منه بیر جام ده، ائی ساقیگی-گۆلفام،

تا مست یازیم بۇ سؤزو افسانه‌لر ایچره.

بالله، بۇ بۆتی-لالروخون یوْخدو نزیری،

باخدیم نئچه مین صۇرته بۇتخانه‌لر ایچره.

اوْل گنجی-خفیدن بیر اثر بیلمه‌دیم آخیر،

جانیم چۆرودو هئچ یئره ویرانه‌لر ایچره.

ائی کؤوثر اۆچون آه چکن زاهیدی-ابله،

مئیخانه‌ده گل گؤر اوْنو پئیمانه‌لر ایچره.

قوواس کیمی قۇته وۇروب بحره نباتی،

اوْل گؤوهری ایستر تاپا دۆردانه‌لر ایچره.

بیللم کی, ائدر آخیر اول نرگیسی-مستانه

بیللم کی, ائدر آخیر اول نرگیسی-مستانه

بو عاشقی شئیدانی مجنون کیمی دیوانه.

یوخ حاجتی گولگونه, اول عاریزی گولرنگه,

بیر شانه گرک ناچار اول زولفی-پریشانه.

سن گؤرمه‌میسن آخیر ترسا قیزین, ائی کافیر,

ایمانه گل, ائی زاهید, تعن ائیله‌مه صنعانه‌.

هر نه دئیه‌جکسن دئ, هر… یییه‌جکسن, یئ!

بیر گون سنه من چاللام بیر ضربه‌تی-خسمانه.

دور گئت, گؤز اؤنوندن ایت, چوخ باشیمی آغریتما,

هر یانه گئدیرسن گئت, گلمه دخی بو یانه!

قوربانین اولوم, ساقی, سندن نه تغافولدور,

من زاهیده توش گلدیم, سن دؤور ائله مستانه!

مست اولمامیشام, بالله, بو نش’ه‌نی خام ائتمه,

تؤک وئر منه بو مئیدن بیر ساغری-ریندانه.

سن گؤرمه روا مندن بو سوزی-دیل اسکیلسین,

ایسترسن اگر قوی-قوی یانسین اودا پروانه!

دور کی, جیگریم یاندی, مجمر کیمی اودلاندی,

آز قالدی گؤزوم یاشی وئرسین منی طوفانه.

گر ائتسه طلب کؤنلون وصلی-لبی-جانانی,

گل سن ده نباتی تک قوی باشینی میدانه.

Latıncə

گولغوله سالدیم گئنه نؤه فلکی-اخضره‌,

گولغوله سالدیم گئنه نؤه فلکی-اخضره‌,

ائتدی مدد طالعیم, یئتدی الیم ساغره.

دیو, به فضلی-خودا اولدو پریدن جودا,

موژده آپار, ائی صبا, اول بوتی-سیمینبره.

شامو سحر, موتصیل, شوغلوم اولوب مشقی-عشق,

گؤزلریمی دیکمیشم لؤوهی-روخی-دیلبره.

بیر یوکه کیم, دؤزمه‌دی گاوی-فلک, سیرره باخ,

گؤتدو بئلیندن اونون, چاتدی منی-کافاره.

تاری بیلیر, اودلارام خیرقوو سجّاده‌نی,

ساقی , بو قان کاسه‌سین قویما الیندن یئره.

قاصیدی-اهلی-نیاز, هودهودی-عاشقن-اواز,

لوطف ایله بو نامه‌نی باغلا او خوش شهپره.

دورما, دؤنوم باشینا, من سنه قوربان اولوم,

حوممت ائله, وئر صفا شؤوق ایله بالو پره.

بیرجه تاماشا ائله دیده‌ی-خونباریمه,

سؤیله گینن حالیمی اول مهی-خوش-منظره.

Latıncə

گتیر, ساقی, مئیی-گولگون, بو بزمی بیر باهار ائیله!

گتیر, ساقی, مئیی-گولگون, بو بزمی بیر باهار ائیله!

او جامی-لعلفام ایله بو خامی بیر خومار ائیله!

ایرم باغین تاماشا ائیله‌دیم دئیری-موغان ایچره,

او دارول-عیشی سن, یارب, همیشه لالزار ائیله.

وره, واختی دئییل, زاهید, بو تسبیحی قوی الدن بیر,

گتیر سجاده‌نی, وئر مئیفوروشه بیر قرار ائیله!

لبی-مئیگونی-ساقی, ساغر ایله حلقه‌ی-ریندان,

بو جعمین ایچره, یارب, سن منی بیر مئیگوسار ائیله.

قوروری-روزه خوشک ائتمیش سنی, زاهید, نه قافیلسن,

بو تزویرو رییادن کئچ, خودادن بیرجه آر ائیله.

به حمدالله, گؤزون وار, کور دئییلسن, جنّت ایسترسن,

قدم قوی خراباته سحردن, بیر ناهار ائیله.

نباتی, عاشقم من ریندلر بزمینده‌کی حاله,

بلی, بالله, بو قومون ایتلرینه جان نثار ائیله.

Latıncə

اگر قویسان باخام من بیر نظر اول چشمی-شهلایه,

اگر قویسان باخام من بیر نظر اول چشمی-شهلایه,

گؤزوم چیخسین اگر من بیر ده باخسام جامی-مینایه.

بیر اؤزگه حاجتیم یوخدور, ولی موشتاقی-دیدارم,

نولور باخ بیر نظر بو عاشقی-مجنونی-شئیدایه.

شبی-یلدا دئییب, حسرت چکیب, قان-یاش تؤکن زاهید,

دئ, ائششک, کور دئییلسن, باخسان اول زولفی-چلیپایه!

اگر عاریفسن, آنلارسان, نه لازیم کشفی-حال ائتمک,

منی بیر گؤزلری جادو سالیب بو شورو قووغایه.

سیزه مندن امانت, ائی جاوانلار, من کی تا گئتدیم,

ولاکین سیز هئییفسیز, دوشمه‌یین بو قانلی سؤودایه.

نباتی, چوخ جفا چکدین, مورادین اولمادی حاصیل,

یئری, پیریندن آل حوممت, یاپیش دامانی-مؤولایه.

Latıncə

اولو یارب کی, دوشه دامنی-جانان الیمه,

اولو یارب کی, دوشه دامنی-جانان الیمه,

دوشسه, بالله کی, دوشر چتری-سولئیمان الیمه.

چالارام داشه کولونگو بئله شیرین-شیرین,

جامی-عشقی وئره گر خوسرووی-خوبان الیمه.

ائده‌رم دایره‌ی-میسری گوهردن لبریز,

دوشسه گر لعلی-لبی-یوسیفی-کنعان الیمه.

تؤوسنی-طبع-صبا سئیری دویونجا چاپارام,

توتا بختیم, گله بیر ساحه‌تی-میدان الیمه.

قوشارام آتی ایلن آتیمی دیل کسمکدن,

عهد قیلدیم دوشه گر راییجی-دؤوران الیمه.

ساقی, دور, وئر منه بیر گور’ه او قان اولموشدان,

چاره قیل دردیمه, وئر بیر تیکه درمان الیمه.

تنگه گلدیم, دخی بیر پنجه یئتیرررم چرخه,

گله گر قایمه‌ی-گونبه‌دی-دؤوران الیمه.

ائی زولئیخا, منی چوخ ائتمه جفا تاپداغی,

بئله قالماز, گلی بیر گوشه‌ی-زیندان الیمه.

کونجی-ایخفاده اگر رختی-ایقامت سالسام,

وئرمز ال اوندا دخی روستمی-داستان الیمه.

اودومو قوردالاما, ائی دیلی کج ابرانی,

یاخشی رنگ چکدی منیم چاکی-گیریبان الیمه.

حق بیلیر کیم, ائده‌رم مؤوجی-فنا غرقابی,

دوشسه گر دیده‌ی-تر لجّه‌ی - عمّان الیمه.

چکرم خنجری-الماس, اؤزومو اؤلدوررم,

ایگید اؤلموش, یولا گل, یاخما منیم قان الیمه.

گئده‌رم داده الیندن سنین, ائی دوشمنی-جان,

دوشسه گر باریگهی-شاهی-خوراسان الیمه.

گؤروم, ائی عشق, سنی گؤرمه‌یه‌سن هیچ ملال,

تاری بیلسین کی, گلیب کوفرده اییمان الیمه.

دم چکیب, گوشه‌ده خاموش اوتورموم, نئیلیم?

بیخبر, گؤر کی, دوشوب گؤوهری-قوران الیمه.

رودی-نیله نئجه قرق ائیله‌مه‌رم فیر’ونو

کی, گلیب مؤ’جیزئیی-موسیگی-عمران الیمه.

هو چکیب, مرقه‌دی-مجنونه یئتیررم پئیغام,

گله گر دمدمه‌ی-ترفی-بییابان الیمه.

ائتمیشم جانی نثار ائتمه‌یه حاضر یاره,

نولا بیردن گله بو موژده‌ی-فرمان الیمه.

خانچوبانی گئنه لال اولدو, قلم آچدی زبان,

دور, نباتی کی, گلیب مورغی-سوخندان الیمه.

Latıncə

دوشدوم گئنه مئیخانه‌ده خوش هنگلر ایچره,

دوشدوم گئنه مئیخانه‌ده خوش هنگلر ایچره,

گؤردوم گئنه بیر رنگ ایله گول رنگلر ایچره.

سد شوکر کی, ایمداد قیلیب بختی-حومایون,

بیر دیز یئری تاپدیم اؤزومه شنگلر ایچره.

ائی مئیدن ائدیب توبه‌, ائدن بنگله اولفت,

دیوانه کیمی دوشمه عبث دنگلر ایچره.

نه نقل, حکایتدی, نه افسانوو افسون,

بو بوخلو حسددیر کی, دوشوب یئنگیلر ایچره.

ائی صاحبی-شمشیری-دودم, شاهی جاهانبخش,

ائی کوشته‌لری پوشته قیلان جنگلر ایچره.

بو مولکی-قراداغده بیمونیسو قمخار,

فریادیمه یئت, قویما منی ننگلر ایچره.

مجنون کیمی اوریانو دیل-آزوردوو محضون,

داغدان داغا گزگز گزه‌رم سنگلر ایچره.

عشق اهلی سانیب سالیک ایله همسفر اولدوم,

گزدیم بیر-ایکی شامو سحر لنگلر ایچره.

بو کوچه‌ی-عشقین, بیلیرم, قایتی یوخدور,

بیچاره نباتی قالاجاق تنگلر ایچره.

Latıncə

سحر مئیخانه اطرافین گزیردیم مستو بیپروا

سحر مئیخانه اطرافین گزیردیم مستو بیپروا
کی, گؤردوم اوندا ناگه بیر عجاییب صورتی-زیبا.
موسلسل زولف چیی‌نیند, مورسسه تؤوق بوینوندا,
فیرنگی اتلس اینینده, باشیندا معجری-همرا.
ملکمنزر, پریپئیکر, سوخنگوستر, وفاپرور,
بوتی-محرو, گولی-خوشبو, سؤزو-شککر, گؤزو شحلا.
سمنروخسار, موشکینمو, شلایین قامتی-دیلجو,
سراسر فیتنوو جادو, سراپا شوریشو قووغا.
گؤرن ساتده ذؤوقوم‌دن ییخیلدیم مستو لایعقیل,
داغیلدی عقل باشیم‌دان, آلیشدی آتشی سئودا.
پریشان اولدو احوالیم, توکندی صبری آرامیم,
گیریبان چاک ائدیب دوردوم یئریم‌دن والئحو شئیدا.
منی گؤرجک بو حالتده او سروی-باغی-دیلبندی,
گلیب یانیمدا ایلشدی الینده ساغری-مینا.
کرم قیلدی منه بیر جام, آلیب مر‌دان نوش ائتدیم,
دوروب اوپدوم آیاغیندان, دئدیم: ائی سانییی-لئیلا!
اگر گؤرمک دیلر‌سن صورتی-مجنونی-شئیدانی,
ئوزاق گزمه, تاماشا قیل, بودور اول عاشقی-روسوا!
شیکسته-خاطرو محضون, سؤزو آشوفته, دیگرگون.
توتوب نقشی-رهی-مجنون, گزر وحشی کیمی صحرا.
نباتی, حمد قیل اللها، مین شوکرو سنا ائیله
کی, مجنونون مقاماتین سنه روزی ائدیب مؤولا.

 

نه اولموش, بیلمیرم, یارب, هانی بیر بولبولی-شئیدا

نه اولموش, بیلمیرم, یارب, هانی بیر بولبولی-شئیدا

کی, سالسین بو گولوستانه گئنه بیر شوریشو قووغا.

توتوبدور قم متایم عالمی, اما نه حاصیل کیم,

تاپیلماز بیر نفر آدم کی, چالسین بیرجه پول سؤودا.

منی بیر موی ایله زنجیره چکمیش بیر پری طلعت,

دهانی قؤنچه‌ی-خندان, بوخاقی لؤ’لؤوو لالا.

بییابانی-جونونو لشکری-عشقیم توتوب هر یان,

بو تاجی-سلطنتدن ال گؤتوررم بیر ده من هاشا!

فنا مولکون توتوب, سئیر ائیله‌رم ایقلیمی-تجریدی,

دلیلیم ذکری-”لهافیز”, رفیقیم حوممتی-مؤولا.

نه اولسون, بوندان آرتیق لوطفی-حق بیر بنده‌یه, شامیل,

انیسین شاهیدی-قودسی, مقامین سایه‌ی-توبا.

ندن مست ائیله‌مز, بیلمم, منی بو باده‌ی-گولگون

کی, مدحوش ائیله‌ییب چوخدان منی بیر گؤزلری شهلا.

لیباسی-فقردن بسدیر منه بو خیرقه‌ی-پشمین,

تنی-اوریانیمه اویماز منیم بو اطلسی دیبا.

ائدیب مولکی-قراداغی منیم بو طبع-سرشاریم,

قراداغ اهلینه بیر باغری داغلی لاله‌ی-حمرا.

گؤتور بیر باش مزاریندان, دور, ائی مجنونی-بیچاره,

گؤزون آچ , بیر تاماشا قیل, بودور گؤر سن دئین لئیلا?

عجب توتدون, نباتی, بارک الله, عشق دامانین,

یئری , گؤزله, ایتیرمه بو یولو, چک های-هو ایلقا!

Latıncə

ساقیا دور دولانیم باشینا ، گل دؤورانه

ساقیا دور دولانیم باشینا ، گل دؤورانه
جام زرینی گؤتور ، بیرجه دولان مستانه
تار زولفون کیمی ، ظالیم ! منی بی جان ائله دین
گتیر اول روح روان ایله منی بیر جانه
گؤرمه سین اؤزگه گؤزللر من مجنونو ، مگر
سالیب اول کافر بی رحم منی زندانه
عشقدن گؤر نه عجب نفعه یئتیشدیم ، وه ! وه !
عاقیل عصر ایکن ، ائتدی منی دیوانه
قورخما نئیران فراقین ، شرریندن ، ای دل
صدق ایله دوت اؤزونو بیرجه شه مردانه
اسم اعظم دئییلن اسم علی دیر ، بالله
گزمه بی جا یئره نسناس کیمی هر یانه
ائتمز اقرار ، نباتی ! بو سؤزه زاهید دون
گلمز ایمانا یقین ، آند ایچه سن قرآنه

وبلاقا گؤره

بو دیل دنیزدی سیزین تک صدفده اینجیسی وار
قیزیلدی سیزده اولان اوزگه‌نین اگر میسی وار
دئسزکی اودلو دیاردی بیزه وطن یاراشار
بیزیم اوجاقلارین آنجاق کور ائیله‌ین هیسی وار
"عقیل"
وبلاق مودیری : نژادمحمد

سون یازیلار

آختارماق

یازارلار

Page Rank بالاجا خوخان آذربایجان تورکجه سینده ایسلام دینی و قرآن کریم