تبلیغات
ایران آذربایجانی تورکجه سینین ادبیات اوتاغی - آغ قوش
ایران آذربایجانی تورکجه سینین ادبیات اوتاغی
یاشاسین آذربایجان

قونو سلاخلانجی

سلاخلانج

باغلانتیلار

اؤزل یارپاقلار‌

← وبلاق گؤروشلری

  • گؤروشلرین هامیسی :
  • بو گون گؤروشلر :
  • دوننکی گؤروشلر :
  • بو آی گؤروشلر :
  • قاباق آی گؤرو‌شلر :
  • یازارلارین سایی :
  • یازیلارین هامیسی‌نین سایی :
  • سون گؤروش :
  • سون دیَیشمه :

لینکلر‌

آغ قوش

آغ قوش 
بیری وار ایدی، بیری یوخ ایدی، بیر پادشاه وار ایدی. بو پادشاهین آروادی‌نین 
بوینونا نه قدر اوشاق دوشوردوسه، هامیسی آنا بطنیندن گلنده اؤلوردو. 
نه قدر طبیب، طیلسیم، جادو ائلتدیریردیلرسه، هئچ بیر فایدا وئرمیردی. 
گونلرین بیر گونونده یئنه ده پادشاهین زنه‌نی هملی اولور. دوغماغینا 
بیر قدر قالمیش، پادشاه زنه‌نینی اؤز قایناتاسی‌نین یانینا گؤندریر 
کی، بلکه اوردا یاخشی باخالار. گون کئچیر، آی دولانیر، پادشاهین بیر 
اوغلو اولور. بلی، موژده-موژده اوستوندن گلیر. پادشاه زنه‌نینه سیفاریش 
گؤندریر کی، هله بیر نئچه واخت قالسین اوردا، اوشاغین بیر آز سومویو برکیسین، 
گلر، یئنه بیر قضا-قدر اوز وئرر. 

بونلار بوردا قالماقدا اولسونلار، سنه کیمدن خبر وئریم، پادشاهین 
وزیریندن. 
پادشاهین بیر خبیس وزیری وار ایدی. چوخدان فورصت آختاریردی کی، اونو اؤلدوروب 
اؤزو پادشاهلیغا کئچسین. بو طرفدن گؤردو کی، یوخ، پادشاهین اوغلو 
دا اولدو، تا پادشاه اؤلسه ده بونا بیر شئی چاتمایاجاق، قت ائله‌دی کی، گرک 
پادشاهی اؤلدوروب اونون نسلینی یئر اوزوندن کسه. بلی، بیر گئجه اؤز 
آداملارین گؤتوروب هوجوم ائله‌دی پادشاهین سارایینا. پادشاهی اؤلدوروب اؤزو 
کئچدی اونون یئرینه، ایلشدی تاختدا. 
صاباحیسی گون اؤز آداملاریندان بیر دسته گؤندردی پادشاهین زنه‌نی‌نین 
یانینا. بیر نامه ده یالاندان پادشاهین دیلیندن یازدی کی، بس ناخوشام، 
گرک دورماییب گله‌سن. پادشاهین کولفتی کجاوه‌یه مینیب بو قاصیدلرله 
یولا دوشدو. گلیب بونلار بیر داغین اته‌یینده دوشرگه ائله‌دیلر. 
ائله کی، گئجه یارییا گلدی، بو قاصیدلرین باشچیسی دوروب گلدی پادشاهین 
آروادی‌نین چادیرینا. وزیر اونا تاپشیرمیشدی کی، آروادی دا، اوشاغی دا اوردا 
اؤلدورسون. گلیب گیردی ایچرییه، توتدو آروادین قولوندان. آرواد گؤردو کی، 
بو ملونون فیکری پیسدی، اوزون اونا توتوب دئدی: 
- سن نه کیمسنه‌سن کی، اؤز پادشاهی‌نین آروادینا ساتاشماق ایسته‌ییرسن. 
قاصیدباشی گولوب دئدی: 
- نه پادشاه، نه پادشاه آروادی؟ سنین ارین چوخدان او دونیایا تشریف 
آپاریب. ایندی پادشاه سنین ارینین وزیریدیر. بیز ده اونون امریله گلمیشیک 
کی، سنی ده، اوشاغینی دا گؤنده‌رک آتاسی‌نین یانینا. 
آرواد بونو ائشیتجک اوشاغی قارمالاییب اؤزون آتدی باییرا. قاصیدباشی 
بیر سس ووردو، کئشیکچیلر اویاندیلار، دوشدولر آروادین دالینا. آرواد 
گؤردو یوخ، آز قالیب کی، چاتسینلار، بیر یئره، بیر گؤیه باخیب اوشاغی آتدی 
دره‌یه. کئشیکچیلر چاتیب آروادی اؤلدوردولر، تای اوشاغین دالینجا دره‌یه 
ائنمه‌دیلر، بیلدیلر کی، او دا حؤکمن اوردا داشلارا دیَیب اؤلوب. 
بونلار پادشاهین یانینا گئتمکده اولسونلار، سنه کیمدن خبر 
وئریم، کؤهنه پادشاهین قارداشیندان. 
کؤهنه پادشاهین بیر قارداشی وار ایدی. بو واختلاردا سیاهته گئتمیشدی. 
سیاهتدن قاییدیب ایشی بئله گؤرنده باخدی کی، اونو دا اؤلدوره‌جکلر، 
باشینا بیر آز آدام ییغیب چکیلدی داغا. پادشاه بو احوالاتی ائشیدیب اونون 
دالینجا قوشون گؤندردی. آنجاق قوشون اونو توتا بیلمه‌دی. پادشاهلا اونون 
آراسی نه دوزلدی، نه ده اونو یوخ ائله‌یه بیلدی. وزیر هر نه تدبیر گؤردوسه 
وئجه گلمه‌دی کی، گلمه‌دی. 
کؤهنه پادشاهین قارداشی گئتدیکجه قوووتلندی. بونلار بیر گون گلیب 
همین داغا چیخدیلار. عسگرلرین بیری بوردا دره‌ده، شیر یوواسی‌نین قاباغیندا 
اوینایان بیر اوشاق تاپدی؛ گتیردی پادشاهین قارداشی‌نین یانینا. پادشاهین 
قارداشی باخدی کی، بو اوشاغین قولوندا بیر بازوبند وار. بازوبندی 
اوخویوب گؤردو کی، اؤز قارداشی‌نین اوشاغیدی. دئمه بو همین اوشاقمیش کی، 
آرواد بونو دره‌یه آتمیشدی. اوشاق شیر سودو ایله بسلندیگینه گؤره آدین 
قویدولار شیرزاد. آمما شیرزاد ائله دوغرودان دا شیر کیمی گومراه بیر 
اوشاقدی. غرض، بو اوشاق ائله خیردالیغیندان آت بئلینده گزدی، اوخ آتدی، 
قیلینج-قمه اویناتدی. اون دؤرد-اون بئش یاشینا چاتاندا عمللی-باشلی بیر 
پهلوان اولدو. 
بو خبر کی، یاییلدی اطرافا، پادشاهین اوغلو تاپیلیب، اؤز عمیسی‌نین یانیندادی، 
بونلارین گوجو بیر آز دا آرتدی. وزیر گؤردو یوخ، ایش خارابدی. تدبیر، 
تدبیر، آخیردا گونلرین بیرینده بؤیوک بیر یایلاق تیکدیردی، گؤزل، هم ده 
حیله‌‌گرلیکده شیطانا پاپاق تیکن قیزینی دا آپاریب قویدو اورا. 
شیرزاد بیر گون تک‌باشینا گزمه‌یه چیخمیشدی. گزه-گزه گلیب 
همین بو یئره چیخدی. یامان آجیمیشدی. بیر اوخ قویدو چیلله‌یه، آتیب بیر 
قوش ووردو. قوش گئدیب دوشدو همین بو قیزین قالاچاسینا. شیرزاد بیر کمند 
آتیب قالخدی بورا. باخدی کی، کولفرنگیده بیر قیز اوتوروب، بیر قیز 
اوتوروب کی، سویا دئییر آخما، آیا دئییر باخما. 
قیز شیرزادی گؤرجک گلیب پلتی آچیب اونو دعوت ائله‌دی ائوه. اؤزو ده 
تئز آتاسینا قاصید گؤندردی کی، دورماسین گلسین، شیرزادی سالمیشام جنگه. 
شیرزاد عیش-عشرته مشغول ایدی، بیر ده پنجره‌یه باخدی گؤردو نه، دریایی- 
لشکردی کی، گلیر. ایشی باشا دوشدو. قالخدی آیاغا. ائله بیرینجی دفعه‌‌ 
قیزین باشین کسیب اونو جهنّمه واصیل ائله‌دی. سونرا تئز اؤزون مهله‌یه 
سالیب میندی آتا. دالین بارییا طرف وئریب باشلادی جنگه. سن اولاسان بیر، 
دوشمن اولا دریایی-عمّان. شیرزادین هر طرفین آلدیلار. شیرزاد باخدی 
کی، داها لاپ گوجدن دوشور. ائله آز قالمیشدی کی، اونون ایشینی بیتیره‌لر، بیر 
ده بیر سس گلدی کی: 
- قارداش اوغلو، قورخما گلدیم. 
شیرزاد عمیسی‌نین سسین تانیدی، ائله بیلدی کی، گؤزلری ایشیقلاندی، قوللارینا 
قوووت گلدی. اؤزونو ووردو دریایی-لشکره. بیر جنگی-مغلوبه اولدو 
کی، روزیگارین گؤزو بئله شئی گؤرمه‌میشدی. قوشوندان قیریلان قیریلدی، تسلیم 
اولان اولدو، پادشاهی اؤلدوروب شهری آلدیلار. شیرزاد پادشاهلیغی عمیسینه 
وئریب، اؤزو باشلادی کئیف ائله‌ییب، گون کئچیرمه‌یه. 
پادشاهین، یعنی شیرزادین عمیسی‌نین ایکی اوغلو وار ایدی. آنجاق پادشاه 
شیرزادی اونلاردان چوخ ایسته‌ییردی. بو اوغلانلارین اورگینه وسوسه دوشدو. 
گؤزلری بونو گؤتورمه‌دی. پادشاه بونو سئزیب، بیر گون اونلارین اوچونو ده 
چاغیرتدیردی حضورونا، دئدی: 
- بالالاریم، سیز اوچونوز ده منیم بالامسیز. من او آدامی چوخ ایسته‌رم 
کی، ایگید اولسون. سیزین هانسینیز ایگیدسینیز؟ 
هره اوزون بیر طرفه چئویردی. پادشاه بونو گؤروب دئدی: 
- دئمک، هامینیز اؤزونوزو ایگید حِساب ائله‌ییرسینیز. اوندا من بیر 
شرط قویورام. کیم منیم آتیمین آیاغی‌نین دیَمه‌دیگی یئردن منه 
گؤرمه‌دیگیم بیر شئی گتیرسه، او ایگیددی. بؤیوک اوغلان قاباغا یئریدی، زمینیه‌دب 
اؤپدو، پادشاه دا اونا یول خرجی وئریب مورخّص بویوردو. 
اوغلان آتی مینیب یولا دوشدو. گئجه‌نی گوندوزه سالدی، گوندوزو گئجه‌یه 
سالدی، دوز ایکی آی یول گئتدی. ایکی آیین تامامیندا بیر یئردن کئچیردی، 
بیردن اونون آتی خوررادی. آتی دایاندیریب گؤردو کی، بیر آغاجین دیبینده 
بؤیوک بیر لعل وار. آتدان دوشدو، فیکیرلشدی کی، اگر آتام بو یئرلره گلمیش 
اولسایدی، یقین کی، بونو بوردا قویمازدی. لعلی گؤتوروب آتین باشین 
قایتاردی. شهرده خبر چیخدی کی، پادشاهین بؤیوک اوغلو گلیر. بلی، پادشاه 
امر ائله‌دی، اونو پیشواز ائله‌دیلر. صاباحی هامی گئییندی، کئجیندی، هره 
اؤز یئرین توتدو، دیوان قورولدو، اوغلان گتیردیگی لعلی بیر خونچایا قویوب 
گتیردی پادشاهین حضورونا. پادشاه اوغلونون آلنیندان اؤپدو، بیر آچار 
وئریب دئدی: 
- شهرین قیراغینداکی داغین آلتیندا بیر کاها وار. کاهادا منیم 
قیرخ اوتاغیم وار. آپار بو لعلی قوی اون بیرینجی اوتاغا! 
اوغلان گئدیب اون بیرینجی اوتاغی آچیب گؤردو بورا او جور لعللرله دولودو. 
نؤوبه‌ گلدی اورتانجیل اوغولا. بو دا اوچ آی یول گئدندن سونرا چاتدی 
بیر مئشه‌یه، گؤردو کی، بوردا یاخشی مئیوه‌لر وار. دئدی بیر-ایکیسین دریم 
یئییم، یاخینلاشدی، گؤردو بونلار هامیسی قیزیلدی. بیر هئیبه بونلاردان 
دولدوروب یولا دوشدو. بلی، گلیب چاتدی. پادشاه بونون دا آلنیندان اؤپوب 
دئدی: 
- گئت آپار قوی ایگیرمی بیرینجی اوتاغا! 
اوغلان گئدیب گؤردو کی، او اوتاق دا دولودو ائله قیزیل مئیوه‌لرله. 
نؤوبه‌ گلدی شیرزادا. 
شیرزاد زمینی-ادب اؤپوب دئدی: 
- عمی، من سنین آتینلا گئده‌جه‌یم. 
پادشاه امر وئردی، اؤز آتینی وئردیلر شیرزادا. شیرزاد آتی مینیب دوشدو 
یولا، آتین باشین بوراخدی. آت بیرباش یولا دوشدو، اطرافینا هئچ فیکیر وئرمه‌ییب 
گئدیردی. بئله‌لیکله، دوز آلتی آی یول گئتدی، یئددینجی آیا دؤننده بیردن 
آت دایاندی، بیر فینخیریب آیاغین یئره دؤیدو، بیر ده کی، دؤنوب دالا 
باخیب کیشنه‌دی، اؤزون جمع‌لشدیردی. بلی، شیرزاد بیلدی کی، آت بوندان او یانا 
گئتمه‌ییب. آتین دهنه یویه‌نیندن دارتیب باشلادی یاواش-یاواش سورمه‌یه. 
بیر قدر گئتمیشدی، بیر ده گؤردو یئرده بیر شئی یانیر. آتی ساخلادی، 
دوشوب باخدی، گؤردو بو، اؤزو-اؤزوندن یانان بیر چیراقدی. چیراغین اورابوراسینا 
باخاندا گؤردو بونون بیر یئرینده یازیلیب کی، “آی بونو تاپان 
آدام، بو چیراقدان دونیادا ایکی دنه‌دی”. شیرزاد فیکیرلشدی. اولا بیلر کی، 
بونون بیرینی ده عمیم تاپمیش اولا، اورگینده قت ائله‌دی کی، ایکینجیسینی ده 
تاپمامیش ائوه دؤنه‌سی دئییل. آتین قارین‌آلتیسین برکیدیب یولا باشلادی. 
چوخ گزدی، آز گزدی، اوردا دئییلدیم، حِسابلایایدیم، آخیر گلیب 
چیخدی بیر شهره. کاروانسارادا دوشوب بیر منزیل کیرله‌دی کی، بیر گون 
قالیب بیر آز ایستراحتچیلیک ائله‌سین. گئجه بونون منزیلینه بیر دنه ده 
آدام گلدی. شیرزاد بیر ده باخدی کی، بو قوناق خورجوندان بیر دنه چیراق 
چیخاریب یاندیردی. باخدی کی، آده، ائله همین چیراغین تایی. 
شیرزاد قوناق ایله تانیش اولدو. اؤز احوالاتین اونا دانیشیب همین چیراغی 
اوندان ایسته‌دی. قوناق دئدی: 
- من چیراغی سنه وئررم، آنجاق سن ده عوضینده منه بیر شئی 
وئررسن. 
شیرزاد دئدی کی: 
- هر نه ایسته‌سن، حاضرام وئرمه‌یه. 
اوندا قوناق دئدی کی: 
- بوردان بیر آیلیق یولدا دیولر اولورلار. اونلارین یاخشی گؤیرچینلری 
وار. اگر او گؤیرچینلردن بیر جوت ائرکک، دیشی منه گتیره بیلسن، من 
بو چیراغی سنه وئره‌رم. 
شیرزاد راضی اولدو. یولو اوندان سوروشوب صاباح تئزدن “آغامی الله 
ساخلاسین” - دئییب یولا دوشدو. آز گئتدی، اوز گئتدی، دره، تپه دوز گئتدی، 
گلیب همین یئره چاتدی. بیر داغین اته‌ییندن کئچنده بیر ده بیر سس 
ائشیتدی. دؤنوب گؤردو کی، داغین اوستونده بیر آغ قوش اوتوروب اونو چاغیریر. 
شیرزاد دایاندی. قوش دئدی: 
- شیرزاد، او آدام سنی اؤلومه گؤندریر. بو دیولر او گؤیرچینلری 
آتالاریندان چوخ ایسته‌ییرلر. سن گرک گئجه‌نی یارییا وئریب، اونلاری یوخولادیب 
سونرا گئده‌سن. 
شیرزاد آتدان دوشدو، گؤزله‌دی، گئجه اؤزون وئردی بارییا طرف. باری‌نین 
یانینا چاتمیشدی کی، بیر ده گؤردو قوش دئییر: 
- شیرزاد، تاماه سنه گوج ائله‌مه‌سین! بیر جوتدن آرتیق توتمایاسان ها... 
شیرزاد باریدان آشیب گیردی مهله‌یه. ایمکله‌یه-ایمکله‌یه گلیب چاتدی 
گؤیرچینلرین یانینا. باخدی، واللاه، بونلار ائله گؤیرچیندیرلر کی، ائله 
بیر جوت گؤز لازیمدی کی، بونلارا تاماشا ائله‌سین. بونلاردان بیر جوت توتدو. 
ایسته‌دی قاییتسین، هر نه قدر ائله‌دی، آیاقلاری گئتمه‌دی، گؤزو قالمیشدی گؤیرچینلرده. 
آخیردا اؤزون ساخلایا بیلمه‌ییب، بیر جوت ده توتدو. ائله بیل کی، 
ائله گؤیرچینلر بونا بندمیشلر. بیر سس-کوی قالدیردیلار کی، تای نه 
بیلیم نئجه. دیولر اویانیب شیرزادی توتدولار. 
شیرزاد احوالاتین دوزونو اونلارا دانیشدی. اونلار دئدیلر کی: 
- بیز بونلاردان بیر جوت وئرریک سنه، آمما بو شرطله کی، بو یاخینلاردا 
دیولر وار، اونلاردا یاخشی اوزوم وار، او اوزومدن بیر سبت بیزه گتیره‌سن. 
شیرزاد آتینی مینیب اوز قویدو او طرفه. آز گئتدی، چوخ گئتدی، گلیب 
چیخدی همین دیولرین ویلایتینه. ائله آتدان دوشوب تزه‌جه چکیلمیشدی بیر 
کولون دیبینه کی، همین سسی یئنه ده ائشیدیب باشین قالدیراندا آغ قوشو 
باشی‌نین اوستونده گؤردو. 
- شیرزاد، منیم مصلحتیمه قولاق آسمادین. اونا گؤره ده موصیبته 
دوشدون. آچ قولاقلارینی، یاخشی ائشیت! باخ سنه دئییرم، تاماه 
ائله‌ییب، ایکینجی سبتی گؤتورمه‌یه‌سن ها... 
شیرزاد گؤزله‌دی، گئجه‌نی یارییا وئریب کمندی آتدی بارییا، کمنددن 
ساللانا-ساللانا دیرماشیب دوشدو او طرفه. سورونه-سورونه گلدی 
آنبارا. گؤردو بودو ها اوزوم سبتلری دوزولوب بوردان اورا. فیکیرلشدی 
کی، قوی بیر آز قاباقجا اؤزوم یئییم، سونرا دا بیر سبت آپاریم. ایلشدی 
سبتین باشیندا. شیرزاد کیمی بیر پهلوانا بیر سبت اوزوم نه 
ائده‌جک؟ اونون هاراسیندا قالاجاق؟ بیر، ایکی، اوچ، بئش سبت قورتاردی. ائله 
سبتده‌کی آخیرینجی سالخیمی گؤتورموشدو کی، بیر ده گؤردو سبت یئنه 
دولدو اوزومله. شیرزاد گؤزلرینه اینانمادی. بیر سبت ده چکدی قاباغینا، 
یئنه یئدی. ائله کی، اوزوم قورتاردی، سبت یئنه قئیبدن دولدو. شیرزاد 
قالدی معطل. سبتین بیرین گؤتوردو، فیکیرلشدی کی، آی دیلی-قافیل، هئچ 
اینصاف دئییل کی، من بو سبتلرین بیرین ده عمیمه آپارمایام. تاماه 
اونا گوج ائله‌دی، ایکینجی سبتی ده گؤتوردو. ائله الین ایکینجی سبته وورموشدو 
کی، بوتون سبتلر قیشقیردیلار. دیولر تؤکولوب اونو توتدولار. شیرزاد 
بوتون قضیّه‌سینی بونلارا دانیشدی. دیولرین بؤیویو بیر بدحئیبت 
شئیدی، اوزون توتدو شیرزادا دئدی: 
- بو یاخینلاردا آغ دیوین مسکنیدی. اونون بیر قیزی وار کی، من اونا 
عاشقم. اگر اونو منه گتیرسن سنه بیر سبت اوزوم وئره‌رم. 
شیرزاد آتی میندی. کور-پئشیمان، اؤزون سؤیه-سؤیه اوز قویدو ایندی ده 
آغ دیوین ویلایتینه. بلی گلیب چاتا-چاتدایدی کی، یئنه آغ قوش کسدی 
اونون باشی‌نین اوستونو، دئدی: 
- ائی تاماهکار اینسان، سن بو دفعه‌‌ حؤکمن اؤلومه گئدیرسن. قولاق 
وئر منه. آغ دیوین قیزی بو ساعت یئددی گونلوک یوخودادی. او، آیدا بیر 
دفعه‌‌ بئله یاتیر. یئددی گونلوک یوخو یاتاندا او قیرخ ساچی ایله چارمیخا چکیلی 
اولور. اونو آچماق سنه مومکون اولماز. مگرینکی آغ دیوین سرتؤوله‌ده 
قیرخ چارمیخلی بیر آتی وار. اونون یانینا قوش قوشلوغو ایله دوشه بیلمز. 
سن گرک او آتی مینه‌سن، سونرا قیزی یئردن قالدیراسان. بیرینجی دفعه‌‌ 
قالدیردین قالدیرمیسان، قالدیرمادین دیزه‌جن داش اولاجاقسان، ایکینجی دفعه‌‌ 
قالدیرماسان قورشاغا کیمی، اوچونجو دفعه‌‌ قالدیرماسان بوتون داش اولوب 
قالاجاقسان اوردا. 
شیرزاد یئتیشدی محللی-مخسودا. اؤزون وئردی سرتؤوله‌یه. گؤردو 
بلی، آغ قوشون دئدیگی کیمی بورادا بیر آت وار کی، ائله بیل اژداهادی. اؤزون 
جمع‌لشدیردی، بیر قوشا تپیک ووروب آتیلدی، ترلان توراجا قونان کیمی قوندو 
آتین بئلینه. اؤزون آتین بئلینده راحتلایاندان سونرا، ائله کی، دهنه-یویه‌نی 
الینده مؤحکملتدی، اوندان سونرا قیلینجین چکیب بیر-بیر ایپلری اوستدن 
یوخاری کسمه‌یه باشلادی. آت چارمیخدان آزاد اولاندان سونرا ایسته‌دی 
بیر گوج ائله‌سین، گؤردو یوخ، اوستونده‌کی جان او جاندان دئییل. شیرزاد اونون 
باشین دؤندردی قیزین یانینا. گلدی چاتدی قیزین برابرینه. گؤردو قیز، 
نه قیز. دوغرودان ائله بیل موغان دورناسدی. اییلدی، الین سالدی قیزین بئلی‌نین 
آلتیندان، بیر دفعه‌‌ گوج وئردی، هئچ بیر شئی چیخمادی. باخدی کی، بلی، 
دیزه قدر اولدو داش. بیر ده الین سالدی، یئنه گوج وئردی، قیز یئریندن 
ترپندی، آمما قالدیرا بیلمه‌دی. قورشاغا کیمی اولدو داش. شیرزاد آتین 
یویه‌نینی برک توتوب دئدی: 
- واللاه، بو دفعه‌‌ یا سنی قالدیراجاغام، یا آتین بئلین سیندیراجاغام. 
الین یئنه ده سالدی قیزین بئلینه. بیر “یا مدد” دئییب قیزی دیک قالدیردی. 
باخدی کی، داشدان سیلکیندی. بیرباش آتی ووردو. دالدان دالا باخماییب 
آتی چاپدی. بیر قدر کئچندن سونرا سس-سمیر کسیلدی. شیرزاد آتی 
مؤحکم ووروردو، بیر ده یئنه آغ قوش ظاهر اولدو. 
- شیرزاد، منه قولاق آس! بو قیزین یوخودان اویانماغینا بیر ساعت قالیب. 
بو یوخودان دوراندا ائله قیشقیراجاق کی، بوتون داغ، داش زلزله‌‌یه گله‌جک. 
سنین قولاقلارین او سسه تاب گتیرمه‌ییب پارتلار. آتدان دوش، بو ساعت بیر آرشین 
ائنی، اوچ آرشین درینی بیر خندک قاز، گیر ایچینه گیزلن! باخ سنه دئییرم، او 
واختا قدر چیخمازسان کی، او آناسی‌نین سودونه آند ایچمه‌یه. 
شیرزاد آتدان دوشدو. آغ قوشون دئدیگی کیمی بیر خندک قاضیب گیردی 
ایچینه. دوغرودان دا یاریم ساعتدان سونرا قیز ائله قیشقیردی کی، اوچ آرشین درینلیکده 
شیرزادین توکلری دیک-دیک دوردو. 
شیرزاد اؤز-اؤزونه دئدی: 
- عجب آلمالی زنندی. هر یوخودان دوراندا بئله قیشقیرسا، شهرده 
قولاقلی آدام قالماز. 
قیز بیر او یانا باخدی، بیر بو یانا باخدی، اؤزوندن باشقا هئچ کسی 
گؤرمه‌دی. اوراسین دا دئییم کی، شیرزاد اونو مؤحکم-مؤحکم بیر آغاجا 
سریمیشدی. 
قیز باشلادی یالوارماغا کی: 
- کیمسن، هر نَیه دئییرسن آند ایچیم، چیخ منی آچ، من تای اولدوم 
سنین. 
شیرزاد او واختا قدر چیخمادی کی، قیز آناسی‌نین سودونه آند ایچدی. شیرزاد 
چیخدی، قیزی آچدی، آلدی یهر قاشینا، دوشدو یولا. آز گئتمیشدیلر، چوخ 
گئتمیشدیلر، بیر کولک قوپدو، بیر سم اسدی، بیر سم اسدی کی، دئدی آتدان 
دوشوب بیر یئرده دالدالانماساز، عهدینیزی کسه‌جه‌یم. 
شیرزاد گؤردو داها علاج یوخدو. گؤردو بیر قالاچا وار، آتی ووردو قالاچانین 
پلتینه طرف کی، آتدان دوشه. آغ قوش جایناغیندا بیر قیرمانج، 
آلیجی قوش کیمی شیغیدی شیرزادین اوستونه. هر طرفدن دوشمک ایسته‌دیسه 
قویمادی. آت قاچیر، آغ قوش وورور، آت قاچیر، آغ قوش وورور. یازیق شیرزاد 
بئله بیر حالدا بلکه یالان اولماسین ایکی ساعت بو کولکده، قیامتده آت 
چاپدی. بیر ساعتدان سونرا کولک کسیلدی، آغ قوش دا قالخدی گؤیه. 
ائله بیر آز گئتمیشدیلر بیر ده گؤردولر بیر گؤزل آت، بئلینده بیر قیزیل 
یهر اوتلاییر. آت ائله‌دی کی، ائله‌دی کی، ائله بیل بئلی‌نین اوستو بیر یومورتادی. 
قیز دئدی: 
- شیرزاد، بو آتی توتا بیلسیدیک من مینردیم، هم سن راحت اولاردین، 
هم ده من. 
ائله بو سؤزدیدی آت کیشنه‌ییب باشلادی بونلارا یاخینلاشماغا. آت لاپ 
یاخینلاشاندا شیرزاد الین اوزاتدی کی، اونو توتا، آغ قوش ایلدیریم کیمی شیغیییب 
شیرزادین الینین اوستوندن ووردو، آتی دا ووروب قاچیرتدی. شیرزاد آغ قوشون 
بو حرکتلریندن چوخ پرت اولدوسا دا آنجاق باغیرساغین دیشینه توتوب بیر 
سؤز دئمه‌دی. بو مینواللا گلدیلر. بلی، بیرینجی دیولرین قالاچاسی گؤروندو، 
آغ قوش دئدی: 
- دایان، شیرزاد، من گؤرورم کی، سن بو قیزی ایسته‌ییرسن، بو قیز دا 
سنی. بونو آپاریب دیولره وئرمک کیشیلیکدن دئییل. 
نه ائله‌دی، نه ائله‌مه‌دی، دوشدو همین قیزین صورتینه، دئدی: 
- قیز قوی بوردا گؤزله‌سین، آپار منی دیولره تحویل وئر. 
شیرزاد قیزی چؤلده قویدو، آغ قوشو قیز عوضینه آپاریب دیولره تحویل 
وئریب، بیر سبت اوزوم آلدی. قاییتدی قیزی دا گؤتوروب یولا دوزلدی. گلیب 
چاتدیلار اوزوم ایسته‌ین دیولرین ویلایتینه. ائله قالاچایا چاتمیشدیلار کی، 
آغ قوش اؤزون یئتیردی. 
- دایان، شیرزاد، منی آپار اوزوم عوضینه تحویل وئر! 
شیرزاد قالدی مات معطل کی، بو نئجه ایشدی. غرض، آپاریب بو دفعه‌‌ ده 
اونو اوزوم عوضینه تحویل وئریب بیر جوت گؤیرچین آلدی. گئدیب بو مینوال 
ایله چاتدیلار هامان چیراق اولان شخصین یانینا. غرض، بوردا دا گؤیرچین 
آدینا آغ قوشو تحویل وئریب چیراغی آلیب دوزلدی یولا، اؤز عمیسی‌نین ویلایتینه 
گئتمه‌یه. گئدیب شهره چاتاندا، گؤردو بیر قوجا کیشی دایانیب. کیشی 
بونلاری گؤرجک دئدی: 
- هارداسیز؟ دی گلین چیخین دا! 
شیرزاد باخدی کی، بو آغ قوشدو. 
بلی، عمیسی احوالاتی بیلدی، بونلاری پیشواز ائله‌دیلر. عمیسی شئیلره 
باخیب شیرزادین آلنیندان اؤپوب دئدی: 
- بالا، سن گتیردین. 
قیرخ گون، قیرخ گئجه توی ائله‌ییب قیزی آلدیلار شیرزادا. 
گلینله بَی گرده‌یه گیرن گئجه شیرزاد گلی‌نین یانینا گیرنده، آغ 
قوش دا اونونلا برابر گیردی. شیرزاد نه قدر ائله‌دیسه، آغ قوش دئدی: 
- اولماز کی، اولماز. من ده بو گئجه بوردا یاتاجاغام. 
شیرزاد چوخ دئدی، آغ قوش آز ائشیتدی. اوزونه سالیب گئجه‌نی اونلاردا بیر 
اوتاقدا یاتدی. سحر تئزدن شیرزاد عمیسی‌نین یانینا گئدیب آغ قوشون گئجه‌کی 
ایشینی اونا دئدی، اؤزو ده خاهیش ائله‌دی کی، آغ قوشو مملکتدن چیخارسین. 
عمیسی بیلیردی کی، آغ قوش اونا چوخ کؤمک ائله‌ییب. نه قدر دلیل-دلاییل 
ائله‌دی، اولمادی کی، اولمادی. آخیردا آغ قوشو چاغیرتدیریب احوالاتی اونا بیلدیردی. 
آغ قوش دئدی: 
- اوندان سوروشون گؤرک، من اونا نه پیسلیک ائله‌میشم؟ 
شیرزاد قاشقاباقلی دئدی: 
- منی چووغوندا، قیامتده قویمادی آتدان دوشوب، اؤزومو قورویام، 
قیزیل یهرلی آتی قویمادی توتام، بو گئجه ده کی، بئله. 
آغ قوش بیر آه چکیب دئدی: 
- چووغوندا اوندان اؤترو قویمادیم سن دوشه‌سن کی، او چووغون قیزین 
آتاسییدی. سن کی، نه قدر او آتین اوستوندیدین، او سنه باتا بیلمیردی. ایسته‌ییردی 
سنی آتدان یئره سالیب اؤلدورسون. بئله‌دی، یا بئله دئییل، قیز؟ - دئییب 
اوزون توتدو قیزا. 
قیز دئدی: 
- بلی، بئله‌دی. 
- او قیزیل یهرلی آتی قویمادیم توتاسان، اونا گؤره کی، او، قیزین عمیسی 
ایدی. سنین الین اونا دیَجک او سنی چکیب آتدان ووراجاقدی یئره. بئله‌دی، 
یا بئله دئییل، قیز؟ 
قیز دئدی: 
- بلی، بئله‌دی. 
- بو گئجه سنین یانیندا اونا گؤره یاتدیم کی، قیزین قارداشی قارا ایلان 
اولوب گلمیشدی سنی هلاک ائله‌سین. گئجه سن یوخودا ایکن من اونو اؤلدورموشم، 
بو دا جمعدیی. بئله‌دی، یا بئله دئییل، قیز؟ 
بونو دئییب بیر یئکه ایلان جمعدیی آتدی اورتالیغا. 
قیز دئدی: 
- بلی، دوزدو. 
سونرا آغ قوش بیر آه چکیب دئدی: 
- منیم آلنیمدا یازیلمیشدی کی، من گرک بیر آداما کؤمک 
ائله‌یم. اگر او آدام مرد چیخسا، اونا گئدم، اگر نانکور چیخسا اؤلم. 
ایندی منیم واختیم تامامدی، من اؤلورم. 
بونو دئییب آغ قوش داش اولدو. هامی آغلادی. آمما کی، آغلاماقدان 
نه چیخاجاق؟.. شیرزادین نامردلیگی اونو داشا دؤندردی. 

وبلاقا گؤره

بو دیل دنیزدی سیزین تک صدفده اینجیسی وار
قیزیلدی سیزده اولان اوزگه‌نین اگر میسی وار
دئسزکی اودلو دیاردی بیزه وطن یاراشار
بیزیم اوجاقلارین آنجاق کور ائیله‌ین هیسی وار
"عقیل"
وبلاق مودیری : نژادمحمد

سون یازیلار

آختارماق

یازارلار

Page Rank بالاجا خوخان آذربایجان تورکجه سینده ایسلام دینی و قرآن کریم