تبلیغات
ایران آذربایجانی تورکجه سینین ادبیات اوتاغی
ایران آذربایجانی تورکجه سینین ادبیات اوتاغی
یاشاسین آذربایجان

قونو سلاخلانجی

سلاخلانج

باغلانتیلار

اؤزل یارپاقلار‌

← وبلاق گؤروشلری

  • گؤروشلرین هامیسی :
  • بو گون گؤروشلر :
  • دوننکی گؤروشلر :
  • بو آی گؤروشلر :
  • قاباق آی گؤرو‌شلر :
  • یازارلارین سایی :
  • یازیلارین هامیسی‌نین سایی :
  • سون گؤروش :
  • سون دیَیشمه :

لینکلر‌

تلگرام

تلگرام دا بیزی ایزله بیلرسز
telegram.me/BilimYurdu

تورکجه تقویم یازییلیمی

 

تورکجه تقویم یازییلیمی

بو پروقیرام آذربایجان تورکجه سینده و گونش ایلی ایه حاضیرلانمیش بیر یازییلیمدیر

اولاناغلار(ایمکانلار):

1-آذربایجان تورکجه سینده گونلر و آیلارین آدی

2-بیلگی سایار تقویم ایله تنظیم اولماق

3-مِنولار ایکی دیلده تورکجه وانگلسیجه.آذربایجان تورکجه‌سی ایکی الیفبادا(لاتین و عرب)

4-هر گون صفحه‌ده بیر بایاتی یادا آتالار سؤزو گؤسترمک اولاناغی(ایکی الیفبادا)

1700 دان آرتیق بایاتی و 4000 دن آرتیق آتالار سؤزو بو یازیلیمدا قوللانمیشیق

5-فارسجا گؤنلر ایله آیلارین آدی

6-میلاد تقویمین گوسترمک

7-آی تقویم گوسترمک اولاناغی

8-آذربایجان جمهوری‌سی ایله تورکیه جمهوری‌سین تقویمین گؤسترمک

9-هر گون ایچین بیر سؤز آلاماق اولاناغی یادا بیلگی‌سایارا اؤزل (خاص) ایشلر تاپیشیرماق او گون ده یادا او ساعت دا گؤرمک اوچون

10-گونش تقویم ایله میلاد تقویم بیر بیرینه چئورمک اولاناغی

11-آذربایجانین اؤزل گونلرین گؤسترمک(فارسجا)

و...

تورکجه تقویمی ائندیر(دانلود)

بو یازییلیم اوچون NetFormwork 2 -نین بیلگی‌سایاردا قوشولو اولماغی گرکدیر.

NetFormwork 2 ائندیر(دانلود)

 

حاضیرلایان:اوختای نژادمحمد

خوخان اوچ یاشینا گیردی

ایکی ایل بوندان اؤنجه بوگون بالاجا خوخان ائکیپی رسمی اولاراق ایشه باشلاییب هرهفته‌نین ایکینجی گونونون سون ساعاتلاریندا گونجللشدی. سیته ده بالاخوخا‌ن‌ین گوندم ناغیللاری( ایکی ایلده 43 ناغیل)، یولداشلارینین شکیللری، ها بئله اثرلری یاییلدی. ایکی درگیده صفحه میز اولدو( آفتاب آذربایجان(تبریز) و آغری .(اورمو) نئچه سسلی موبیل اوچون ناغیلیمیز و…

 ائکیپین ایکی ایللیک آماری:

·        ثابت یولداشلارین سایی (163)

بیر یاش:11، ایکی یاش:15، اوچ یاش:13، دؤرد یاش:13، بئش یاش: 11، آلتی یاش:13، یئددی یاش:21،  سککیز یاش:16،  دوققوز یاش:18، اون یاش:16، اون ایکی یاش:15، اون اوچ یاش:1.

 

·        یولداشلارین سایی شهر سیراسی ایله

تبریز:80 ، تهران:30، اورمو:20،  اردبیل:7 ، جلفا:5، بیناب:5 ، سولدوز:3 ، قاشقایی ائلی:3، ماراغا:3، کرج:3 ، زنجان:2، سرسکند:1، موغان:1.

 

·        اثرلرین نوعلری

سسلر:23 ،  ال یازیلاری:15، نقاشیلر:17

 

·        خوخانی لینک ائدن سیته ،وبلاقلار :50-دن آرتیق

·        خوخان ناغیلارین فایدالان سیته لر :10-دان آرتیق

·        خوخاندا یاییلان یازیلار 99

·        خوناندا یازیلان یوروملار:793

·        بیزیمکی لر(اثرلر) بؤلومونده یاییلان پستلار: 215

·        ایندیه کیمی سیته گؤروشچولرینین سایی:250 مین

·        ایشبیرلیک آپاردیغیمیز درگیلر: آفتاب آذربایجان(تبریز) 14 سای، آغری(اورمو) 8 سای.

بو ایکی ایلده بیزه امک وئرن بوتون یولداشلارا درین تشکورمو بیلدیریم اؤزللیکله: رسسامیمیز کؤنول رنجبر، ناغیللاریمیزی سسلندیرن خانیم لار تامای حسن زاده و آرزو مورادی، آفتاب آذربایجان(تبریز) و آغری(اورمو) درگیلرینده چالیشان یولداشلاریمیز و درگی بؤلومونون سوروملوسو آرزو مورادی، سیته یؤنتمنلییی اوختای نژاد محمد. تبریز روابط عمومی تامای حسن زاده،سسلی ناغیللاریمیزین شکلینی چکن ائلناز اؤدل، ائله ده جه ایلک گونلرده بیزه آرخا دایاق اولان اولکر داغ‌قیزی، ائل‌بیلمی مؤسسه‌سی، اؤزللیکله مهندس صرافی جنابلاری، مسعود سبزی و خانیم کبیری.

اولکراوجقار

آذربایجانلی اوشاقلار اوچون یئنی ایشلر، یئنی خبرلر

آذربایجانلی اوشاقلار اوچون یئنی ایشلر، یئنی خبرلر

اوزوموزه گلن ایلده، بالاجا خوخان ائکیپی «پیشگامان پژوهش‌مدار» نشریاتی‌ایله بیرلیکده، «کپنک» آدلی کتاب و فرهنگی محصوللار یایین سیستیمینی یولا سالاجاقلار. بو فرهنگی محصوللار سیستیمینی‌نین طریقیله آذربایجانین دؤرد بیر یانیندا، هم ده تهراندا یاشایان اوشاقلار مشترک اولماقلا، آیدا بیر دؤنه کیتاب، درگی و باشقا محصولاللاری پست واسطه‌سیله آلاجاقلار. بو طرحین آدی او سببدن کپنک قویولوبدور کی کیتابلار اوچا- اوچا، کپنکده مشترک اولان اوشاقلارا چاتاجاقلار. کپنک سیستیمی،  پیشگامان پژوهش مدار نشریاتینین چاپ ائتدیرییی اوشاق کتابلاری یا ائکیپین تائییدینه یئتیشن باشقا کتابلاری، عضو اوشاقلار اوچون گؤندره‌جکدیر. کپنک‌دن علاوه، بالاجا خوخان ائکیپی و پیشگامان پژوهش مدار نشریاتینین ایش بیرلییینده، باشقا فرهنگی محصوللار او جمله دن موزیکال خوخان ناغیللاری، کارتون دوبله سی، شهرلر درگیسی و … یارانماسی دا پلانلانمیشدیر.

کپنک بوتون آذربایجان سئور اوشاق یازیچی و شاعیرلرینی بو گروپو گوجلندیرمه‌یه دعوت ائدیر. بو طرح بو ایلکی دونیا آنا دیلی گونو ایله برابر، رسمی اولاراق اعلام ائدیلیر.

بالاجا خوخان ائکیپی و پیشگامان پژوهش مدار انتشاراتی،آرزی ائدیرلر آز بیر زامان کئچمه‌دن بیر چوخ آذربایجانلی اوشاقلار ، کپنک‌له دوستلوق سالسینلار. آیدا بیر دؤنه اوشاقلارینیزا آلدیغینیز چیپس، باستیل و دوندورمانین پولونو قیراغا قویسانیز، راحاتجاسینا بیر ایللیک اشتراک پولونو اؤده‌یه ‌بیله‌جک‌سینیز. هله لیک اشتراک وجهی اعلام اولونماییب، سیز پوللارینیزی حاضیرلایین، بیز ده کیتابلاری و دیگر محصوللاری حاضیرلاییریق.

یاخین گونلرده، اوشاقلارینیزین آدلارینی نئجه کپنکده یازدیرا بیله‌جه‌یینیزدن دانیشاجاغیق. بیزیم  یئنی اطلاعیه‌میزی گوزله‌یین. یاخین گونلرده و یئنی ایل باشلامازدان سیزینله دانیشاجاغیق.

-****

اوشاقلاریمیزا اللرینه آنا‌دیل لرینده حاضیرلانان کیتاب و دیگر محصوللاری چاتدیرماق، هامیمیزین بورجوموز دور.

***

اختصاصی و فردی اشتراکدان باشقا، اوشاق باغچالاری، مدرسه لر، مدنیت ائولری(فرهنگسرالار)، کیتاب ائولری و کیتاب ساتانلاردان دا گروهی اشتراک قبول اولوناجاقدیر.

آرتیق معلومات الده ائتمک اوچون باخین: xoxan.com

قارداشیم سۆلئیمان رۆستمه اتحاف

قارداشیم سۆلئیمان رۆستمه اتحاف

بیزی یاندیریر یامان آیریلیق،

بۇ داریخدیران دۇمان آیریلیق.

گؤزه سوْوورور سامان آیریلیق،

آمان آیریلیق، آمان آیریلیق!

بیر گؤزون آچار، بیر گؤزون یۇمار،

آرازی سرین گؤردوکده اۇمار،

خزری درین گؤردوکجه جۇمار،

قم دریاسینا جۇمان آیریلیق.

آمان آیریلیق، آمان آیریلیق!

آرازیم وۇرسون باش داشدان-داشا،

گؤز یاشی گرک باشلاردان آشا،

نئجه یاد اوْلسون قارداش قارداشا،

نه دین قانیر، نه ایمان آیریلیق،

آمان آیریلیق، آمان آیریلیق!

گؤیلرین گۆنون، آیین گیزله‌دیر،

اۇلدوز آختاریر، سایین گیزله‌دیر،

اوْخونو آتیر، یایین گیزله‌دیر،

قددیمی ائدیب کامان آیریلیق،

آمان آیریلیق، آمان آیریلیق!

آیریلیق گله بیر کرم قێلا،

بیر نئچه گۆن ده بیزدن آیریلا،

قم ده بیر بیزتک سۇیا سوْورولا،

هانی بیر بئله گۆمان، آیریلیق،

آمان آیریلیق، آمان آیریلیق!

دئدیم: آیریلیق، قێناما منی،

سنی گؤرموشم ائللر دۆشمنی،

یۆز مین کره دئ سێناسام سنی،

هامان آیریلیق، هامان آیریلیق،

آمان آیریلیق، آمان آیریلیق!

آمانسیز گؤزون یۇمان آیریلیق،

جان جێزلیغیندان اۇمان آیریلیق،

نه قملی یازار روْمان آیریلیق،

دیللره سالان دۇمان آیریلیق،

آمان آیریلیق، آمان آیریلیق!

سن اۇنوتسان دا، سۆلئیمان، منی،

اۇنوتمایاجاق شهریار سنی،

یاز گلر، بۆلبول قاپسار چمنی،

ایندیلیک سئوسین زامان آیریلیق،

آمان آیریلیق، آمان آیریلیق!

“دده‌‌ قورقود”ون 1300 ایللیگی

“دده‌‌ قورقود”ون 1300 ایللیگی

موناسیبتیله یازیلمیش شعر

خوش گلمیسن، دده‌‌م قورقود،

بیزه مین اوچ یوزیلیندن،

گلدین، گؤردونمو بیر اثر

گؤردویون اوغوز ائلیندن؟

اوغوز ائلی یاغمالانیب

اوغوزلارین یاتیر هله،

اوغوز آدی دامغالانیب

ناحاق قانلار باتیر هله.

قورولماییبدی چادیرلار

ایگید اوخو دوشن یئرده.

ایندی قاچقین حیاتی وار

ایگیدلر اؤتوشن یئرده.

بو دفعه‌‌ قادین آتدیغی

یایلیق دوشمه‌دی یئرینه.

قیصاص، قئیرت بویاتیدی

یامان ایشله‌دی درین..

یایلیق آتیلدی آرایا

پاپاقلار باشدان سوروشدو.

یئرینه دوشمه‌ین یایلیق

پاپاقسیز باشلارا دوشدو.

یاشاساق دا نیشانگاهدا

قئیرت بوزو سینان دئییل.

اوز توتما قوپوزا، دده‌‌

بو هنا او هنا دئییل.

باشچی باشدا اولمایاندا

خالق یولونو آذان اولار.

میللتی داردا اولانین

باشچیسی خان قازان اولار!

دیلیم گلمیر دئمه‌یه ده

دردیمیزی سن بؤله‌سن،

دؤنوب یاریم ائلدن، دده‌‌،

بوتؤو ائلینه گله‌سن!

******

بو دونیادا توتدوغوم یئر

ائنیم، اوزونوم قدر.

فقط دونیایا سیغمارام

درددن داغیلسام اگر!

latincə...

اولیم اولمامیش...

اولیم اولمامیش...

بیر دولو بولودام گؤیون اوزونده،

دردی اورک-اورک ییغیرام ائله.

یاغمیرام چمنه، داغا، مئشه‌یه،

یاغاندا ایچیمه یاغیرام ائله.

هله ده توشام من شرعین داشینا،

بؤهتانین، یالانین، شرعین داشینا.

قایتاریب چیرپارام هاچان باشینا

ایللردی ییغیرام، ییغیرام ائله.

نئجه قورتاراجاق سونو بو عصرین،

آخدی، توکنمه‌دی قانی بو عصرین.

سؤکولور، داغیلیر، تالانیر قصریم،

من دوروب باخیرام، باخیرام ائله.

صبر ائیله‌ییب صبری قییمتدن سالدیم،

دؤزه-دؤزه یاری-یاریمچیق قالدیم،

“الله” دئیه-دئیه اللهدان اولدوم

یئنه ده اللهی چاغیررام ائله.

آهلانان، آغلایان آنا منیمدی،

داغلانیب سینه‌سی یانان منیمدی،

قورورو تاپدانیب سینان منیمدی

اؤزگه یئرده کؤمک آختاررام ائله.

کؤرپم قونداغیندا گولله‌له‌نیبدی،

قانی بئشیگینده سیله‌له‌نیبدی.

قئیرتیم، ووقاریم سیلله‌له‌نیبدی،

غضبدن شیمشکتک چاخیرام ائله.

هایقیریرام، هاییم اؤزومه یئتمیر،

نالم اینیلتیدن او یانا گئتمیر،

اؤز ائلیمده الیم اؤزومه چاتمیر،

گؤزده قان-یاش اولوب آخیرام ائله.

اؤزگه‌دن گوج اومور جسارت، قئیرت،

حقیقت قیفیلدا، قاندالدا جورت،

اورگیمده دهشت، گؤزومده حئیرت

باخیب یانا-یانا یاخیللام ائله.

تورپاق وطن دئییل، شهیدی یوخسا،

روحو باغیشلاماز شهیدین یوخسا،

تورک اوغلو، ترپن دی، هایقیر دی، یوخسا

اولیم اولمامیش آخیرام ائله.

قبیریستانا گئدن گلین

قبیریستانا گئدن گلین

هارا بئله، هارا بئله

بو گئییمده، بو لیباسدا؟

نه تاپمیسان بوروندویون

قارا شالدا، قارا یاسدا؟

قم نه واختدان چؤرک اولوب؟!

آه چکنده سن دریندن -

دئییرم کی، بو ساعتجا

یئر قوپاجاق مئهوریندن.

اوتوز یاشین آنجاق اولار،

یانیندا دا بیر قیزین وار:

گؤزلرینده بیر یارالی،

بیر کؤرپه‌جه جئیران قمی!

اونا بئله تانیدیرسان

نشه دولو بو عالمی!

هئچ او کؤرپه اولماسایدی

بلکه سنی گؤرمزدیم من.

قبریستانی ائو ائتسن ده

قئیری معنا وئرمزدیم من.

هارا بئله؟ قبریستانا؟

بو گئدیشین سونو وارمی؟

بس، حیاتا گتیردیگین

او کؤرپجیک گوناهکارمی؟ -

اویون واختی، گولوش واختی،

باغ-باغچایا گئدیش واختی،

شکیللره باخان گونو،

تئلینه گول تاخان گونو

یانیب گئدیر: گؤزلری‌نین حیات عشقی،

سئوینج سسی دونوب گئدیر. -

من دئمیرم اونوداسان

واختسیز اؤلن ارینی سن.

حیاتین دا، اؤلومون ده

دئییرم بیل یئرینی سن.

گئت قبر اوسته، گئت، نه اولار؛

واختیندا گئت!

گؤز یاشی یوخ، چیچک آپار!

ارین قالخسا، سؤیله‌مزدی

سنه آغلا.

دئیردی کی، گئت یادیگار

اوشاغیمی یاخشی ساخلا!

گئت، سن اونا هئیکل قویدور،

اؤزونه ده عائله‌‌ قور.

گئت بیر داش قوی داش اوستونه،

چیخ دونیانین سئیرینه بیر،

آخی حیات اؤز ائویندن

قبریستانا یول دئییلدیر...

latincə...

الیمیزدن دئییملر

الیمیزدن دئییملر

الیمین ایچینده الین نه زریخ،

ائله بیل تانریدان گلن مکتوبدو.

اوردا یازیلیب کی، - منی دویمایان،

ابدی ظلمته، ظلمه محکومدو.

***

آنا قوجاغیندا کؤرپه ار کیمی،

اللرین الیمده ایستیله‌نیردی.

منی خیانتین ائله یاندیردی،

اوجاغی باشیمدا توستوله‌نیردی.

***

فیکری نه، سؤزو نه، دئسین، ائله‌سین،

الینین الیمه ایختییاری وار.

الین الیمده‌دی، یاتیر، دینجه‌لیر،

گؤره‌سن الیمدن بختییاری وار؟!

***

الیمه الینین ایشیغی دوشور،

اللریم بوی آتیر سنه سارماشا،

ان بؤیوک سؤزوموز اوغول، قیز اولا،

نوه‌لر قولومدان توتا، ساللاشا.

وزیرین موریدلری‌نین اونا خلوتنیسینلیگی ترک ائتمیی دفعه‌‌لرله تکلتف ائتمه‌لری

وزیرین موریدلری‌نین اونا خلوتنیسینلیگی ترک ائتمیی دفعه‌‌لرله تکلتف ائتمه‌لری

هامی اونا سؤیله‌دی، ائی فیتنه‌لی علامه،

بیراخ بو جفالاری، سؤیله بو نه هنغامه.

بیزی ایبتیدادان سن، نئجه قبول ائتمیسن،

سون قونوموزه قدر، مرحمت ائتمه‌لیسن.

زییفلیک، عاجیزلیگی، کاسیبلیقی بیلمیسن،

قدریمیزی بیلنسن، بیزه اؤیرت علمی سن.

دؤردایاقلیلار قدر، یوکه گوجوموز چاتماز،

ضعیف آداملاریق بیز، ایشه الیمیز یاتماز .

هر قوشون وار اؤز دنی، بیلیرلر اندازه‌نی؛

بوتون قوشلارین انچیر، اولا بیلرمی دنی؟

کؤرپه اوشاغا وئرسن، چؤرگی سود یئرینه،

او یازیق اوشاق اؤلر، دیریلمک عوضینه.

دیشلر چیخاندان سونرا، ایشلر دیَیشر بیردن،

اوشاق اؤزو- اؤزونه، چؤرک آختارار یئردن.

قانادی چیخمایان قوش، اوچا بیلمز هئچ زامان،

ییرتیجی پیشیکلرین، اووو اولاچاق هامان.

قاناد چیخاندان سونرا، اؤزو پرواز ائدچک،

زحمتسیز، اذیتسیز، فیشتیریقسیز اؤته‌جک.

سن اؤز گؤزل نیطقینله، دیوی ده سوسدورارسان،

اؤز شیرین صؤحبتینله، بیزه شنلیک قورارسان.

قولاقلار دا مست اولار، چونکی دانیشان سنسن،

صحرالار دا گؤیرر، چونکی سؤز قوشان سنسن.

سنینله سانکی رببین، مکانیندا اوجالیق،

ائی آی بورچو بیل سندن، نورونو آلیر بالیق.

سنسیز تانریمیز بیزه، بیلینمز بیر وارلیقدیر،

سنینله ائی ماه یئرلر، همیشه بیر نورلوقدور .

سنین آی اوزون ایله، قئجه هئچ واخت قارالماز،

گوندوزلر نورون یوخسا، یئر اوزو ایشیق اولماز.

سنینله تورپاقلارا، فلکدن ال اوزاتدیق،

سنسیز سمادا اولساق، سانکی تورپاغا چاتدیق.

سرعتی عظمتلی، اولار چرخی- فله‌یین،

معناصی بؤیوک اولار، حیاتین، گؤزللیگین.

گؤزلر سرعتلر یالنیز، جیسیملر اوچوندور بیل،

جیسیم معنا یانیندا، ایسیم کیمیدیر ائی دیل.

الله! الله! بیر نظر، سال بیزیم اوستوموزه،

نا اومود ائتمه بیزی، آلوو وئر توستوموزه .

بیر ده گۆل!

بیر ده گۆل!

«نه گؤزلسن!» ایکی کلمه سؤز دئدیم.

منیم کیمی بینوایا بیر ده گۆل!

اؤلدورسه‌لر یالان گلمز دیلیمه،

سن سالمیسان بۇ بلایا، بیر ده گۆل!

اێسمتینی اؤیرنمیشم گؤزوندن،

آ بختور، نۇر تؤکولور اۆزوندن،

الله حاقی اینجیمه‌رم سؤزوندن،

بۇ یاشیمدا بۇ سئودایا بیر ده گۆل

جانیم یامان اۆشوموشدو، ایسیندی،

سن خوْشبخت اوْل گۆلمه‌یینده بسیمدی.

دینله‌دیگیم نغمه‌دی، یا سسیندی؟!

رشید دئییر من قوْجایا بیر ده گۆل!

ائله بیلمه گۆلونج گۆنه قالمیشام،

بیر چیچه‌یین اترین آلدیم، سرخوْشام.

بیر جئیرانین کؤلگه‌سیندن وۇرموشام،

اذیتیم دؤندو زایا بیر ده گۆل،

تۆفنگ تپدی دۆشدوم چایا بیر ده گۆل.

latincə...

اومید

اومید

قورخمورام، دوشمنیم قوی مین-مین اولسون.

نئیله‌یر منه؟

شؤهرت سنین اولسون، آد سنین اولسون،

اومید وئر منه!..

اومید ایسته‌ییرم، من اومید آنجاق،

اومیدله قویارام داغی-داغ اوسته.

نه شؤهرت، نه منصب، نه دؤولت، نه وار.

ائی کؤنول، دونیادان سن اومید ایسته!..

اومید آرزولارم قیزیل ناخشیدیر.

دئیرلر، یئمکدن اومید یاخشیدیر.

دئیک دنیزده‌یم، ساحل گؤرونمور.

اومید منیمله‌دیر،

او، مندن دؤنمور.

ساحله جان آتیب چیرپینیر اورک.

دئ، نئیله‌یه‌جک

اوستومه شیغییان لپه‌لر منه؟

اومید وئر منه!

ایناملا اوجالتدیق آنامیز یئری،

بیز مؤحتاج اولمادیق دوستا، دوشمنه.

دمیر چپرلری، داش هاسارلاری

دیشیمله سؤکرم، اومید وئر منه!

حسرت ده، هیجران دا دئییل قورخولو.

اومیدله آچیلار هر عشقین یولو!

بیر ایل - بیر آن کیمی گؤرونر منه.

اومید وئر منه!

حسرت - وصال قدر خوش گلر منه،

اومید وئر منه!

اینام وئر منه!

یامان داریخیر،

سفره چیخیر

منیم کؤنلومده‌کی خیاللار یئنه،

بلدچی یئرینه اومید وئر منه.

دیلکلر اومیدله بیرگه دوغولسا،

یئرین ترکینده ده اوجالار اینسان.

آرزومو تاپماغا اومیدیم اولسا،

منزیل باشیندایام، یولا چیخمادان.

اومیدله قویارام داغی داغ اوسته.

ائی کؤنول، اؤزوندن سن اومید ایسته!..

مارت 1967

latincə

اولکر اوجقاردان ادبیاتیمیز اوچون داها بیر اوغور

1391-جی ایلین بهمن آیین 2-سینده فرانسیز دیلینده یوکسک ائییتیم آلمیش دَیرلی یازار شاعیر و چئویرمن یئنی ایشق اؤزو گؤرموش " یاساق سؤزجوک، یوخسا شعرسل دئوریم" آدلی کیتابینا "آراز" ادبی درنه‌یی طرفیندن اوغورلو بیر تانیتیم تؤرَنی کئچیریلدی.

تؤرَن چوخ باخیملاران اوغورلو و اولوملو ایدی آنجاق بیر نئچه بالاجا چاتیشمازلیقلار دا اولدوآنجاق یقین بو چاتیشمامازلیقلارایلک اولدوغوندان دولایی ایدی .اصلینده نظره گلیردی بعضی چیخیش ائدنلر تقدیمات یا تانیتیم گونون نه اولدوغونون فرقینده دئییلدیلر.تانیتیم گونو تنقید و سورغو گونوندن چوخ فرقلی اولوب ذاتاً بوگون ییغیشانلار کیتابی بَینمیش اولمالیدیرلار بو اوزدن تریبون آرخاسینا چیخیب:« من کیتابی اوخومامیشام انجاق بو فورصتدن فایدالانیرام نقد دونیامیزینان باریشام» یا « بیزیم ادبیات کؤرپه دی و نقده احتیاجیمیز یوخدو» کیمی جومله لری دئینلر اورایا گلمه‌مه‌لی ایدیلر. تاسوفله ادبی اجتماعیاتیمیزدا بو ایشین بیرینجی اولدوغو سبب اولموشدو آکادئمیک یئرلردن اوزاق دوشن یا یاشلاری آز اولان یولداشلار بئله یئرسیز جومله‌لری ایره‌لی سورسونلر یا جاوان بیر اوغلان الینده تسبئح تریبون آرخاسینا چیخیب قهوه ده دانیشیر کیمی سایمازیانا باخسین توپلوما.

بونلارلا بئله، تؤرَن، تؤرَنه قاتیلانلارین سایی هم ده اجرایی ایشلرباخیمیندان حرفه ای تؤرَن ایدی. آذربایجانیمیزین چوخلو دیرلی یازار آراشدیریجی ،شاعیر و ادبی تنقیدچیسینین  ایشتراکی اونو یوخاری سویه ده قاباغا آپارماقدایدی. بو تؤرَنین قازاندیغی اوغورو آپارچی سایین رسول بی اسمعیلیانین و آراز درنه یی نین باشقا چالیشانلارینا تبریک ائدیب بو گؤزل ایش اوچون امک وئردیکلری اوچوون تشکورمو بیلدیرمک ایستیرم و اونلارا داها اوغورلو ایشلر دیله ییرم.

ایلک چیخیش ائدن سایین حامد بَی احمدی، دانیشقلارین باشلانیشیندا کیتابدا گئدن بیر پارا چاتیشمامازلیقلاردان سؤز آچدی. نظره گلیر بو تنقیدلرین یئری تانیتیم تؤرَنی دئییل نقد اوتوروموندا اولابیلردی. حامد بَی کیتابین بوتون نظری مقدمه یه یییه(مالیک) اولمادیغیندان دانیشیب  فروید و لاکاندان سؤز آچدیغیندا چالیشدی ژولیا کریستوانی اونلارین کؤلگه‌سینده تانیتدیرسین. بو مقدمه کریستوایا هئچ مستقیم اشاره وئرمه‌دن بیتدی و اولکر اوجقارین مقدمه‌سیندن دقیق بیر بیلگی آلمایان اوخوجو بیر داها پایسیز قالدی.

سایین همت شهبازی چیخیشی چوخ اوغورلو و تام کیتابا و تؤرَن گؤره ایدی.سایین همت شهبازی بیلمیسل بیر دانیشقلا کیتاب قونوسون چوخ ساده دیلده آچیقلادی. بو دانیشیق اولوسلار آراسی تانیتیم تؤرَنلری‌نین اؤلچوده داها اویغون ایدی و البته همن مقدمه نقصیندن ده سؤز آچدی.

دوکتور حریری ادبیاتیا گنل اولاراق نقدین نئجه اولاجاغی حاقدا دانیشیب اونو بو کیتابدا یوخلادی، حریری جنابلارینا گؤره کیتابین اوچ گوجلو نقطه‌سی و بیر گوجسوز نقطه‌سی وار ایدی . بو گوجسوز نقطه اونون دیلی‌نین چتینلیی ایدی . دوکتور حریری اوخوجونون ساوادسیز اولدوغونو ووغولایاراق یازارین و اوخوجونون اورتاق دیله چاتماسینی ایسته دی.

سایین نادیر بَی  ازهری‌ نین ده چیخیشی اوغورلو هم ده یئرلی بیر چیخیش اولدو. بو چیخیش چوخ منظم و مئتودیک ایدی. نادیر بَی داها آرتیق کیتابین محتواسینا توخونموشدو و حرفه‌ای بیچیمده کیتابین اوخویوب دوشونمه‌سی و حتی تنقیدینه لازیم اولان بیر پارا سورغولارلا مئیدانا گلمیشدی.

حسن اومود اوغلو، توحید راعی ،جعفر بزرگ امین جنابلاری نین چیخیشلاری تام اولوملو اولا بیلمه دی البته بونلار ادبیاتمیزین دَیرلی شخصلری ساییلیرلا رو اونلارین چیخیشلارین اولموسوز اولدوغونون بللی نه‌دن‌لری و ار ایدی.

چیخیشلاردا اولکر خانیمین کیتابدا ایشلتدیگی دیله توخونولوب اونو آغیر سایدیلار آنجاق منجه اولکر خانیم ایشلتکدیگی دیل تکجه بو کیتابدا یوخ  بوتون یازیلاریندا چوخ اویغون بیر دیلدیر. بیلدیگینیز کیمی ادبی دیل دانیشق دیلله فرقلی دیر،ادبی دیلده ایشله دیلن سؤز گرک دانیشق دیلینده ایشلنن سؤزلردن فرقلی و داها یوکسک دوزئی ده سئچیله.ایندی بیز او قدر سؤزلریمیزی ایشلتمه‌میشیک اونلار آردان گئتمک ده دیر .بئله بیر کیتابی اوخویانین گؤزو گرک دانیشیق دیلینده اولماییب یالنیز ادبی دیلده ایشله نن بیر نئچه سؤزه توخونا .

چاتیشمازلیقلارین ان اؤنملی سی کیتابین قاباقجا تنقیدچیلرین اللرینه چاتماماغی ایدی . بو دا بئله بویوک بیر تؤرَنین ایلک تجروبه اولدوغوندان دولایی ایره‌لی گلیردی و اونو گله جک ده کی بئله گؤزل تؤرَنلر اوچون بیر آددیم سایماق اولار.

تؤرَنین سونوندا دَیرلی شاعیرلرمیزدن بیر نئچه شعر اوخویاندان سونرا اولکر خانیم چیخیش ائدیب قوناقلارا تشکور ائدیب، کیتابین مقدمه‌سی‌نین ناقص اولدوغو و نشر و مجوز مرحله‌لریندن دوغولان کیتابین تایپ موشکول‌لریندن سؤز آچیب گلن چاپلاردا اونلارین تصحیح اولاجاغینا سؤز وئردی و عین حالدا تکجه مکتوب نقدلر حاقدا دوشونوب جاوابلایا بیلر دئیه چیخیش ائدنلردن ایسته‌دی دئدیکلرینی مکتوب شکیلده اونون الینه چاتدیرسینلار.

آذربایجان باشقا بولگه‌لریندن ده بو تؤرَنه قاتیلمیشدیلار و بعضی دَیرلی ادبیاتچیلارمیزین یئری بوش گورونوردو.انشالله آراز دَرنه‌یی‌نین باشلادیغی بو گؤزل و اوغورلو ایش ادبیات ساحه‌سینده گؤره‌‌بیله‌جه ‌ییمیز اوغورلو ایشلرین باشلانقیجی اولسون و بئله ادبی –علمی تؤرَنلر گونو گوندن داها چوخ اولسون

من بالاجا فرهادیدیم اۇشاقکن،

بیرینجی حیصه‌‌

من بالاجا فرهادیدیم اۇشاقکن،

گؤزللیکلری قانمیشدیم.

ائله بیل سۆددن یانمیشدیم.

ایلک ازلدن، تیفیل من.

کؤورک اۆرگیم کؤکلو ایدی

ساز تئللریندن ده.

میضرابی، گؤزللیکلر.

چالیناردی

سێز-سێز سێزلداردی

گؤزللیک گؤرنده!...

تۆکلریم بیز – بیز دۇراردی،

اۆرگیم چابالاردی.

باغریمی آلیشدیران

دؤیونتولرین

اوْدو، آلوْوو

پار - پار پاریلداردی،

گؤزلریمین یاشیندا.

بیله‌سن نه بوْیدا ایدی

اوْ زامان

بۇ بیجکمان

بۇ “فرهاد”

بد ذات!

8-9 یاشیندا!

دۆنیادا هر نَیین،

حئیوانین، اینسانین

گؤزه‌لین سئوردیم

گؤزللردن اؤتور اؤلردیم.

“گۆل اندام”دان اؤتور لاپ چوْخ،

هددی، حسابی یوْخ!

آخی اوْ،

گؤزللرین گؤزه‌لی ایدی!.

هله عشقی، محبتی تانیمازدان اول،

عشقیمین ازلی ایدی!

گۆلر اۆزلو،

ایری گؤزلو،

آغ قاباغی آی کیمی،

قارا قاشلاری یای کیمی،

اتلی – جانلی،

ایستی قانلی،

دیلبر بیر قێز ایدی گۆل اندام.

کیم بیلیر؟

16 - 17 یاشیندا!

شیرین گۆلوشلری،

گؤزل کهلیک کیمی

قاققیلدایاندا آغاریشان

صدف دیشلری،

باشا دۆشه بیلمه‌دیگیم جازیبه ایله

تیترشن قابا دؤشلری،

قارا داشا دیَسه دلیب کئچن،

سۆزگون باخیشلاری.

سالخیم – سالخیم،

وۇرغون اۆرکلری

هؤروکلرینه هؤرولن

ایپک تئللری‌نین

قێوریشلاری

چێرپیندیراردی کؤرپه قلبیمی،

قۇش اۆرگی کیمی،

سۇ اۆزونده‌کی کیمی.

پالتار یۇماغا گلردی هر گۆن

چای قێراغینا،

منیم اوْیناغیما.

آرخاسیندا دۆیونلردی

گۆل پێتالی،

قێرمیزی چادیراسی‌نین اۆجلارینی.

دیزه قدر چێرمالاردی،

یوْل – یوْل یۇسیفی شالوارینی،

هم ده دیرسکدن یۇخاری

ساری کؤینیی‌نین

قوْللارینی.

شاققیلداییب کئچن

بۆلول سۇلارین ایچینده

آغ بیلکلری،

مرمر اللری

پالتارلاری اؤوکله‌دیکجه

اۆزونه داغیلان تئللری

لاله اۆرگی‌نین کاکیلی ایدی دییه‌سن!

اوْ، تئز - تئز

ایشدن چکردی اللرینی،

آغ اۆزونه داغیلمیش تئللرینی،

گۆموش سێرقالی قۇلقلاری‌نین

دالینا وئرردی.

گلدیک دوْداقلاری،

قێرمیزی گۆلساباه قوْنچاسی کیمی

گۆلومسردی.

من مفتون – مفتون،

اوْنا باخدیقجان

فۆسونکار ادالارینا

سای سالدیقجان

اوْ، ممنوعن – ممنوعن

گۆلش قاباق

آلنین قێریشدیراراق

اۆزومه باخاردی.

دۇزلو گۆلوشلرین،

گۆل چلنگی کیمی،

اۆستومه آتاردی.

تاختا دَ‌ییرمانیمی

چوْخ زامان

سۇیون عکس آخیشی ایله،

آشاغیدان یۇخارییا

فێرلادا – فێرلادا

لاپ یاخینلاشاردیم اوْنا.

اۆزوم،

سۆنبول شلاله‌سی کیمی چاغلایان،

اسمر بوْغازینا آغنایان،

قێوریم تئللرینه سۆرتوشردی.

سینم،

تؤوور، تؤوور تؤوشردی.

ساچلاریندان قوْورولو بۇغدانین،

چادیراسیندان سحر آیازی‌نین

عطیری گلردی.

هوالار پاییزلادیقجان،

سۇلار سوْیودوقجان،

یانیب یاخیلماغا باشلادیم.

من ده گۆل اندام ایلن.

سئوردیم، - سؤیله‌دیگیم

سئوگیلی اللر

سێر – سێرالی سۇلارین ایچینده

نه حاللار، نه حاللار کئچیرردی.

بۇلاق اوْتو یارپاقلاری کیمی،

گؤم – گؤی گؤیرردی!

دقیقه‌دن بیر قێزجیغازین

بۆکوکلری آراسیندا سێخیلان،

دوْنوق اللرین زوْققولتوسونو،

یانیب، یاخیلان

فنار کیمی

یێغیلیب، آچیلان

آلنی‌نین قێریشلاریندا

دۆیونله‌نیب آچیلان

قارا قاشلاریندا اوْخودوغوم کیمی،

یانار اۆرگیمین

باشیندا دا دۇیاردیم.

ایلان وۇران آداما اوْخشاردیم.

نه ائده بیلردیم...

اوْ ایل قێش اۇزونو

بۆتون رؤیالاریمی،

فیکیر دۆنیالاریمی،

قاپسادی، گۆل اندامین

بۇ ایشکنجه‌لی حیاتی.

مگر یۇخلاردیم؟

قێشین ساکیت گئجه‌لرینده،

ساعتلار، ساعتلار،

آییق، گؤز آچیق

قالاردیم!

نئیلردیم؟

گؤزلریمی دامجیلارین

هێسلی پنجه‌رمیزین

قارالمیش قێراقلارینا

رسم ائتدیگی جۆر به جۆر ناخیشلارا

زیللردیم،

نقشه‌لر چکردیم،

پلانلار تؤکردیم.

چایا قالخان دوْلایی‌نین

کێران سینه‌سینده

بیر کؤهول چاپا بیله‌رممی؟

کؤهولون ایچریسینده

بیر گؤلمش یاپا بیله‌رممی؟

یئر آلتی اێلیق سۇلاردان

بیر بۇلاق چێخاریب،

بۇ گؤلمشه بۇراخا بیله‌رممی؟

اوْیونجاقلاریمین ایچینده

جمع – جۆمهور

کیچیک بیر بئلچه،

چکیج یئرینه ایشلتدیگیم

باشی ایری بیر دمیر

بیر ده بیر اۇزون شیشه

گۆمانیم گلیردی

هر گئجه - هر گئجه،

خیالیمدا،

بۇ قازما آلتلریمی

ایشه سالاردیم.

آنامین ناغیللاریندا

ائشیتدیگیم “فرهاد” کیمی

قێرمیزی کێرانلاری

پنیر تکین کسیب چاپاردیم.

سوْنرا دا

بیلمیرم گئجه‌نین نه واختلاریندا

شیرین رؤیالاریملا

قۇجاقلاشیب یاتاردیم.

مسیحی

کیتابین آدی : مسیحی

کیتابین بیچیمی  : جاوا

ساپورت ائدن قولاقجیقلار (موبایل تلفونلاری): بوتون قولاقجیقلاری کی جاوا یازیلیمین آچا بیلر.

اولچوسو : 226 کیلو بایت

ایندیر(دانلود)

یان، ائی گونش!

یان، ائی گونش!

سن ائی آزادلیغین ایلکین مشعلی،
بیزیم بو یئرلره قوناق گله‌لی.
چیخارتدین ظلمتدن اینسان اوغلونو،
او ائهتیراس دولو، او حسرت دولو.
اورکلر اوجالمیش ایندی داغ کیمی،
سن ائی گؤی اوزونده بیر بایراق کیمی.
باشینی ساللاییب دایانان گونش،
بیلیرم سنده‌کی او اود، او آتش.
مین یانان اورکدن قوپوب بیر آندا،
آلیشیب یانمیشدیر او آسیماندا.
نورون یئر اوزونه وئردیکجه زیینت،
تک سنه، تک سنه اینانمیش فقط.
آزادلیق تشنه‌سی - بو مظلوم اینسان،
دئمیش کی: “ائی گونش بیزدن اولوسان.
یان، بو اؤلکمیزین قلبینی قیزدیر.
یان، بو ایلک عشقیمیز، سون آرزوموزدور:
ائلین باشی اوسته گونش سؤنمه‌سین.
تاریخین تکری گئری دؤنمه‌سین،
بیر ده قاییتماسین نه هیجران، نه قم.
یان، سنین عشقینله بو یئر، بو عالم
چیخسین پنجه‌سیندن قارانلیقلارین،
یان کی، سینه‌سینی بورانلیقلارین
سنین شؤله‌لرین اریده‌جک، یان.
یان، نورا قرق اولسون تورپاق، آسیمان...”
سن ائی آزادلیغین ایلکین مشه‌لی،
بیزیم بو یئرلرین اوزو گوله‌لی
آنجاق بیرجه ایلدیر، بو کی، بللیدیر.
آدین کؤنلوموزه  بیر تسللیدیر.
قلبی‌نین اودو وار تورپاغینیزدا،
سنین شفقیندیر بایراغیمیزدا،
او آلیشیب یانان نه رنگ، نه قاندیر،
ایندی اؤزگه دؤوران، اؤزگه زاماندیر،
نه آیریلیق واردیر، نه ده کی زیندان.
یان ایندی، ائی گونش، سن یاخیندا یان.
او گونلر، او آیلار بیزدن اوزاقدیر،
یان، آزادلیق سؤزو بیزه بایراقدیر...
اردبیل، 1946

 
  • یارپاقلارین سایی :90
  • ...  
  • 3  
  • 4  
  • 5  
  • 6  
  • 7  
  • 8  
  • 9  
  • ...  
 

وبلاقا گؤره

بو دیل دنیزدی سیزین تک صدفده اینجیسی وار
قیزیلدی سیزده اولان اوزگه‌نین اگر میسی وار
دئسزکی اودلو دیاردی بیزه وطن یاراشار
بیزیم اوجاقلارین آنجاق کور ائیله‌ین هیسی وار
"عقیل"
وبلاق مودیری : نژادمحمد

سون یازیلار

آختارماق

یازارلار

Page Rank بالاجا خوخان آذربایجان تورکجه سینده ایسلام دینی و قرآن کریم