تبلیغات
ایران آذربایجانی تورکجه سینین ادبیات اوتاغی - مطالب بولوت قاراچورلو
ایران آذربایجانی تورکجه سینین ادبیات اوتاغی
یاشاسین آذربایجان

قونو سلاخلانجی

سلاخلانج

باغلانتیلار

اؤزل یارپاقلار‌

← وبلاق گؤروشلری

  • گؤروشلرین هامیسی :
  • بو گون گؤروشلر :
  • دوننکی گؤروشلر :
  • بو آی گؤروشلر :
  • قاباق آی گؤرو‌شلر :
  • یازارلارین سایی :
  • یازیلارین هامیسی‌نین سایی :
  • سون گؤروش :
  • سون دیَیشمه :

لینکلر‌

بایرام آیی باشلار، باشلاماز

بایرام آیی باشلار، باشلاماز 
هاوالار خوشلار، خوشالماز 
باخچامیزدا داغ تکین قالان 
(چای قیراغی دولاییسینا اوخشایان) 
قار قالاغی‌نین دؤشونده 
تجروبه ائتمه‌یه باشلادیم. 
اوزون گونلر چالیشدیم، 
تر تؤکدوم، 
بوزلامیش قارلاری 
قازدیم، سؤکدوم. 
آرزیلادیغیم کؤهولو، کؤهولجیگی 
ایسته‌دیگیم شکیلده، 
قارین آلتیندا 
قاضیب بیتیره بیلدیم. 
مکتبدن قاییدارکن، 
کؤنلوم خوش، اورگیم شن، 
ساعتلاریمین چوخو 
بو سویوق داخماجیغین 
ایچینده کئچردی 
او گوندن. 
قاضیب تورپاغا چیخاردیغیم 
آرخین ایچی ایلن 
نازیک قار آلتی سولار 
آخیشیب کئچدیکجه، 
“بیستون” داغلاری‌نین آلتیندان 
“شیرین” آرخ قاضیب قاییران 
آرخینا سود آخیران 
“فرهاد”دان 
ذؤوق آلیب سئوینردیم. 
منه بو داراشلیق 
بالاجا، سوپ – سویوق، 
قاپیسیز - باجاسیز داخماجیغین 
واقع ده اولدوغو کیمی، 
بوز کلوا کیمی یوخ، 
بلکه داش دیوارلا، 
ایستی هاوالی 
کؤهول کیمی گلردی، 
اورگیم دینجه‌لردی. 
آرخجاجیغین تکینده 
زینه - زینه آخیشان، 
جانسیز. سویوق. لیل سولار 
گؤزومه ایستیلیکدن 
بوغور – بوغور بوغلایان 
آریلیقدان 
بوللول کیمی پارلایان 
زور – زور شاققیلداییب چاغلایان 
سولار کیمی گؤرونردی... 
پالتار یویان قیز – گلینلری گؤروردوم 
آرخین اوتای - بو تاییندا. 
گول اندام ایسه هامیدان باشدا، 
سویون لاپ چیخاریندا، 
هیریلدایا، هیریلدایا، 
آغ بیلکلری، مرمر اللری ایله 
پالتارلارین سویا چکیر. 
یولداشلاری ایله 
پیچیلداشا، پیچیلداشا، 
دئییب گولوب، 
قاققیلداشا، قاققیلداشا 
گاهدان بیر اوزومه گولومسه‌ییر، 
ممنوعن باخیشلاری، 
دوزلو ایشارتلری ایله 
منه محبت دمتی گؤندریر.

من بالاجا فرهادیدیم اۇشاقکن،

بیرینجی حیصه‌‌

من بالاجا فرهادیدیم اۇشاقکن،

گؤزللیکلری قانمیشدیم.

ائله بیل سۆددن یانمیشدیم.

ایلک ازلدن، تیفیل من.

کؤورک اۆرگیم کؤکلو ایدی

ساز تئللریندن ده.

میضرابی، گؤزللیکلر.

چالیناردی

سێز-سێز سێزلداردی

گؤزللیک گؤرنده!...

تۆکلریم بیز – بیز دۇراردی،

اۆرگیم چابالاردی.

باغریمی آلیشدیران

دؤیونتولرین

اوْدو، آلوْوو

پار - پار پاریلداردی،

گؤزلریمین یاشیندا.

بیله‌سن نه بوْیدا ایدی

اوْ زامان

بۇ بیجکمان

بۇ “فرهاد”

بد ذات!

8-9 یاشیندا!

دۆنیادا هر نَیین،

حئیوانین، اینسانین

گؤزه‌لین سئوردیم

گؤزللردن اؤتور اؤلردیم.

“گۆل اندام”دان اؤتور لاپ چوْخ،

هددی، حسابی یوْخ!

آخی اوْ،

گؤزللرین گؤزه‌لی ایدی!.

هله عشقی، محبتی تانیمازدان اول،

عشقیمین ازلی ایدی!

گۆلر اۆزلو،

ایری گؤزلو،

آغ قاباغی آی کیمی،

قارا قاشلاری یای کیمی،

اتلی – جانلی،

ایستی قانلی،

دیلبر بیر قێز ایدی گۆل اندام.

کیم بیلیر؟

16 - 17 یاشیندا!

شیرین گۆلوشلری،

گؤزل کهلیک کیمی

قاققیلدایاندا آغاریشان

صدف دیشلری،

باشا دۆشه بیلمه‌دیگیم جازیبه ایله

تیترشن قابا دؤشلری،

قارا داشا دیَسه دلیب کئچن،

سۆزگون باخیشلاری.

سالخیم – سالخیم،

وۇرغون اۆرکلری

هؤروکلرینه هؤرولن

ایپک تئللری‌نین

قێوریشلاری

چێرپیندیراردی کؤرپه قلبیمی،

قۇش اۆرگی کیمی،

سۇ اۆزونده‌کی کیمی.

پالتار یۇماغا گلردی هر گۆن

چای قێراغینا،

منیم اوْیناغیما.

آرخاسیندا دۆیونلردی

گۆل پێتالی،

قێرمیزی چادیراسی‌نین اۆجلارینی.

دیزه قدر چێرمالاردی،

یوْل – یوْل یۇسیفی شالوارینی،

هم ده دیرسکدن یۇخاری

ساری کؤینیی‌نین

قوْللارینی.

شاققیلداییب کئچن

بۆلول سۇلارین ایچینده

آغ بیلکلری،

مرمر اللری

پالتارلاری اؤوکله‌دیکجه

اۆزونه داغیلان تئللری

لاله اۆرگی‌نین کاکیلی ایدی دییه‌سن!

اوْ، تئز - تئز

ایشدن چکردی اللرینی،

آغ اۆزونه داغیلمیش تئللرینی،

گۆموش سێرقالی قۇلقلاری‌نین

دالینا وئرردی.

گلدیک دوْداقلاری،

قێرمیزی گۆلساباه قوْنچاسی کیمی

گۆلومسردی.

من مفتون – مفتون،

اوْنا باخدیقجان

فۆسونکار ادالارینا

سای سالدیقجان

اوْ، ممنوعن – ممنوعن

گۆلش قاباق

آلنین قێریشدیراراق

اۆزومه باخاردی.

دۇزلو گۆلوشلرین،

گۆل چلنگی کیمی،

اۆستومه آتاردی.

تاختا دَ‌ییرمانیمی

چوْخ زامان

سۇیون عکس آخیشی ایله،

آشاغیدان یۇخارییا

فێرلادا – فێرلادا

لاپ یاخینلاشاردیم اوْنا.

اۆزوم،

سۆنبول شلاله‌سی کیمی چاغلایان،

اسمر بوْغازینا آغنایان،

قێوریم تئللرینه سۆرتوشردی.

سینم،

تؤوور، تؤوور تؤوشردی.

ساچلاریندان قوْورولو بۇغدانین،

چادیراسیندان سحر آیازی‌نین

عطیری گلردی.

هوالار پاییزلادیقجان،

سۇلار سوْیودوقجان،

یانیب یاخیلماغا باشلادیم.

من ده گۆل اندام ایلن.

سئوردیم، - سؤیله‌دیگیم

سئوگیلی اللر

سێر – سێرالی سۇلارین ایچینده

نه حاللار، نه حاللار کئچیرردی.

بۇلاق اوْتو یارپاقلاری کیمی،

گؤم – گؤی گؤیرردی!

دقیقه‌دن بیر قێزجیغازین

بۆکوکلری آراسیندا سێخیلان،

دوْنوق اللرین زوْققولتوسونو،

یانیب، یاخیلان

فنار کیمی

یێغیلیب، آچیلان

آلنی‌نین قێریشلاریندا

دۆیونله‌نیب آچیلان

قارا قاشلاریندا اوْخودوغوم کیمی،

یانار اۆرگیمین

باشیندا دا دۇیاردیم.

ایلان وۇران آداما اوْخشاردیم.

نه ائده بیلردیم...

اوْ ایل قێش اۇزونو

بۆتون رؤیالاریمی،

فیکیر دۆنیالاریمی،

قاپسادی، گۆل اندامین

بۇ ایشکنجه‌لی حیاتی.

مگر یۇخلاردیم؟

قێشین ساکیت گئجه‌لرینده،

ساعتلار، ساعتلار،

آییق، گؤز آچیق

قالاردیم!

نئیلردیم؟

گؤزلریمی دامجیلارین

هێسلی پنجه‌رمیزین

قارالمیش قێراقلارینا

رسم ائتدیگی جۆر به جۆر ناخیشلارا

زیللردیم،

نقشه‌لر چکردیم،

پلانلار تؤکردیم.

چایا قالخان دوْلایی‌نین

کێران سینه‌سینده

بیر کؤهول چاپا بیله‌رممی؟

کؤهولون ایچریسینده

بیر گؤلمش یاپا بیله‌رممی؟

یئر آلتی اێلیق سۇلاردان

بیر بۇلاق چێخاریب،

بۇ گؤلمشه بۇراخا بیله‌رممی؟

اوْیونجاقلاریمین ایچینده

جمع – جۆمهور

کیچیک بیر بئلچه،

چکیج یئرینه ایشلتدیگیم

باشی ایری بیر دمیر

بیر ده بیر اۇزون شیشه

گۆمانیم گلیردی

هر گئجه - هر گئجه،

خیالیمدا،

بۇ قازما آلتلریمی

ایشه سالاردیم.

آنامین ناغیللاریندا

ائشیتدیگیم “فرهاد” کیمی

قێرمیزی کێرانلاری

پنیر تکین کسیب چاپاردیم.

سوْنرا دا

بیلمیرم گئجه‌نین نه واختلاریندا

شیرین رؤیالاریملا

قۇجاقلاشیب یاتاردیم.

الده قاییرما چیچکلر

الده قاییرما چیچکلر

آلتونلوجا ناخیشلی،

آغ گولداندا بیر دسته.

الده قاییرما “چیچک”

قویولموش میزین اوسته.

یام – یاشیل یارپاقلاری

آغ، قیرمیزی، بنفشه،

نه سو، نه قایغی ایستر

آرسیز – آرسیز، تپ تزه!

اوزون ایللر گئچسه ده

دوروب یاشایاجاقلار.

رییاکار طراوتله،

هله ده قالاجاقلار.

کیمسه نه دئییر، دئسین،

نه سؤیله‌ییر، سؤیله‌سین.

یوخ!

نه سوسوزوندان اؤلن،

نه عطیر ساچا بیلن،

بو پیلاستیکلری من

چیچک سانا بیلمیرم.

من بزک – دوزکلری،

گؤزللیک سانانمیرام.

گؤزللیکدن نه رنگه،

نه شکله آلدانمیرام.

نه سئون، نه سئویلن،

نه اوموب کوسمک بیلن،

نه یاشاماق آنلایان،

نه ده کی، اؤلمک بیلن.

جانسیز تؤر – تؤکونتولر،

گولمو، چیچکمی اولار؟

گول کمالدیر، حیاتدیر،

هم آچار، هم ده سولار!

بو، گول دیَیل، اؤلومدور،

آلدانیشدیر، دهشتدیر.

یوخ، اونا اؤلوم دئسم،

اؤلومه اهانتدیر.

اولسون! اؤلومده سولماق،

چورومک دهشتی وار.

ولاکین توخوم اولماق،

جوجرمک قودرتی وار.

نه قیزاریب سارالماق،

نه آچیلماق، نه سولماق،

نه اوتانیب، قیپچینماق،

محبت تانیماماق

گولمک بیلمه‌ینلرده

قهبه‌لیک صیفتی وار.

تهران 1353/1/13

قارا یازی شاعر

قارا یازی شاعر

پرستاریم،

شفقت باجیم،

بری گلگیل.

مین خستخانایا گیررکن،

اوزادیلیرکن تخت اوسته،

سنه دئدیلر: بو خسته،

عصریمیزین بؤیوک شاعرلریندن بیریدیر.

بئله دیَیل؟

اینینده‌کی آغ خالات تک

تمیز اولان او مهریبان اورگینله

سن دینله‌دین بو تانیتمانی

چونکو، سؤزلرینه موطلق اینام بسله‌دیگین

اؤزونه درین حؤرمت قویدوغون

ان بؤیوک حکیم ایدی

بو سؤزون سؤیله‌یه‌نی.

سن بو سؤزه ایناندین مهریبان قیز.

خستوی محبتله، حؤرمت ایله قورودون.

یادیگار ساخلاماقچین،

بیر شئ`ر ده اوندان دیله‌دین.

اؤلومون فیرتینالی دنیزینده بوغولانلارا

اومود مایاغی کیمی گؤرونن اولدوز،

منه قولاق آس،

گل ایندی سنله،

بو “بؤیوک” شاعردن دانیشاق:

او سنین

پاک محبتلرینی ایتیرمییه‌جک.

سنه اورگیندن جوشان بیر شئ`ر ده یادیگار

وئره‌جک.

سن اونون وئردیگی شئ`ری

ایمتینانلا آلاجاقسان

ایفتیخار و هیجانلا بیر چوخلارینا دا

اوخویاجاقسان.

تیفیل قیز!

کیمسه سنین بو “بؤیوک” شاعریوی

تانیمایاجاق!

یازدیقلارینی دا نه سن، نه ده اؤزگه‌لری

اوخومایاجاق!سنه اونون آدینی،

باشقا آدامدان داها ائشیتدیگینی

سؤیله‌یه‌جک کیمسنه

بو ایسه سنه،

بیر سیرر، بیر مو`ما اولاجاق، شوبهه‌سیز:

“-آخی بونو منه دانیشان حکیم،

یالان دانیشان آدام دیَیل، هرگیز!”

بیر داها قولاغیوی منه گتیر،

سنی راحتلاییم زاواللی قیزیم!

سنین او ایناندیغین حکیم،

یالانچی دیَیلدیر هرگیز!

بو “قارا یازی” شاعرین آنجاق،

آدی دا، اؤزو ده،

شئ`ری ده، سؤزو ده،

دانیشدیغی دیلینه گؤره،

یاساقدیر، یاساق!

حسرت

حسرت

دونن اوغرون باخیشلاریم،

دره - دره آیاقلارین،

قارا هیلال قاشلاری‌نین

آلتین، اوستون گزدی گلدی.

آل ایناقدان اؤنلوک آسان،

ایکی قولدور جان آلانین،

آرخاسیندا یایی گؤروب،

جاندان الین اوزدو گلدی.

دار آغزیندا آبی حیات،

چشمه‌سینی گؤردو کئچدی.

سوسوزوندان دیلی چیخدی،

بیر قورتوم دا ایچنمه‌دی.

سینه‌سینده قوشا – قوشا

تر شاماما باش وئرمیشدی.

لاکین، باغلی یاخاسی‌نین

چپریندن کئچنمه‌دی.

او، گول اوزلو، گوندوز اوزلو،

شن باهارین، گوللو یازین،

نش`ه‌سیندن، نفه‌سیندن،

ذؤوقو - صفا آلانمادی.

مین آشیقلی، یاراشیقلی،

اوجا بویلو سرونازین،

کؤلگه‌سینده بیر آن بئله،

دینجلمه‌یه قالانمادی.

بیردن - بیره کؤنول قوشو

قفه‌سیندن اوچدو، گئتدی.

قانادلاندی، هاوالاندی،

اولوروندان، یوواسیندان.

آن ایچینده اوزاقلاندی،

اولدوزلاندی، گؤزدن ایتدی.

بیرده گؤردوم سسی گلیر

تئللری‌نین آراسیندان.

دئدیم آمان، کؤنول آمان

هر توکوندن بیر تور قوروب

ایلیشرسن، ییخیلارسان

جله‌سینه، دوزاغینا.

دئدی: یازیق، هایاندایدین

قانادیما مین اوخ ووروب

جان آتیرام، جان وئررکن،

باش قویماغا قوجاغینا.

قوربانیمی قبول ائله آراز!

قوربانیمی قبول ائله آراز!

صمد!

نه یازیم صمد؟!

دنلی خرمنیمین یانماسین یازیم؟

سرین سو کوزه‌مین جالانماسین یازیم؟

داغلی سینه‌مین آلوولانماسین یازیم؟

من سنه نه یازیم صمد؟

حسرتیمی کیم یاخاجاق؟

گؤز یاشیما کیم باخاجاق؟

آراز؟..

یئنه ده آخاجاق!

صمد!

کیمی چاغیریم؟

نه قدر باغیریم؟

سه...مد!

سؤیله منه، سؤیله آراز!

نه دن بیزله اولدون بئیله آراز؟

کسدین ایکی قارداش آراسین،

آلدین موغانین ساراسین،

بوغدون ائلیمین دیَرلی بالاسین!

بسدیر!

بس...دیر!.

قوربانیمی قبول ائله آراز!

من‌ تبریز'دن‌ گلمیشه‌م

من‌ تبریز'دن‌ گلمیشه‌م

بیلمیره‌م‌ آغلاییم‌، بیلمیره‌م‌ گولوم‌،
بیلمیره‌م‌ آچیلیب‌، یا سولوب‌ گولوم‌!
دانیشماغا توتمور آغزیمدا دیلیم‌،
آخی‌ دوستلار، من‌ تبریز'دن‌ گلمیشه‌م‌!

مندن‌ سوروشمایین‌ تویدان‌، بایرامدان‌،
نغمه‌دن‌، ماهنی‌دان‌، باده‌دن‌، جامدان‌،
اوغول-‌ اوشاغیمدان‌، بالا ـ بولامدان‌،
آمان‌ دوستلار، من‌ تبریز'دن‌ گلمیشه‌م‌!

سؤز آچمایین‌ منه‌ یازدان‌، باهاردان‌،
یا ایستی‌ اوره كلی‌، ایستكلی‌ یاردان‌
سورمایین‌ او عزیز آنا دییاردان‌،
آمان‌، دوستلار، من‌ تبریز'دن‌ گلمیشه‌م‌!

سورمایین‌، سورمایین‌ یاشیل‌ داغلاردان‌،
شاختا قارسیلایان‌ بارلی‌ باغلاردان‌،
یا دا، باغریمداكی‌ چارپاز داغلاردان‌،
آمان‌ دوستلار، من‌ تبریز'دن‌ گلمیشه‌م‌!

عاریفلر دردیمی‌ آنلایار ـ قانار،
آلیشانلار آلوولانار، اودلانار،
بعضیلر سؤزومو افسانه‌ سانار،
آمان‌ دوستلار، من‌ تبریز'دن‌ گلمیشه‌م‌!

یارادان‌ دیل‌ وئریب‌ اینسان‌ دانیشا،
ال‌ ـ قول‌ وئریب‌ حیات‌ اوچون‌ ووروشا،
اوره ك‌ وئریب‌ سئوه‌، كوسه‌، باریشا،
آمان‌ دوستلار، من‌ تبریز'دن‌ گلمیشه‌م‌!

گوناهیم‌: ثروتیم‌، دوشونجه‌م‌، دیلیم‌،
ال‌ ـ قولوم‌ زنجیرده‌، یورد، دیلیم‌ ـ دیلیم‌،
اوره ییم‌ شان‌ ـ شاندیر، باغلیدیر دیلیم‌،
آمان‌، دوستلار، من‌ تبریز'دن‌ گلمیشه‌م‌!

شاعیرین‌ سیلاحی‌ كلمه‌دیر، سؤزدور،
یاخان‌ شاپالاقدیر، یاخیلان‌ اوزدور،
گؤیه رن‌ یاناقدیر، قیزاران‌ گؤزدور،
آمان‌، دوستلار، من‌ تبریز'دن‌ گلمیشه‌م‌!

قلم‌ سونگو ایله‌ قارشی‌ دورا؟...هئی‌...
كاغاذ قالخان‌ اولا، جان‌ قورویا؟...هئی‌...
ناحاق‌ قان‌ قورویا، قورومایا؟...هئی‌...
آمان‌ دوستلار، من‌ تبریز'دن‌ گلمیشه‌م‌!

سؤز دوستلارینا من‌ دایانانمیرام‌،
بوش‌ بوغاز سؤزونه‌ اینانانمیرام‌،
جان‌ قویماقلا، سؤزو، بیر سانانمیرام‌،
چونكو دوستلار، من‌ تبریز'دن‌ گلمیشه‌م‌!

باده‌ مجلیسینده‌، ایستی‌ اوتاقدا،
اؤیونمك‌ ده‌ اولار، بلكه‌ جوشماق‌ دا،
ایش‌ مرره‌ باشینا یئتیشه‌ن‌ واختدا،
آمان‌ دوستلار، من‌ تبریز'دن‌ گلمیشه‌م‌!

لاله‌نین‌ توتولدو باغری‌ قارالدی‌؟
بولبولون‌ نه‌ اولدو رنگی‌ سارالدی‌؟
قان‌ قارداشلاریم‌ بس‌ هایاندا قالدی‌؟
آمان‌ دوستلار، من‌ تبریز'دن‌ گلمیشه‌م‌!

طالئعیم‌ بللی‌دیر دوستا، دوشمانا،
دئمیره‌م‌ او باشی‌ دومانلی‌ آنا،
لاله‌یه‌ بورونوب‌ یا باتیب‌ قانا،
آنجاق‌ دوستلار من‌ تبریز'دن‌ گلمیشه‌م‌!

ساوالان‌ اوره كلی‌ تبریز آناسی‌،
اللری‌ اوستونده‌ قالیب‌ بالاسی‌،
تویو چالیناركن‌ باشلاییب‌ یاسی‌،
آمان‌ دوستلار، من‌ تبریز'دن‌ گلمیشه‌م‌!

دیرناقلانیب‌ گلینلرین‌ یاناغی‌،
گردكلر اولوبدور « قاسیم‌ » اوتاغی‌،
قیرمیزی‌ گئیینیب‌ عئینالی‌ داغی‌،
آمان‌ دوستلار، من‌ تبریز'دن‌ گلمیشه‌م‌!

دومان‌ چولقاییبدیر داغلاری‌، دوزو،
شهه‌رین‌ آغزیندا قالیبدیر سؤزو،
آنجاق‌، سحر ـ آخشام‌ قیزاریر گؤزو،
آمان‌ دوستلار، من‌ تبریز'دن‌ گلمیشه‌م‌!

دؤنوم‌ ـ دؤنگه‌لرده‌ قوردلار اولاشیر،
سومسوك‌ ـ سومسوك‌ گزیر، گاه‌ قودوزلاشیر،
بعضن ده‌ دیشلری‌ قانا بولاشیر،
آمان‌ دوستلار، من‌ تبریز'دن‌ گلمیشه‌م‌!

درین‌ دنیز كیمی‌ ساكیتدیر شهه‌ر،
سس‌سیز ییرقالانیر قالین‌ لپه‌لر،
بو سوكوتدا نه‌لر گیزله‌نیب‌، نه‌لر؟...
آمان‌ دوستلار، من‌ تبریز'دن‌ گلمیشه‌م‌!

سهند'ین‌ ایچینده‌ كوپسونور وولقان‌،
باشیندا گاه‌ دومان‌، گاه‌ دا كی‌، توفان‌،
بویلانیر شهه‌ره‌ باخیر نیگاران‌،
آمان‌ دوستلار، من‌ تبریز'دن‌ گلمیشه‌م‌!

وطن‌ دمیرده‌دیر، وطن‌ داردادیر،
گؤزلری‌ یول‌ چكیر، اینتیظاردادیر،
«شهرییار» قارداشیم‌ گؤره سن‌ هاردادیر،
آمان‌ دوستلار، من‌ تبریز'دن‌ گلمیشه‌م‌!

تهران‌، اسفند 1356

بولوت قاراچورلو نون شعرلری موبایل اوچون

کیتاب آدی : بولوت قاراچورلو

کیتابین فورما سی  : جاوا

ساپورت ائدن قولاق جیقلار (موبایل تلفونلاری): پتون قولاق جیقلاری کی جاوا پروقرامین ساپورت ائدرلر

اؤلچوسو : 64 کیلو بایت

ایندیر (دانلود)

سهند

سهندی‌ دومان‌ آلیب‌،

یاشیل‌ دونو سارالیب‌.

بوردا بیر غریب اؤلوب‌،

اؤلوسو یئرده‌ قالیب‌.

من‌ یارانان‌ گوندن‌ دردلی‌ یاراندیم‌،

«وای‌ ننه‌» چاغیرار بیزده‌ دردلیلر.

آغلادیم‌، قیشقیردیم‌، باغیردیرم‌ ـ ساندیم‌،

آنا وطنیم‌ وار، قایغی‌ چكر.

سن‌ دئمه‌ ازلدن‌ یتیم‌میشم‌ من‌،

آنا یورددان‌، آنا وطندن‌ ساری‌.

بونو گیزله‌میشدی‌ هامیلار مندن‌،

حاق‌ قارقیسین‌ اینسان‌ آلدادانلاری‌.

ائله‌ده‌ قایغیسیز، السیز، آیاقسیز،

توللاندیم‌ حیاتین‌ بورقانلارینا

بالتاسیز، ناجاقسیز، دایاناجاقسیز،

آتیلدیم‌ طالعین‌ عومّانلارینا.

ایلیشه‌ ـ ایلیشه‌ ایلیشیملره‌،

سیریمسه‌دیم‌، بویا ـ باشا یئتیشدیم‌.

یانغینلارا آتیلسام‌ دا مین‌ كره‌،

یانیب‌ كول‌ اولمادیم‌، قاینادیم‌ ـ پیشدیم‌.

آز ـ ماز گؤز ـ قولاغیم‌ آچیلان‌ زامان‌،

گؤردوم‌ هامیلارین‌ آدی‌ ـ سانی‌ وار.

بیر منیم‌ آدیما دئییرلر جیرتدان‌،

هر كسین‌ ائل‌ ـ گونو، دودمانی‌ وار.

بو دردن‌، بو غمدن‌ یاندیم‌، آلیشدیم‌،

حسرتیم‌ داغلاری‌ ـ داشی‌ یاندیردی‌.

كول‌ ـ اولوبان‌ تورپاقلارا قاریشدیم‌،

آلووم‌ قورونو، یاشی‌ یاندیردی‌.

من‌ ده‌ مجنون‌ كیمی‌ دوشدوم‌ چؤللره‌،

لئیلام‌ ایسه‌ یوردوم‌، وطنیم‌ اولدو.

چوخ‌ دولاندیم‌، باش‌ اوزاتدیم‌، هر یئره‌،

آیاقلاریم‌ قابار چالدی‌، یورولدو.

سحر ـ آخشام‌ یوللار اوسته‌ دایاندیم‌،

گلندن‌ ـ گئدندن‌ خبر سوروشدوم‌،

سوراق‌ آلانمادیم‌، آنجاق‌، بوشاندیم‌،

گئت‌ ـ گئده‌ حسرته‌، غمه‌ یاندیم‌.

بیر گون‌ بیر قوجایا توش‌ گلدیم‌، سوردوم‌،

گؤردوم‌ گیزلی‌ ـ گیزلی‌ منه‌ گؤز ووردو.

واردیم‌، خلوت‌ یئره‌، یولوندا دوردوم‌،

الیمه‌ كؤهنه‌ بیر كیتاب‌ قیسدیردی‌.

اوخودوم‌، دیرچلدیم‌، آیاغا قالخدیم‌،

شیمشك‌ اولوب‌ چاخدیم‌، وولكانا دؤندوم‌.

بولود تك‌ كیشنه‌دیم‌، سئل‌ اولوب‌ آخدیم‌،

كؤكسو داغ‌دالغالی‌ عومّانا دؤندوم‌.

وارلیغیمی‌ دانان‌ قلبه‌زنلرله‌،

یامان‌ یاخالاشدیم‌، یامان‌ ووروشدوم‌.

یالان‌ ـ پالانلارین‌ تاپشیردیم‌ یئله‌،

حاقسیزلیغا قارشی‌ یامان‌ ووروشدوم‌.

اورك‌ سؤزلریمی‌، حاق‌ سؤزلریمی‌،

قایا كیمی‌ دوشمان‌ كؤكسونه‌ ووردوم‌.

غصبكارا جومرد بابالار كیمی‌،

گاه‌ قان‌ قوسدوروبان‌، گاه‌ قان‌ اوتدوردوم‌

الیمدن‌ زینهارا، زارا گلنلر،

كؤپك‌ كوشگورتدولر، ایت‌ بوراخدیلار.

حاق‌ سؤزومه‌ جاواب‌ وئره‌نمیه‌نلر،

قددره‌ قوللانیب‌، قمه‌ تاخدیلار.

گوجوم‌ گوجلرینه‌ چاتانمادیقدا،

هر طرفدن‌ منی‌ دؤوره‌له‌دیلر.

سونگونو بؤیرومه‌ سانجیب‌ آدیما

وطنسیز دئدیلر، نه‌لر دئدیلر!...

یئنه‌ داغلار كیمی‌ دوردوم‌، دایاندیم‌،

نه‌ چكیندیم‌، نه‌ ده‌ سؤزومو چاشدیم‌.

محكمه‌لرینی‌ اگلنجه‌ ساندیم‌،

دنیز كیمی‌ جوشدوم‌، كوكره‌دیم‌، داشدیم‌.

آیاغی‌ كونده‌لی‌، قوللاری‌ باغلی‌،

سسیمی‌ اوجالتدیم‌، آچدیم‌ دیلیمی‌.

اورگی‌ غوبارلی‌، سینه‌سی‌ داغلی‌،

دئدیم‌، هر دردیمی‌، هر نیسگیلیمی‌.

ائی‌ عیرق‌ افسانه‌سینی‌ اوزه‌ چكنلر،

روحونوزو شئیطان‌ چوشلاییب‌ بوتون‌.

قارداش‌ قیرغینی‌نا توخوم‌ اكنلر،

اكدیگینیزه‌ پئشمان‌ اولارسیز بیر گون‌.

بیر پارا سؤزو چوخ‌ اوزه‌ چكمه‌یین‌،

بوش‌ سانمایین‌ بئله‌ چوخدا مئیدانی‌،

قیپچینین‌، بو قدر سوخمایین‌ گؤزه‌،

آنانیزدان‌ قالان‌ كیرلی‌ تومانی‌.

كاش‌ بو «تمیز نژاد»، «پاك‌ قان‌»لاریزلا،

هیتلرین‌ دیرناغی‌ اولابیلئیدیز.

خام‌ خیاللار، گولونج‌ یالانلاریزلا،

قوبلزلردن‌ عیبرت‌ آلا بیلئیدیز!

گئدئیدیز برلینه‌ یادا لوندونا،

اوستون‌ نژادلارین‌ گؤرئیدیز حالین‌.

بلكه‌ سیغینایدیز اینسان‌ قوینونا

سونون‌ دوشونئیدیز بوش‌ خیاللارین‌.

گؤرئیدیز مئیدانا چوخ‌ گئج‌ گلیبسیز،

معركه‌ ییغیشیب‌، اویون‌ قورتولوب‌

بوش‌ یئره‌ چاپیبان‌ آت‌ چرله‌دیبسیز

گلین‌ اركك‌ چیخیب‌، توی‌ باطیل‌ اولوب‌.

گؤرئیدیز خالقلار قالخیب‌ آیاغا،

وارلیغین‌، منلیگین‌ آختاریر سین‌ ـ سین‌.

كیمسه‌ نه‌ نؤكردیر، نه‌ ده‌ كی‌، آقا،

نه‌ ایستر ازیلسین‌، نه‌ ده‌ كی‌، ازسین‌.

تاریخ‌ كدرلنمز گوزگویه‌ بنزر،

اوندا گؤرمك‌ اولار، اگرینی‌ ـ دوزو.

بیر مصلحتیم‌ وار، دینله‌سز اگر،

بو آینادا گؤرون‌ اؤز اؤزونوزو.

ظن‌ ائتمه‌یین‌ یئنه‌ قلم‌ سیزده‌دیر،

سیزلره‌ مخصوصدور كیتابخانالار.

آغی‌ ـ قارا یازماق‌ الینیزده‌دیر،

یوخ‌!... بو گون‌ میلیونلار باشا دوشن‌ وار.

دیرشه‌ بیلسه‌ده‌ كیم‌ حقیقتله‌،

خالقی‌ آلدادانمیر، اؤزو آلدانیر.

دیزه‌ چوكدورولسه‌ میلیون‌ قالیله‌،

یئنه‌ یئر دولانیر، یئنه‌ فیرلانیر.

چوخ‌ یاخشی‌ بیلیرسیز فیریلداقچیلار،

من‌ نه‌ وطنسیزم‌، نه‌ ده‌ گؤبه‌لك‌.

دوغما دیاریم‌ وار، بؤیوك‌ ائلیم‌ وار،

منیمدیر هم‌ كئچمیش‌، هم‌ ده‌ گله‌جك‌.

منه‌ نه‌ عیرق‌، نه‌ ده‌ بابا یونتایین‌،

اؤزوم‌، اؤز كؤكومو یاخشی‌ تانیرام‌.

گئدین‌ اؤزونوزه‌ «بابا» آرایین‌،

سیزین‌ یئرینیزه‌ من‌ اوتانیرام‌.

قاطیرینیز چوخدا باش‌ آپارماسین‌،

قودورمایین‌ بئش‌ گون‌ یایان‌ اولموشام‌.

منی‌ چوخ‌ دا بئله‌ حقیر سانمایین‌،

ایگنه‌می‌ یئینه‌ قیییق‌ قوسدورام‌.

خاما باغلامیشام‌ قیر آتی‌ هله‌،

بیر گون‌ بوتون‌ مینیب‌ اویناداجاغام‌.

ائل‌ ـ اولوسونوزا سالیب‌ ولوله‌،

سیزه‌ قان‌ قوسدوروب‌، قان‌ آلاجاغام‌.

بئش‌ گونلوك‌ بگلیگی‌ بگلیك‌ سانمایین‌،

ایشین‌ دالیسینی‌ دوشونون‌، دویون‌.

بوش‌ یئره‌ اؤیونوب‌ خوروزلانمایین‌،

دالی‌ گونونوزه‌ بیر كؤرپو قویون‌.

بیر آن‌ زنجیرلری‌ آچین‌ دیلیمدن‌،

بو دیل‌ میلیونلارین‌ آنا دیلیدیر.

قورخون‌ غضبیمدن‌، قورخون‌ كینیمدن‌،

ساغالمایان‌ یارام‌ دیل‌ نیسكیلیدیر.

مین‌ ایل‌ قاباق‌ بابام‌ قازان‌ دئمیشكن‌:

بوتون‌ سیزین‌ اولسون‌ تورپاغیم‌، داشیم‌.

تالادیقلارینیزی‌ آلمیرام‌ سیزدن‌،

قویون‌ آنام‌ ایله‌ بیر قوجاقلاشیم‌.

یانیلمایین‌ اگر یالواردیم‌ سیزه‌،

آنام‌ آیاق‌ آلتدا قالماماق‌ اوچون‌.

آنا، موقّدسدیر ازلدن‌ بیزه‌،

قییماریق‌ آیاقلار آلتینا دوشسون‌.

نامردلر زینهارا گلدی‌ الیمدن‌،

چارمیخا چكدیلر منی‌ هر یاندان‌.

قنّارایا آسلادیلار دیلیمدن‌،

یاتاغیم‌ قورو یئر، اوتاغیم‌ زیندان‌.

ایچیمده‌ بوغولان‌ قیشقیریق‌ سسیم‌،

دمیر مییله‌لری‌ تیترتدی‌ یالنیز.

تك‌ باشیما آرتیق‌ نه‌ جوشوب‌، داشیم‌،

اولدوزسوز یارانیب‌ زاواللی‌ یالقیز.

نه‌ قدر باغیردیم‌، هارای‌ قوپاردیم‌،

بوشلوقلاردا ایتدی‌ آنجاق‌ هاراییم‌.

دمیر زنجیرلری‌ چئینه‌دیم‌، دارتدیم‌،

دادیما چاتمادی‌ هاوادارلاریم‌.

كیریدیم‌، آغاردی‌ ساققالیم‌، ساچیم‌

قاپینی‌ آچدیلار، دئدیلر، ایتیل‌!

بیلمه‌دیم‌ هایانا اوز قویوب‌ قاچیم‌،

اومودسوز، آرزی‌سیز، یئر ـ یوردسوز، سفیل‌.

یئنه‌ده‌ اوز قویدوم‌ داغلارا ساری‌،

بلكه‌ دالداناجاق‌ آرایا بیلم‌.

بلكه‌ تاپا بیلم‌ آنام‌ دیاری‌،

قوینونا سیغینیب‌ بیر آز دینجلم‌.

یورولدوم‌ ـ خورد دوشدوم‌، گئتدیم‌ اویقویا،

دربه‌در گزمكدن‌ آخیر اوساندیم‌.

اپریمیش‌ بیر قاری‌ گلدی‌ یوخوما،

دیسكیندیم‌، خوفلاندیم‌، ایسكلت‌ ساندیم‌.

باشیما ال‌ چكدی‌ قورخوم‌ تؤكولدو،

خوش‌ باخیشلاریندان‌ گؤردوم‌ تانیشدی‌.

مهریبان‌ ـ مهریبان‌ اوزومه‌ گولدو،

دؤندو دیله‌ گلدی‌، منله‌ دانیشدی‌:

قورخما، عزیز بالام‌! گزدیگین‌ منم‌،

اپریمیش‌ اولسام‌ دا، گل‌، قوجاقلاشاق‌.

هامان‌ آختاردیغین‌ آنا وطنم‌،

آنا اؤلوسوندن‌ چكینمز اوشاق‌.

بیلیرم‌ دردیوی‌، هر نیسگیلیوی‌،

دولانیم‌ باشووا، دؤنوم‌ گؤزووه‌.

دانیش‌، قوی‌، دینله‌ییم‌ دردلی‌ دیلیوی‌

جانیم‌ قوربان‌ اولسون‌ شیرین‌ سؤزووه‌!

سؤیله‌دیم‌، یوخ‌ آنا! سن‌ دانیش‌گیلن‌،

سؤیله‌، نه‌ اولوب‌ بو گونه‌ دوشوبسن‌؟

دانیش‌ طالعیندن‌، دانیش‌ گونوندن‌

دانیش‌ یازیق‌ آنا، زاواللی‌ وطن‌.

قورو كلّه‌ده‌كی‌ گؤز یئرلریندن‌،

باخدیم‌، داملا ـ داملا یاش‌ دامجیلادی‌.

لاكین‌ كلمه‌ وئریب‌ آلمادی‌ اصلا،

ایچیم‌ آلوو چكدی‌، اورگیم‌ یاندی‌.

اتگین‌ آختاردیم‌ اله‌ گلمه‌دی‌،

یالواردیم‌، آسلاندیم‌ سوموكلریندن‌.

آنا اورگی‌ ایدی‌، دؤزه‌ بیلمه‌دی‌،

آخیر دیله‌ گلدی‌، دانیشدی‌ منلن‌.

دینله‌، دردلی‌ بالام‌، دردیمی‌ دینله‌،

درد اهلی‌ آرتیق‌ درد چكمگه‌ نه‌ وار؟

گل‌، بیر ـ بیر تانیش‌ اول‌ كدرلریمله‌،

دردین‌ دولو گرك‌، دئمیش‌ آتالار.

گوناهكار توتورسان‌ گئت‌ توت‌ هر كسی‌،

آنجاق‌، او گوندن‌ كی‌، اسیر توتولدوم‌،

بویوندوروق‌ آلتدا قارا مال‌ كیمی‌،

یئر شوملادیم‌، هولالارا قوشولدوم‌.

یارالی‌ چیگنیمله‌ چمنلر سؤكدوم‌

تارلالار بیتیردیم‌ چاییرلیقلاردان‌.

گئجه‌لر آج‌ قالدیم‌، گونوز تر تؤكدوم‌،

دیزیمین‌ طاقتی‌ توكنن‌ زامان‌.

دؤندولر اتلیگه‌ كسدیلر منی‌

قوشا چاتما قوروب‌ تونقال‌ یاپدیلار.

چاغیردیلار بوتون‌ یولدان‌ اؤته‌نی‌

دریمی‌ سویدولار، شیشه‌ تاخدیلار.

دؤوره‌لندیم‌، شولن‌ بوریانی‌ تكین‌،

هر كاباب‌ ایگینه‌ ییغیشیب‌ گلن‌،

پیچاغین‌ چیخاریب‌، چكدی‌ قمه‌سین‌،

بیر پارچا سییریب‌ كسدی‌ اتیمدن‌.

یاراماز اوغوللار یاریماسینالار،

چوخ‌ قافاسیز چیخدی‌ سون‌ بابالارین‌.

یورد وئریب‌ قوللوغو ساتین‌ آلدیلار،

الدن‌ گئتدی‌ بوتون‌ وارلیغیم‌، واریم‌.

دؤنرگه‌ دولاندی‌، اوجاغیم‌ سؤندو،

دوغما یوردوم‌ دوغراق‌ دوغراق‌ دوغراندی‌.

قارقالار قارتالا، لاچینا دؤندو،

قارتال‌ قوزغون‌ اولدو، قوش‌ قارقالاندی‌.

اتیم‌ یئییلسه‌ده‌، نئیلك‌، یئییلسین‌،

چالیش‌ خاطیره‌می‌ عزیزله‌، ساخلا.

قویما باری‌ مزاریم‌ اولا ایتگین‌،

ییغ‌ سوموكلریمی‌، بیر یئر تاپ‌، قویلا.

بیزده‌ آنا حقّی‌ تانری‌ حقّیدیر

مگر وصیتین‌ اونوتماق‌ اولار؟

آنا تاپشیریغین‌ یئرینه‌ یئتیر،

مرد ایگیت‌ بورج‌ اوسته‌ جانینی‌ قویار.

آنانین‌ هر سؤزون‌، هر وصیتین‌،

حلال‌ سود امنلر اونودا بیلمز.

یورومك‌ نه‌ قدر اولسا دا چتین‌،

مرد ایگیت‌ یولوندان‌ اوز دؤندرنمز.

او قورخونج‌ رؤیادان‌ آییلان‌ گوندن‌،

نه‌ گئجه‌م‌ قالیبدیر، نه‌ده‌ گوندوزوم‌.

یالنیز بیر سئودانین‌ دالینجایام‌ من‌،

قورو سوموك‌ گزیر هر یئرده‌ گؤزوم‌.

جان‌ آتیب‌، آختاریب‌ یورددان‌، یووادان‌

آنجاق‌ بیر تورباجیق‌ سوموك‌ ییغمیشام‌.

گزیب‌ دولانیرام‌، سفیل‌، سرگردان‌،

هارادا قویلایام‌، هاردا باسدیرام‌.

بو گئنیش‌ دونیادا ارلر، یارانلار،

هر یئر باشدان‌ ـ باشا قاپسانمیش‌ بوتون‌.

ای‌ وطن‌ داشینی‌ دؤشه‌ وورانلار،

مزاردا تاپیلمیر وطنیم‌ اوچون‌.

من‌ كی‌ بیر وطنسیز، یوردسوز شاعیرم‌،

بیر عؤموردور سیتقاییب‌ اینله‌ییرم‌.

كیمسه‌دن‌ نه‌ قان‌، نه‌ دییه‌ت‌ ایسترم‌

بیر مزار بویوندا یئر دیله‌ییرم‌.

یوردومو ـ یووامی‌ باسیب‌ آلانلار،

فقط‌ نئچه‌ قاریش‌ یئر وئرین‌ منه‌.

بوتون‌ سیزین‌ اولسون‌ بو اؤلكه‌ ـ دیار

بیر مزار قاییریم‌ آنام‌ وطنه‌.

ساوالان

ساوالان باخ هاوالان، دردین آلان، چوخدو منیم تك
سئویره م داغ- دَ ره وی، بَت- به ره وی جانلا- تَنیم تك
قارا، آغلی- قاراداغلی ، قاراباغلی ، وطنیم تك
آی بوتون وارلیغی گْؤیچك
ده لی وورغونلارا باش چك!
آی طبیعت گؤزه لی چوْخلو گوزه للیك گؤزو سه ن سن
هم شیرین یازلی، شیرین نازلی، باخیشلار سؤزو سه ن سن
نه بیلیم! بلكه ده دونیادا بهشتین اؤزو سه ن سن
كوْ ثه رین چئشمه سی دریاچه وه باغلی
اَته گین سَبزه لی – باغلی
گول له رین خوْ للو بوتاقلی
گؤز باخاركه ن باخیشملا اؤپوره م آل یاناغین دان
خضر تك آختاریرام آب حیاتی بوُلاغین دان
وارلیقین شه فتینی بلكه اَ مه م اوْ گول دوداغیندان
آلمادان حاجه تیمی من اوْ موقدده س اوْ جاغیندان
چكمه رم ال- آیاغین دان
قوْپمارم هئچ قوُ جاغیندان
اوُلوُ سوُلطان ساوالان، داغلار آرا توُت اوُجا باشین
نئچه میلیون ایلی آید یندی قْوْیوب دور گئری یاشین
آچیق آلنین قیریشیبسا، آغاریب باشیله قاشین
یئنه سای سیزدی ته لاشون
چوخ! دوشوب باشلارا داشین
حؤرمتین وار ائل آرا ، بیزلره سوُ لطان بابا سه ن سن
اؤز قوچاقلارینا یوْ ل گؤسته رن آغشین خوْ جا سه ن سن
دده قوُرقوُ د لو او سه ك سن بیر ائلاته آتا سه ن سن
دیللرین اَزبری ائللر آرا سه ن سن
بوْ للو ده رده چارا سه ن سن

بولوت قارا چورلو حیاتی

  کیتابین آدی : بولوت قارا چورلو حیاتی

یازان : یلماز تورک آی

اولچوسو : 44 کیلو بایت

الیفبا : لاتین الیفباسی

دیل : آذربایجان تورکجه سی

صفحه لرین سایی : 4 صفحه

یوکله(دانلود)


 

قورقود دده مه نیسگیللی سوزلریم

  کیتابین آدی : قورقود دده مه نیسگیللی سوزلریم
یازان : بولوت قاراچورلو(سهند)

اولچوسو : 151 کیلو بایت

الیفبا : عرب الیفبا سی

دیل : آذربایجان تورکجه سی

صفحه لرین سایی : 16 صفحه

یوکله(دانلود)


 

بولوت قاراچورلو تانیش اولماق

بولوت قاراچورلو 1305 ده مراغا شهرینده آنادان اولدو. دوغوم گونونده یاغیشین یاغماسی باعث اولدی آتاسی اونون آدینی ((بولوت)) قویسون، اما پهلوی رژیمینین ثبت احوال اداره سی بو آدی "نامانوس!" بیلیب و اونون شناسنامه سین "بهلود" آدیله وئردیلر. بولوت قاراچورلو پهلوی رژیمینین بوغونتوسوندا ((سازیمین سوزو)) آدیندا شعر كتاب ایله ایراندا یاساق اولموش تورك دیلینین گوجونو بیر داها اثبات ائدیب و آذربایجان میللتینه چیراغ كیمی یول گوسترن اولدو. سهندین شعرلرینده انسانلیق و بیرلیك دالغالانیر، اونون شعرلری وطن عشقی، آزادلیق، میللی حقلر، سئوگی و… نی ترنم ائدیر. سهند آنادیلینه و آذربایجانلی اولماقینا گووه نیردی و بو دوشونجه دن اوتور پهلوی دورونده خوش بیرگون گورمه دی و دائما مامورلارین طرفیندن اذیت اولوب و نظر آلتیندا ساخلانیردی، اما اونون اینامی و اوز وطنینه اولان عشقی بو فشارلارا اوستون گلیب و اولاری مایوس ائدیردی. سهند 1346نجی ایلین بهمن آییندا شهریاری گورمه ك اوچون تهرانا گئدیر آمما شهریار كی بو ایللر دونیادان ال اوزوب و اوز ائویندن ائشیكه چیخمیردی سهندی گورمك ایستمیر دی. آمما شهریاری گورمك شوقی سهندی مجبور ائدیر اوز آنا دیلینده بیر شعر یازیب شهریارا گوندرسین، و بو مكتوب "سهندیه" اثرینین یارانماسینا باعث اولور. بو آزادلیغا حسرت قالان دویغولو و دویوشجول شاعیر 1358 نجی ایلین فروردین آیینین21نده دونیادان گئدیر و اونون وطن عشقینه دویونن اوره گی دویونمه كدن دایانیر و بوتون حق سئون انسانلاری ماتمه بورویور. اونون روحو شاد و یولو دواملی اولسون.

قورقود دده مه نیسگیللی سوزلریم

گئجه دیر، عالمه چوكوب قارانلیق

افقلر تاپدانیب یئره یامانیب

هر یان، قوو وورورسان قولاق توتولور

فیكیرده، دویغودا، دونوب دایانیب

آی كوسوب اوز قویوب زهره یه ساری

گونش یولوب توكوب زرلی ساچلارین

ظلمت بایراق آچیب یئرین اوزونده

دگیشیب عالمین قایدا- قرارین

بیر چاققالدا هورمور، قورددا اولامیر

بایقوشلاردا باشین چكیب قینینا

اولوم قواند گریب یئرین اوزونه

هر شئی شبهه لنیر وار اولدوغونا

كوشنی بوروین سوكوت الیندن

سوكوت جانا دویور، فریادا گلیر

داریخیب هووكوروب هارای چكیرم

دره لر دیسگینیب، داغلار ترپنیر:

- اولدوزلو گویلره – آیلی گویلره

قوزقون كیمی قاناد گه رن بولودلار!

دومانلار ایچیندن، چنلر ایچیندن

جانیخمیش بیر انسان سیزی هارایلار!

اهرمنلر، دوزاق قوروب یولومدا

قورخورام- قورخورام من قارانلیقدان!

دیشین شاققیلدادیر، برلدیر گوزون

هر كولون دیبیندن، منه بیر شیطانگونشی سالسادا گئجه قویویا

یئنه ده گویلرده، اولدوز وار، آی وار

دئیرلر گئجه لر یولدان آزانلار

اولدوزلارا باخیب، یولونو تاپار

چكیلین، چكیلین، چكیلین آمان!

عومرومون گویوندن چكیلین بیر آن!

قویون ایشیق سالسین یوللاریما آی

یولومو سوروشوم من اولدوزلاردان

اولدوزلار، اولدوزلار، آمان اولدوزلار

نه دن گوز باسماییب پاریلداشمیرسیز؟

هارداسیز؟ هارادا ایتیب باتیب سیز؟

نییه ساكیت- ساكیت پیچیلداشمیرسیز؟

یوخسا باتلاقلیقا باتیبدی ((بهرام))؟

((كیوانین)) غصه دن بوكولوب بئلی؟

((اولكرین)) سالخیمی پوسگوندن دوشوب؟

((زهره)) نین سازینین قیریلیب تئلی؟

سانكی بولوتلاردا یوخویا باتیب

بختیمدن گویده بیر شیمشكده شاخماز!

بستانچی بابادا باش آتیب یاتیب

چاخماغینی چالماز، فنارین یاخماز!

اولدوزلار اوزاقدیر، سمالر درین

انسانا یئردندی وارسا هر هارای

یوز بئله باغیرسام، سیتقاسامدا من

یولونو دگیشمز گونش، اولدوز، آی

ادامه مطلب

وبلاقا گؤره

بو دیل دنیزدی سیزین تک صدفده اینجیسی وار
قیزیلدی سیزده اولان اوزگه‌نین اگر میسی وار
دئسزکی اودلو دیاردی بیزه وطن یاراشار
بیزیم اوجاقلارین آنجاق کور ائیله‌ین هیسی وار
"عقیل"
وبلاق مودیری : نژادمحمد

سون یازیلار

آختارماق

یازارلار

Page Rank بالاجا خوخان آذربایجان تورکجه سینده ایسلام دینی و قرآن کریم