تبلیغات
ایران آذربایجانی تورکجه سینین ادبیات اوتاغی - مطالب ملا پناهی واقف
ایران آذربایجانی تورکجه سینین ادبیات اوتاغی
یاشاسین آذربایجان

قونو سلاخلانجی

سلاخلانج

باغلانتیلار

اؤزل یارپاقلار‌

← وبلاق گؤروشلری

  • گؤروشلرین هامیسی :
  • بو گون گؤروشلر :
  • دوننکی گؤروشلر :
  • بو آی گؤروشلر :
  • قاباق آی گؤرو‌شلر :
  • یازارلارین سایی :
  • یازیلارین هامیسی‌نین سایی :
  • سون گؤروش :
  • سون دیَیشمه :

لینکلر‌

نه‌دن کوسوب تبی نازیک اولان یار،

نه‌دن کوسوب تبی نازیک اولان یار، 
بیلمنم کی، بونا نه چاره گرک؟ 
نه دئمکدیر دوست-دوستوندان اییلمک، 
گرکدیر دوزله یول، آرا گرک. 
  
گؤره‌سن، نه دئمیش رقیبی-بی پیر، 
یار اولوبدور مندن هابئله دیلگیر، 
من اوندان ائتمه‌رم جانیمی تقسیر، 
آمّا کی، اؤزوندن ایشاره گرک. 
اتکلیگی آلتون، قسابه‌سی زر، 
چهرایی چارقاتی قدّه برابر، 
باشیندا برق وورور گون کیمی زیور، 
اونو گؤرن دوشه اودلارا گرک. 
اشرفیدن اوزلوک اوزونده گؤیچک، 
بوغازی آلتیندا سیغاللی بیرچک، 
قاباق بئله بَیاض یاناق لاله تک، 
گؤز آلا گرکدیر، قاش قارا گرک. 
اوخویوب واقیفین هم اززه‌لیندن، 
شیرین قافیه‌سیندن شوخ قزه‌لیندن 
دوروب اؤپوب آیاغیندان، الیندن، 
باریشماق یالوارا-یالوارا گرک.

ائی هۇری لیقالیم، ملک سیمالیم،

ائی هۇری لیقالیم، ملک سیمالیم،

گؤزللیکده اوْلماز کیمسه سن کیمی!

آل یاناغین حلقه‌-حلقه‌ یانیندا

بنفشه زۆلفلرین -یاسه‌من کیمی.

گرده‌نینده تئللر نه گؤزل تئلدی،

اوْنلارین مسکنی اوْ نازیک بئلدی،

نه سنگی-مرمردی، نه برگی-گۆلدی،

بۇ آغ اندام کیمی، بۇ بدن کیمی.

قامتین تک هئچ بیر قامت بیچیلمز

دوْداقلارین تر قؤنچه‌دن سئچیلمز،

بۆلبول جه-جه وۇروب گۆللر آچیلماز،

بئله شیرین - شیرین سن گۆلن کیمی.

نه خوْش سیتمکارسان ظالیمو خۇنخار،

اوْنون اۆچون سندن چوْخ گیلئییم وار،

بیلمنم کی، سنه نه دئمیش اغیار،

خیالیندیر مندن گئنه گئن کیمی.

واقیفی مؤهنتو فراغا سالما،

اغیارین سؤزونو قالاغا سالما،

منی اؤز دریندن قێراغا سالما،

هئچ عاشق تاپیلماز سنه من کیمی.

Latincə

جمعالین گؤزومدن نیهان اوْلالی،

جمعالین گؤزومدن نیهان اوْلالی،

ایسته‌رم باخمایین دۆنیایه، پری!

خیال ائیله‌دیکجه اوْ سرو قددین،

دؤنر قانلی یاشیم دریایه، پری!

اوْلسالار یۆز ملک، یۆز هۇری قیلمان،

یۆز مینا گردنلی، زۆلفو پریشان،

یۆز لاله یاناقلی، لبلری مرجان،

کؤنول دؤنمز سندن کیمسه‌یه، پری!

سن گئده‌لی، من ضیاده آغلارام،

وئرمیشم عؤمرومو بادا، آغلارام،

هر دۆشنده قددین یادا، آغلارام،

اۆنوم چێخار عرشی-الایه پری!

سندن آیری باغریم کابابا دؤنموش،

یێخیلمیش دیل شهری خرابا دؤنموش،

فیرقتین دامو تک عذابا دؤنموش،

دیدارین جنّتول-موایه، پری!

بیر گؤریدیم سنین گۆل جمعالینی،

جادو گؤزلرینی، یای هیلالینی،

مۆنبر ساچینی، هیندو خالینی،

یئتردی هر دردیم دوایه، پری!

پئیوسته قۇرولسون قاشین کامانی،

اوْخلارین سینمدن کئچسین نیهانی،

گۆل بدنین هئچ گؤرمه‌سین یامانی،

لۆطف ائیله واقیفی-شئیدایه، پری!

Latıncə

بوْیون سۇراهیدیر، بدنین بۆللور،

بوْیون سۇراهیدیر، بدنین بۆللور،

گرده‌نین چکیلمیش مینادان، پری!

سن ها بیر سوْناسان، جۆدا دۆشوبسن

بیر بؤلوک یاشیلباش سوْنادان، پری!

ایختیلاتین شیرین، سؤزون مزه‌لی،

شکر گۆلوشوندن جانلار تزه‌لی،

ائللر یاراشیغی، اؤلکه گؤزه‌لی،

نه گؤزل دوْغوبسان آنادان، پری!

اۆز یانیندا تؤکولوبدور تئل نازیک،

سینه مئیدان، زۆلف پریشان، بئل نازیک،

آغیز نازیک، دوْداق نازیک، دیل نازیک،

آغ اللرین الوان هنادان، پری!

آوچیسی اوْلموشام سن تک مارالین،

خیالیمدان چێخماز هرگیز خیالین،

انلیگی، کیرشانی نئیلر جامالین،

سن ائله گؤزلسن بینادان، پری!

گۆنش تکی هر چێخاندا سحردن

آلیرسان واقیفین عقلینی سردن.

دۇعاچینام، سالما منی نظردن،

اکسیک اوْلمایاسان سنادان، پری!

سیاه تئللی بیر صنمین اۇجوندان

سیاه تئللی بیر صنمین اۇجوندان

باده گئتدی دین-ایمانلار، افندی!

اوْل اوْدا کی، من دۆشموشم یانیرام،

دۆشمه‌سین هئچ مۆسلمانلار، افندی!

کؤنول دئییل سن گؤردویون هاوادا،

دردیم اوْلور گۆندن-گۆنه ضیادا،

هر زامان دۆشنده لبلری یادا،

تؤکولور گؤزومدن قانلار، افندی!

منیم مئیلیم یوْخدور سۇلطاندان، خاندان،

یاریمین آرزوسون ساخلارام جاندان.

خالق دا بیلیر، منیم کؤنلومدور اوْندان

اوْلسا یۆز مین نوْوجاوانلار، افندی!

موْللا اوْدور هر نه گؤرسه کیتابدا،

اوْنو شرح ائیله‌یه حاقدا-حسابدا،

واقیف دئییر سنه، منه بۇ بابدا،

هله آزدیر بۇ دیوانلار، افندی!

Latıncə

بدنینی گۆل یارادان ایلاهی،

بدنینی گۆل یارادان ایلاهی،

سراسر اترینی عنبر ائیله‌دی،

گؤزللیکده کیمدیر سنه تای اوْلا،

حۆسنون ملکلری چاکر ائیله‌دی.

صۇرتینی چکدی اوْل گۆن کی، نقاش،

جمعالینی قێلدی هر گؤزلدن باش.

جبی‌نینه قوْیدو بیر مۆقووس قاش.

سییاه کیرپیگینی خنجر ائیله‌دی.

زۆلفونو بنزتدی مۆشکین کمنده،

اۇجون حلقه‌‌ قوْیدو سیبی-زغنده،

لبیگین لذتین بنزتدی قنده،

دهانینی شهدو شککر ائیله‌دی.

سنی خلق ائیله‌دی گۆل دسته‌سی تک،

پریدن الاسان، ملکدن گؤیچک،

جیسمیندیر مۆنوور آغو نازیکرک،

اوْل سمن سینه‌نی مرمر ائیله‌دی.

ائی گؤزللر شاهی، کرم، کرم ائت مانا،

باخماگیلن هرگیز اغیاردان یانا،

شۆکر اوْلسون اللها - واقیفی سانا

قاپیندا قۆلامی-کمتر ائیله‌دی.

Latıncə

سراسر بیر یئره یێغیلسا خۇبلار،

سراسر بیر یئره یێغیلسا خۇبلار،

سنین بیر مۇیینه تای اوْلا بیلمز.

گۆنش تکی شؤله وئریر جامالین،

بئله گؤزللیکده آی اوْلا بیلمز.

هئچ گؤزه‌لی سن تک شۇخ گؤرمه‌میشم،

نه فایدا، حۆسنونو چوْخ گؤرمه‌میشم.

اۇزون کیرپیگین تک اوْخ گؤرمه‌میشم،

قاشلارین طرزینده یای اوْلا بیلمز.

حسرتیندن باغریم قان ایلن دوْلوب،

هئیوا تکی رنگیم سارالیب-سوْلوب،

بۇ خۇبلوق کی، حقدن بخش اوْلوب،

هئچ کیمسه‌یه بئله پای اوْلا بیلمز.

قددین شاهباز، آغ بدنین سمن تک.

یاناغین لاله‌دن ضیادا گؤیچک.

اۇستاد سنی چکیب مانندی-ملک،

بۇندان آرتیق حقو سای اوْلا بیلمز.

واقیفم، من سنه حئیران اوْلموشام،

قاشلارین یایینا قۇربان اوْلموشام،

دردیندن دیده‌سی گیریان اوْلموشام،

قانلی یاشیم کیمی چای اوْلا بیلمز.

Latıncə

موللا پناه واقیف-ین حیاتی

موْللا پناه واقیف 1717-جی ایلده قازاخ ماهالی‌نین قێراق سالاهلی کندینده آنادان اوْلموشدور. آتاسی مئهدی آغا نۆفوذلو آدام ایدی. مۆعللیملریندن بیری ده شفی افندی اوْلموشدور.

آدی پناه, تخللوسو واقیفدیر. حؤرمتلی شخص اوْلدوغو اۆچون موْللا آدلاندیریلمیشدیر. موْللاخانا تحصیلینی بیتیردیکدن سوْنرا واقیف هم مۆعللیملیک ائتمیش, هم ده آشیق شعری اۆسلوبوندا «واقیف» تخللوسو ایله شعرلر یازماغا دعوت ائتمیشدیر.

خوییی عصر گۆرجوستان سرحددینده‌کی مۆناقیشه‌لر بیر سێرا عائله‌لر کیمی, اوْنون دا عائلهسی‌نین اوْرادان کؤچمه‌سینی زروری ائدیر. اوْنلار اول گنجه‌یه, سوْنرا قاراباغا, اوْرادان دا خانلیغین مرکزی اوْلان شۇشا شهرینه کؤچورلر.

واقیف ایکی آرواد آلیب. بیری‌نین آدی قێزخانیم, اوْ بیری‌نینکی مدینه اوْلوب. قێزخانیم دۇربند بَیین قێزی ایدی و گنج یاشلاریندا اؤزوندن چوْخ-چوْخ یاشلی اوْلان واقیفه اره گئتمیشدی. خالق آراسیندا اوْنون قئیری-آدی گؤزللیگی باره‌ده روایتلر دوْلاشیردی. واقیفین بیر اوْغلو, ایکی قێزی اوْلوب. اوْنلارین هامیسی مدینه خانیمدان اوْلموش اۇشاقلار ایدیلر. اوْغلونون آدی الیاغا ایدی, "عالیم" تخللوسو ایله شعرلر یازمیش و یئتکین چاغلاریندا قتله یئتیریلمیشدی.

ایبراهیم خان واقیفی سارایا دعوت ائدیر, اوْنو اول ائشیکاغاسی, سوْنرا ایسه باش وزیر تعیین ائدیر.

واقیف سارایا دۆشدوکدن سوْنرا اؤزو سۆننی اوْلسا دا, خانین ایناندیغی شیعه مذهبینی قبول ائدیر. بیرینجی وزیر اوْلدوقدان سوْنرا خانلیغین خاریجی سیاستینه رهبرلیک ائدیب. اوْ واخت آذربایجاندا وضعیت چوْخ گرگین و مۆرککب ایدی. 1747-جی ایلده نادیر شاهین اؤلدورولمه‌سیندن سوْنرا, بلکه هله بیر آز دا اول آذربایجاندا مۆستقیل خانلیقلار یارانمیشدی. آز بیر مدت عرضینده شکی, قاراباغ, گنجه, قۇبا کیمی آذربایجان خانلیقلاری بئین الخالق میقیاسدا تانینماغا باشلاییرلار.

واقیف ویدادی, حسین خان مۆشتاق, آغقیز اوْغلو پیری کیمی شاعرلرله دوْستلوق ائتمیشدیر. اوْنون ان یاخین دوْستو ایسه هئچ شۆبهه‌سیز, همیئرلیسی و بعضی منبع‌لره اساساً, اۇزاق قوْهومو ویدادی اوْلوب. واقیف اؤز قێزلارینی ویدادی‌نین اوْغلانلارینا اره وئرمیشدیر. اوْنلارین مۆشایره‌سی (شعرلشمه‌سی) هر ایکی شاعرین یارادیجیلیغیندا مۆهوم یئر تۇتور

واقیف موْللا ویدادی ایله مشهور «آغلارسان» آدلی دئییشمه‌سی وار. واقیف نیکبین, ویدادی ایسه بدبین اینسان ایدی.

گۆرجوستان و رۇسییا ایله قاراباغ خانلیغی‌نین سییاسی مۆناسیبتی‌نین یاخشیلاشدیرماق مقصدی ایله تیفلیسه صفره گئتمیشدیر. ایرانین سییاسی, حربی تضییقلرینه قارشی فعال مقاومت گؤسترمیشدیر.

1795-جی ایلده آغا محمّد شاه قاجارین ایبراهیم خانا گؤندردیگی «فله‌یین مانجاناغیندان فیتنه داشلاری یاغیر, سن ایسه ابلهجه‌سینه شۆشه ایچریسینده اوْتورموسان»- مکتوبونا واقیف بئله جاواب یازیر: «اگر منی قوْرویان منیم تانیدیغیمدیرسا, شۆشنی داش ایچریسینده ده سلامات ساخلار».

قاجار بۇندان غضبله‌نیب شۇشایا هۆجوم ائدیر, قالانی 33 گۆن مۆحاصیره‌ده ساخلاییر. اما آلا بیلمیر. قاجار 1797-جی ایلده قاراباغ خانلیغینی جزالاندیرماق اۆچون یئنیدن قاراباغا هۆجوم ائدیر. ایبراهیم خان بالاکنه قاینی‌نین یانینا قاچیر, واقیف ایسه شۇشادا قالیر.

شاعر حبس ائدیله‌رک زیندانا سالینیر. لاکین قاجار اؤلدورولور, ایران قوْشونو گئری چکیلیر. واقیف حبسدن آزاد ائدیلیر. محمّد بَی جاوانشیر حاکمیتی اله آلیر.

1797-جی ایلده واقیفی اوْغلو الی بَیله بیرلیکده اعدام ائتدیریر. واقیفین ائوی تالانمیش, الیازمالاری ایتمیشدیر.

واقیف شرق پوْئزییاسی‌نین بۆتون کلاسسیک فوْرمالاریندان ایستیفاده ائدیب. اوْ, قزل, تجنیس, مۆخممس, مۆستزاد, مۆششره, مۆشایره, مثنوی و مرسییه‌لر یازیب. آنجاق اوْنون یارادیجیلیغی‌نین بؤیوک بیر قیسمی, آشیق پوْئزییاسیندان گؤتورولموش قوْشما نؤوعنده یازیلمیش شعرلر تشکیل ائدیر. همین شعرلرین دیلی خالقین جانلی دانیشیغینا چوْخ یاخیندیر. واقیف عرب و فارس منشأ‌لی سؤزلردن باجاردیقجا آز ایستیفاده ائتمیشدیر.

Latıncə

بیر اۆزو گۆل, رنگی لاله, زۆلفو تر,

بیر اۆزو گۆل, رنگی لاله, زۆلفو تر,

گشته چێخیب, درر تازا بنفشه.

دسته-دسته سانجیب بۇخاق یانینا,

یاراشیبدیر اوْ شاهبازا بنفشه.

جیسمی مرمر, حلقه‌ زۆلفلری قارا.

اوْنو گؤرن مجنون اوْلور -آوارا,

هؤروب ساچلارینی, سالیب قاتارا,

دۆزوب تئله, هم قوْتازا بنفشه.

یاشی اوْن سککیزه یئنیجه یئتمیش,

گؤزللیکده تامام خلقی مات ائتمیش,

گشته چێخمیش - یار گلدیگین ائشیتمیش,

داغا سالیب بیر آوازا بنفشه.

گؤیسون آچیب, آغ قوْللارین چێرماسین,

ائله گزسین, اوْنو رقیب گؤرمه‌سین,

اغیار ایلن چێخیب سئیره, درمه‌سین,

لاییق اوْلماز آنلامازا بنفشه.

سن ساللانیب قاباغیمدان گئدنده,

هرگیز قالماز صبرو ایختییار منده.

واقیف زۆلفلرینی تعریف ائدنده,

گرکدیر کی, اول یازا: بنفشه.

Latıncə

ساچین زنجیرینه کؤنول باغلادیم,

ساچین زنجیرینه کؤنول باغلادیم,

مجنون کیمی دۆشدوم داغا, فاطمه‌!

نئچون منی گؤرجک سرخوْش اؤتورسن,

بیر باخمازسان سوْلا-ساغا, فاطمه‌!

اؤزون پری, خۆلقو خوْیون فریشته,

هاردا اوْلسان اوْرا دؤنر بهیشته,

سن گرکدیر گۆنده چێخاسان گشته,

گۆل دۆزه‌سن گۆل بۇخاغا, فاطمه‌!

هاچاناجان جانیم اوْدلارا یاخیم,

هر طرفه داشقین سئللر تک آخیم.

چوْخ مۆشتاقم آچ اۆزونو, قوْی باخیم

عنبر زۆلفه, گۆل یاناغا, فاطمه‌!

لاییق دئییل سنه ناکسو بیقم,

آدام گرک اوْلا آداما همدم.

جانیم چێخار سنی گؤرمه‌سم بیر دم,

گئتمه مندن سن اۇزاغا, فاطمه‌!

واقیف سنی سئودی خۇبلار ایچینده,

بیر تزه قؤنچه‌سن گۆلزار ایچینده,

سؤز دانیشماق اوْلماز اغیار ایچینده,

گل چکیلک بیر قێراغا, فاطمه‌!

Latıncə

سێغاللانیب-سێغاللانیب سیاه زۆلف،

سێغاللانیب-سێغاللانیب سیاه زۆلف،

نه گؤزل دۆشوبدور اۆزه، فاطمه‌‌!

جان آلیرسان یئنه، بۇ نه سۆرمه‌دیر

چکیبسن اوْل خۇمار گؤزه، فاطمه‌‌؟

من ماییلم سنین زنخدانینا،

حلقه‌‌-حلقه‌‌ زۆلفی-پریشانینا،

جواهیرلر خرج ائیله‌رم شانینا،

اگر مۆشتاق اوْلسان سؤزه، فاطمه‌‌!

جان مۆلکونه وئرمم ساچی‌نین دنگین،

آت جانیما کیرپیکلرین خدنگین،

تا کی، گؤردوم یاناغی‌نین من رنگین،

دۆشموشم بیر اوْدا، کؤزه، فاطمه‌‌!

یای کیمی نه گؤزل چکیبسن قاشی،

اوْنا سؤز یوْخ، هر نه دئسم یاراشی،

سنه پئشکش ائتمنممی جان-باشی؛

نئچون بیر گلمزسن بیزه، فاطمه‌‌؟

عشقین آتشیدیر منه اریدن،

جان اۆزولدو باخا-باخا گئریدن،

دؤنموشم ملکدن، تامام پریدن،

واقیفم، سئومیشم تزه فاطمه‌‌!

Latıncə

دوْلدو دیماغیما زۆلفون عنبری،

دوْلدو دیماغیما زۆلفون عنبری،

والئه اوْلدو کؤنول هوادن سنه.

الیم یئتمز - نامه یازیب دردیمی

گؤندریرم بادی-صبادن سنه.

اوْتوروشون گؤزل، دۇروشون گؤزل،

ساللانیشین گؤزل، یئریشین گؤزل،

خوْیون، خۆلقون گؤزل، هر ایشین گؤزل،

بخش اوْلوب بۇ خۇبلوق خۇدادن سنه.

دوْداقلارین اوْخشار لعلی-یمنه،

یادا دۆشدو، باغریم قان اوْلدو یئنه،

سییاه تئل دۆزورسن بَیاز گردنه،

دۆشوبدور بۇ قایدا سوْنادن سنه.

فیکرو خیالیندیر کؤنلوم زیینتی،

شیرین سؤزلریندیر آغزیم لذتی،

سنسن منیم عؤمروم، گۆنوم وحدتی،

یئتیشمه‌سین، یا رب، بلادن سنه.

قم ائوینده سالدین کۆنجه واقیفی،

ائیله‌دین مۇییندن اینجه واقیفی،

نئچون اینجیدیرسن مۇنجا واقیفی،

نه حاصیل بۇ جؤورو جفادن سنه؟

Latıncə

سنسن، ائی نازه‌نین، گؤزللر شاهی،

سنسن، ائی نازه‌نین، گؤزللر شاهی،

اوْلا بیلمز کیمسه برابر سنه.

سرخوْش دۇروب ساللاناندا هر یانا،

مات قالیر، ائی سرو، سنوبر سنه.

باخدیقجا باخیشین شیرین، گؤزون شۇخ،

بیر عجب جاوانسان نزاکتین چوْخ،

کمالیندا، جامالیندا ائییب یوْخ،

پروردیگار وئرمیش هر هۆنر سنه.

سؤز یوْخ زنخدانا، زۆلفه، یاناغا،

قامته، گردنه، قاشا قاباغا،

بیر شیرین دیلبرسن باشدان آیاغا،

نه نابات بنزه‌ییر، نه شکر سنه.

یا بدرلنمیش بیر ماهی-تابانسان،

یا جنّت باغیندا گۆلی-خندانسان،

یا ملکسن، یا دا هۇری قێلمانسان

ائی سئودیگیم، اینسان کیم دئیر سنه؟

چوْخلار گئتدی ایلتیماسا، گلمزدین،

اۆزوم اۆسته قدم باسا گلمه‌دین،

واقیف اؤلدو، نئچون یاسا گلمه‌دین؟

یا ظاهر اوْلمادی بۇ خبر سنه؟

Latıncə

سرو بوْیلوم، بیر چێخ، گؤروم بوْیونو،

سرو بوْیلوم، بیر چێخ، گؤروم بوْیونو،

اوْندا قۇربان ائدیم جانی من سنه.

قاشلاری‌نین تاغی قیبلگاهیمدیر،

فدا قێلیم دین-ایمانی من سنه.

آدام گرک گؤرسون حقی آرادی،

هانی سنین کیمی بیر پریزادا،

ملکدن ده سنی بیللم ضیادا،

تای ائتمنم هئچ اینسانی من سنه.

باخماق ایلن دوْیماق اوْلماز اۆزوندن،

دانیشاندا شیرین-شیرین سؤزوندن،

اوْنون اۆچون گؤز کسمه‌رم گؤزوندن

مۆشتاغام، ائی شکر کانی، من سنه.

قاشا، گؤزه سۆرمه نه گؤزل چکدین،

جیلوه‌له‌نیب زۆلفه هم سئیقل چکدین،

سن نه اۆچون آخیر مندن ال چکدین؟

ائیله‌مزدیم بۇ گۆمانی من سنه.

گؤزل سن تک بئله شۇخو شن گرک،

همدمی ده هم اؤزونه تن گرک،

سنه واقیف کیمی درد بیلن گرک،

لاییق گؤرمم هر نادانی من سنه.

Latıncə

ائی سۆسن سۆنبولوم، آل زنخدانلیم،

ائی سۆسن سۆنبولوم، آل زنخدانلیم،

قۇربان اوْلسون لاله، گۆل ایلن سنه.

بۇ نئچه گۆندور کی، سندن آیرییام،

ساناسان حسرتم ایل ایلن سنه!

دئمه‌لی چوْخ گیزلین دردی-دیلیم وار،

قوْرخورام کی، دئییم، ائشیده اغیار،

ایسته‌رم کی، یازام گؤنده‌رم، ائی یار،

سحر اوْغرون اسن یئل ایلن سنه!

آغزی پییاله‌سن، گرده‌نی مینا،

نازیک اللرینده ایننابی هنا،

سنی گؤرن دئیر، یاشیلباش سوْنا،

اۇجو حلقه‌‌، سییاه تئل ایلن سنه!

چوْخلار سنه اییما ایلن باش ایر،

مۇم تک اریر، اوْلسا باغری داش ایر،

تۇبا گؤرسه، ایکرام ائیلر، باش ایر،

بۇ گؤزل بوْی ایلن، بئل ایلن سنه!

یادیما دۆشنده زۆلفون عنبری،

قۆللاب گیرر جییریمدن ایچری،

من شاهام، ائی گؤزللرین سروری،

قۇربانام واقیف تک قۇل ایلن سنه!

 
  • یارپاقلارین سایی :3
  • 1  
  • 2  
  • 3  
 

وبلاقا گؤره

بو دیل دنیزدی سیزین تک صدفده اینجیسی وار
قیزیلدی سیزده اولان اوزگه‌نین اگر میسی وار
دئسزکی اودلو دیاردی بیزه وطن یاراشار
بیزیم اوجاقلارین آنجاق کور ائیله‌ین هیسی وار
"عقیل"
وبلاق مودیری : نژادمحمد

سون یازیلار

آختارماق

یازارلار

Page Rank بالاجا خوخان آذربایجان تورکجه سینده ایسلام دینی و قرآن کریم