تبلیغات
ایران آذربایجانی تورکجه سینین ادبیات اوتاغی - کور‌اوغلونون ایستانبول سفری
ایران آذربایجانی تورکجه سینین ادبیات اوتاغی
یاشاسین آذربایجان

قونو سلاخلانجی

سلاخلانج

باغلانتیلار

اؤزل یارپاقلار‌

← وبلاق گؤروشلری

  • گؤروشلرین هامیسی :
  • بو گون گؤروشلر :
  • دوننکی گؤروشلر :
  • بو آی گؤروشلر :
  • قاباق آی گؤرو‌شلر :
  • یازارلارین سایی :
  • یازیلارین هامیسی‌نین سایی :
  • سون گؤروش :
  • سون دیَیشمه :

لینکلر‌

کور‌اوغلونون ایستانبول سفری

کور‌اوغلونون ایستانبول سفری
کور‌اوغلو دلی حسنله آرخا-آرخایا وئریب چنلیبئلده یورد-یووا
سالمیشدی. تای ایش گلیب او یئره چاتمیشدی کی، چنلیبئلین هندوریندن
بیر کاروان دا کئچه بیلمیردی. کور‌اوغلونون آدی بوتون عالمه یاییلمیشدی.
دونیانین هر طرفیندن ایگید اوغلانلار اونون دسته‌سینه گلیردی.
قیزلار، گلینلر اونون حسرتینی چکیردیلر.
بو سس-صدا گلیب ایستانبولا دا چاتمیشدی. ایستانبول خوتکاری‌نین قیزی
نیگار خانیم دا گؤرمزه-بیلمزه عشق باده‌سینی ایچیب بیر کؤنولدن مین
کؤنوله کور‌اوغلویا عاشق اولموشدو. آمما یازیق قیز آتاسی‌نین، بیر ده کی بیر
نامرد قارداشی وار ایدی، اونون قورخوسوندان لب ترپه‌دیب نفس چکه
بیلمیردی. کور‌اوغلونون دردینی اورگینه سالیب پاییز یارپاغی کیمی
گوندن-گونه سارالیب سولوردو.
دئییرلر ایستانبول کندلری‌نین بیرینده بللی احمد آدیندا یئنییئتمه،
جاوان بیر اوغلان وار ایدی. بللی احمدین بیغ یئری تزه‌جه ترله‌ییردی.
آمما، نئینیرسن، سن گل کی، قوووتده-هونرده روستم پهلوانا
باج وئرمزدی. بللی احمد نه قدر کی، ایگید ایدی، بیر او قدر ده الی
آچیق، کؤنلو-گؤزو توخ ایدی. تاپدیغینی تک یئمزدی.
ائله کی، کور‌اوغلو صداسی گلیب بورالارا چاتدی، بللی احمد چوخ
گؤتور-قویدان سونرا چاریخلاری‌نین باغینی برکیدیب، آغامی الله ساخلاسین
دئییب، چنلیبئله طرف یولا دوشدو. چوخ گئتدی، آز گئتدی، او نئجه دئیرلر
دره-تپه دوز گئتدی، بیر جومه‌نین گونونده گلیب ایستانبولا یئتیشدی.
بلی، ائله تزه‌جه بازارا گیرمیشدی، او یان بو یانا باخیردی کی، گؤردو
هامی قاچیر. اؤزو ده هئچ دوکانی باغلاییب ائلمیر. بیر سو ایچیم ساعتدا
بوتون بازار قالدی باشینا. بللی احمد مات-مهطّل دایانمیشدی. بیر
ده گؤردو بودو بیر چولاق تاجیر قیچینی یئل توتموش قوجا قاتیر کیمی هایتییاهایتییا
قاچیر. تئز اونون قاباغینی کسیب سوروشدو:
– آی عمی، بو جاماعتا نه اولوب؟ بو نه قاچهاقاچدی؟
تاجیر اونا دقتله باخیب دئدی:
– گؤرونور قریب آدامسان.
بللی احمد دئدی:
– بلی قریبم، بو گون گلمیشم.
تاجیر قیچی‌نین بیرینی سورویه-سورویه باشلادی دانیشماغا کی، بس خوتکار
گئدیب مکّه‌ زیارتینه، هر جومه گونوندن جومه گونونه خوتکارین
قیزی نیگار خانیم مسجیده گئدیر. او، ائودن چیخاندا جار چکیب جاماعتا
خبر وئریرلر کی، گرک هامی ائوه گئتسین. گرک اونون بویونو هئچ کس
گؤرمه‌یه. دوکانلارین هئچ بیریسینی باغلاماغا دا ایجازه یوخدو.
تاجیر دیلی توتولا-توتولا بو سؤزلری دوغراییب تؤکدو. تلسدیگیندن
چولاق قارغا کیمی آتدانا-آتدانا قاچیب گؤزدن ایتدی.
بللی احمد باخدی کی، دوغرودان جار چکیلیردی. فیکیرلشدی کی، آده،
من بللی احمد اولام، بیر کلک قوروب خوتکار قیزینی گؤره بیلمه‌یم،
بو هئچ بیر کیتابا-دفتره سیغیشماز.
جلد بیر اطرافا گؤز گزدیریب باخدی کی، یاخیندا بیر گؤیرتی-سبزوات
دوکانی وار، قاپیسی دا آچیقدی. یاواشجا اؤزونو وئردی دوکانا. قاپینی چکدی،
اؤزو ده پیش‌تاختانین آلتینا گیریب تاختانین دئشیگیندن گؤز قویماغا باشلادی.
بلی، گؤزله ها گؤزله آخیردا دسته‌نین اوجو آچیلدی، قاراچیلار، فرراشلار
کئچندن سونرا بللی احمد بیر ده باخدی کی، بودو نیگار خانیم یئتمیش
ایکی قلمنن اؤزونه زیینت وئریب قیرخ اینجه‌بئل قیزین آراسیندا یوز-ناز
قمزینن ساللانا-ساللانا گلیر.
نیگار خانیم دوکان-بازارا تاماشا ائلییه-ائلییه گلیردی. ائله کی، بللی
احمد گیزلنن دوکانین قاباغینا چاتدیلار، نیگار خانیم یانینداکی
قیزلارا اوز توتوب دئدی:
– بو نه سیردی؟ بوتون دوکانلار قالیب باشلی-باشینا. بؤیوک صرّافلار
اؤز جواهیراتلارینی صاحبسیز قویوب گئدیبلر. هئچ دوکانلارینی باغلاماییبلار،
بو تروز دوکانی نییه باغلیدی؟ یقین بورادا بیر حیکمت وار.
من گرک اورایا باخام.
بللی احمد بو سؤزلری ائشیدیب قورخودان دوردو زاغ-زاغ اسمه‌یه کی،
ایشدی، ایر خوتکار قیزی گلیب منی بورادا گؤرسه، دده‌‌می قبیردن چیخاراجاق.
یازیق قورخودان گؤیرتی تاغی‌نین ایچینه سوخولوب گیزلندی. نیگار خانیم
قیرخ اینجه‌بئل قیزلا ایچری گیریب باخدی کی، بیر نفر شخص باشینی گؤیرتیتنین
ایچینه سوخوب گیزله‌نیب. بیر تپیک ووروب قیشقیردی کی، باخین گؤرون بو کیمدی،
بورادا گیزله‌نیب. قیزلار بللی احمدی بایاقدان قامارلادیلار. بللی
احمد مین انوایی-موصیبتله، بیر تهر کی، اؤزونو اونلارین الیندن
قورتاریب نیگارین آیاقلارینا ییخیلدی کی: “خانیم، قوربانین اولوم، آمانین
بیر گونودو، بیر قلتدی ائله‌میشم، قویما بونلاری، باشیمدا توک قالمادی”.
قیزلار ائله تؤکولوشموشدولر اونون اوستونه کی، ائله بیل قارغا لئشه
تؤکولوب. چیمدیکله‌ین کیم، دیشله‌ین کیم، باشینی یولان کیم. نیگار
خانیمین اونا یازیغی گلیب سوروشدو: 


– یاخشی، دئ گؤروم بورادا نه قلت ائله‌ییرسن؟
بللی احمد نیگار خانیمین جاوابیندا دئدی:
– خانیم، واللاه، بالله من قریب، نابلد بیر آدامام. بورا بو گون
گلمیشم. ائله بازاردا گزیردیم. بیر ده گؤردوم قاچهاقاچ دوشدو، قریبلیک
پیس شئیدی، خانیم. بیلمه‌دیم هارا قاچیم. آخیردا قاچیب بورایا گیردیم.
نیگار خانیم سوروشدو:
– اده، آدین ندی؟ هارالیسان؟
– خانیم، سنه قوربان اولوم، آدیم بللی احمددی. اؤزوم ده عرضوروم
طرفیندنم.
نیگار خانیم عرضورومون آدین ائشیتجک تئز سوروشدو:
– یاخشی، دئییرلر کی، چنلیبئلده کور‌اوغلو آدیندا بیر ایگید وار. هئچ
اونو گؤروبسن؟
بللی احمد باخدی کی، آها دئیه‌سن بورادا بیر ایش وار. یوخسا خوتکار
قیزی کور‌اوغلونو نییه سوروشور. تئز اؤزونو دوزلدیب دئدی:
– خانیم، من ائله قوچ کور‌اوغلونون دلیلریندنم.
نیگار خانیم بونو ائشیتجک کاغیذ گؤتوروب بیر نامه یازدی کی، بس
“کور‌اوغلو، من ایستانبول خوتکاری‌نین قیزی نیگار خانیمام. ایر سن
دوغرودان دا ایگیدسنسه گل منی آپار”.
نامه‌نی بوکوب مؤهورله‌دی، اوندان وئردی بللی احمده کی:
– بو نامه‌نی چاتدیر کور‌اوغلویا. او ایر کیشیدیرسه گلیب منی آپارسین.
بللی احمد نامه‌نی اؤپوب جیبینه قویدو، سونرا دئدی:
– خانیم، بلکه اینانمادی.
نیگار خانیم قولوندان بازوبندینی ده آچیب اونا وئردی. اوسته‌لیک بیر
ده بیر اوووج قیزیل وئردی کی، آتدان، زاددان آلیب، نامه‌نی تئز چاتدیرسین.
بللی احمد اورادان چیخیب اؤزونو بیرباش یئتیردی کاروانسارایا. تئز بیر
آت آلیب چنلیبئل دئییب یولا دوشدو. گئجه‌نی گوندوزه قاتدی، گوندوزو گئجه‌یه،
آز گئتدی، چوخ دایاندی، چوخ گئتدی آز دایاندی، بیر نئچه گوندن سونرا
گلیب چنلیبئله یئتیشدی. کور‌اوغلویو تاپیب نیگارین نامه‌سینی وئردی اونا.
کور‌اوغلو نامه‌نی اوخویوب احوالاتدان حالی اولاندان سونرا امر ائله‌دی،
قیراتی یهرله‌دیلر. اوندان اوزونو دلی حسنه توتوب قیشقیردی کی:
– اده، اورادان او زنجیرلری بورایا گتیر.
بللی احمد زنجیر آدینی ائشیدنده گئتدی فیکیره کی، یوخسا بو منی
چارمیخا-زادا چکمک ایسته‌ییر. ائله ائله ده اولدو. دلی حسن اونو یاخشیجا
زنجیرله‌دی. ال-آیاغینی باغلاییب اوستونه ده قاراول قویدو.
دئییرلر کور‌اوغلونون بئله بیر خاصیّتی وار ایدی. اونا کیم بئله-بئله
خبرلر گتیرسیدی قاباقجان اونو بئله‌جه زنجیرله‌ییب اوستونده ده آدام
قویارمیش کی، اؤزو گئدیب گلینجن قاچیب ائله‌مه‌سین. ائله کی، گئدیب قاییتدی،
ایر سؤز دوز چیخدی، یاخشی خلت وئریب اؤزونه دلی ائلرمیش، یوخ ایر
یالان چیخدی، اورتالیقدا حیله‌‌-مییله، اولدو، اوندا تای الله گؤسترمه‌سین.
اوندا ایش قالاردی میسری قیلینجا.
بلی، ائله کی، قیرات حاضر اولدو، دلیلر یئربه‌یئردن دئدیلر کی، بس
کور‌اوغلو، گل بو سفره سن تک گئتمه، بو، خطرلی، قورخولو سفردی.
قوی هامیمیز بیرگه گئدک. کور‌اوغلو بو سؤزون اوستوننن سازی دؤشونه
باسیب، دئدی:
ایگید گرک یار سئومه‌یه
اؤزو تک گئده، تک گئده.
موخنّت قددین ایمه‌یه
اؤزو تک گئده، تک گئده.
نیگارین شیرین دیللری،
باغریما سانجیب میللری،
اوزاق-اوزاق منزیللری
اؤزو تک گئده، تک گئده.
قنیمینه قیلینج چالا،
اؤلکه‌سینه تالان سالا،
دوشمنلر اوسته باش آلا،
اؤزو تک گئده، تک گئده.
دالا پولاد یاراغینا،
دوشه ایگید سوراغینا،
یوز تولکونون قاباغینا،
اؤزو تک گئده، تک گئده.
کور‌اوغلویام، هاشا-هاشا،
گیررم خوتکارلا ساواشا،
قیرات دؤشلتمه‌یه پاشا،
اؤزو تک گئده، تک گئده.
کور‌اوغلو سازلا دئدیگی کیمی، سؤزله ده دئدی:
– دلیلریم، نیگار خانیمی گتیرمه‌یه اؤزوم تک گئده‌جه‌یم. سیز
قالین، چنلیبئلی دوشمنلردن قورویون.
کور‌اوغلو قیلینج قورشادی، عمود آسدی، نیزه گؤتوردو، اوستوندن ده بیر
ساز کئچیرتدی.
دلیلرله حالال-حوممت ائله‌ییب سلاماتلاشدی. دلی حسنی اونلارین
اوستونه بؤیوک قویدو. سونرا ترلان کیمی توللانیب قیراتی مینیب یول باشلادی.
ائله کی، قیرات یویه‌نین بوش گؤردو، ایلدیریم کیمی سوزوب دؤرد گونلوک
یولو بیر گونده گلیب آخشام اوسته ایستانبولا یئتیشدی. قارانلیق دوشموشدو.
کور‌اوغلو قیراتی سوروب بیر قاپینی دؤیدو. قاپییا قوجا بیر آرواد گلدی.
کور‌اوغلو دئدی:
– آی باجی، قریبم، منی بو گئجه‌لییه قوناق ائله‌یرسنمی؟
آرواد دئدی:
– نییه قوناق ائلمیرم. دوش قال.
کور‌اوغلو دوشدو. قیراتی تؤیله‌یه چکدی. اؤزو ده آروادین ائوینه گیریب
بیر طرفده اوتوردو. آرواد چؤرک گتیردی. کور‌اوغلو یئمکدن سونرا
صؤحبت آچیب آرواددان کیم اولدوغونو سوروشدو.
آرواد دئدی:
– قوجا، دول بیر آروادام. آی بالا، آمان-زامان گؤزومون آغی-قاراسی
بیرجه اوغلوم وار. خوتکار قیزی نیگار خانیمین نار باغیندا باغباندی.
کور‌اوغلو بو ایشی یاخشی فال حِساب ائله‌ییب چوخ سئویندی. دئیه‌سن ایشلر
یاخشی گتیردی. ائله باجادان دوشن کیمی قیسمتین اوستونه دوشموشدو.
غرض، کور‌اوغلو اوردان-بوردان سؤز-صؤحبت سالیب اؤیرندی کی، بس خوتکار
مکّه‌ زیارتینه گئدیب. سونرا قاریدان اوغلونو سوروشدو کی، بس اوغلون
هارادادی؟
قاری دئدی:
– خوتکار قیزی خانیم هر آیدا، اون بئش گونده بیر قیرخ اینجه‌بئللی قیزلا
نار باغینا گزمه‌یه چیخیر. ایندی صاباح یوخ، او بیریسی گون وعده‌‌سیدی. باغا
گزمه‌یه گله‌جک. اودو کی، اوغلوم باغی یؤر-یؤنده‌مه سالیر.
کور‌اوغلو نه قدر اوتوروب گؤزله‌دیسه، قاری‌نین اوغلو گلیب چیخمادی.
آخیردا آرواد دوردو کی، “بس اوغلان گلمه‌دی، یقین گئجه‌نی باغدا قالاجاق،
یئر سالیم یاتاق”.
کور‌اوغلو باخدی کی، آرواد بونون یئرینی ائوین یوخاری باشیندا سالیب، اؤز
یئرینی قاپی‌نین آغزیندا.
دئدی:
– سن ائله ائله‌مه. منیم یئریمی قاپی‌نین آغزیندا سال.
آرواد گئتدی فیکره. اصلینده آرواد ائله کور‌اوغلونون خوتکاردان، خوتکارین
قیزیندان سؤز-صؤحبت آچماغیندان، بیر دخی سیر-صیفتیندن، یاراقسابه‌سیندن
بیر آز شکّه دوشموشدو. ایندی ده بئله دئمه‌یی کی، “منیم
یئریمی قاپی آغزیندا سال”، آروادی لاپ داغداغییا سالدی، دئدی:
– یوخ، بالا، من قوجا آروادام. گئجه‌لر تئز-تئز باییرا-باجاغا
چیخیرام.
کور‌اوغلو دئدی:
– هئچ عیبی یوخدو. سن ائله منی آیاقلاییب دا کئچه بیلرسن. قورخما،
قابیرغالاریم سینماز. آمما بیردن ایشدی من چؤله-زادا چیخمالی اولسام،
سن گرک خورد-خشیل اولاسان.
غرض، نه باشینیزی آغریدیم، کور‌اوغلونون یئری سالیندی، قاپی‌نین آغزیندا.
قوچ کور‌اوغلو بایاخ ها ائله یئرینه گیرجک گئتدی یوخویا. خورولتو دونیانی
گؤتوردو. آمما آروادین گؤزونه یوخو گئتمه‌دی کی، گئتمه‌دی.
گئجه‌نین بیر عالمینده کور‌اوغلو اویاندی. باخدی کی، آرواد یاتماییب
سوروشدو:
– آی آنا، نییه یاتمیرسان؟
آرواد دئدی:
– نه بیلیم، آی بالا، یوخوم قاچیب.
کور‌اوغلو سوروشدو:
– آی آنا، بلکه مندن قورخورسان؟
– یوخ، آنجاق ائله بئله...
کور‌اوغلو گؤردو یوخ آرواد دئیه‌سن سؤزلو آداما اوخشاییر.
دئدی:
– آنا، سن اولاسان اوغلونون جانی دوزونو دئ، گؤروم نییه یاتمیرسان؟
آروادین دار دونیادا عزیز-خلف بیرجه اوغلو واردی. اودو کی، تای بو
آندین اوستوندن کئچه بیلمه‌ییب مثلای آچدی کی:
– واللاه آی بالا... ائله بئله اورگیمه داغداغا گلیب کی، گؤره‌سن سن
کیمسن. هئچ بیزیم یئرلرین آدامینا اوخشامیرسان.
کور‌اوغلو سوروشدو:
– یاخشی، آی آنا، سنین فیکرینجه من کیم اولا بیله‌رم.
آرواد دئدی:
– آی بالا، باخیرام سنه... نه بیلیم واللاه، دئمه‌یه ده اوتانیرام...
سن ائله دئیه‌سن نظرگلدی پهلیوانسان.
– یوخ، آنا، تاپا بیلمه‌دین.
– اوندا یقین عرب ریحانسان.
– یوخ، یئنه تاپا بیلمه‌دین.
– اوندا، گیزیروغلو مصطفی بَی دئییلسن کی؟
– یوخ، آنا، او دا دئییل.
– بالا، اوندا واللاه آز قالیرام... آی بالا، بیردن سن او کور‌اوغلو
اولارسان ها...
– باخ، ایندی تاپیبسان.
آروادین سسی چیخمادی. کور‌اوغلو بیر-ایکی دفعه‌‌ اونو سسله‌دی گؤردو یوخ،
سس یوخدو. آخیردا دوروب آروادین یانینا گلدی، گؤردو نه، بو گون
اؤلوبسن، دونن. آرواد تیر-تاب دوشوب اؤزوندن گئدیب. تئز بیر آز سودانزاددان
تؤکوب اونو آییلتدی. آرواد ائله اؤزونه گلجک دوردو آیاغا کی،
قاچسین. کور‌اوغلو توتدو اونون بیله‌ییندن.
– آی آرواد، هارا قاچیرسان؟ من آدام زاد یئین دئییلم کی، نییه
مندن قورخورسان؟
– نییه سندن قورخورام؟ من هله چوخ ایگید آروادام کی، سنین
آدینی ائشیدنده قورخودان باغریم چاتلاماییب. الله سنین ائوینی ییخسین.
سنین آدینی ائشیدنده پاشالار قارین آغریسینا دوشور. سنین یولون
یومرولسون. هارادان گلیب منیم ائویمه چیخدین؟
کور‌اوغلو بیر آز گولوب، آروادی ساکیت‌لشدیردی. اورک-دیرک وئردی. اوندان
چیخاردیب بیر اوووج دا قیزیل وئردی کی، بو سیرّی گرک هئچ یئرده آچمایاسان.
یوخسا کوپه گیریب یئددینجی گؤیه چیخسان، بالیق اولوب دریایا جومسان،
یئنه ده الیمدن قورتارا بیلمزسن.
آرواد دئدی:
– خئییر، آرخایین اول. شجاعتینه بله‌دم. سنی تانیمایانا لعنت.
هئچ گؤر سن گئدندن ده بیر-ایکی آی سونرایا من هئچ یورغان-دؤشکدن
دورا بیله‌جه‌یم کی، بیر سؤز ده دانیشام. منده سن اورک-گؤبک
قویوبسان کی؟..
غرض، کور‌اوغلو آروادا بیر آز دلیل-دلاییل ائلییندن سونرا یئرینه
گیردی. آمما ائله بیل کی، آروادین یئرینه گتیریب بیر کیسه بیره تؤکموشدولر.
یاتا بیلمیردی کی، بیلمیردی. آخیردا چاغیردی کی:
– آی اوغول، بس آخی، هئچ بیر دئمه‌دین بورایا نییه گلیبسن؟
کور‌اوغلو باخدی کی، لاپ یئریدی. دئدی:
– آنا، خوتکارین قیزی نیگار منه سیفاریش گؤندریب کی، گلم اونو
آپارام. من ده اونون اوچون گلمیشم.
آرواد دئدی:
– باخ، بو اولدو. دوغرودان دا، نیگار خانیم ائله سنه یاراشان جاندی.
الله موبارک ائله‌سین. آمما، آی بالا، اونو سن نئجه آپاراجاقسان؟
کور‌اوغلو دئدی:
– بو ایشده گرک سنین اوغلون منه کؤمک ائله‌یه.
آرواد سئوینجک دئدی:
– او منیم بو الیمین ایچینده. آغزی ندی کی، ائله‌مه‌سین. اینشاللاه
صاباح کئچر، او بیریسی گون نار باغیندان بیرباش...
غرض، گئجه‌نی یاتدیلار. سحر اولدو. کور‌اوغلو دوروب آتی یئمله‌دی،
سولادی، راحتلادی، آروادا پول وئردی کی، شئی-شوی آلسین خؤرک حاضرلاسین،
هم ده گئدیب اوغلونو چاغیرسین، اؤزو ده اوز قویدو مئیدانا طرف. آنجاق
گئتمه‌میشدن اوست-اوسته آروادا تاپشیردی کی، دیلینی دیشلری‌نین دالیندا
ساخلاسین، یوخسا بوینونون آردیندان چیخار.
غرض، آرواد اؤز ایشلرینده اولسون، سیزه کیمدن دئییم، کور‌اوغلودان.
بلی، کور‌اوغلو بوردان بیرباش گلدی بیر اوستانین یانینا. اونا بیر اوووج
قیزیل وئریب خوتکارین آدینا بیر مؤهور قاییرتدیریب قویدو جیبینه.
اورادان چیخیب گئدیردی، بیر ده گؤردو بودو بیر میرزه چشمه‌یینی تاخیب
بورنونون اوجونا، ایلشیب بیر سکی‌نین اوستونده موشتری گؤزله‌ییر. کور‌اوغلو
میرزه‌نین یانینا گلیب دئدی:
– میرزه، منیم بیر قوجا ننم وار. بودو بیر نئچه آیدی کی، اؤلوم
یورغان دؤشه‌یینده‌دی. هر نه ائله‌ییریکسه ساغالمیر. ایندی منه سنی دئییبلر
کی، سن چوخ یاخشی دعا یازیرسان. سنه قوربان اولوم، گئدک ننه‌مه
بیر دعا یاز.
میرزه‌نین گؤزلری بوغا گؤرموش دانا گؤزلرینه دؤندو. جلد آیاغا
قالخدی، قلم-داواتینی گؤتوروب بیر الینده ایمانی، بیر الینده تومانی
دوشدو کور‌اوغلونون یانینا. بلی، گلیب آخیردا یئتیشدیلر قاری‌نین هیتینه.
میرزه باخدی کی، هیتده بیر قوجا قاری وار. کور‌اوغلویا باخیب دئدی:
– اوغلان، بس سن دئییردین ننم ناخوشدو. بودو ننن هیتده
گزیر کی.
کور‌اوغلو بایاق ها داروازانی باغلامیشدی. میرزه‌نین لاپ یانینا گلیب
دئدی:
– میرزه، ایر جانینا حئیفین گلیرسه، چیخارت کاغیذ-قله‌مینی خوتکارین
دیلیندن قیزی نیگار خانیما بیر نامه یاز.
– نه نامه؟
میرزه‌نین اللری اسه-اسه بیر پارچا کاغیذ چیخارتدی. کور‌اوغلو باشلادی
دئمه‌یه:
– خوتکارین دیلیندن قیزی نیگارا یاز کی: “بو نامه‌نی سنه وئرن
آدام منیم چوووشومدو. منیم باریگاهیمدا منه اولان حؤرمت
گرک اونا دا اولا”.
میرزه آلتدان-آلتدان کور‌اوغلویا باخا-باخا نامه‌نی یازیب قورتاردی.
تئز ایسته‌دی کی، آغزینی باغلاسین، کور‌اوغلو دئدی:
– وئر گؤروم نه یازمیسان.
میرزه‌نین رنگ اوروفو قاچدی. باشلادی ککله‌مه‌یه کی، بس سهو
ائله‌میشم، وئر تزه‌دن یازیم.
کور‌اوغلو اوخویوب گؤردو میرزه یازیب کی، “نیگار خانیم، بو آدام
قولدوردو. اورایا چاتجاق توتوب آسدیرارسان”.
کور‌اوغلو بیر ایری-ایری میرزه‌یه باخدی. میرزه قورخوسوندان کاغیذی
جیریب تزه‌دن نامه‌نی یازیب کور‌اوغلویا وئردی. کور‌اوغلو باخدی کی، ایندی
دوز یازیب قاییرتدیردیغی خوتکار مؤهورونو ده نامه‌یه ووروب جیبینه
قویدو. سونرا میرزه‌یه دئدی:
– میرزه، من سنه یاخشیجا حؤرمت ائلییه‌جکدیم. سن کی، منه
کلک گلدین، سنه تای آیری جور حؤرمت ائله‌مک گوناهدی. آل، بو سنین
زحمت حاقین.
بونو دئییب کور‌اوغلو میرزه‌نین ایکی قاشی‌نین اورتاسیندان بیر ترسه یومروق
دویونله‌دی. آرواد قیشقیرماق ایسته‌ینده کور‌اوغلو دؤنوب گؤزونون
اوجو ایله اونا ائله باخدی کی، آرواد بایاق ها قاچیب گیردی ائوه. کور‌اوغلو جلد
میرزه‌نین عباسینی، عمّامه‌سینی سویوندوروب اونو گئییندی، الینه ده بیر
تسبئح آلیب دوزلدی خوتکارین باریگاهینا طرف. قاپیچیلار اونون الینده
خوتکارین مؤهورلو نامه‌سینی گؤرجک ایکی قات اولوب تورپاغا دوشدولر.
قاپیلار تای‌باتای آچیلدی. کور‌اوغلو ایچرییه کئچه-کئچه قیشقیردی:
– هانی نیگار؟ منیم قاباغیما چیخسایدی، آیاقلارینا سویوق دیَردی؟
بوتون باریگاه اهلی قورخودان باشلادیلار زاغ-زاغ اسمه‌یه. بئلبئله
کور‌اوغلو قیرخ قاپیدان کئچیب نیگار خانیمین هیتینه گیردی. نیگار
خانیم قیرخ اینجه‌بئل قیزلا پنجره‌نین قاباغیندا اوتورموشدو. باغا
تاماشا ائله‌ییردی. اونو گؤرجک شیخ بیلیب تئز قیزلاردان بیریسینی گؤندردی
کی، گئتسین گؤرسون کیمدی، مطلبی ندی؟
کور‌اوغلو قیزی گؤرجک ائله بیر نره چکدی کی:
– هانی نیگار؟ نییه منیم قاباغیما چیخمیر؟ خوتکارین یانیندان
گلمیشم.
قیز اونو بیر اوتاغا آپاریب اؤزو ده تئز قاچیب نیگارا خبر وئردی. ائله
کی، نیگار قیرخ اینجه‌بئل قیزلا اونون یانینا گلدی، کور‌اوغلو باخدی کی، بللی
احمد دوغرو دئییب. نیگار دوغرودان دا ائله اونا لاییق نیگاردی. هله
اوزونو گؤرمه‌میشدی. ائله بوی بوخونوننان عاشق اولدو. ایشاره ائله‌دی کی،
قیزلار چیخسین، سنه گیزلین سؤزوم وار، خوتکار تاپشیریب.
قیزلار هامیسی چیخدی. ائله کی، نیگارلا کور‌اوغلو تک قالدیلار کور‌اوغلو
عبانی، عمّامه‌نی توللادی. نیگار باخدی کی، چاووش دؤندو اولدو بیر ایگید
اوغلان، چیینینده ساز. ائله قالدی مات کی، بو ندی؟ کور‌اوغلو ایکی الینی دؤشونه
قویوب نیگار خانیما سلام وئردی. نیگار سلامی آلمادی. کور‌اوغلو بیر ده
سلام وئردی. نیگار یئنه ده سلامی آلماییب ایسته‌دی کی، گئری دؤنسون.
آلدی کور‌اوغلو:
سلام وئردیم، سلام آلماز،
گؤروم کسسین سلام سنی.
آخچاسیز، پولسوز عاشقم،
پولوم یوخدو آلام سنی.
گوللو باغلاردا گزرسن،
جاهیللار باغرین ازرسن،
یوخا کاغیذا بنزرسن،
توتماز قلم، یازام سنی.
خزینم یوخ، آغزین آچام،
دؤولتیم یوخ، تؤکم ساچام،
علاج بودو آلام، قاچام،
چنلیبئله سلام سنی.
هانسی داغلارین قاریسان؟
هانسی باغلارین باریسان؟
نیگار، کور‌اوغلو یاریسان،
بیلیر کولّی-عالم سنی.
نیگار خانیم باخدی کی، بو آدام کیمدیسه بونا عشق اعلان ائله‌ییر. نه
قدر ائله‌دیسه اؤزونو ساخلایا بیلمه‌ییب اوجادان بیر قه-قهه چکیب
گولدو، اوزونو اونا توتوب دئدی:
– سن بیر عاشق، من بیر خوتکار قیزی، سنین وارین، پولون وارمی کی، منی
آلاسان؟
نیگار خانیمین جاوابیندان آلدی کور‌اوغلو گؤرک نه دئدی:
اوجا-اوجا داغلار باشی،
چنلی ده اولور، چنسیز ده اولور.
جهد ائله بیر ایشده تاپیل
سنلی ده اولور، سنسیز ده اولور.
آغ اوزده بوسه تک گرک،
ارنلر عیسی تک گرک،
گؤزللر نیسا تک گرک،
تئللی ده اولور، تئلسیز ده اولور.
کور‌اوغلونون آتی اولسا،
دمیر، پولاد قاتی اولسا،
بیر ایگیدین ذاتی اولسا،
پوللو دا اولور، پولسوز دا اولور.
نیگار خانیم باخدی کی، بو چوخ کور‌اوغلو، کور‌اوغلو دئییر. دقتله بئله
باخاندا گؤردو کی، اؤز بازوبندی کی، وئرمیشدی بللی احمده، اونون سازی‌نین
دسته‌سینده‌دی. بیلدی کی، بو، کور‌اوغلودو. باخدی کی، کور‌اوغلو دوغرودان دا
کور‌اوغلودو. هوشو باشیندان ائله داغیلدی کی، اوز-گؤز هامیسی آچیلدی. کور‌اوغلو
تئز اونو دیک گؤتوردو. ائله قاپیدان چیخارتماق ایسته‌ییردی کی، نیگار دئدی:
– یوخ، کور‌اوغلو بئله اولماز. سن منی بو قدر قوشونون ایچیندن
چیخاردیب آپارا بیلمزسن.
کور‌اوغلو دئدی:
آلا گؤزلو نیگار، سنی
من چنلیبئله آپاررام.
چکرم قیرات ترکینه،
دؤنه‌رم یئله آپاررام.
مائلم گؤزو، قاشینا،
دوشه‌رم، تر ساواشینا،
دوروب دولاننام باشینا،
توتارام دیله، آپاررام.
تولک ترلان قورخماز ساردان،
کؤنول آیریلماز نیگاردان،
سنی زور ایله خوتکاردان،
آلارام بئله، آپاررام.
سایمارام خوتکاری، خانی،
قوشونا وئرمم آمانی،
مئیدان ایچینده آل قانی،
دؤندررم سئله، آپاررام.
کور‌اوغلو گلسه داماغا،
ضربه‌‌ دؤزمز سولطان، آغا،
قیراتی چاپدیررام داغا
چارداقلی بئله آپاررام.
نیگار دئدی:
– ایگیدلیگیندن دم وورما. زورلا ایش اولماز. یاخشیسی بودو کی، جاماعت
شوبهه‌لنمه‌میش بو عبا-قبانی گئییب بورادان چیخ گئت. صاباح کئچر، او
بیریسی گون من نار باغینا گزمه‌یه چیخاجاغام. قاچیردا بیلسن، منی
اورادان گؤتوروب قاچیردارسان.
غرض، کور‌اوغلو یئنه ده عبا-قباسینی گئییب، قاپیدان چیخیب اؤزونو
قاری‌نین ائوینه سالدی. باخدی کی، آروادین اوغلو دا گلیب، اونو گؤزله‌ییر. دئ
خوش بئش، اون بئش ایلشدیلر. خؤرک یئییب توققانین آلتینی مؤحکمله‌دندن
سونرا اوغلان اوزون کور‌اوغلویا توتوب کیم اولدوغونو سوروشدو.
کور‌اوغلو نیگاری گؤرندن سونرا ائله حالدا دئییلدی کی، سوالا سؤزله
جاواب وئرسین. اودو کی، سازی دؤشونه باسیب دئدی:
جاوان اوغلان، اؤلکه‌نیزه اوز توتوب،
بیر قیز سوراغینا گلدیم، ها گلدیم.
اوسمان گؤزه‌لی‌نین دوشدوم عشقینه،
آچیق قاباغینا گلدیم، ها گلدیم.
قیراتی چاپدیریب یوللاردا یوردوم،
دوشمن قارشیسیندا مردانه دوردوم،
آدیم رؤوشن ایگید، چنلیبئل یوردوم،
لاچین اویلاغینا گلدیم، ها گلدیم.
اسکیک اولماز کور‌اوغلونون قووغاسی،
دوشر پاشالارلا جنگی، ساواشی،
ایستانبول شهرینده خوتکار بالاسی،
نیگار فراغینا گلدیم، ها گلدیم.
اوغلان دئدی:
– آی ایگید، سن تک اوغلانسان. عثمانلی قوشونونون ایچیندن نیگاری
نئجه چیخاریب آپاراجاقسان؟
کور‌اوغلو دئدی:
– سن منی باغا بوراخ، نئجه آپاراجاغیمدا ایشین اولماسین.
اوّل-اوّل باغمان بیر آز چکیندی. ائله کی، بیر طرفدن آناسی، بیر
طرفدن ده کور‌اوغلو دوشدولر اونون اوستونه، اوغلان راضیلاشدی. گئجه‌نی
یاتیب سحر اولجاق کور‌اوغلو دوردو، قیراتی یهرله‌ییب باغمانلا بیرلیکده
نار باغینا گلدیلر. کور‌اوغلو آتی بیر طرفده باغلادی، اؤزو ده گیزله‌نیب
باشلادی نیگار خانیمین یولونو گؤزله‌مه‌یه. آز کئچدی، چوخ کئچدی کور‌اوغلو
بیر ده گؤردو بودو نیگار خانیم قیرخ اینجه‌بئللی قیزلا گلیر. کور‌اوغلو قیزی
گؤرجک آز قالدی هوشو باشیندان داغیلسین. نیگار خانیم دا کور‌اوغلونون
باغدا اولدوغونو باشا دوشدو. قیزلاری باشیندان داغیدیب اؤزونو او گیزلنن
طرفه وئردی. کور‌اوغلو پوسقودان چیخان آسلان کیمی اونون یولونو کسدی.
نیگار دایاندی. کور‌اوغلو اونون الیندن توتدو کی، چکسین. نیگار دئدی:
– یاخشی، بس سن منی ایندی نه ایله چنلیبئله آپاراجاقسان؟
کور‌اوغلو سازی گؤتوروب دئدی:
قیراتا چکدیررم بیر جوت اوزنگی،
اوجا داغ باشیندا توتارام جنگی،
قیررام عثمانلینی، هیندی، فیرنگی،
ایستانبولدا قیلینج چاللام، اینشاللاه.
قیراتیمی بسله‌میشم قهرینده،
گؤزل گؤرمه‌میشم سنین تهرینده،
قیلینج چکیب ایستانبولون شهرینده،
خوتکاری تاختیندان ساللام، اینشاللاه!
قاریشمایین کور‌اوغلونون ایشینه،
دوو گلّه‌م دوشمنین اللی بئشینه،
قوزغون قونار یاغیلارین لئشینه،
یاغیدان قیصاصیم، آللام، اینشاللاه!
نیگار خانیم دئدی:
– آخیر او نئجه آتدی کی، بیزیم ایکیمیزی ده بو قدر قوشونون ایچیندن
چیخاردیب آپارا؟
آلدی کور‌اوغلو:
اوجا داغ باشیندا یئل کیمی اثر،
بو گونومده منه اورک قیراتیم.
بیر آیلیق منزیلی بیر گونده کسر
کؤهلن بسله‌میشم، گؤرک قیراتیم.
یوللارین توزونو گؤیه قالدیرار،
موخنّت اوستونو بیردن آلدیرار،
مئیدانین ایچینده دوشمن سالدیرار،
اولار یییه‌سینه دیرک قیراتیم.
قوچ کور‌اوغلو قونار اولسا یهره،
یاغی دوشمنلری سالار قهره،
آخوردا آرپاسین قویماز سحره
دارا دوشسم، منه کؤمک قیراتیم.
نیگار دئدی:
– ایندی کی، بو قدر قیرات-قیرات دئییرسن گئدک گؤرک او نئجه آتدی؟
کور‌اوغلو نیگاری قیراتین یانینا گتیردی. نیگار باخیب گؤردو آت دوغرودان
دا یاخشی آتدی. کور‌اوغلو آتین یویه‌نینی آغاجدان آچیب دئدی:
– نیگار خانیم، بونون اوستونه مینمه‌میش یاخشی، پیسلیگینی گؤره بیلمزسن.
کور‌اوغلو بونو دئییب ترلان کیمی سیچراییب آتین بئلینه میندی. سول الینی
ده آتیب نیگاری دیک گؤتوروب ترکینه قویدو. نیگار ایشی بئله گؤروب قیشقیردی کی:
– اده، بیر قوی گؤرک، بیر دانیشاق، مصلحتلشک سونرا.
کور‌اوغلو آتی سیچرادیب بایاق ها باغدان چیخدی کی:
– قیز، نه فیکیر، نه مصلحت. مصلحت ائله بودو کی، وار.
بلی، کور‌اوغلو ایله نیگار قیراتین اوستونده یئل کیمی سوروب گئتمکده
اولسونلار، سیزه کیمدن دئییم، نیگار خانیمین قارداشیندان.
ایستانبول خوتکاری‌نین بورجو سولطان آدیندا بیر اوغلو وار ایدی. ائله کی،
خبر چیخدی، های-کوی دوشدو کی، نیگار خانیمی گؤتوروب قاچدیلار، بورجو
سولطان آتی مینیب قوشونا های ووردو. قوشون آتلانانا قدر بورجو سولطان
اؤزو آتا بیر-ایکی تازیانا چکیب یولا دوزلدی.
کور‌اوغلو نیگار دا ترکینده یئلدن قانات تاخیب اوچان قیراتین اوستونده
گل ها گل، گلیب بیر چمنگاها چیخدیلار. بیر طرفدن کور‌اوغلو گئجه‌نی
یاتمامیشدی دئیین یامان یوخوسوز ایدی. بیر طرفدن ده نیگاری بئله
داواسیز-شاواسیز آپارماق قوچ کور‌اوغلویا آغیر گلیردی. اودو کی، آتدان
دوشدو، آتی یانچیدار ائله‌ییب اوتلاماغا بوراخدی. نیگاری دا گؤتوروب بولاغین
باشینا گلدی. نیگار نه قدر ائله‌دی کی، گل گئدک، آتامین قوشونو گلیب
بیزی توتار، سنی اؤلدورر، منی ده گئری قایتارارلار، کور‌اوغلو اونو ائشیتمه‌دی.
کور‌اوغلو دئدی:
– قورخما، بیزیم دالیمیزجا هئچ کس گلمه‌یه‌جک.
ائله کی، نیگار ایلشدی، کور‌اوغلو باشینی اونون دیزی‌نین اوستونه قویوب
دئدی:
– نیگار خانیم، من بیر آز یاتیم. سنین گؤزون قیراتدا اولسون، ائله
گؤردون اوتدان آغزین چکیب، آیاقلارینی یئره دؤیوب ناراحاتلیق ائله‌ییر، بیل
کی، دوشمن گلیر. اوندا منی اویادارسان.
کور‌اوغلو بونو دئییب باشینی آلاگؤز نیگارین دیزینه قویوب یوخولادی.
آرادان بیر آز کئچمیشدی، نیگار بیر ده باخدی کی، واللاه قیرات بیر
حرکتده‌دی، بو حرکتده‌دی کی... ائله بیل کی، واخت ائله‌ییر، آتین باغری
چاتلاسین. نیگار تئز کور‌اوغلونو اویاتدی کی:
– دور، گؤر آت نییه ائله ائله‌ییر؟
کور‌اوغلو دئدی:
– قورخما، بیر شئی یوخدو. دوشمن گلیر.
کور‌اوغلو جلد آتی میندی، نیجاری دا گؤتوروب ترکینه قویدو. بیر ده
باخدیلار کی، بودو اوزاقدان بیر آتلی ائله گلیر، ائله گلیر کی، ایلدیریم کیمی.
نیگار اونو گؤرجک دئدی:
– قارداشیم گلیر.
کور‌اوغلو دئدی:
– قوی گلسین، گؤرک نه دئییر.
ائله اونلار بو سؤزده ایدیلر کی، بورجو سولطان گلیب چاتدی. نیگاری کور‌اوغلونون
ترکینده گؤرجک بوغازیندان قووقال تیکانی گلمیش اؤکوز کیمی
باغیریب دئدی:
– قیزی الدن قوی!
کور‌اوغلو دئدی:
– خوتکار اوغلو، حیرصلنمه. قیزی آپاران یوخدو، گل آپار.
بورجو سولطان اوندان بو سؤزو ائشیدیب بیر آز دا جورتلندی.
– نئجه گل آپار! گرک سنی اؤلدوروب قیزی سونرا آپارام!
کور‌اوغلو گوله-گوله دئدی:
– چوخ گؤزل، من ده راضییام. آنجاق دئیه‌سن چوخ تلسمیسن، آتین
قارین‌آلتیسینی یاخشی برکیتمه‌میسن. اونو دوزلت سونرا داوا ائله‌یک.
بورجو سولطان اییلدی کی، آتین قارین‌آلتیسینا باخسین. کور‌اوغلو اونون
بوینونون آردیندان بیر یومروق ووروب آتدان یئره سالدی. آلیجی قوش کیمی
سینه‌سینه چؤکدو. خنجرینی چیخارتدی کی، باشینی کسسین، نیگار آغلادی کی:
– کور‌اوغلو، اونو منه باغیشلا. تک بیرجه قارداشیمدی.
کور‌اوغلو بورجو سولطانین سینه‌سی‌نین اوستوندن دوروب دئدی:
– گئت، سنی نیگارا باغیشلادیم. آنجاق بیر ده گیریمه کئچسن اؤلدوره‌جه‌یم.
اونلار یئنیدن قیراتا مینیب چنلیبئله طرف یول باشلادیلار. بورجو
سولطان او قدر گؤزله‌دی کی، قوشون گلیب چاتدی. هامیسی بیرلیکده کور‌اوغلونون
دالینجا دوشدولر.
کور‌اوغلو بیر ده باخدی کی، بودو قوشون گلیر. تئز قیراتین باشینی دؤندریب
دایاندی. باشلادی گؤزله‌مه‌یه. نیگار گؤردو کی، کور‌اوغلو داوا ائله‌مک
ایسته‌ییر. دئدی:
– کور‌اوغلو، ازل منی گؤتوروب قاچمایایدین. ایندی کی، آپاریرسان
قاییتما، سور آپار گئت. آتامین قوشونو چوخدو، سن تکسن. اونلارلا باجارمازسان،
داوا ائله‌مه.
– من سنی چنلیبئله بو جور آپارا بیلمه‌رم. دلیلر دئیرلر
کور‌اوغلو گئتدی خوتکارین قیزینی قاچیردیب گتیردی. گرک داوا ائله‌یم،
قوشون قیرام، قان تؤکم، پاشا اؤلدورم، سنی ائله آپارام.
کور‌اوغلو بونو دئییب نیگار خانیم دا ترکینده میسری قیلینجی چکیب
قاییتدی، اؤزونو عثمانلی قوشونونا ووردو.
کور‌اوغلو بورادا داوا ائ‌له‌مکده اولسون سیزه چنلیبئلده دلیلردن
خبر وئریم. کور‌اوغلو گئدندن سونرا دلیلر دئدیلر:
– کور‌اوغلو تک گئتدی، سونرا اله کئچر توتولار، باشسیز قالاریق. دالینجا
گئتمک گرکدی.
دلیلردن بیر نئچه‌سی چنلیبئلده قالدی. قالانی آتلاندی، کور‌اوغلونون
دالینجا یولا دوشدو. دلیلر او واخت یئتیشدیلر کی، قیزغین داوا ایدی. کور‌اوغلو
ساغا-سولا قیلینج ووروردو. دلیلر نره چکیب اؤزلرینی عثمانلی قوشونونا
ووردولار. قوشون اهلی دلیلرین هوجوموندان قورخوب کور‌اوغلونون باشیندان
داغیلدیلار.
کور‌اوغلو گؤز گزدیردی. دلیلری قیزغین داوا ائله‌ین گؤردو، کؤنلو
آچیلدی، اورگی آتلاندی. آلدی گؤرک ترکینده آغلایان نیگار خانیما نه دئدی:
آغلاما، تئللی نیگاریم،
گلدی دلیلریم، گلدی.
خوتکار قیزی، گؤزل یاریم،
گلدی دلیلریم، گلدی.
دوشمنه قیلینج چکمه‌یه
باشلاری بیچیب تؤکمه‌یه
پاشالار قددی بوکمه‌یه
گلدی دلیلریم، گلدی.
قوربانام مردین آدینا،
دوستونو سالار یادینا،
بو گون بیر ار ایمدادینا،
گلدی دلیلریم، گلدی.
الده شئشپری، قالخانی،
یاغییا وئرمز آمانی،
اؤلدورمه‌یه بَی، پاشانی،
گلدی دلیلریم، گلدی.
ایگیدین کسمز قووغاسی،
همیشه اولار داواسی،
کور‌اوغلونون قوچ آرخاسی،
گلدی دلیلریم، گلدی.
کور‌اوغلونون نره‌سینه دلیلر داها دا قیزیشدیلار. کور‌اوغلو بیر یاندان،
دلیلر بیر یاندان خوتکارین قوشونوندان چوخ قیردیلار. قوشون دلیلرین
هوجومونا داوام گتیره بیلمه‌دی، قاچیب داغیلدی. کور‌اوغلو ترکینده نیگار
خانیم، باشیندا دا دلیلر چنلیبئله یوللاندی. اوزاق یئرلری کئچیب، یوللاری،
یاماجلاری آشیب گلدیلر چنلیبئله چاتدیلار. نیگار خانیم گؤردو،
چاتدیقلاری یئر اوجا داغلارین باشی، گوللو-چیچکلی بیر اویلاقدی، دئدی:
– کور‌اوغلو، چنلیبئل بودورمو؟
نیگار خانیمین جاوابیندا آلدی قوچ کور‌اوغلو گؤرک نه دئدی:
چیسکینلی داغلارین باشی،
نیگار، چنلیبئل بودو، بو!
ایگیدلر آچار ساواشی
نیگار، چنلیبئل بودو، بو!
چکیب بأزیرگان سویدوغوم،
قفله‌لری بوش قویدوغوم،
پاشالار گؤزو اویدوغوم،
نیگار، چنلیبئل بودو، بو!
اوست یانی داغ، تپه، دره،
موخنّتلر دوشر گیره،
مرد ایگیده اولار بره،
نیگار، چنلیبئل بودو، بو!
خوتکارلار باتا بیلمه‌ین،
جومردلر توتا بیلمه‌ین،
کؤکسونه یاتا بیلمه‌ین،
نیگار، چنلیبئل بودو، بو!
اوجالاردان اوجا داغی
هرگیز گله بیلمز یاغی،
کور‌اوغلو تک ار اویلاغی
نیگار، چنلیبئل بودو، بو!
چنلیبئله های دوشدو. دلیلر هامیسی آت مینیب کور‌اوغلونون قاباغینا
چیخدیلار. نیگار خانیمی آتدان دوشوروب، کجاوه‌یه میندیردیلر. شنلیک
باشلاندی. کور‌اوغلو ایله نیگاری مجلیسین باش طرفینده اوتورتدولار.
هامی‌نین کئفی ساز ایدی. آمما هئچ کیمین کئفی بللی احمدین کئفینه
چاتمازدی. خلت خلت اوستوندن تؤکولوردو. هره اؤز قوووه‌سینه گؤره
اونا خلت وئریردی. بونو گؤرن نیگار خانیم کور‌اوغلودان سوروشدو:
– آی کور‌اوغلو، بس سن نییه بللی احمده خلت وئرمیرسن؟
کور‌اوغلو دئدی:
– منیم خلتیم اودو کی، اونو آزاد ائله‌ییب دلیلییه گؤتورموشم. نه
واخت کی، چنلیبئل دلیسی اولماغا لاییق اولدوغونو گؤستردی، مندن خلتی
اوندا آلاجاق.
بو سؤزون جاوابیندا بللی احمد دئدی:
– کور‌اوغلو، من چنلیبئله قورخودان، آجلیقدان گلمه‌میشم. من
ایگید اولماسایدیم آدیما بللی احمد دئمزدیلر. اینشاللاه واخت گلر
سندن ده خلتیمی آلارام.
مجلیس اهلی اونون بو سؤزونه احسن دئدی. کور‌اوغلو بیر نیگارا باخدی،
بیر دلیلره باخدی، اورگی تئللندی، آدلی گؤرک نه دئدی:
ایستانبولدان بوتا آلیب گلمیشم،
ایستانبولدا آرزومانیم قالمادی.
چنلیبئل اویلاغیم، قیرات دایاغیم،
آت مینمکده آرزومانیم قالمادی.
قیراتی چکمه‌سم داغلار سؤکولمز،
بزمندین چکمه‌سم ساغری اؤرتولمز.
قاباغیندان قاچان دوشمن قورتولماز،
قیصاص آلدیم، آرزومانیم قالمادی.
کور‌اوغلویام، چنلیبئلده اوتوررام،
هاردا گؤزل گؤرسم، آللام، گتیررم.
دلیلری مورادینا یئتیررم،
گؤزللرده آرزومانیم قالمادی.

وبلاقا گؤره

بو دیل دنیزدی سیزین تک صدفده اینجیسی وار
قیزیلدی سیزده اولان اوزگه‌نین اگر میسی وار
دئسزکی اودلو دیاردی بیزه وطن یاراشار
بیزیم اوجاقلارین آنجاق کور ائیله‌ین هیسی وار
"عقیل"
وبلاق مودیری : نژادمحمد

سون یازیلار

آختارماق

یازارلار

Page Rank بالاجا خوخان آذربایجان تورکجه سینده ایسلام دینی و قرآن کریم