تبلیغات
ایران آذربایجانی تورکجه سینین ادبیات اوتاغی - کور‌اوغلوینان دلی حسن
ایران آذربایجانی تورکجه سینین ادبیات اوتاغی
یاشاسین آذربایجان

قونو سلاخلانجی

سلاخلانج

باغلانتیلار

اؤزل یارپاقلار‌

← وبلاق گؤروشلری

  • گؤروشلرین هامیسی :
  • بو گون گؤروشلر :
  • دوننکی گؤروشلر :
  • بو آی گؤروشلر :
  • قاباق آی گؤرو‌شلر :
  • یازارلارین سایی :
  • یازیلارین هامیسی‌نین سایی :
  • سون گؤروش :
  • سون دیَیشمه :

لینکلر‌

کور‌اوغلوینان دلی حسن

کور‌اوغلوینان دلی حسن

گونلرین بیر گونو کور‌اوغلو قیرات مینیب چنلیبئلین اته‌یینده‌کی

یولا چیخمیشدی. بیر ده باخدی بودو، بیر دسته یاراقلی-یاساقلی آتلی

گلیر. آمما آتلیلارین قاباغیندا بیر اوغلان گلیر کی، دونیالارا دیَر.

اوزوندن، گؤزوندن ایگیدلیک یاغیر. اوغلان کور‌اوغلونو گؤرجک، دسته‌سینه

های ووردو. آتلیلار او ساعت کور‌اوغلونو آرایا آلدیلار. کور‌اوغلو دایاندی.

گؤزله‌دی کی، گؤرسون ایشین آخیری نه اولاجاق. اوغلان آتی جؤولانا گتیردی، سوزدوروب

دوز کور‌اوغلونون قاباغیندا دایاندی. سونرا بیر کور‌اوغلویا باخدی،

بیر آتینا باخدی، سوروشدو:

– ایه، دئ گؤروم کیمسن؟ بو یئرلرده نه گزیرسن؟

کور‌اوغلو دئدی:

– یولدان کئچنم.

اوغلان بیر ده کور‌اوغلونون آتینا باخیب سوروشدو:

– بو آتی هارادان آلیبسان؟

کور‌اوغلو دئدی:

– من سنه مصلحت گؤرورم اؤز یولونلا دوز گئده‌جن. یوخسا

یاخشی اولماز.

اوغلان بو سؤزدن غضبلندی. حیرصله آتینین باشینی چکدی. آت ایکی دال

آیاقلاری اوستونه قالخدی. اوزونو کور‌اوغلویا توتوب دئدی:

– گؤرونور کی، سن منی تانیمیرسان؟ اگر تانیسایدین بئله دانیشمازدین.

منه دلی حسن دئیرلر. بو یوللاردان کیم کئچسه، منه

باج-خراج وئرمه‌لیدی.

کور‌اوغلو اونو تانیدی. بیلدی کی، آتاسی‌نین دئدیگی دلی حسندی. بیر ده

دقتله آتینا، اؤزونه باخدی. گؤردو یوخ، دلی حسن دوغرودان دا ایگید

اوغلاندی.

کور‌اوغلو آتاسی اؤلن گوندن بری اونو آختاریردی. اونونلا دوستلاشماق،

البیر اولماق فیکرینده ایدی. آنجاق بیلیردی کی، بو ایش ائله-بئله باش توتمایاجاق.

داوا-دالاشسیز مسئله‌‌ دوزلمه‌یه‌جک. فیکیر اونو گؤتوردو کی، ایندی

نه تهر ائله‌سین. ائله بو فیکیرده ایدی کی، دلی حسن بیر ده قیشقیردی:

– ایه، سنه آتدان دوش دئمیرممی؟ یوخسا عجلین چاتیب؟

کور‌اوغلو آراملا دئدی:

– دلی حسن، سسینه قوووت وئرمه، ایگید دیل آچماز، ال آچار.

دلی حسن دئدی:

– ایه، سن کیمسن کی، منیم قاباغیمدا بئله یئکه-یئکه دانیشیرسان؟

– دایان، دئییم کیمم.

بونو دئییب، کور‌اوغلو آتین باشینی چکدی. آت ائله قالخدی کی، دیرناغی‌نین

آلتیندان قوپان داش بیر نئچه آدام بویو دلی حسنین باشی‌نین اوستوندن

کئچیب، او طرفه دوشدو. کور‌اوغلونون اطرافینی بوروموش آتلیلار چاخناشمایا

دوشدولر. کور‌اوغلو سازی چیینیندن آشیریب دؤشونه باسدی، دئدی:

مندن سلام اولسون عجم اوغلونا،

مئیدانا گیرنده، مئیدان منیمدی!

قیراتیم کؤهلندی، اؤزوم قهرمان،

چالارام قیلینجی، دوشمن منیمدی!

مئیدانا گیرنده مئیدان تانییان،

حاقین وئرگیسینه من ده قانییام.

بیر ایگیدم، ایگیدلرین خانییام،

بو اطرافدا بوتون هر یان منیمدی!

آدیمی سوروشسان، بیل، رؤوشن اولو،

آتادان، بابادان جینسیم کور‌اوغلو؛

منم بو یئرلرده بیر دلی، دولو،

گون‌دوغاندان تا گون‌باتان منیمدی.

دلی حسن بیر کور‌اوغلویا باخدی، بیر دؤنوب باشی‌نین آداملارینا

باخدی، هوندوردن بیر شاققاناق چکیب گولدو. آتلیلار دا گولوشدولر.

اونلارین بو گولوشمیی کور‌اوغلویا دیَدی. بیر ایسته‌دی میسری قیلینجی چکیب،

اؤزونو اونلارا گؤسترسین. سونرا لعنت شیطانا دئییب، آلدی سازی گؤرک نه

دئدی:

ایگید مئیدانا گیرنده،

قایناییب جوشماماق گرک.

اگر اولسا حاق وئرگیسی،

قیسمتدن قاچماماق گرک.

باخمارام دوشمن هایینا،

حاق بلا وئرسین، خایینا،

ایگید ایگیدین پایینا

کؤن‌دَ‌لن دوشمه‌مک گرک.

قوچ کور‌اوغلو چیخار دوزه،

باخمارام اللییه، یوزه.

من دلیدن اؤیود سیزه،

حدآیندن آشماماق گرک.

کور‌اوغلونون بئله یئکه-یئکه نصیحت وئرمیی دلی حسنه لاپ آجیق

گلدی. باشی‌نینین آداملارینا های ووروب، کور‌اوغلویا هوجوم ائله‌مک ایسته‌دی.

کور‌اوغلو دئدی:

گل سنه سؤیله‌ییم، آی دلی حسن،

آند ایچمیشم بو گون دؤیوش اولماسین.

یوخسا آسلان کیمی جوشا گله‌رم،

آند ایچمیشم بو گون دؤیوش اولماسین.

مرد ایگیدلر موخنّتدن سئچیلسین،

قاری دوشمن دره‌لره تؤکولسون،

بیزیم آرامیزدا مونصیف تاپیلسین،

آند ایچمیشم بو گون دؤیوش اولماسین.

چکرم قیلینجی، کسه‌رم یولو،

منم ایگیدلرده بیر دلی، دولو

هله جوشماییبدی بو قوچ کور‌اوغلو،

آند ایچمیشم بو گون دؤیوش اولماسین.

دلی حسن ائله بیلدی کی، کور‌اوغلو اوندان قورخور. گئری قانریلیب، باشی‌نین

آداملارینا دئدی:

– ایه، من ده ائله بیلمیشم کی، بو دوغرودان دا ایگیددی. سن دئمه،

بو یانشاق گوزه‌نین بیریسی ایمیش. توتون، یئکه-یئکه دانیشدیغینا گؤره

آتینی الیندن آلین، اؤزونه ده بیر-ایکی ووروب یولا سالین.

کور‌اوغلو باخدی ایش داواسیز کئچمه‌یه‌جک. میسری قیلینجی چکیب، آلدی

گؤرک نه دئدی:

آجیقلانما، دلی حسن،

میسری قیلینجا قاتارام.

آتیلارام شئشپر کیمی،

باغرین باشینا باتارام.

نامرد ندی اؤزون اؤیه؟

مئیداندا مرد ایگید سؤیه؟

قاچیب چیخار اولسان گؤیه،

کمند توللاییب توتارام.

نه باخیرسان کوسور کیمی؟

یارپاق نئجه اسیر کیمی؟

ایندی سنین یئسیر کیمی

قوللارین دالدا چاتارام.

هایقیریب آچسام مئیدانی،

سو تک آخیدارام قانی،

دستله‌ییب بَیی، خانی،

قیرات دؤشونه قاتارام.

قوچ کور‌اوغلو اؤز کاریندا،

یالان اولماز ایلقاریندا.

چکیب حلب بازاریندا

سنی قول دئییب ساتارام.

کور‌اوغلونون بو سؤزوندن دلی حسن قیزیشدی. اؤزو چکیلدی بیر کناردا

دوردو، باشینداکی آداملارا حؤکم ائله‌دی کی، کور‌اوغلونو توتسونلار.

دلی حسنین دسته‌سی کور‌اوغلویا هوجوم ائله‌دی. کور‌اوغلو آتی جؤولانا

گتیریب، قیشمیز شیر کیمی اونلارین اوستونه جومدو.

بیر یاندان کور‌اوغلو، بیر یاندان قیرات آز واختدا دسته‌نی قاتیمقاتیم

قاتلاییب الدن-آیاقدان سالدیلار. دسته‌دن قیریلان قیریلدی، قالانلار

دا قاچیب داغیلدیلار. کور‌اوغلو دسته‌نی داغیلمیش گؤروب، قیراتی ایلدیریم

کیمی سوزدوردو، چکیلیب بیر یاندا دوران دلی حسنین اوستونه سوردو.

اوزونو اونا توتوب، آلدی گؤرک نه دئدی:

قیراتی گتیردیم جؤولانا، ایندی

وارسا ایگیدلرین مئیدانا گلسین!

گؤرسون من دلی‌نین ایندی گوجونو،

بویانسین اندامی آل قانا، گلسین!..

قورخوم یوخ پاشادان، سولطاندان، خاندان،

گلسین منم دئین، کئچیردیم ساندان،

ارلر دالدالانیب قورخماسین قاندان،

آت سورسون، قووغایا مردانا گلسین!..

کور‌اوغلو اییلمز یاغییا، یادا،

مردین اسکیک اولماز باشیندان قادا.

نره‌لر چکرم من بو دونیادا،

گؤستررم محشری دوشمانا، گلسین!..

دلی حسنله کور‌اوغلو داوا ائله‌یه‌سی اولدولار. قیلینجلارینی چکیب، بیربیرینه

هوجوم ائله‌دیلر. قیلینجدان موراد حاصیل اولمادی، عمودا ال آتدیلار.

عموددان موراد حاصیل اولمادی، نیزه‌یه ال اوزاتدیلار. نیزه‌دن ده کار

آشمادی. آخیردا آتدان دوشدولر، گولشمه‌یه باشلادیلار. دلی حسن ایله

کور‌اوغلو چوخ گولشدیلر، گاه او بونا گوج گلدی، گاه بو اونا گوج گلدی. قوچ

کور‌اوغلو آخیردا بیر دلی نره چکیب دلی حسنی گؤتوروب یئره ووردو.

دیزینی سینه‌سینه دایادی، الینی قیلینجا آتاندا، دلی حسن بیر آه چکدی.

کور‌اوغلو دئدی:

– بیر قاشیق قانیندان قورخوب نییه آه چکیرسن؟

کور‌اوغلونون جاوابیندا دلی حسن دئدی:

– ائی ایگید، من جانیمدان قورخوب آه چکمیرم. عهدیم وار ایدی.

عهدیمه چاتمادیم.

کور‌اوغلو سوروشدو:

– عهدین نه ایدی؟

دلی حسن دئدی:

– من عهد ائله‌میشدیم کی، هر کیم منی باسسا، اونونلا دوست، قارداش

اولام. اؤلنه قدر اونون یانیندا قالام. ایندی سن منی باسدین، آنجاق

اؤلدورورسن، عهدیمه چاتا بیلمیرم.

دلی حسنین بو سؤزو کور‌اوغلونو سئویندیردی. آیاغا قالخدی، دلی

حسنین قولوندان یاپیشیب قالدیردی، الینی اوچ دفعه‌‌ اونون دالینا ووردو.

دلی حسن اونون قیلینجی‌نین آلتیندان کئچدی، اؤلنه‌جن اونا قارداش

اولوب، قوللوغوندا دورماغا آند ایچدی. اوندان سونرا اوزونو کور‌اوغلویا

توتوب دئدی:

– قوچ کور‌اوغلو، دوز یئددی ایلدی کی، من بو یوللارین آغاسییام. ایندییه

قدر هله بیر آدام منیم قاباغیما چؤپ سالا بیلمه‌ییب. بو یئددی ایلین

عرضینده بیر بأزیرگان منه باج وئرمه‌میش بو هندوردن کئچه بیلمه‌ییب.

بَیلردن، خانلاردان، تاجیرلردن آلیب ییغدیغیم مال-دؤولتین،

قیزیل-گوموشون، جاواهیراتین هامیسینی ساخلامیشام. ایگیدلر آراسیندا اولان

عادته گؤره ایندی اونلارین هامیسی سنه چاتیر. بویور، گئدک مالینا صاحب

اول!

کور‌اوغلو قاباقجا اونا اینانمادی. شوبهه‌لندی کی، بلکه حیله‌‌ قوروب

اونو توپا سالماق ایسته‌ییر. سونرا فیکیرلشیب اؤز-اؤزونه دئدی: “عیبی یوخدو،

ائله بئله یاخشیدی. بو باشدان یوخلاییب، سیناقدان چیخاردارام. قوی

مرددیرسه ده ایندیدن بیلینسین، موخنّتدیرسه ده ایندیدن بیلینسین”.

اؤزو قیراتی میندی، سونرا دا اوزونو اونا توتوب دئدی:

– مین آتینی، سور، گئدک!

دلی حسن قاباغدا، کور‌اوغلو دالدا آز گئتدیلر، اوز گئتدیلر، گلیب

بیر سیلدیریم قایانین دیبینه چاتدیلار.

قایانین دیبی یامان کول-کوسلوق ایدی. دلی حسن آتینی کول-کوسلوغا

ووردو. کور‌اوغلو دا اونون دالینجا. ائله بیر آز گئتمیشدیلر کی، قاباقلارینا

بیر ماغارا چیخدی. دلی حسن آتدان دوشدو. سونرا قیراتین جیلوووندان

یاپیشیب دئدی:

– چاتمیشیق. ایندی آتدان دوش، ایچری گیرک.

کور‌اوغلو یئنه ده دلی حسنی قاباغینا سالیب ماغارایا گیردی. باخدی

کی، بورادا او قدر قیزیل-گوموش وار کی، ائله بیل یئددی پادشاهین خزینه‌سی

بورادادی. کور‌اوغلو ماغارانی تامام-کمال گزدی. هامیسینی گؤزدن

کئچیردی. سونرا دلی حسنه دئدی:

– قوی بونلار ائله بوراداجا قالسینلار. ایندی بونلار بیزه لازیم دئییل.

آمما ائله کی، چنلیبئلده یورد-یووا سالدیق، باشیمیزا دلیلر، ایگیدلر

ییغیلدی، اوندا بونلار بیزه لازیم اولاجاق.

دوغرودان دا ائله اولدو.

بو گوندن کور‌اوغلونون باشینا یاواش-یاواش آداملار ییغیشماغا

باشلادی. چوخ چکمه‌دی کی، چنلیبئل قوچاق اوغلانلارین، ایگیدلرین مسکنی

اولدو.

وبلاقا گؤره

بو دیل دنیزدی سیزین تک صدفده اینجیسی وار
قیزیلدی سیزده اولان اوزگه‌نین اگر میسی وار
دئسزکی اودلو دیاردی بیزه وطن یاراشار
بیزیم اوجاقلارین آنجاق کور ائیله‌ین هیسی وار
"عقیل"
وبلاق مودیری : نژادمحمد

سون یازیلار

آختارماق

یازارلار

Page Rank بالاجا خوخان آذربایجان تورکجه سینده ایسلام دینی و قرآن کریم