تبلیغات
ایران آذربایجانی تورکجه سینین ادبیات اوتاغی - مطالب پروفسور محمد تقی زهتابی
ایران آذربایجانی تورکجه سینین ادبیات اوتاغی
یاشاسین آذربایجان

قونو سلاخلانجی

سلاخلانج

باغلانتیلار

اؤزل یارپاقلار‌

← وبلاق گؤروشلری

  • گؤروشلرین هامیسی :
  • بو گون گؤروشلر :
  • دوننکی گؤروشلر :
  • بو آی گؤروشلر :
  • قاباق آی گؤرو‌شلر :
  • یازارلارین سایی :
  • یازیلارین هامیسی‌نین سایی :
  • سون گؤروش :
  • سون دیَیشمه :

لینکلر‌

وطن قۇشو

وطن قۇشو

بیر قۇش اۇچدو چمندن،

آیری دۆشدو وطندن،

غۇربتده سوْروشاردی

وطنین هر گلندن.

****

آخیر آچیب قانادین

اۇچدو غۇربت چمندن،

گلدی وطن یۇردونا،

قۇرتاردی غم محنتدن،

Latıncə

آناما

عؤمور کئچدی،ایز قالدی               ویجدانیم تمیز قالدی

آنا سنین خاطیردن                      قلبیمیده عریز قالدی

                                    ***

غربته بئل باغلادیم؛                     اورَگیمی داغلادیم

آیریلیق گونلرینده                         آنا دئییب آغلادیم

                                    ***

داغلاردا دوُمان واردی،                  عؤموردن آمان واردی

آیریلیغین سونوندا                      گؤروشه گومان واردی.

پرفسور زهتابی

  کیتابین آدی : پرفسور زهتابی شعرلری 

کیتابین فورما سی  : جاوا

ساپورت ائدن قولاغ جیق لار (موبایل تلفن لاری): بوتون قولاغ جیق لاری کی جاوا پروگرامین ساپورت ائده لر

اولچوسو : 67 کیلو بایت

ایندیر (دانلود)

پروانه نین سرگذشتی

پروانه نین سرگذشتی

سئودا گولونون رایحه سین تازه جه قانمیش
گول- گول قانادیندان آزاجیق شعله ده یانمیش
پروانه نی گوردوم.
سرمیشدیسه یانمیش قانادین تورپاغا یورغون
دوشموشدوسه دیلدن، گئنه ده آتشه وورغون
باخماقداایدی حیرصیله، اولدوز كیمی، گوزلر
اوددان نه گوروبسن، آ زاواللی؟ - دئیه، بیر آن
توتدوم قانادیندان.
ساپدیرمایاراق گوزلرینی بیر دم آلوودان:
- بیگانه سن، ای – سویله دی- افسانه لریمدن
قالدیردیغیم اولده كی پئیمانه لریمدن
احوالیمی بیلسه ایدین ازلدن گر آدیمدان
توتمازدی الین ایندی بو یانمیش قانادیمدان
- عاشیق تانیمیشدیر- دئدیم- آنجاق سنی دونیا
ائتمز سن، آدیندان گورونور، دهرده پروا
اوددان و آلوودان.
اما دئه گوره ك حالیوی، افسانه وی بیر- بیر
قصدین نه دی یانماقدان اود ایچره، اونو بیلدیر؟
- من سویله رم اما- دئدی- ال چك قانادیمدان
لاییق دئییل آزاد اولان انسانلارا زندان:
" دایم منی اوخشاردی آنام كورپه اوشاقكن.
تك لایلاریندان بونو خاطیرلاییرام من:
"آتشله یاراندیق!"
اورتردی عصیرلرجه یئری قاپ- قارا پرده
مطلق او قارانلیقلاری یلدا گئجه لرده
شیمشكلر عجایب سسیله گورلاییب، هردن
اوز اودلو قیلینجیله بیر آنلیقجا یاراركن:
- باخ، گور، بودور آتش- دئیه، سویله ردی آنام، من
فیكره دالیب، آتش دئیه، قاچماق دوشونركن
اوخشاردی و سویله ردی منه قایغیلی گوزله:
تئزدیر، هله گوزله!!
آخشام چاغی بیرگون بوتون عالم قارالاندا
ظلمت قوشو هر بیر طرفه كولگه سالاندا
خلوتده آنام سویله دی:
- دولدون یاشا آرتیق،
كئچمیشدیر او گونلر، بالا، كئچمیشدیر اوشاقلیق
عقلین كسیر آرتیق، قولاغ آس سویله ییم ایندی
قلبیمده كی سیرری:
" بیر آخشام آتان، گوستره رك شمعی اوزاقدان،
- هر وقت- دئدی- كورپم اولار بیر ایگیت آسلان،
سویله، اوسانیب تنگه گتیرسه اونو ظلمت
بیلمه ك دیله ییب سورساكی، بس هاردا حقیقت؟
قوی گئتسین اورا، اوردا حقیقت نه دیر آنلار
گر بیر آتا تك اوندا منیم حق- سعییم وار
گئتسین كی، یئتر نسله بو گئتمكله شرافت
كئچمیش بابالاردان منه چاتمیش بو وصیت…
قورتارجاق آتان اوددو اونو قاپ- قارا پرده،
دونمه دی بیرده.
دوزدور بالا اونلار، دئمیره م بیر داها تكرار
كئچمیش آنالاردان منه قالمیشدیر اینان بو
حق یول بو، حقیقت بو دور، اسرار جهان بو…
ظلمتده بونو سویله یه رك ، ایتدی بیر آندا
گئتدی آنام دا…
×××××
گون كئچدی، زامان كئچدی، قارانلیغدان اوساندیم
شیمشك چاخان آن یاتمیش ایدیم سانكی، اویاندیم
آخشام چاغی، ائتجه ك بالاما من ده وصیت
آتش دئیه گئتدیم.
تاپدیم من اوز آختاردیغیمی اوردا نهایت
هر بیر شئی اینان: شعله، ایشیق، نور، حرارت…
- بیلدیم، دئه- سوآل ائیله یه رك، بیرده دایاندیم:
- قاندین می حقیقت نه دیر آخیر؟
- بلی قاندیم.
لاكین او زامان سیررینی آنجاق اونون آندیم
كیم اودا یاندیم.
چونكی قانادیم اوددا یانان دمده، بیر آنلیق
گوردوم نئجه محو اولدو ایشیقلاردا قارانلیق!!
- یانماقدادا، بیچاره – دئدیم- وارمی حقیقت؟
- یانماقدا حقیقت سنه افسانه دیر البت،
اما منه یوخ، چونكی، قارانلیقدان اوساندیم
اودسوز عومورون قلبه ماحال اولدوغون آندیم،
آتش دئیه گئتدیم و نهایت اودا چاتدیم
ظلمت تورونو نورایله بیر لحظه ده آتدیم
بیر دمده ایشیقلاندی باشیم دا، بدنیم ده...
فیكریمده ن اوزاقلاشمادی اما وطنیمده
ظلمتلره قلبیمده درین نفرت اویاندی
فیكریم او قارانلیقلاری بوغماقدا دایاندی
جومدوم اودا، آچدیم قولومو اودلو هوسله
تا بیر قوجاق آتش گتیریم یوردوما تحفه
رحم ائتمه ییب عصیان آلوو جسمیمی یاخدی
شر قووه لر آت چاپدی قانیم سئل كیمی آخدی
یانماقدادا، عشقیم كیمی، دیلده ن- دیله دوشدوم
قان دالغاسی آتدی بو آزاد ساحیله دوشدوم...
ال چك قانادیمدان، گوروسن بیتدی حكایت.
- الدن سنی سالمیش بو آغیر گون، بو فلاكت
مرهم قویارام، دوز بوگونو – سویله دیم آرام-
قورتارمادی گون، وار یئنه ده آیری بیر آخشام.
- یوخ، یوخ- دئدی- سن آنلامادین قلبیمی، هئیهات!
هر عصره یاراشماز نه او مجنون، نه او فرهاد
هر بیر گونون اوز حوكمو، اوز افسانه سی واردیر
هر آیری اودون، آیری دا پروانه سی واردیر
هر بولبول ایله بیر گول آچیر عشق باغیندا
هر قیز گلین اولمازمی مگر اوز اوتاغیندا؟
آچمیش بو گولون ده دلی- دیوانه سی یم من
ایندی بو اودون، قان بونو، پروانه سی یم من
ال چك قانادیمدان!!
ال چك كی، دوغولموشكن اوزوم فیرتینالاردان
ساكت باخا بیلمه م دلی عمانا كناردان
هر دالغاسی بیر عومره برابر هیجاندیر
هر نعره سی خلق عاشیقینه بیر تازا جاندیر...
باخ كوكره ین عمان نه دئییر اودلو سسینده
مین نغمه سی، مین آتشی وار هر نفسینده
من گرمه لی یم سینه او چیلغین لپه لرده
گول- گول قانادیمدان گره ك اونلار اوپه لرده
چارپیشماسا قول اوردا، پولاد تك سوواریلماز
شیمشك كیمی قول اولماسا، ظلمت كی یاریلماز
- اوددور او، یاخیب وارلیغیوی یاندیراجاق دیر!
- یاندیرماغینا جاهیل اونون كورپه اوشاقدیر.
اوددا یاناراق، ظلمتی بوغماق دیله رم من
آل شعله اولوب، عرشه اوجالماق دیله رم من.
اوددان و آلوودان دوغولوبسوز اوزونوزده
واردیر هله ده اودلو قیغیلجیم گوزونوزده
اوددان بو ساغیندیرمازا بیلمه م نه سبب وار؟
- آلقیشلامیش آتشلری پئیوسته ازلدن
اوددان دوغولانلار.
آلقیش دئییرم من ده او وولقانلارا قلبا
وولقان گوجونه قورموش الیم گوللو گولوستان
قوی سن كیمی اود یاورولاری فیض آلا اوندان
- قورموشدور الین بیر تازا گولزار ، بو دوزگون
غواص تك اونلار كی، و لاكین دور آرارلار
گولشن دئییل، سهو ائتمه سم، عمانه وارارلار!!
- بیر آرزو دور هر شخصه حیاتین دادین آلماق
- لذت! نه گوزه ل سوز! بونا شك ائتمیره م ، آنجاق
فرض ائت بورادا خیضر قدر اولدو حیاتیم
هر فیرتینادان، فرض ائیله یك، اولدو نجاتیم
عومروم كئچه جكدیر، توتالیم، هر یئنی گونده
مین تویدا، دویونده...
آخیر منی بیر گون اوداجاقدیر قارا تورپاق
بس اوندا وطن قلبینه باتمیش قارا جایناق؟!
بس وارلیغیمین، منلیگیمین خالیقی ائللر؟!
بس گنج اولاراق چیمدیگیم افسانه لی گوللر؟!
روحون، كونولون، حسلرین دایه سی گوللر؟!
بس اوندا سویون ایچدیگیم او گوزگو بولاقلار؟!
پئیوسته بولودلا اوپوشن نازلی او داغلار؟!‍‍‍‍‍‍
یوز بار وئره ن هر شاخه ده جنت كیمی باغلار؟!
چوللر‍،دره لر،یام- یاشیل اطلسلی یاماجلار؟
قاققیلداشاراق گویده سوزه ن نازلی توراجلار؟
آزادلیق اوچون چارپیشان ائل؟ قان توكه ن انسان؟!
ترك ائتدیگیم آل قانا بویانمیش اولو مئیدان؟!
زحمت آناسیندان مدنیت دوغورانلار؟!
بس وارلیغیمی قانلی ترایله یوغورانلار؟
بس اوندا حالال سود كی،اوشاقلیقدا دوشونده ن
امدیم آنامین من؟!
بس بونلارا بورجوم؟!
بس اوندا وصیت؟ اونودولسون مو وصیت؟!
ترك ائتسه م اگر،مین كره نفرت منه نفرت
یوخ،یوخ،منه گولزاردا پئیمانه گركمز
شهلا، جان آلان نرگس مستانه گركمز
دلبر دوداغیندان امره ك مست اولوب اولمه ك
من ایسته مم، آللاهی سئورسن، بوراخ، ال چك
دایم تازالیقلار  گونونون ایلك ایشیغیندا
چیممه ك و ایسینمه ك دیله ین تشنه بو كونلوم
ائل آرزوسو عمانینی بیر دمده، بیر آندا
كوثر دئیه، ساغر كیمی، ایچمه ك دیله ییر، قان!
ال چك قانادیمدان!!

بیز اوستون گلمیشیك هر سیتمگره،

بیز اوستون گلمیشیك هر سیتمگره،
آرخادا اوْلموشوق ا‌زیلنلره،
حتی باج وئرمه‌دیك بیز ایسكندره،
سود وئریب ارشكه، اشكانا خلقیم.
بیز قوودوق ایراندان یادی ، یونانی،
قورتاردیق ظولمدن فارسی، كیرمانی،
خلقیمین تاریخده وار آدی، سانی،
دئییلدیر قورو، بوش افسانا خلقیم.
عرب بو توپراغا چكنده شمشیر،
اوْنون شمشیرینی قیردی جوانشیر،
بابكین نعره‌سی هله‌ده یاشیر،
قالاسین ساخلاییر آلانا خلقیم.
عربین بو یئردن ظولمونو قازان،
مگر اولمامیشدیر آلپ‌ارسلان؟!
قورویوب بو یئرین ، بلی هر زامان،
شرافتین مرد ـ مردانا خلقیم.
اوندا كی یو‌خ ایدی ایراندان نیشان،
قیزیلباش ائیله‌دی ایرانی ایران،
ایرانا باش اوْ‌لدو آذربایجان،
سالدی ایشلرینی سهمانا خلقیم.
مشروطه زامانی اولو ستارخان
ایستیبداد دئوینه توتاراق دیوان،
آزادلیق پری  سین گتدی ارمغان،
توْی توتدو سولطانا ، خاقانا خلقیم.
هله ده اوْلوبدور دیللر ازبری،
قوْچاق موجاهیدین ایگیدلیكلری،
بیزیمدیر اونلارین بؤیوك هونری،
اؤیونور سالارا، باغبانا خلقیم.
جسارت كانییدی خیابانیمیز،
اونونلا دیریلدی بو ایرانیمیز ،
او بیزیم فخریمیز، حیكمت كانیمیز،
سؤزلرین ساییری دوردانا خلقیم.
شئخ ممد سوسمایان آلوولو سسدیر.
میلی وارلیغیما او تكجه بسدیر،
تاریخه های سالان گوٍجلو جرسدیر،
اؤیونور بئله ‌بیر اینسانا خلقیم.
ایل كئچر ، بیر میلت بیر اینسان دوغار
اوْنون تدبیریله  دوشمانین بوغار،
داهیلر توپلانار ، خلقه گوٍن دوغار،
چو‌خ وئریب دهیلر ایرانا خلقیم.

افسانه دی شمشیره دایانمازسا، آزادلیق

چكدیكده قیلینجین،
جوشدوقدا دنیز تك،
توفان كیمی اورمانلاری تیترتدیگی آنلار
دوشمن كیریییب آغلادی مسكین.
باش ایدی غلام تك اونا سلطانلار، اوزانلار،
زحمت چكن انسانا اؤلوم حؤكمو یازانلار،
مللتلرین دیللرینه قبر قازانلار...

قؤیدوقدا قینا اودلو قیلینجین،
سونبوللری بیچدیكده یایین ایستی چاغیندا،
دوشمن دونه رك آسلانا گلدی،
سونگو یله اونون زحمتینین یاریسین آلدی،
آج قالدی قیشین شاختالی، چووغونلو چاغیندا،
بیر سؤز دئمه دی سینه سی میس تك یانان
      / آسلان
      / كیمی انسان!!
سونگویله بوتون ثروتینی چالدی، آپاردی،
زنداندا چوروتدو
آسلانلاری بیر- بیر،
حؤكمون ده یوروتدو،
بئینین ده قازیب اینجی قوپارتدی،
تاریخینی آلت- اوست ائله ییب یازدی تازاشدان؛
بیر آبیده ده تیكمك اوچون وئرمه دی ایمكان؛
اولكیلری ائیله دی ویران...
دؤزدو گئنه ده سینه سی میس تك یانان
       / آسلان
       / كیمی انسان!!
قلبینده سه عصیان.

بیر گون ده گلیب ایسته دی توپراقدان
       / آییرسین اونو دوشمان
بیر فیكره دالیب سوسدو بو آسلان
       / كیمی انسان
       / و دوشوندو:
آرخامدی بو توپراق،
شنلیكده بوساطیم دؤشنن یئر،
پیس گونده دایاق،
       / همده سیغینجاق
توپراق
/ اگر اولمازسا نه ییم وار و نه یم من؟
توفانلی دنیزلرده اوز ه ن بیر اؤلو یارپاق!
مین بیر اولو بابك كیمی اجدادلاریم آنجاق
بوردا یاشاییب، عؤمر سوروب، گؤمدورولوبلر
چیخسام وطنیمدن،
هاردان آلارام قان،
هاردان گله جك جسمیمه قووت،
       / و جسارت
       / و همییت؟
هاردا قازیلار سون بئشیگیم بس؟
كولی دئیر اولادیما هر كس...
نفرت دولو گوزله
بیر دوشمنی سوزدو،
((هئركول)) كیمی جانلاندی گؤزونده
ایستیر آیاغین یئردن اوزوب آنتئیی بوغسون...
داغلار گوجو حیس ائتدی اؤزونده،
قلبینده قانی كوكره دی، جوشدو،
قیزغین شئره دؤندو
سانكی بو سفر سینه سی میس تك یانان
        / آسلان
         / كیمی انسان!!
آیدینجا گؤزونده آلیشان شعله گؤروندو؛
كین اؤرتوگونه سانكی بوتون وارلیغی بیر آندا بوروندو.
سیخدی كوره گین توپراغا دوشمنله دیدیشدی.
قوپمام- دئدی- اؤلسم ده بو یئردن،
           / بو دیاردان.
كئچمیش بابالاردان
           / آتالاردان
ارثیمدی بو داغلار،
بو بولاقلار،
بو اتكلر،
بو چیچكلر...
اوولادیما ارثیم گرك اولسون بو دیاریم.
توپراقدی منیم دارو نداریم.
داغلارجا فلاكت،
عمانجادا موحنت
و اذیت
بیر دمده بئله آغناسا گر اوستومه قوپمام...
آز قالدی جوشا سینه سی میس تك یانان
        / آسلان
        / كیمی انسان!!
قلبینده یامان چاغلادی عصیان
توفانلی دنیز تك!!

كئچمیشلری خاطیرلادی دوشمن،
بیر واخلاری كی، سینه سی میس تك یانان
      / آسلان
      / كیمی انسان.
چكمیشدی قیلینجین...
- قوی جوشماسین عمان-
       / دئیه، قلبینده جه آرام،
دوشمن گئری دؤندو...

اولدو سحر، آخشام،
كئچدی نئچه ایام،
/ قوجامان سینه سی میس تك یانانین آتشی سؤندو
سؤندو گئنه گؤزلرده قیغیلجیم
/ و دورولدو
گؤزلر كیمی هر یاندا بولاقلار
  / و ایشیقلاندی چیراقلار؛
سونبوللری ده بیچدی اوراقلار؛
قیشلار دولانیب، كئچدی سازاقلار؛
بیر آزجا گولوش  گؤردو دوداقلار؛
دینجلدی آیاقلار
/ و باجاقلار،
هر یاندا بوساطین دؤشه دی دوزلره یازلار،
آذر گوزلین چؤلغادی نازلار،
دیللندی یاماجلاردا یئنه نغمه لی سازلار،
عزیزیم گولوم واردیر،
وفالی ائلیم واردیر،
وطنیم تالاندیسا،
وارلیغیم، دیلیم واردیر...

توتدو گؤزونو اویغو ایلان چالمیشین، آمما
بیر آن دا بئله یاتمادی دوشمن.
هر گون یئنی بیر حیله دوشوندو،
هر ایل یئنی بیر دوندا گؤروندو،
عاریفلرینی توپلایاراق، قوردو ییغینجاق،
تا بلكه تاپا مینمه گه بیر تازا اویونجاق.
سون تدبیری ساده:
لازیمدی ده گیشسین
زحمتله بوتون وارلیغی یوغرولموش اولان،
   / سینه سی میس تك یانانین اؤزلوگو آنجاق.
گر اؤزلوگون آلساق،
گر منلیگینی، كیملیگینی آلساق الیندن،
توپراق دا بیزیم دیر،
داغ، دوز، دره، اوتلاق دا بیزیم دیر،
تكجه نه كی نعمت، نه كی معدن،
نعمت یارادان قول، قولوموزدور؛
آلساق دیلینی، اؤزلوگو یوخ بیر قولوموزدور...

دوشمن یاساق ائتدی، وئره رك بیر اولو فرمان
زحمتله سعادت آرایان،
    / سینه سی میس تك یانانی دوغما دیلیندن.
انسانلیغی لذتله قارین، پولدا بیلنلر،
قارین ایزی ایله سورولر تك سوروننلر،
معنادا دئییل، ظاهیرأ اینسان گوروننلر،
اؤز وارلیغین افسانه سایانلار،
اینسان كیمی لر بال كیمی شیرین دیلین آتدی؛
نعمتلره،
  / لذتلره،
   / شهرتلره،
    / چاتدی.
انسانلیغینی بیر قارینا، بیر پولا ساتدی.
آیریلدی دیلیندن،
آیریلدی ائلیندن.
كئچمیش كیمی لاكین قوجامان
    / سینه سی میس تك یانان
     / آسلان،
دایم باخاراق غملی گئدنلر دالیسینجا،
انسانلیغی، ملیتی جوشدو،
قلبینده قانی جوشدو و داشدی،
جسمینده گوجو حدینی آشدی،
ووردو بئلی قووتله بیر آرشین یئره كئچدی،
خوشبخت لیگین تاپدی یئریندن
   / و تریندن.
یئللر پوزا بیلمز قوجامان داغلارین
   / آیدیندی ووقارین.
قانون طبیعتدی درین كؤكلو چینارلار،
یارپاقلارینی توكسه ده توفاندا، سازاقدا،
آزاد گونشه دوغرو دمادم بوی آتارلار،
مؤحكمدی كؤكو چون آنا توپراقدا،
   / بولاقدا،
اؤلموش قورو یارپاقلاری
   / سالماز چیناری
   / ذره جه اولسا ووقاردان، عظمتدن!!
سرسم یئله اویموش
یارپاقلارین آمما،
یئللر گومورر هر بیرین آخیر
بیر گوشه ده، بیر قبرده ایتگین.

بئش یاپراغیله اؤزلوك آلینماز،
قیرخیلسا توك، اینسان كیشیلیكدن كی سالینماز،
لازیمدی دگیشسین دیلی بو سینه سی میس تك یانانین
سون امرینی دوشمن بئله وئردی.

دوشمن گله رك سؤیله دی:
آت دوغما دیلین بیر كره، حتی
آت اسكس شعورون
   / و دوشون تكجه منیم تك.
سن
   / منسن
     / ازلدن.
مجبور ائله ییبلر كی، اوزاقلاشمیسان اؤز دوغما دیلیندن.
بیگانه دیلین بوشلا سن، ال چك...
فیكره دالاراق سوسدو بیر آن
    / سینه سی میس تك یانان
     / آسلان
      / كیمی انسان!!
مومكون دو مگر آیریلیم اؤز دؤغما دیلیمدن؟ 
مومكونسه ده، آخیر نه سببدن؟
دیلدیر منی آنجاق ائله ین
    / من!!
اؤزگه كیمی، بیلمم، نئجه مومكوندو دوشونمك؟
مومكونمو قارانلیق اولا شیمشك؟!
مومكوندو مگر ((آب)) دئییم من سو یو گورجك؟!
ائتمیش، دئمه لی، اؤزلوگومو، وارلیغیمی ایندی نیشانه.
قویمام آتا، قویموشسادا دوشمن بو اوخون ایندی كامانه.
ساكیت دنیزی چالخادی توفان.
هر مؤحنته دؤزموش قوجامان
     / سینه سی میس تك یانان
      / آسلان
       / كیمی انسان!!
یوخ، یوخ- دئیه رك، چكدی قیلینجین
دیل؟؟!!
   / شوخلوق بو دئییل، بیل.
شمشیرلره چئوریلدی اوراقلار،
عمان كیمی چالخاندی یاخینلار و اوزاقلار،
سرنیزه یه دؤندو گوزل اللرده داراقلار...
دوشمن كیرییب آغلادی مسكین؛
آیریلدی خیالدان،
بیر امر- ماحالدان،
هم بیلدی كی، اولماز بیر ائلین
   / اؤزلوگونو آلماق الیندن.
اولماز كی، آییرماق بیر ائلی دوغما دیلیندن.

بیر گون دئدی اوولادینا یای فصلی بیچینده:
كئچمیش بوتون عؤمروم تر ایچینده؛
من قویمامیشام یوغرولا بیر گون خمیریم اؤزگه تریندن،
اولسون گؤزوز آنجاق ایشینیزده، قولونوزدا،
مؤحكم دایانین اؤز یولونوزدا...
آردیندا و لاكین، امه گین اولماسا شمشیر،
هر گون چؤره گه دامجیلایار قان.
هر گون گؤره جكدیر شرفیز بیر یئنی تحقیر،
هر گون چكه جكدیر باشینیز بیر یئنی ذلت،
تحقیر ائده جك ساغ، ووراجاق سؤل سیزه تهمت،
یوردوز اولاجاق دوغما اؤز اولادیزا غربت،
هر كس سیزه ایستر اولا سلطان،
    / آغا، سرور،
دایم آج اولار قارنیز، الیز لئیك خمیرده،
شنلیك بینالی آتلی اولار، خلق پیاده،
یاس حالی اولار ائلده سراسر،
غربتده و دوستاقدا حیاتین چورودو مرد اوغوللار،
وئرمز اولارا یاد گوجو مئیدان،
قولدورلارین آغزیندا اولار
آزادلیغیز، حقیز،
تحقیر اولار هر گوشه ده، هر وقتده انسان،
بیگانه لر اوینار دیلینیز، وارلیغینیزلا،
سرمستلیگیز، شادلیغینیزلا،
اولماز آدینیز دونیادا میللتلر ایچینده،
شهرتلیز ایتر همشه شهرتلر ایچینده،
قلبیز كیمی ویرانه قالار دوغما دیاریز،
یول گئتسه ده ائل، كؤلگه كیمین قویمایاجاق ایز،
قارین سوراغیله سورولر تك گئده جكسیز.

اللرده اوراقلار
بیر آغزی قیلینج اولسا و لاكین،
دوشمن ده سیزه دوست اولاجاقدیر،
هر كس ائده جكدیر سیزه حؤرمت،
ائللر سیزی اینسان سایاجاقلار،
چون قایدادی شمشیره دایانمیشدیر عدالت
     / و شرافت.
یوردوزلا برابر
آزادلیغیز، حقیز اولاجاق اؤز الینیزده،
تحقیر اوزو گؤرمز ائلینیزده،
     / دیلینیزده.
دونیا تانییار سیزلری ملت،
ائللر ائله یر ملته حؤرمت.
حقین قیلینجی وارسا اگر حق تانییارلار.
قدرتلی و آماده گر اولسان،
دایم سنی اینسان سانایارلار،
هئچ كیمسه ده جرات اولا بیلمز
      / آغالیق فیكرینه دوشسون
       / سنه بیر آن!!
بلی، بالالار، قوی قالا دایم قولاغیزدا
ایش وقتی ده شمشیرینیز اولسون قوجاغیزدا
افسانه دی شمشیره دایانمازسا آزادلیق!!...
هئچ وقت قینا قؤیما قیلینجین!

بذ قالاسیندا

قوجا داغلارین اوجا زیروه سینده باخیر ووقاریله بیر قالا

ائله بیل كی، یئر اوره گین یاریب چیخاریر نهنگ اوجا بیر قایا

قایانین باشیندا طبق كیمی قالانی قویوب آپاریر آیا

دئیه سن به یا كی، خطر گوروب آلیشان آنا

گویه قالدیریر بالاسین، قویوب ایكی اووجونا

سورونوب قالانین توپوغون اوپور كوله گیله رقص ائله ین دومان

بولودون امیر مه مه سین شیرینجه یاتیر قالا

سینه سین ده گاه یاراراق اونون اوجالیب، بو دور

گونشین قیزیل ایشیغین اودور

گئجه اولدوزون قوجا سیرداشی

آی اونون همیشه كی، یولداشی

او گورر بیرینجی آلاولار اولكه سینه سحر سوكولنده دان

ساوالان ساغیندا فلكلره اوزادیر باشین

باخیب آختاریر قوجامان سهندینی، اولمه ین قوشا قارداشین!

اوجا داغلارین قوجا زیروه سینده باخیر ووقاریله بیر قالا

مئشه لر اوپور آیاغین اونون

كولك اوخشاییر یاناغین اونون

سایا بیلمز سن بولاغین اونون

اولا بیلمه میش هله داشلاری یووا قارتالا!

 

دوشه رك و سویكه نرك قیلینج كیمی ساللارا

دورورام، گئدیب كئچیرم داغین، چاتیرام یالا

نئچه زیروه لر، نئچه سیلدیریم، نئچه اورمانین

قایاسین، دوزون، كئچیدین، بویوك مزاریستانین

كئچه رك یاواش گئدیرم، گئدینجه هر بیر آن اوجالیر قالا

دونه رك باخاندا بیر آنلیغا كئچیلن یولا

قارالیر گوزوم...

دایانیب اونومده بو دور قالا

اوتوروب او داغ یئكه لیكده شیش قایادان سالا

ستمین اسیرگه مه میش اونا قوجا روزگار

بوراخیب، اوتوب كئچن عصرلر اونو یادگار

بو آلاولار اولكه سینین دوشوندن امنلره

داغیلیب سادا، اله نیر گئنه ظلمت، ووقار

باخیری، سوسور سادا، داغلارا و چمنلره

ائله بیل باخیر زامانین گوزو...

باش اییب ووقارینا توپراغین اوپه رك اونون

دئدیم: ای قالا!

دئه نه دیر آدین؟

ازلینده كیم اولوب اوستادین؟

نئچه موحتشم ساریلیب باشان دومان، ای قالا!

سنی قوینونا بو دیار آلیب آنا مثلی مهربان، ای قالا!

سوكولوب دیوارین، توكولوب داشین

اوره گین یقین دولودور، بوجور چاتیلیب قاشین!

كئچیب عصرلر، دئه نه لر چكیبدی سنین باشین؟

كیم اولوب ازلده كی یولداشین

و سیلاحداشین؟

سوكولوب دیوارین، توكولوب داشین...

گئنه یاز گلنده همیشه لاله دی سیر داشین

گورونور ووروب سنه ضربه لر

كئچن عصرلر و قرینه لر...

گئنه توكجه سارسیماییب ولی ووقارین سنین

و چكیبدی قامچیلارین زامان كوره گن قالا

و چكیبدی داغ اوره گن قالا

و ووروبدو زنجیری ایگیت بیله گن قالا

كی، بوغوب سسین، قویا سون بویوك دیله گن قالا...

گئنه لاله لر

یاز اولونجا قالدیراراق سینه نده پیاله لر

دئییری كی، قاینایان آل قانین هله دونمامیش

ادامه مطلب

وبلاقا گؤره

بو دیل دنیزدی سیزین تک صدفده اینجیسی وار
قیزیلدی سیزده اولان اوزگه‌نین اگر میسی وار
دئسزکی اودلو دیاردی بیزه وطن یاراشار
بیزیم اوجاقلارین آنجاق کور ائیله‌ین هیسی وار
"عقیل"
وبلاق مودیری : نژادمحمد

سون یازیلار

آختارماق

یازارلار

Page Rank بالاجا خوخان آذربایجان تورکجه سینده ایسلام دینی و قرآن کریم