تبلیغات
ایران آذربایجانی تورکجه سینین ادبیات اوتاغی - مطالب حضرت نیظامی کنجوی
ایران آذربایجانی تورکجه سینین ادبیات اوتاغی
یاشاسین آذربایجان

قونو سلاخلانجی

سلاخلانج

باغلانتیلار

اؤزل یارپاقلار‌

← وبلاق گؤروشلری

  • گؤروشلرین هامیسی :
  • بو گون گؤروشلر :
  • دوننکی گؤروشلر :
  • بو آی گؤروشلر :
  • قاباق آی گؤرو‌شلر :
  • یازارلارین سایی :
  • یازیلارین هامیسی‌نین سایی :
  • سون گؤروش :
  • سون دیَیشمه :

لینکلر‌

تزیم خیطابه‌سی

تزیم خیطابه‌سی

نه گؤزل گونشسن، تا اوزاقلاردان

ائدیرسن بیزیمچین هر شئیی عیان.

ایشیق جینسیندندیر هرچند کی، چیراق،

ایشیقسیز چیراق دا گؤرونمز آنجاق.

اصیل تاجیدارلیق، دوشون، یاخشی بیل،

یوزلرجه تاج ییغیب ساخلاماق دئییل.

حؤکمودار اودور کی، هر باشا مودام

مرحمت گؤستریب، تاج ائده انام.

اینسانی آزدیران خیاللاری سن

باشلاردان قیلینجلا رد ائله‌میسن.

اوجالسا بیر شاهین فیکری، بایراغی،

شاد اولار اوردوسو، یوردو، تورپاغی.

سنین بایراغینا بزکدیر ظفر،

گوجونله یوخ اولدو دردلر، سیتملر.

کیانلار کؤچوبلر ایندی دونیادان،

یئرلری بوش دئییل، سنسن حؤکموران.

اؤلکه‌ده بو خالقا رهبر اولدون سن،

فطرتین گؤزلدیر سنین ازلدن.

ایندی بو دونیادا سنسن تاجیدار،

الینله تاج قویار باشینا شاهلار.

چاتماز عدالتده سنه پیشداد،

کئیخوسروو، کئیکاووس، نه ده کئیقوباد!

یئددی فیروزه‌لی بو قصرده سن

حاقا، عدالته ووسعت وئرمیسن74.

بیر قدح‌ مئی وئریر سنه نظامی،

گرک نوش ائده‌سن کئیکاووس کیمی.

بو توسی قدح‌له محمودا بیلدیر

"شاهنامه"نین قدری-قیمتی نه دیر!75

ایکی خزینه‌نین واریثی، حؤکمن،

سخاوتده سنسن، سؤز دئمکده من76.

بورج اگر واختیندا اؤده‌نیلمسه،

قایدادیر: واریثدن چاتار واریثه77.

من ائله سؤز دئدیم - دئمه‌میش هئچ کس،

بیر ایش گؤر - اولماسین اونا هئچ عوض.

منه عقلیم چاتیب بو ایشده دادا،

مووفّق اولاسان سن اوخوماقدا.

یار ائتسک بو ایکی گؤزل نیّتی،

بیره اون آرتاجاق سؤزون قیمتی!

باغیمدا ریحاندیر منیم بو اثر،

سنین ائیوانینی قندیلتک بزر.

مجلیس قور، بو مئیله دولدور کاسانی،

شؤله‌سی، نشه‌سی دورولتسون قانی.

سن مئی ایچ، گتیرمه هئچ بیر بهانه،

آغزیم مؤهورلودور اوز وورما منه.

داماغین چاغ اولسون، بختین ده جاوان،

جاهاندا اولاسان جاهان پهلوان.

بو دونیا، بو دؤوران سنه یار اولسون،

روزگارین همیشه خوش روزگار اولسون!

گؤیلر عولویّتدن دوشمز هئچ زامان،

سن ده گؤیلر کیمی اوجا اولاسان.

قیلینجین کسکیندیر گون شؤله‌سیندن،

گؤیو ده یئر کیمی سن رام ائدیبسن.

پارلاق قیلینجیندان مهو اولسون یاغی،

سندن قودرت آلسین کیان بایراغی.

بؤیوک بیر ایش اوچون، بیل، ائی حؤکمودار،

گؤندردیم، دوغرودور، من بیر یادیگار،

سن اؤزون ابدی بیر یادیگار قال،

دئدیگیم بو سؤزو دایم یادا سال!

سؤزون تعریفی و پادشاهلارا نصیحت

سؤزون تعریفی و پادشاهلارا نصیحت

دنیز دالغالانیب گلرسه فئیضه,

صدفدن دورر آلیب چیخاردار اوزه.

یئنیدن دؤولتیم باشیمدان آشدی.

دؤولتلی اوره ییم سؤزله دوستلاشدی.

قارانلیق چکیلدی, دوغدو گؤزل گون,

شوخ سحر آچیلدی شوخ بولبول اوچون.

اویاندی یئنیدن, بختیم اولدو یار,

گؤر ایندی شاد کؤنلوم نلر یارادار?

طالع بیریسینه وئررسه آچار,

او, قارا داشدان دا گؤوهر چیخارار.

هر گونه روزیگار دئدیک عزلدن.

بیرینده جله وار, او بیرینده دن.

وارلیق پرگاری‌نین اولو رهبری

منه سؤز مولکونو وئرندن بری,

خئیلی دوشوندوم کی, بو اولکه‌نی من

بس کیمه تاپشیریم اوزوم گئدرکن?

بیر شهر یاراتسام, باختیم اولسا یار,

کیم اولسون بس اونا سونرا شهریار?

عقلیم سؤیله‌دی کی: - بئله شخص گرک

تانینسین دونیادا معروف اینسانتک.

ائله لوطفکار ال اولا کی, اوندا,

میثلی تاپیلمایا بوتون جاهاندا.

گرک قاریشقایا آزجا یئم وئره,

فیله ده فیل پایی سئچیب گؤندره.

اولمایا سرسری, خام آداملارتک

الیندن گلمه‌یه قلم ده چرتمک.

قاریشقا یئمیله فیلی یئمله‌یه,

جبراییل روتبه‌سی وئره میلچه‌یه.

بوتون بختی دؤنموش شاهلارین, البت,

اولچو بیلمزلیکدن اولوب بختی بد.

باش ایله آیاغی پیس فرق ائتمیشلر,

مست اولوب, تاجی دا قویوب گئتمیشلر.

کیچیک چوخ پای آلمیش, بؤیوک آز آلمیش,

بؤیویون قیمتی بئله آزالمیش!

معناسیز سخاوت گؤسترسه هر کس,

ییرتیق طبیل کیمی چیخاراجاق سس.

اولچو-بیچی بیلسن هر بیر ایشده سن,

بؤیوک حسابلاری دوز حل ائدرسن-

متاهی بؤلنده سن ائله بؤل کی,

آپارانین آغیر اولماسین یوکو.

قویما قوجا شاها گنج اوستون گله,

شیرویه پرویزی اولدوردو بئله.

قوجامان آغاجا میشار چکمه سن.

زؤهاک بونون اوچون دوشدو تختیندن.

حؤکمدار اولچویله بخش ائده گرک

اودو دا, سویو دا, - گونتک, بولودتک.

علیله دورر ساچا او, دنیزلره,

داغلاردا تورپاغی لعله دؤندره.

هاردا بایراغینی اؤجالتسا گؤیه

کیسه‌دن پایلایا بول-بول هدیه‌.

ایدراک صاحبیدیر, شوکور اللها,

ناز دا, نوازیش ده یاراشیر شاها.

داغلاردان تا سامان چؤپونه قدر

هر شئیین هر زامان قدرینی بیلر.

هر کسده نه قدر وارسا لیاقت,

او قدر گؤسترر اونا سخاوت.

اودور کی, چوخ-چوخدور مده ائدنلری,

دونیادا یوخ میثلی, یوخ برابری.

چوخلاری ایسته‌دی "ایقبالنامه"نی,

تک اونا حصر ائتدیم من بو نامه‌نی.

چونکی تانیدیغیم بوتون شاهلاردان

تک اودور امیه دوز قیمت قویان.

بوشدور چوخ شاهلارین آنجاق باشلاری,

ناهاق چوخ کسدیرمیش اونلار باشلاری.

های-کوی چوخ, هئچ بیر شئی یوخدور سوفره‌ده,

دؤنوب بدنلری قورو جسه‌ده.

اونلاردا بیر تاجیر طبیعتی وار,

زلیتک قان سوروب لذت آلارلار.

دنیزتک دوشونجم, دوررتک سؤزلریم,

لعل ایله دولودور منیم اثریم.

شاه اوزو سررافدیر, قدرینی بیلر,

سؤزومون روتبه‌سی قات-قات یوکسه‌لر.

لاتین الیفباسی و فونتیک الیفباسی

لیلی و مجنون (کیتابی)

کیتابین آدی : لیلی و مجنون

اولچوسو : 1.11 مگا بایت

الیفبا : عرب الیفبا سی

دیل : آذربایجان تورکجه سی

صفحه لرین سایی : 358 صفحه

ایندیر(دانلود)

 کیتابین آدی : لیلی و مجنون

اولچوسو : 1.35 مگا بایت

الیفبا : لاتین الیفبا سی

دیل : آذربایجان تورکجه سی

صفحه لرین سایی : 288 صفحه

 

 

ایندیر(دانلود)

کیتابین یازیلماسینین

کیتابین یازیلماسینین
سببی
دولانیب دؤندوکجه قوجا روزیگار,
اوزونه بیر یئنی معلم آرار.
کؤحنه هاوا‌لاری دییشر تامام,
او یئنی نغمه‌لر بسته‌لر مودام.
دؤوران اویونبازتک اوینار بیر مدت,
چیخارار پرده‌دن بیر تزه صورت.
ائدیب فوسونکارلیق بو صورت ایله,
خالقی ایلن‌دیرهر بیر زامان بئله.
اونو دا قوجالدیب دؤوران ایتیرر,
سحنیه یئنی بیر صورت گتیرر.
تزه شاعر‌لر ده تزه خطت ایله
کؤحنه تاریخ‌لری تزه‌لر بئله.
هر دؤورون اولار بیر ئوستا باغبانی,
بسلییب بؤیودر کؤرپه فیدانی.
بیر گؤوهر حوسنونو ایتیرسه اگر,
داش‌دان باش قال‌دیرار باشقا بیر گؤوهر.
گلینیمده اولان شوخلوق, طراوت
پئیکرشوناس‌لارا ائیلر کیفایت16.
تزه اولماسایدی بو اثر, یقین
تزه بیر سؤز دئمک اولاردی چتین.
بیر هارین آت ایدیم بیر زامان من ده,
زحمتله, ذلتله دوشدوم کمنده.
هر بیر خزینده وار من‌دن نیشان,
آنجاق, حیف اولسون کی, دئییلم جاوان!
گنجلیک - تزه نال‌لی, هارین, کؤحلن آت,
قوجالدین - نال قیزیر, دوشور الدن آت.
کوره‌دن چیخاندا گوزگو برق وورار,
فقط سینان زامان ذیرئحه یارار17.
سؤز, سنت عشقیله چیرپینان اورک
آلیر سیرداش کیمی ایلحام‌دان کؤمک.
دوشونجم بئینیمین قیزیل قانین‌دان
اینجیتک اینجه سؤز آلاردی هر آن.
چونکی گیزلینده بیر ایلحامچیم واردی,
منیمله اورتولو سؤز دانیشاردی.
سوسموشدور سیرداشیم خئی‌لی زامان‌دیر,
من ده سؤز تاپمیرام, حالیم یامان‌دیر.
بیر ده کی, سؤزومو دینلییب دویان
بیزی ترک ائلییب, گئدیب دونیا‌دان.
شاه آرسلان تورپاقدا, قبیرده ایکن,
نئجه سؤز سؤیلییم, شعر یازیم من?
شاه اگر لوطف ایله ائتسه مرحمت,
یئنی سؤز دئمیه ائیلرم جور ات.
بو دار کئچید‌لرده درد منی آلدی,
بدنیم سوستالدی, رنگیم سارالدی,
یولومو توفانتک توتدو فیکیر‌لر,
گؤزومده قالمادی یوخو‌دان اثر.
گئجه, دار قلب‌لر‌دن قارا بیر گئجه,
یول‌لار باش توکون‌دن داها دا اینجه!
بئله بیر گئجده مومکونمو سفر?
هئچ بئله بیر یولدا قویو سئچی‌لر?
ظلمته بورونموش کئشیکچیخانا,
همله ائلمیش‌دیر فیل پاسیبانا18.
بیر آحو بالاسی دوغموشدور چمن,
موشک-عنبر ساچمادا اوز گؤبیین‌دن19.
نه پروانه شام‌دان ئوزاق دایانیر,
نه ده کی, شام اوندان ئوزاقدا یانیر.
بیر بئله گئجده اوتورموشام تک,
کاغیذدا یازی‌لار قارا گئجتک.
دورر اوچون قوواستک سویا باتیردیم,
گاه سئچیب گؤتورور, گاه دا آتیردیم...20
گئجه‌دن بیر قدر کئچمیش اولاردی,
هله قارانلیقدا, صوبحه چوخ واردی,
فلیین کؤحلنی اولوب تنگنفس21,
خوروز‌لار بانلامیر, گلمییر بیر سس.
داخمادا گئجه‌نین هؤروک‌لرین‌دن
یئددی رنگ ایپک‌لر توخویورام من22.
بو لاجیورد کوپ‌دن من ده عیسیتک
ایپلر چیخاریرام هر آن رنگبرنگ23.
اول‌دن بسلییب تربییه وئرن
بیر نجیب اینسان‌دیر منی یئتیرن:
معتبر بیر شخص‌دیر او خویلو ایماد;
قالخماق ایستینه او ائدر ایمداد.
سخاسی دونیانی سالمیش حیرته,
دورله بزک وورموش او, سخاوته.
بو قوجا دونیادا اونا تای هانی
کی, سؤزو, سخاسی توتسون جاحانی?
اوندا موشترینی گؤررک هر آن,
وورار اوزویونه اوتارید نیشان24.
افسوس کی, بختیمین سرکشلییین‌دن,
گیزلییر بو دونیا او ذاتی من‌دن.
ایشلریم دویونلو, نسیبیم درد-قم,
نه یاخین بیر دوست وار, نه ده بیر همدم.
مگر نئچه ئوشاق توتار بیر ماما?
بیر آغاج نه قدر یئتیرر خورما25?
یوخوسوز, آج-سوسوز قالیب او گئجه,
بو ماوی دریادا اوزوردوم تکجه26.
گئجه گئجه دئییل, دیبسیز بیر قویو,
آیی دا, گونو ده ئودموشدو سویو27.
گئجه‌نین باغرینی یارمیشدی ظلمت,
کؤلگه ائلییردی ایشیغا تؤحمت.
آتدیغیم کمندله, شاهین بختین‌دن.
املیک جئیران‌لاری اوولامیشام من28.
انگین دنیز‌لره من تور آتمیشام,
بو تورلا نؤوبنؤو بالیق توتموشام29.
خوش گؤروب بختینی شاهین رسدده,
من سؤزه باشلادیم خوش بیر ساتده.
ووروشور اونومده چین ایله هبش30,
شاها ائدجیم اونلاری پئشکش.
او قورخونج گئجده سوستلشردیم من,
توتماسایدی شاهین بختی علیم‌دن.
چاتدی مده‌نین گؤوهر آختاران,
کؤنول آزاد اولدو قم‌دن, قوبار‌دان.
قیزیل چادیرینی گونش ئوجالتدی.
ایپلری داغ‌لارین باشینا آتدی.
گئجکی ازابی ئونوتماق اوچون
بیر مجلیس بزدیم من ده همین گون.
عاریف‌لر بینن بیر یئر سئچرک,
اوردا بیر تاخت قوردوم من سلطان‌لارتهک.
یئنی بیر اصوللا بوسات قورولدو,
دوشونجم مجلیسه خیدمتچی اولدو.
شرابیم, ریحانیم, مزم, همدمیم
سؤزومدو, فیکریمدی, قلبیمدی منیم
قیزیشیب جوشدوقجا بئینیم شراب‌دان.
گلدی سخاوته سؤز ده بو زامان31.
ایلحام بولود‌لاریم چکدی نره‌لر,
گؤوهرشوناس‌لارا یاغ‌دیردی گؤوهر32.
ایکی شئی جسارت ایستر اینسان‌دان:
بیری اود, بیری ده ییرتیجی آسلان.
سانکی همجینس ایمیش اودلا آسلان دا,
نه دوشسه محو ائدر بون‌لار بیر آندا.
تالئییم آچیلدی, اولدوم بختور,
ذؤحره دف گؤندردی, موشتری دفتر33.
لوطف‌دن گاه بزک یارا‌دیرام من,
گاه هیکمت ساچیرام سؤز خزینم‌دن.
ساچدیغیم گؤوهرله بزندی جاحان,
چونکی وار شاه کیمی بیر گؤوهر آلان.
یئنی‌دن مدنه من ال ئوزاتدیم,
گئدیب خزینه‌نین مغزینه چاتدیم34.
هئچ یاخشی ایش دئییل یالان دانیشماق,
بو قیزیل, بو دا اود, اریت, یوخلا, باخ!
نئچه واخت آغ رنگه لاجیورد قاتدیم,
بیتدی "شرفنامه", مورادا چاتدیم.
جوشدو چین ناخیش‌لی شعریم, سنتیم,
گؤر هارا قالخاجاق منیم شؤهرتیم!
گؤر اول نه اکدیم, گؤر بیتدی نلر,
سینیغی بو سایاق بیتیش‌دیرر‌لر35.
نئچه ایل اولار کی, گؤوهر سئون‌لر
آختاریب تاپماییب بیر بئله گؤوهر.
آخیر کی, تاپیلدی بیر گؤوهر ساتان,
یاخشی مال آلینار ساتیجی‌سین‌دان.
پادیشاه امر ائتدی: بزنسین بیر باغ,
سرو‌لر چمنه گتیرسین نؤوراق.
قلبی نورلو شاهین شرفینه من
گوج آلیب ایدراکین شفق‌لرین‌دن,
بیر سرو بزدیم کی, مجلیس شاد اولسون,
اونون شرفینه باده‌لر دولسون.
شعر یوخ, معناسیز نزم یازان‌لار
چتینلیک چکمز‌لر, اونلارا نه وار?
داش‌لار‌دان جواهیر چیخاران آنجاق
بیلیر کی, چتین‌دیر گؤزل سؤز تاپماق.
بو اینجه خیال‌لار منی جوشدوردو,
کؤنلومون آتشی بئینیمه ووردو.
اوز توستوم باشیما قالخدیقجا منیم,
قورویوب قاخاجا دؤندو بدنیم.
گلینجه بو گؤزل گلین حاسیله
منده صبر گرک, شاهدا هؤوسله.
سؤزه باخ, باش آلیب هارا ئوجالیر,
من نلر دئییرم, او نلر چالیر?
بیلمیرم بو قدر فوسونکار سؤز‌لر
بابیل قویوسون‌دان چیخیر نه تحر?36
ذؤحریه او "ذند"ای کیم‌لر اویرتدی,
اوخویوب هاروتو تامام بند ائتدی?37
سئحیر‌لی نغمم‌دن ذردوشت خار اولدو.
سؤندو چوخ "ذند"لرین آلووو, اودو38.
دریایا دورر ساچسین قتره بورا‌دان,
قوی خورما داشیسین بسره بورا‌دان39.
بو آلتیکونج تاغدا بیر بولودام من,
سپرم هر یانا سو جییریم‌دن40.
بیتکیتک پای آلیر هامی سویوم‌دان.
یاغیشیم سرو‌لر یئتیریر هر آن41.
کؤلگتک ایشیق‌دان کیم چکسه ذرر.
البته, همیشه اوندان چکینر.
چئشمم‌دن فئیزییاب اولسا دا چوخو,
گئتمیر گؤز‌لرینه حسد‌دن یوخو42.
منیم مئیخانام‌دان ایچر‌لر شراب43,
منیم سؤز‌لریم‌دن باغ‌لار‌لار کیتاب.
بو فئیزی اونونچون قازاندیم کی, من
اصلا سو ایچمدیم یاد بیر چئشمه‌دن44.
خلوتده پولاد‌دان سیلدیم کی, پاسی,
یاقوت رنگی آلسین اونون آیناسی45.
سیلیب بو آینانی پارلاتدیم پار-پار,
یئر‌دن توز-تورپاغی کولک آپارار.
او چین اوزلو نیگار, بیلمیر‌سن مگر
رومون قالاسینی نئجه فتح ائدر?
خزینه کشف ائتمک ایستسه بیری.
گرک ئونوتماسین چتینلیک‌لری!
خزینه کشف ائتمک ایسته‌سن اگر,
هر بیر چتینلییه تاب ائت, سینه گر!
مسل وار, دئیر‌لر, ائشیت, قولاق آس:
"ویرانه اوجاق‌دان هئچ توستو چیخماز!"
یوخو وار, اولجه چوخ قورخونج اولور,
گون دوغور, اوریین فرحله دولور.
قلبه قورخو سالان چوخ شئی‌لر اوچون
اینسان شوکر ائلییر آخیردا بیر گون.
نه چوخدور شاعرلیک ادعا ائدن, -
قورخورام مئی‌داندا قان تؤکولمک‌دن.
یایین اورتا‌سیندا چوخ یاغسا یاغیش,
ائله سویوق دوشر, سانکی دؤنوب قیش.
هاوایا یاغیش‌دان نم چؤکسه اگر,
گونش او چیرک‌لری سیلیب محو ائدر.
پاییز یئتیشدیکده, بیلیر کی, هر کس,
داها لطیف کولک, اینجه مئه اسمز.
آرتیق روتوبت‌دن تؤریر وبا,
تنففوس چتین‌دیر بئله هاوادا.
بون‌دان قورتارماقچون قالایار‌لار اود,
تؤکر‌لر بو اودا سندل, گول و ئود.
تبیمله شاها ئود یان‌دیرارام من,
داها باشقا بیر ایش گلمز علیم‌دن.
الله منی اونا بنده خلق ائتمیش.
اطاعت‌دن باشقا بیلمرم بیر ایش.
دونیاگؤرموش آدام, - یاخشی یا یامان,-
شیکایت ائیلمز اوز روزگارین‌دان.
بو دونیا هئچ کسله دئییل هماواز,
سازنده‌لر کیمی بیر هاوا چالماز
او, سازدا گؤررسه ایپک بیر تئلی,
قیریب آتماق اوچون ئوزانار علی.
ایپک یئتیرمکده ایکی جور قورد وار,
ذید‌دیر اودلا سوتک همیشه اونلار.
بیری بارامانی توخویور بیر-بیر,
او بیری کاروانلا ایپک محو ائدیر.
پتکده ایکی جور آری وار مودام,
نئجه کی, آلدادار پرواننی شام,-
بیری یئم داشییار هئی آخشام-سحر,
او بیری گیزلینجه او یئم‌دن یئیر.
بال وئرن آرینین بیرجه‌سی, یقین,
یوزون‌دن یاخشی‌دیر بال یئین‌لرین.
هله جان آلمامیش اجل, توراجتک:
"داد, منی توتدو‌لار!" - چیغیریب داد چک46.
تاماحکار دونیا‌دان نه ئومماق اولار.
یا سنی یان‌دیرار, یا دا چیی ساخ‌لار,
قایناییب جوشارسان, یانارسان درد‌دن,
قایناییب جوشماسان, چیی قالارسان سن.
فلک - یئددیباش‌لی قورخونج اژداحا,
بیرجه ذربه وورسا, محو اولدون داها47.
خلبیره بنزین تئشت‌دیر آسیمان,
سن بیر خلبیر تورپاق, او دا بیر تئشت قان48.
او, تئشت‌دن سو تؤکسه باشینا ناحاق,
سن اله خلبیرتک اوستونه تورپاق.
تورپاق دا, چئشمه ده اولان بیر یئرده
لازیم‌دیر, البت کی, تئشت ده, خلبیر ده.
بو گؤی رنگ‌لی کوپون چوخ هییله‌سی وار,
ایچین‌دن گؤرر‌سن یوز جور رنگ چیخار49.
کوپه بیر جادوگر مینر, دئیر‌لر,
بو کوپه مینمیش‌دیر یوز مین جادوگر50.
فلک حسابینی گل ائتمه ناحاق,
آلچاغی یوکسک‌دیر, یوکسیی آلچاق.
او گاه آلتدا اولور, گاه اوستده اولور,
اونا آلت-اوست دئمک داها دوغرودور.
ابس‌دیر فلکله بحثه گیریشمک,
هئچ کسله هماحنگ اولماییب فلک.
آتدیغی هر آددیم فند‌دیر, کلک‌دیر,
ایشلری بوسبوتون اویوندور, رنگ‌دیر!
بیرینی گؤی‌لره ئوجال‌دیر بزن,
بزن ده قول ائدیر اونو گؤرور‌سن.
تولکوتک گئی‌دیرهر قیرمیزی پاپاق,
سونرا قارا ایته یئدیردهر آنجاق.
ندیر دؤرد یول اوسته مسکن دوزلتمک?52
ندیر قارین گودمک دؤردایاقلیتک?
دؤرد بالیش قئیدین‌دن قورتاراندا بیز,
آسوده یاتاریق سسسیز-سمیرسیز53.
یولوستو منزیل‌دیر بو کؤحنه تورپاق,
ایکیجه قاپیسی وار اونون آنجاق:
گیریش قاپی‌سین‌دان گیررسه هر کس.
چیخیش قاپی‌سین‌دان چیخمایا بیلمز.
بدبخت‌دیر بو درین قویودا قالان,
قار کیمی دوشرک دونوب بوز اولان.
خوشبخت‌دیر شیمشکتک یالنیز بیر آندا
پارلاییب سؤنن‌لر فانی جاحاندا.
نه لازیم دونیادا فرسیز بیر شامتک
گئجه‌لر ئوزونو جان وئریب سؤنمک?
اعتبار ائتمین اوز گمیسینه
گرک اولجه‌دن اوزمک اویرنه.
تله‌سن آداما کؤحلن آت گرک,
یابییلا نه قدر او یول گئدجک?
هییله‌دن پوزولوب, کورلانیب دونیا,
نه قلبده قان قویموش, نه اوزده هیا.
فلک او فلک‌دیر: داغ چکیب حدر,
بیزی گاه سارالدار, گاه دا گؤیردر.
هر پرده‌ده یالنیز او آدام چالار
کی, اولا پرده‌دن یاخشی خبردار54.
دوز یولو یاخشی بیر راهبر گؤسترر,
من یولا چیخیرام, بس هانی راهبر?
ائله بیر پیس واختدا گلجک اولوم
کی, بئزمیش اولاجاق دونیا‌دان کؤنلوم.
قفلت قوشون چکیب گلجک بیر‌دن,
یاتاغا باش قویوب یاتاجاغام من.
خیال دونیاسینا ائدیب تاماشا
عومرو یوخو کیمی وورورام باشا.
بئله قول-قانادلا اولارمی ئوچماق?
هارا چات‌دیراجاق بئله ال-آیاق?
بئله دؤرد موخالیف یول آ آیریجین‌دان
چیخمارام, یا قوجا اولوم, یا جاوان55.
قوجالیق اداسی گؤسترسم اگر,
من‌دن بو جاوان‌لار اوز دؤندرر‌لر.
جاوانلیق ائلسم بو بدنله من
گرک باشقا‌سین‌دان بورج آلام بدن.
یاخشیسی بودور کی, اولام هر زامان
قوجا ایله قوجا, جاوانلا جاوان.
آچام بو دویونو بلکه بیرتحر,
من‌دن دوست-آشنا‌لار اینجیمیه‌لر.

 

لاتین الیفباسینان

سونونجو پیغمبرین

سونونجو پئیغمبرین تعریفی

نه بیر تاخت ایسته‌دی محمّد, نه تاج,

قیلینجلا چوخ آلدی شاهلاردان خراج.

یوخ, یوخ, سهو ائلدیم, او بؤیوک نبی

هم تاخت صاحبیدی, هم تاج صاحبی.

اونون تاختی ایدی بوتون بو افلاک,

باشی‌نین مقدس تاجییدی "لؤولاک".

ملک سیمالییدی, اللهتانییان,

بیزه ده اللهی او وئردی نیشان.

بیزلری جننته اودور آپاران,

جهنم اودوندان اودور قورتاران.

پارلاییب نور ساچدی بو کایناتدا,

بنزردی ظلماتدا آبی-حیاتا

اؤجا قالخماسایدی عرشین تاغیندان,

کیمدی کایناتین سیررینی آچان?

معنوی بیر تؤهفه او وئریب بیزه,

عرشین سووقاتینی گؤندریب بیزه.

یولونون تورپاغی اولان باشیمیز

دیمز باشینداکی بیر توکه یالنیز.

بیزیم حالیمیزا قلبدن یاناراق

گوندوز گونش اولدو, گئجه‌لر چیراق.

هر سینیق اوره یین اودور پناهی,

اودور باغیشلادان هر بیر گوناهی.

داهیدیر, بؤیوکدور او داهیلردن,

اوستوندور, یوکسکدیر هر پئیغمبردن.

جننتدن تورپاغا گلدیسه ائدم,

او قویدو تورپاقدان جننته قدم.

آیتک چیخدی یوسیف قویودان اگر,

نور ساچدی قویودان او, آیا قدر.

خیزرا آبی-حیات اولدوسا قیسمت,

حیات چشمه‌‌سیندن کئچدی محمّد.

یونیسی اوددوسا بالیق بیر زامان,

اونا سجده ائتدی بالیقلا ایلان.

داووددان یادیگار تک بیر زیرئه وار,

محمّد یوز زیرئه قویوب یادیگار.

سولئیمانین تاختی گئتدیسه بادا,

محمّد ابدی قالدی دونیادا.

عیسینین بئشیی گؤیه قوووشدو,

محمّدسه اوزو گؤیلره اوچدو.

تور داغی موسایا اولدوسا ائیوان,

محمّدین قصری یاراندی نوردان.

شمی‌نین اونونده دوروب چیراقلار,

سندن ایشیق ایستر, سندن پای اومار.

شفاف بیر چشمه‌سن, تمیز بیر بولاق

اوزونو سویونلا یویوب بو تورپاق.

بو قورو تورپاغین صداسی سنسن,

بو خسته دونیانین شفاسی سنسن.

حکیمسن, آیدیندیر دوشونجن, زکان,

الینده اللهین حؤکمو بیر درمان.

مخلوقون گؤزونه سن ایشیق وئردین,

گؤیده ملکلره یاراشیق وئردین.

آدین مؤهور کیمی سؤزه زینتدیر,

جامیندان هر قطره‌ ابدیتدیر.

اوندان بیرجه اودوم ایچرسه هر کس,

دونیادا درد بیلمز, اذیت بیلمز.

ائله ائت کی, اولسون او دادلی شربت

بو یازیق بنده‌یه - منه ده قیسمت.

لاتین الیفباسی و فونتیک الیفباسی

میناجات

میناجات
بندیه ال توتان سنسن, ایلاهی,
یوخدور سندن باشقا اونون پناهی.
اولموش-اولاجاغی سنسن یارادان,
سنین کرمینه مؤحتاجدیر اینسان.
لوطف ائله, الینی منه ده ئوزات,
منه اوز قووغامدان اوزون وئر نجات.
سنسن, پروردیگار, هر بیر مورادیم,
سندن حاسیل اولار هر بیر مورادیم.
مرحمت گؤررسه سندن بیر اینسان.
نه گؤیدن قورخار او, نه ده ئولدوزدان.
سن وارکن احتیاج یوخدور گؤیلره.
آسیمان وار ایکن کیم باخار یئره.
وارکن بو دونیادا هر جوره بوسات,
بئحیشتده نه اوچون آختاراق حیات?
اینانما کی. جننت بوردان شن اولسون,
دئییرسن یاخشیدیر, سن دئین اولسون.
بیزه ده بئحیشتده بیر یئر آییر سن,
سیل پیس ناخیشلاری دوشونجمیز‌دن.
بیز اوز چارمیزی بیلمیریک اصلا.
هانسی یول یاخشیدیر آپار او یولا.
سنی اومید ایله هئی آختارماقدا
کیمیسی قارادا, کیمیسی آغدا3.
بیر مئیوه درمکچین سنین باغیندان,
هره بیر قاپیدا ائیلییر فغان.
منده جسارت یوخ سنه سؤز دئییم,
- اونو وئر,- دئیرک بیر شئی ایستییم.
دیلییم یئرینه یئتسه هر کسدن.
گؤرورم او دئییل, سنسن لوطف ائدن.
سنین مؤوجوداتا یوخ احتیاجین,
اونلارین هامیسی سنین مؤحتاجین.
سن کی, دوستلوق ایله چیخدین قارشیما,
بیگانلیک کولو تؤکمه باشیما.
فئیزین‌دن ایشیق وئر گؤزلریمه سن,
قوی اولوم آسوده اوزگه گؤزلر‌دن. .
پروانه اولموشام شبچیراغینا.
بیر قوشام, قونموشام سنین باغینا.
بو کیچیک بندنی سالما گؤزون‌دن.
بؤیوکسن, کؤمک ائت بؤیوکلوکله سن.
من نیم, بیر ذرره - گؤزله گؤرونمز,
سندن نور آلمیشدیر او ذرره - سؤنمز.
سنین قودرتینله آشکار اولموشام,
هر بیر خزینیه آچار اولموشام.
کؤحنه حکایهتی چاتدیردیم سونا,
باشلاسین تزه سؤز ایندی جؤولانا4.
سالدین ایلک سؤزومو سن دیلدن-دیله,
بو سون آددیمی دا یئتیر منزیله5.
ضیا ساچ, قوی قلبیم ایشیقلا دولسون,
اینجه متلبلره او, گوزگو اولسون.
بو چتین یوللاردا بودور مقصدیم:
سنین بیندییین بیر یوللا گئدیم.
ائله کؤمک ائت کی, ایشلریمه سن.
اوزون شاد اولاسان دئدیکلریم‌دن.
من اوز خوشوم ایله گلیم اونونه,
اطاعت ائیلییم پیغمبرینه
 

لاتین الیفباسی نان

زومرود قولوزاده

زومرود قولوزاده

هاردا کی, عقل بیر خزینه تاپار,

اللهین آدینی ائیلیر آچار.

الله عقللییا نوازیشکاردیر,

عقلسیزلارا دا علاجی واردیر.

او, سؤزون سیررینی عیان ائیلیر,

او وئرر ذلیله, آجیزه هونر.

ظاهر‌دن, باتین‌دن آشیکار, نیهان,

اقله یول گؤسترن اودور هر زامان.

او, بو ایمارتین سقفینی تیکمیش,

او, بو کارخانانین نقشینی چکمیش.

قلبه ده خوش گلیر اونداکی قودرت,

اقله ده واجیبدیر اونا اطاعت.

بوتون وارلیقلارین فؤوقونده دورور,

وارلیغی هر شئیی یارادیب قورور.

هیکمتی گیزلیندیر, حؤکمو آشیکار,

اونون تعریفینه دیل آجیز قالار.

اصلی پاک, ذاتی پاک, تکدیر ووجودو,

نه اوددور, نه تورپاق, نه یئل, نه ده سو.

وارلیقلار هامیسی اونون مؤحتاجی,

اونونسا هئچ کسه یوخ احتیاجی.

یئددی قات ایچینده نه وار بینادان,

مین آلقیش اونا کی, اودور یارادان1.

اونا قوووشماغا یول یوخدور فقط,

اقله, دوشونجیه سیغماز بو هیکمت.

دئسک کی, گؤیددیر او پروردیگار,

اونا تزیم ائدن یئر تنحا قالار.

یوخ, اگر یئرددیر, سؤیلسک, الله,

شنینی آلچالتماق اولمازمی گوناح?!

معبودون ذاتیندان دانیشان زامان

آختارما نه گؤیده, نه یئرده مکان.

اگر قودرتین‌دن دئییب-دانیشساق,

حؤکمونه تابعدیر بو گؤی, بو تورپاق.

هر بیر کرمینه, غضبینه سن

ناشوکور اولماییب, باش ایملیسن.

بیرینین کؤنلونده یاندیرار چیراق,

بیرینین کؤنلونه چکر دردله داغ.

بیرینه سارایلار وئرر فلکدن,

بیرینی قویویا سالار یوکسک‌دن,

بیردیر حضوروندا اونون چوخ, یا آز,

بؤیویو, کیچییی اصلا آییرماز.

اونون قارشیسیندا چؤپ کیمیدیر داغ,

حؤکمونه باغلیدیر اولمک, یاشاماق,

هئچ بیر کس تورپاغا دیل وئره بیلمز,

نقش وورا بیلمز سویا دا هئچ کس2.

تکجه او یارادار تورپاقدان اینسان,

تک اودور سویا دا ناخیشلار ووران.

آزانین یولونا نور ساچان اودور,

باغلی قاپیلاری ایلک آچان اودور.

ساکین, موتحرریک, - نه وار دونیادا;

وارلیغی باغلیدیر او بؤیوک آدا.

حؤکمویله یارانمیش بوتون کاینات,

بوتون جانلیلارا او وئریر حیات.

اوندان آد آلمیشدیر بو وارلیق تامام,

او, تامدیر, قالانلار نه وار - ناتامام.

لاتین الیفباسی نان

مژده ای خاطر پژمرده کی دلبر گله جک

مژده ای خاطر پژمرده کی دلبر گله جک

جان ساراییندا امیر اولماغا سرور گله جک

یئنه ده دل بولبولی باشلادی فغان ائیله مگه

مگر اول سرو گول اندام سوسنبر گله جک

نفس باد صبا غالیه سا اولدو مگر

او ساچی نافه تر زولفی معنبر گله جک

گئده جک محنت و اندوه و غم و درد و عنا

یئرینه راحت و شادی و صفالر گله جک

شب فرقت گئده جک محنت و هجران گئده جک

صبح وصل ایریشر و مهر منور گله جک

نئجه بیر سعی ائدیبن وصلینه ایریشمک اوچون

دم فطرتده نه کیم اولدو مقدر گله جک

سن نگار ایله "نظامی" منی عالمده دخی

صنما سانما کی بیر بی دل و دلبر گله جک

وبلاقا گؤره

بو دیل دنیزدی سیزین تک صدفده اینجیسی وار
قیزیلدی سیزده اولان اوزگه‌نین اگر میسی وار
دئسزکی اودلو دیاردی بیزه وطن یاراشار
بیزیم اوجاقلارین آنجاق کور ائیله‌ین هیسی وار
"عقیل"
وبلاق مودیری : نژادمحمد

سون یازیلار

آختارماق

یازارلار

Page Rank بالاجا خوخان آذربایجان تورکجه سینده ایسلام دینی و قرآن کریم