تبلیغات
ایران آذربایجانی تورکجه سینین ادبیات اوتاغی - آشیق جونون
ایران آذربایجانی تورکجه سینین ادبیات اوتاغی
یاشاسین آذربایجان

قونو سلاخلانجی

سلاخلانج

باغلانتیلار

اؤزل یارپاقلار‌

← وبلاق گؤروشلری

  • گؤروشلرین هامیسی :
  • بو گون گؤروشلر :
  • دوننکی گؤروشلر :
  • بو آی گؤروشلر :
  • قاباق آی گؤرو‌شلر :
  • یازارلارین سایی :
  • یازیلارین هامیسی‌نین سایی :
  • سون گؤروش :
  • سون دیَیشمه :

لینکلر‌

آشیق جونون

آشیق جونون 
گونلرین بیرینده کور‌اوغلو یئنه ده قیراتی مینیب گدیگی کسمیشدی. 
بیر ده باخدی کی، بودو بیر کاروان گلیر. کور‌اوغلو گؤزله‌دی، ائله کی، 
کاروان گلیب چاتدی، بیر نره چکیب آتی داغدان آشاغییا بوراخدی. کاروانداکی 
آداملار ال-آیاق آچانا کیمی کور‌اوغلو اونلارین باشی‌نین اوستونو آلدی. 
دئییرلر کور‌اوغلو هر کاروانی سویوب داغیتمازدی. قاباقجا اونلاردان 
باج ایستردی. بو کاروانین دا قاباغینی کسیب باج ایسته‌دی. بأزیرگان‌باشی اونو 
تک گؤروب سؤزلرینه فیکیر وئرمه‌دی. ایسته‌دی کی، کاروانی چکسین. او بیلمیردی 
کی، بو آدام آدی دیللرده داستان اولان قوچ کور‌اوغلودور. قان ووردو 
کور‌اوغلونون بِینینه. دلی کور‌اوغلو یئنه جوشدو. اوّل میصری قیلینجا ال 
آتماق ایسته‌دی. سونرا لعنت شیطانا دئییب اوچ تئللی سازی دؤشونه باسیب، 
گؤرک نه دئدی: 
گل سنه سؤیله‌ییم، بأزیرگان‌باشی، 
گلمیشم من سندن باج آلام، گئدم! 
داغیدام قفله‌نی، تؤکم مالینی، 
گلمیشم من سندن اؤج آلام، گئدم! 
پولاد شِش پرینن ازم باشینی، 
آخیدام گؤزونون قاننی یاشینی، 
جیداییلن اؤلچم آل قوماشینی، 
ناغدین دا اولماسا، وئج آلام، گئدم! 
کور‌اوغلویام، سرت قایادان آتیللام، 
هاردا داوا اولسا اوردا تاپیللام، 
آج قورد کیمی جومله‌‌‌نیزه تپیللم، 
اورتادان اولمازسا، اوج آلام، گئدم! 
بأزیرگان‌باشی بونون کور‌اوغلو اولماغینا عینانمادی. او ائشیتمیشدی کی، 
کور‌اوغلونون یئددی مین یئددی یوز یئتمیش یئددی دلیسی وار کی، اونلار دوشمن 
گؤرنده، شیره، پلنگه دؤنورلر. ایندی اونو گؤروب کور‌اوغلو اولدوغونا 
اینانمادی، باج وئرمک ایسته‌مه‌دی. آتینی سوروب یولا دوزلمک ایسته‌ییردی 
کی، کور‌اوغلو آلدی باشی‌نین اوستونو، گؤرک نه دئدی: 
آلمامیش آل قوماشینی، 
بوراخمارام سنی بوردان! 
ایچیب دویمامیش قانینی، 
بوراخمارام سنی بوردان! 
توتوبسان یوکونو اوجا، 
سنسن تاجیرباشی خوجا. 
ماتاهینی سویمایینجا 
بوراخمارام سنی بوردان! 
مئیداندا شِش پر آتمامیش، 
قوللارین دالدا چاتمامیش، 
قیرات دؤشونه قاتمامیش، 
بوراخمارام سنی بوردان! 
هارادان توتدون سوراغی، 
آل ائیله‌دین قاننی یاغی، 
سیننه چکمه‌میش داغی، 
بوراخمارام سنی بوردان! 
قوچ کور‌اوغلو ایستر خراج، 
ایگیدسنسه گیر، مئیدان آچ. 
مالینی ائیله‌رم تاراج، 
بوراخمارام سنی بوردان! 
کور‌اوغلو سازلا دئدیگی کیمی سؤزده ده دئدی: 
– بأزیرگان‌باشی! من سنینله داوا ائله‌مک ایستمیردیم. ایندی کی، باج 
وئرمه‌دین، اؤز خوشونلا داوا-دالاشسیز کاروانی چنلیبئله چک! یوخسا 
زورلا آپاراجاغام. 
بأزیرگان‌باشی اؤزونو ائله گؤستردی کی، گویا راضیدی، کاروانی چنلیبئله 
چکیر. عامّا حیله‌‌‌ یولو ایله گؤز آلتی اؤز یاراخلی-یاساقلی آداملارینا هیم 
ائله‌دی کی، کور‌اوغلونو وورسونلار. یاراقلی تاجیرلر کور‌اوغلویا هوجوم ائله‌دیلر. 
ائله بیل کی، بئش-اون دنه سیچان بیر قیزمیش کرگدانی اؤلدورمک 
ایسته‌ییردی. بو قاباقجا کور‌اوغلویا گولمه‌لی گلدی. سونرا بوینونون قاتقات 
دوران اتی قیزاردی. کور‌اوغلو آشدی، داشدی، آسلان کیمی جوشدو، قاپلان کیمی 
قئیظه گلدی. میصری قیلینجی چکدی، ترلان کیمی قیراتین بئلینه یاتیب مئیدانا 
تپیلدی. ساغدان ووردو سولدان چیخدی، سولدان ووردو ساغدان چیخدی، 
تاجیرلری خورد-خشیل ائله‌دی. باخدیلار کی، یوخ بو زارافات ائله‌مه‌لی آدام 
دئییل، سلاحلارینی تؤکوب دایاندیلار. کور‌اوغلو هامیسینی قیراتین دؤشونه 
قاتیب چنلیبئله گتیردی. دلیلر قاباغا چیخدی. ماللاری یئره دوشوردولر، 
یئربه‌یئر ائله‌مه‌یه باشلادیلار. کور‌اوغلو باخدی کی، تایلارین ایچینده بیر 
بؤیوک دمیر صاندیق وار. فیکیرلشدی بو یقین قیزیل-گوموشدی. ایشاره ائله‌دی 
ساندیغی آچدیلار. نه چیخسا یاخشیدی. باخدیلار کی، ساندیغین ایچینده ساچی چیینینده 
بیر آدام اوزانیب. کور‌اوغلو قالدی مهطّل کی، بو نه سیرّدی؟ دؤندو 
بأزیرگان‌باشی طرفه کی، اوندان سوروشسون، گؤردو بأزیرگان‌باشی مئییت کیمی 
تیر-تاپ اوزانیب یئره. یانینا یویوردو، گؤردو خئییر ها... دونن اؤلوبسن، 
بو گون! بأزیرگان‌باشی قوپ-قورو قورویوب. دلیلردن بیریسی دئدی کی، بس 
سن ساندیغی آچاندا او اؤزوندن گئتدی. سودان-زاددان تؤکدولر، کیشی بیر آز 
اؤزونه گلدی. کور‌اوغلو سوروشدو: “بو نه سیرّدی؟”. 
بأزیرگان‌باشی دئدی: 
– کور‌اوغلو، ایندی کی، بئله اولدو، دوزونو دئیه‌جه‌یم. بو منیم آشیغیمدی. 
آدی دا آشیق جونوندو. بو او قدر آیاغی یونگول، خئییر برکتلی 
آدامدی کی، منیم یانیما گلندن بری مال-دؤولتیم حدّینی آشیب. 
سن بیزه هوجوم ائلیینده من هاوانی بولوت گؤروب اونو صاندیقدا گیزلتدیم 
کی، بلکه مالیم، دؤولتیم گئتسه ده، او قالسین. 
کور‌اوغلو فیکره گئتدی. بیر طرفدن آشیق جونونو اؤز یانیندا ساخلاماق 
ایسته‌ییردی، بیر طرفدن اونو بأزیرگان‌باشی‌نین الیندن زورلا آلماق 
ایستمیردی. بیر ده باشینی یوخاری قالدیراندا آشیق جونونو قاباغیندا دیز 
چؤکموش گؤردو. 
آشیق جونون دئدی: 
– قوچ کور‌اوغلو، گؤزوم، کؤنلوم سنی توتوب. عومرومون آخیریناجان 
سنه قوللوق ائده‌جم. 
آشیق جونون او گوندن کور‌اوغلونون یانیندا قالدی. عومرونون لاپ 
آخیر گونونه‌جن اونون آشیغی اولدو. 
دئییرلر کی، آشیق جونون همیشه شهرلری، کندلری، اوبالاری، اویماقلاری 
گزیب دولاناردی، هاردا بیر ایگید، نجیب، آنا سودو ام‌میش اوغلان گؤرسه 
گلیب کور‌اوغلویا خبر وئرردی. کور‌اوغلو دا اونلاری اؤز دسته‌سینه گتیردردی.

وبلاقا گؤره

بو دیل دنیزدی سیزین تک صدفده اینجیسی وار
قیزیلدی سیزده اولان اوزگه‌نین اگر میسی وار
دئسزکی اودلو دیاردی بیزه وطن یاراشار
بیزیم اوجاقلارین آنجاق کور ائیله‌ین هیسی وار
"عقیل"
وبلاق مودیری : نژادمحمد

سون یازیلار

آختارماق

یازارلار

Page Rank بالاجا خوخان آذربایجان تورکجه سینده ایسلام دینی و قرآن کریم